O Meaalofa e Fa ua Ofo mai e Iesu Keriso ia te Oe
O’u uso e ma tuafafine, e maeu lenei vaitau ofoofogia! Tatou te fiafia i le viiga, “Outou Faamaoni, O Mai”1 ma o mai ma le naunautai e faamemelo ia te Ia: Iesu le Keriso—lena pepe e tasi o Peteleema—”le Ieova Sili o le Feagaiga Tuai [ma le] Mesia o le Feagaiga Fou.”2
I le po nei se’i o tatou mafaufau faatasi i faamanuiaga lea e oo mai ia i tatou ao tatou taulai atu i le olaga, misiona, aoaoga faavae, ma le Togiola o le Alii o Iesu Keriso. Ou te valaaulia outou, e pei ona faia e le Tupu o Peniamina i ona aso, ina ia “manatunatu i le tulaga manuia ma le fiafia o i latou o e e tausi i poloaiga a le Atua.” O lena faamanuiaga e mo i tatou iinei ma i le taimi lenei, ae e faaopoopo i ai o le folafolaga mulimuli o “le fiafia e lē gata.”3 Sa ta’ua manino, e maua e i latou e mulimuli ia Iesu Keriso le avanoa e lagona ai le olioli e lemafaamatalaina e faavavau.
Na faamanatu mai ia te a’u lenei mea i le isi aso ina ua ma feiloai ma se agelu e igoa ia Litia. O lenei agelu sa le’i laei i se ofu paepae, ae sa ia faafaigofie mo i matou i lona susu mai i lo’u ofisa. E 12 tausaga o Litia. Sa ta’u mai ia te a’u sa mafatia o ia mai se ituaiga o kanesa o le faiai matautia ma e le taatele.4 Sa i ai sona foliga agelu ma malualii e sili atu nai lo lona matua na i ai. A o matou talanoa e uiga i lona olaga ma mea o loo taoto i ona luma atu, sa to’afimalie o ia ma filemu. Ina ua ou fesili atu i ai pe i ai sana fesili, sa vave ona ia tali mai, “E faape’i le lagi?” Sa taitai atu lenei fesili i se talanoaga loloto e uiga i le faamoemoega o le olaga ma faamanuiaga ua ofo mai e lo tatou Tama Faalelagi ma Lona Alo Pele ia i latou o e faamamaluina ma mulimuli ia i La’ua.
Sa uunaia loloto a’u e le faatuatua o Litia ma lona aiga! E ui i le feagai ai ma se luitau tuga tele e tusa ma lenei olaga faalelalolagi, ae ua faatumulia Litia i le faatuatua. Ua i ai sona vaaiga e faavavau. Ua ia iloa e alofa le Alii ia te ia ma o le a tausia o ia. Ua faatumulia lona aiga tuuto i lea lava filemu e tasi ma le toafimalie lea e na o le faatuatua i le Alii e mafai ona aumaia.
O le moomooga o Litia o le feiloai lea i le Peresitene o le Ekalesia a le Alii, ae o ona manaoga sa sili atu ona loloto nai lo se isi lava aafiaga se tasi iinei i le olaga faaletino. O lona manaoga sili ona loloto o le faatasi lea ma lona aiga e faavavau i le malo selesitila. Ua aofia ai i lena lona manao ia faatasi pea ma le Tama Faalelagi ma Iesu foi.
O le mea moni, o o tatou manaoga e uunaiaina i tatou taitoatasi i auala loloto, e le na o iinei ma le taimi nei ae o talaatu. Mafaufau i le taua tele o leni faamatalaga mai ia Alema: “E tuu mai e [le Alii] i tagata e tusa ma o latou manao.”5
O le manao e taua i lenei vaitau o le foai atu o meaalofa, pe a tatou mafaufau tonu i manaoga o i latou tatou te alolofa i ai. I le taimi o lenei vaitau, ou te valaaulia outou ia mafaufau i o outou lava manaoga. O a ni ou manaoga sili ona loloto? O le a moni a le mea e te manao e lagonaina ma ausia i lenei olaga? E te manao moni lava e avea atili pea e pei o Iesu Keriso? E te manao moni lava e ola faatasi ma le Tama Faalelagi ma faatasi ma lou aiga e faavavau ma ola e pei ona soifua o Ia?
