Po Filemu, Susulu
Ou te fia faamatalaina ni tala se lua o le mea na tupu ia te a’u o loo i ai pea i lo’u mafaufau mo le tele o tausaga ma e oo lava i le taimi nei o loo aoao mai ia te a’u ni lesona ou te manaomia.
O le [tala] muamua na tupu ina ua 6 o’u tausaga. O le matou taitai pese i le Uarota 5 a Hunter o Sister Beverly Whitley. Ua ou iloaina nei masalo sa lei oo i le 40 tausaga lona matua, ae sa i ai sana fanau talavou ma sa foliga matuai matutua lava ma atamamai ia i matou i le Peraimeri feoloolo. Sa fiafia o ia ma taulimaina i matou e pei o ni tagata matutua laiti, ma sa matou fiafia i ai. Sa matou faamemelo ia te ia ma taumafai e faafiafia o ia. Na te fai mai ia i matou e mafai ona matou pepese leotetele ina ia mafai ona lagonaina i matou e o matou matua mai le isi potu. E le o le feei—ae o le pepese moni lava! Ma sa matou pepese ma o matou loto atoa! Sa ia aoaoina foi ia i matou se pese mai le tusipese a tagata matutua, ma fai mai ua lava lo matou matutua o ni tagata musika e mafai ai ona tauloto ia upu faigata. Ma sa ia faamatala mai uiga uma o upu ina ia matou malamalama i ai. Sa ia aoaoina i matou e faapea e tofu uma lava pese ma se feau taua mo na o i tatou ma, a tatou mafaufau e uiga i upu, e mafai ona tatou maua le feau lea e faatatau mo o tatou lava olaga.
O lena Kerisimasi, sa ou taumafai e faaaoga mea sa aoao mai e Sister Whitley ia i matou, ma sa ou aoaoina fuaiupu uma o le pese “Po Filemu.” Ia, ou te faatoese muamua atu i le au faaliliu ona e taufaasee le mea lenei. I le avea ai ma se 6 tausaga, sa ou mafaufau mamafa lava e uiga i upu i le fuaiupu lona tolu, ae ou te lei malamalama i faailogatusi. Nai lo le usuina “Alo o le Atua, ua susulu,” e pei o Iesu o le malamalama lea e tafe mai le alofa mama, na ou iloaina o loo faapea mai o le Alo o le Atua e fiafia i le malamalama mama—Na te faamemelo i soo se mea e fai mai le malamalama mama. O le mafaufau faapei o Sister Whitley, sa ou taumafai pe faapefea ona ou “susulu” foi e pei ona faia e Iesu.
O le [tala] lona lua na tupu ina ua 9 o’u tausaga. E pei o le toatele o tamaiti i lena matua, sa fai ni a’u lesona piano. Ou te le talenia tele, ma, atonu ina ia faamalosiau ia te a’u, na fesili mai ai le matou epikopo pe mafai ona ou taina se pese Kerisimasi i le sauniga faamanatuga ao lumanai ai le Kerisimasi. Sa tonu ia te a’u ou te taina le “Po Filemu.” Sa fesoasoani mai lo’u faiaoga ia ou saunia. Na faalogologo o’u matua ia te a’u ao taina pe faa 100 i le matou piano tu lanu uliuli i le potu i lalo. Sa ta’ua e se tasi faapea atonu e mafai ona ou taulotoina le pese ma aua le faaaogaina le musika, ae sa ou matua popole lava e uiga i le tata i luma o tagata uma o lau uarota ma o lea sa le mafai ai ona ou taulotoina le musika. Peitai, sa i ai sa’u fuafuaga. O le a ou alu ma ave le musika, ae nai lo le tuuina i luga o le piano, o le a tuu i luga o o’u vae. E mafai ona ou tilotilo i o’u lima ma vaai ai i le musika, ma e ono foliga ai ua ou taulotoina le musika. Sa matagofie le lelei o le fuafuaga mo le 20 sekone. Sa ou faataatiaina le musika i luga o lo’u sakete Kerisimasi tafeta, ma ao amata ona tata, sa maseesee tele le ie o le sakete ma i le ogatotonu o le fuaiupu muamua, na see ese ai le musika mai lo’u sakete ma leiloa atoa atu ai i lalo o le piano. Sa ou le mautonu. Sa leai se auala e aumai ai le musika, ma sa pogisa lo’u mafaufau. Sa u o’u nifo ma taumafai e fai le mea sili na ou mafaia. Sa matuai faaletonu lava.
