Dua na iSolisoli nei Tamada: Ciqomi se Vakanadakui
Na ivakatagi sa totoka dina kei na itukutuku talei mai vei Sister Eubank. Sa vakasakiti dina na malawa ni loloma soli wale veivueti oya! Io, sa yaco mai oqo na Tiseba. Sa batabata mai na cagi ka lutu na ucacevata. Vei ira e lewevuqa, sa kena ibalebale oqo ni sa voleka sara na Siganisucu. Ia, vei au e sega ni dau vakaoqo, na veika au dau vakila ena Siganisucu.
Ena noqu bula taucoko ena vuravura oqo, sa dau ikau mai ni Siganisucu, na veisiga babalavu ka katakata. Oqori baleta ni vulaikatakata mai Ositerelia. Vakakina ena Ceva kei Aferika, keirau a vakaitikotiko kina kei na watiqu ena lima na yabaki sa oti, dau katakata tu ga.
O koya sa dau kauta mai kina o Tiseba na veisiga e baravi, vodo ua, kei na tatavu. Ena Kirisimasi, sa dau kauta voli na neitou itikotiko na iboi ni maqo kei na rorogo ni veidredrevaki. Ia e tautauvata e veivanua kecega na yalo ni Siganisucu. Mai Serene, Salt Lake, se e Sierra Leone; mai Nukualofa, Newfoundland, se e Nigeria, nona sucu noda iVakabula e uqeta na tamata me caka vinaka.
Ena vuqa na veivanua, era dau veisoli iloloma na tamata, veisikovi, ka veiqaravi ena yalovinaka me ra marautaka na yalo ni Siganisucu. E dua nodratou itovo tudei na neitou itokani mai Samoa ena siga ni oti na Siganisucu, era dau tawana na kakana kei na ivakalomavinaka eso ena kateni ka solia vei ira na veimatavuvale era leqa tu, sega walega ena nodratou tabanalevu, ia vei ira tale eso ena nodratou itikotiko. E tiko talega nodratou loga ni kakana draudrau, ka dau soli na iwase levu ni veika e rawa mai kina vei ira na tamata era vakaleqai tu.
E dua neitou itokani vinaka sara mai Senegal ena Ceva kei Aferika e tukuna ena koro a sucu kina mai Ivory Coast, ena veiyakavi ni Siganisucu, era dau kauta yani na lewe ni koro na duidui eso se bera tu ni wali vei ira nodra iliuliu, me isosomi ni soli iloloma. Era dau tiko ena siga oya o ira na iliuliu oqo ka veivosaki vata kei na veimatavuvale oqo me wali na duidui. Era gadreva na lewe ni koro na vakacegu kei na veiyaloni oya me tiko ena veivale kecega ena koro oya ena Siganisucu, baleta ni ra marautaka na sucu i Karisito—o Koya a sucu me baleta sara ga na inaki oya, me kau mai na bula vakacegu ki vuravura.
Ena itekivu ni yabaki oqo, keirau sotava e dua na daukaulotu goneyalewa, o Sister Jeanne Ingabire mai Rwanda, ka kaulotu tiko e Liberia. A tukuna vei au na italanoa vakariseyate baleta na revurevu ni nodra labati vakayauyau na tamata mai Rwanda ena 1994 ki na nona bula. O tamana e lewe ni yavusa Hutu, ka ra dau cati ira sara vakalevu na lewe ni yavusa Tutsi. Ia o tinana e lewena na yavusa Tutsi oya. Me taqomaka nodratou bula na watina kei iratou na luvena yalewa e va, a laki vunitaka nona matavuvale na tamani gone yaloqaqa oqo ena dua na vanua vakayawa ka lesu duadua mai ki na nona koro. Eratou a sega ni raici koya tale na watina kei iratou na luvena yalewa ka ratou sasaga dredre me ratou qai bula tiko. Eratou qai lesu tale ni oti e ciwa na yabaki ki na dua na bose ni veivakaduavatataki a kaciva na matanitu, ka ratou qai kila kina ni a vakamatei na watidratou ka tamadratou ena gauna a lesu tale mai kina ki nona koro. Ia, e veivakurabuitaki, nodratou vosoti ira era tinia na bula ni watidratou ka tamadratou o tinai Sister Ingabire kei iratou na luvena.
Ena dua na gauna a rawa ni vakacudrui voli kina o Josefa Simici, ena nona tauri vakavesu cala tu ena Valeniveivesu mai Liberty ena vica na vula donumaka na gauna ni Siganisucu ni 1838, a vakatakila na Turaga na Vunau kei na Veiyalayalati wase 121. Ena ivakatakila oqo a vukei Josefa na Turaga me ulabaleta na yalo ca a kunevotu tiko ena itekivu ni iwase oqo ka vakavulica kina vua na Parofita ni yalovinaka, vosota vakadede, ivalavala malua, yalomalumalumu, kei na loloma e sega ni veivakaisini era itovonibula Vakarisito ka gadrevi ena bula vakatisaipeli.