Afai o lea, e manaomia la ona e taliaina le tele o meaalofa ua ofo mai e le Alii e fesoasoani ai ia te oe ma a’u i le taimi o lo tatou olaga faataitai i la le tino nei. Se’i o tatou taulai atu i meaalofa e fa o meaalofa na foai mai e Iesu Keriso i tagata uma o loo loto e taliaina.6
Muamua, na Ia foai mai ia te oe ma a’u se gafatia le tapulaaina e alofa atu. Ua aofia i lena gafatia le alofa atu i e e le alofaina ma i latou e le gata e lealolofa ia te oe ae o loo sauaina oe i le taimi nei ma faaaogaina oe.7
Faatasi ma le fesoasoani a le Faaola, e mafai ai ona tatou aoao e alolofa atu e pei ona sa Ia alofa mai. E ono manaomia ai se suiga o le loto—aemaise lava le faamalūlūina o o tatou loto—e pei ona aoao mai ai e le Faaola le auala e tausia moni ai lava e le tasi le isi. O’u uso e ma tuafafine pele, e mafai moni lava ona tatou auauna atu i le ala a le Alii pe a tatou taliaina Lana meaalofa o le alofa.
Ōle atu mo le fesoasoani a le Alii e alofa atu ai ia i latou ua Ia manaomia oe e te alofa atu i ai, e aofia ai ia i latou o ē e le faigofie i taimi uma ona lagonaina le alofa. E ono manaomia foi ona e ōle atu i le Atua mo Ana agelu e savavali faatasi ma oe i nofoaga e te le o fia manao e te savali ai i le taimi nei.8
O se meaalofa lona lua ua ofo mai e le Faaola ia te oe o le gafatia e faamagalo atu ai. E ala i Lana Togiola le i’u, e mafai ai ona e faamagalo atu ia i latou o ē faatiga ia te oe ma ē atonu latou te lē taliaina lava le tiutetauave mo lo latou agaleaga ia te oe.
E masani lava ona faigofie ona faamagalo atu i le tasi o loo saili ma le faamaoni ma le lotomaualalo i lau faamagaloga. Ae o le a faamatuu atu e le Faaola ia te oe le gafatia e faamagalo atu i soo se tasi na agaleaga ia te oe i soo se auala. Ona le toe mafai lea e a latou faatinoga tiga ona avea ma avega mamafa i lou agaga.
O se meaalofa lona tolu mai le Faaola o le salamo. O lenei meaalofa e le o malamalama lelei i ai i taimi uma. E pei ona outou silafia, o le Feagaiga Fou na muai tusiaina i le gagana Eleni. I fuaitau o loo valaau atu ai le Faaola i tagata ia salamo, o le upu ua faaliliuina o le “salamo” o le faaupuga Eleni o le metanoeo9 O veape mamana tele lenei faaEleni. O le muai fasi upu (prefix) o le meta o lona uiga o le “sui.” Tatou te faaaogaina foi lena muai fasi upu i le Igilisi. Mo se faataitaiga, o le upu metamofphosis o lona uiga o le “suia i le ituaiga po o le fuaitino.” O le fasi upu mulia’i (suffix) o le noeo e fesootai ma le upu Eleni lea o lona uiga o le “mafaufau.”10 E fesootai foi ma isi upu Eleni e uiga foi ma le “malamalama,”11 “agaga,”12 ma le mānāva.”13
O mafai ona tatou amata vaaia le lautele ma le loloto le mea o loo foai mai e le Alii ia i tatou pe a Ia ofo maia le meaalofa o le salamo? O loo Ia valaaulia i tatou ia suia o tatou mafaufau, lo tatou malamalama, o tatou agaga, e oo lava i lo tatou mānāva. Mo se faataitaiga, pe a tatou salamo, tatou te manava ma le lotofaafetai i le Atua, o le e tuu maia ia i tatou le manava mai lea aso i lea aso.14 Ma tatou te mananao foi ia faaaoga lena manava e auauna atu ai ia te Ia ma Ana fanau. O le salamo o se meaalofa ofoofogia. O se faagasologa e le tatau ona matatau i ai. O se meaalofa mo i tatou ia maua ma le olioli ma ia faaaoga—ia taliaina—i lea aso ma lea aso a o tatou saili atu ia avea atili e faapei o lo tatou Faaola.
Sa maua e le tamā o le Tupu o Lamonae sina vaaiga o mea na taoto i luma atu mo i latou o ē na talitonu ia Keriso ma mulimuli ia te Ia. Na ia tautino atu o le a ia lafoaiese ana agasala uma mo le avanoa e iloa ai le Alii.15 O le salamo moni e le o se mea e faatasi ona tupu. O se avanoa e le muta. E taua tele i le alualu i luma ma le mauaina o le filemu o le mafaufau, mafanafana, ma le olioli.