Sa ou taina ma le tiga ia nota sese, ma sa mafai ona ou vaai atu i tagata o loo faamimigi mai i le potopotoga. Sa ou tautevateva i le fuaiupu lona lua. Sa ou faamisia ma le atamai le fuaiupu tolu ma faatopetope atu loa i le auala savali ma foliga mumu o loo taumafai e aua nei tagi. Na musumusu mai o’u matua, “O le a le mea na tupu? E te iloa lelei lava le pese.” Sa le mafai ona ou faatali e aluese mai le lotu. Ou te lei fia vaai pe talanoa i soo se tasi; ua ou ma ma maasiasi. Ina ua maea le sauniga, sa agai mai lo’u faiaoga matua o le Aoga Sa, o Sister Alma Heaton ia te a’u. Sa ou taumafai e aloese mai ia te ia, peitai sa ia uuina lo’u lima. Nai lo le fai mai sa lelei [la’u ta], aua e iloa lelei lava e tagata uma o se tala pepelo, ae sa ia fai se tala o le a ou manatuaina pea mo lo’u olaga atoa. Sa ia fai mai, “Sharon, e le afaina pe na faapei le taunuuga. Na iloa e tagata le tele o au taumafaiga na tuu i ai, ma e matou te alolofa lava ia te oe pe e te mafai ona taina le piano pe leai.”
O le mea moni lea. Ae e lei tiga e pei ona ou mafaufauina. O le mea moni sa ou galue malosi, ma sa latou alolofa ia te a’u e ui lava sa le mafai ona ou taina le piano. Sa ou tuuina atu sina ataata sili ona laitiiti ma sa ia fusi a’u i se fusi faatina matua ma sa vave lava ona lelei mea uma.
E lei faia e Beverly Whitley ma Alma Heaton ni mea ofoofogia. La te lei tusia ni mea i a la api talaaga i lena po. E leai se tasi o la aiga na iloa nei tala. Sa na o le la aoaoina o fanau laiti i le auala e pepese ai ma le auala ia malamalama ai i le talalelei. O le a se mea na sili atu ona faigofie? Peitai e leai. A e fesilii mai ia te a’u po o a foliga o se tagata e “fiafia i le malamalama mama,” e foliga pei o Beverly Whitley. E foliga pei o Alma Heaton. Na mafai e i laua uma ona iloa le “malamalama mama” o se teineitiiti o loo taumafai i le mea sili na te mafaia ma alofa ai ia te ia, e tusa lava pe lei atoatoa.
E faapena lo tatou Tama Faalelagi. Na te silasila mai ia i tatou, o Ana fanau iti, o loo taumafai. E le manuia i taimi uma a tatou taumafaiga, ae ua Ia silafia lo tatou galulue malosi—o nisi taimi i le u ai o o tatou nifo ma tauivi ma se faafitauli—ma e alofa mai o Ia ia i tatou. Mo o tatou le ogatusa uma, sese le fati, ma le le iloaina o le musika, na Ia auina mai ai Lona Alo lalelei e Toatasi, o le e fiafia i le malamalama mama. O le a faaleleia e Iesu Keriso soo se nota leaga ma faasao soo se le ogatusa pe afai tatou te liliu atu ia te Ia ma fesili atu mo Lana fesoasoani. Ona o le fanau mai, Togiola, ma le maliu o Iesu Keriso ua mafai ai nei ona tatou “momoe filemu uma.”1
Oka so’u fiafia mo lenei vaitau o le Ekalesia e usu ai pese e i ai ni feau taua mai le Faaola o le lalolagi mo i latou o loto nutimomoia. Ou te folafola atu ia te outou le mea lava e tasi na folafola mai e Sister Whitley i le Peraimeri. A e mafaufau e uiga i upu e te usuina i lenei vaitau, o le a e maua se feau paia ua mamanuina faapitoa lava mo oe lea o le a siitia ma faamafanafana ai oe. O se tasi lenei ua mauaina a’u i lenei vaitau o le Kerisimasi. Sa ou popole lava e uiga i tagata e le mafai ona oo atu i ai la tatou auaunaga alofa ma le auala e faafaigata ai e malo mo i tatou ona oo atu i tuagane ma uso o e o mafatia. Ma i le taeao nei i le Aualofa, sa ou gauai atu ai i le pese sa matou lagiina:
Ia e faamanuia mai i fanau uma,
Ma ia saunia matou ia tatou toe mafuta.2
Ou te molimau atu e fiafia le Alo o le Atua i le malamalama mama; o Ia o le malamalama mama. I le suafa, o Iesu Keriso, amene.