O se meaalofa lona fa mai lo tatou Faaola o se folafolaga moni lava—o se folafolaga o le ola e faavavau. E le o lona uiga e tau na o na ola mo se taimi umi, umi, umi lava. O le a ola uma tagata e faavavau pe a mavae le oti, e tusa lava po o le a le malo o le mamalu e ono agavaa ai i latou. O le a toetutu tagata uma ma maua le tino ola pea. Ae o le ola e faavavau e matua silisili atu nai lo o se atofaga o taimi. O le ola e faavavau o le ituaiga ma le tulaga silisili o le olaga o loo soifua ai le Tama Faalelagi ma Lona Alo Pele. Pe a ofo mai e le Tama ia i tatou le ola e faavavau, o loo Ia fetalai mai i le aano atoa, “Afai tou te filifili e mulimuli i lo’u Atalii—afai o lou manao o le avea moni e faapei o Ia—ona oo mai lea o le taimi tou te ola ai e pei ona ma ola ai ma pulefaamalumalu i lalolagi ma malo e pei ona ma faia.”
O nei meaalofa tulagaese e fa o le a aumaia atili ia i tatou le olioli sili pe a tatou taliaina ia meaalofa. Na mafai ona maua ona na afio mai lalo Ieova i le lalolagi e avea ma Iesu le pepe. Na soifua mai o Ia i se Tama tino ola pea ma se tina faalelalolagi nei. Na soifua mai o Ia i Peteleema i lalo o tulaga sili ona faatauvaa o tulaga uma. O Lona soifua mai paia na muai vaaia e perofeta talu mai aso o Atamu. O Iesu Keriso o le meaalofa le mafaatusalia lea a le Atua—o le meaalofa a le Tama i Ana fanau uma.16 Le soifua mai lea tatou te faamanatuina ma le olioli i vaitau taitasi o le Kerisimasi.
Faatasi ma o tatou mafaufauga ma lagona e matua taulai atu i le Faaola o le lalolagi, o le a la le mea e manaomia ona tatou faia e maua ai nei meaalofa ua ofo mai ia i tatou ma le loto naunau e Iesu Keriso? O le a le ki i le alofa e pei ona Ia alofa mai, faamagalo atu e pei ona Ia faamagalo mai, salamo ia avea atili e faapei o Ia, ma le ola ai mulimuli ane faatasi ma Ia ma lo tatou Tama Faalelagi?
O le ki o le osia ma le tausia o feagaiga paia. Tatou te filifili e ola i luga o le ala o feagaiga a le Alii ma tumau ai iina. E le o se auala faigata. O le auala lea i le olioli i lenei olaga ma le ola e faavavau ma talaatu.
Ou uso e ma tuafafine, o o’u manaoga sili ona loloto e mo fanau uma a le Tama Faalelagi ia maua le avanoa e faalogo ai i le talalelei a Iesu Keriso ma gauai i Ana aoaoga ma mo Isaraelu ia faapotopotoina e pei ona folafola mai i nei aso e gata ai. Ou te tatalo o le a tatou talitonu ma mauaina le alofa o le Faaola mo i tatou taitoatasi. O Lona alofa le i’u ma le atoatoa na uunaia o Ia e togiola oe ma a’u. O lena meaalofa—Lana Togiola—e faatagaina ai isi Ana meaalofa uma e avea ma tatou.
I se aso o i luma—i lena Meleniuma lea tatou te sauniuni atu ai nei—”o le a tootutuli ai tulivae uma ma ta’uta’u atu e laulaufaiva uma”17 o Iesu o le Keriso. Ma e le na o le Aufaipese ofoofogia a le Tapeneko i le Lotoa o le Malumalu o loo pepese i le “Aleluia.”18 O tagata uma ua filifili e mulimuli ia Iesu Keriso o le a pepese ma alalaga: “Aleluia: aua ua nofotupu le Alii le Atua malosi aoao.”19 “O malo o lenei lalolagi e avea ma malo a lo tatou Alii, ma lona Keriso; ma o le a nofotupu o ia e faavavau, faavavau lava,”20 “O le Tupu o tupu, ma le Alii o alii.”21
Ou te molimau atu o loo soifua le Atua. O Iesu o le Keriso—le Mesia. O Lana Ekalesia lenei, lea o loo Ia taitaia e ala i Ana perofeta. Ma le lotomaualalo, matou te tuu atu ai Ana faamanuiaga i o outou luga taitoatasi, e aofia ai le manao ma le gafatia e talia ai meaalofa uma ua ofo mai e le Faaola ia te outou, i le suafa o Iesu Keriso, amene.