Na Siganisucu e dau kauta mai vei au na veivakanananu vakamareqeti. Ia, e sega ni ra vinaka kece na veivakanananu oqori. Niu se gonetagane lailai sara, au nanuma nona a solia vei au o tamaqu e dua na motoka ni veitau vaka na waqa ni masese roka drokadroka totoka. Keitou matavuvale dravudravua, kau taleitaka sara vakalevu na iloloma oya. Ia, ena dua na siga, ena yalo cudru vakaitabagone me baleta e dua na ka lailai, au qai viritaka na motoka ni vakatatalo ena loga ni wisitaria ka ologa tu neitou bai. E tuburi au na veivutuni ena gauna vata ga oya, sega ni baleta ga noqu viritaka laivi na ka ni vakatatalo ia e baleta niu nanuma oya na ivakaraitaki ni nona loloma na tamaqu. Au vaqara ka vaqara, ia au sega ni kunea rawa. Ni yaco mai na vulaililiwa ka ra mira na draunikau, au vaqaqara tale, sega ga. Se bikai au voli ga noqu vakacudruya na tamaqu. Se mosi tu ga.
Kila, e via tautauvata oya kei na noda dau vakanadakuya na nona loloma kei na Nona isolisoli na Tamada Vakalomalagi, o koya e cecere duadua na Nona tala mai na Luvena me mai vakararawataki ka veisorovaki ena vukuda. Sa dua na leqa levu kevaka eda vakanadakuya na Nona isoro ni veivakaduavatataki se na veiyalayalati kei na cakacaka vakalotu ni Nona kosipeli!
Io me rawa ni da dau vakataki ira tikoga era dau cakacaka me ra vakaraitaka kina nodra lomani ira na tani. Wale tikoga qo, e vuqa era a cakacaka me ra vukei ira na vakaitikotiko mai Florida kei na yatu Carolina ka ra a sotava na cagi tataba ka vukei ira talega era vakaleqai ena kama levu mai California se me ra mai vukei ira era vakaleqai tale tu ga vakakina e vuravura raraba.
Ena 25 ni Tiseba, 1974, a vakarusai na koroturaga ni Veiyasana ena Vualiku kei Ositerelia. Ena mataka caca ni Siga ni Kirisimasi oya, a labata kina na koro levu o Darwin na Cagilaba o Tracy. Era mate kina e lewe levu, ka ra mai sega ni vakavale e levu cake na lewei Darwin. Na itaba ni vakacaca walega oqo mai Florida e vakatayloyalotaka na kena mai Darwin. Ia na yalo ni Siganisucu e ulabaleta na rarawa. A vakayauyau mai na cau mai vei ira na tamata kecega ena veiyasai Ositerelia, e vuqa na tamata era biuta tu na ka kecega ka lako ki Darwin me ra veivuke ena vakacoko.
Ena vuqa na yabaki sa oti, ni se qai yabaki rua na luvei keirau yalewa qase duadua, a kamusu na yavana ni se bera na Siganisucu ka curu kina i valenibula ena vica na macawa ni simede tu na yavana. Sa dua dina na Siganisucu dredre oya. Eratou lako mai e dua na matavuvale sega soti ni tuvinaka vakailavo me mai sikovi iratou ena Siga ni Sucu. Eratou dui kauta mai na luvedrau gonelalai nodratou iloloma taleitaki, era taura ena mataka oya, me ratou solia vei luvei keirau yalewa me nodratou iloloma vua. Keirau luvuci kei na watiqu o Kay, ena nodratou loloma savasava kei na yalovinaka na gonelalai oqo kei rau na nodratou itubutubu.
Oqo dina na yalo ni Siganisucu—era veivukevukei na tamata. Ia, e dua na tiki bibi ni nona isolisoli na iVakabula, na Nona qarava na “dua.” Oqo e dua na ivakavuvuli era mareqeta ka vakayagataka na lewe ni Nona Lotu e Aferika, ka sai koya talega na ka e gadreva vei keda eke o Koya.
E kaya o Peresitedi M. Russell Ballard ni Veisorovaki sai koya na ulumatua ni nona cakacaka na iVakabula ena Nona vakayacora vei keda “yadua” na ka saraga oqo. Na vosa nei Peresitedi Ballard:
“Kevaka eda kila dina na Veisorovaki kei na bibi ni tamata yadua, eda na vakasaqarai ira … yadudua na … luvena cidroi na Kalou. Eda na vukei ira me ra kila na nona lomani ira na Karisito. Eda na cakava na veika kece eda rawata me vukea nodra vakarautaki me ra ciqoma na cakacaka vakalotu ni veivakabulai ni kosipeli.
“E dina sara, kevaka e liu tiko ena nodra vakasama na iliuliu ni tabanalevu kei na tabana na Veisorovaki i Karisito, ena sega ni dua na lewenilotu vou se vakabulabulataki lesu mai ena vakawaleni. …
“… Na ibalebale ni Veisorovaki sai koya ni tawayalani ka tawamudu, ia e vakayagataki yadudua, dua na tamata ena dua na gauna. …
“Taciqu kei na ganequ, kua, kua sara ni vakawalena na kena bibi e dua.”1
Ena sega beka ni vakasakiti kevaka eda muria kece na ivakasala oqo, kei na nona na noda parofita lomani, o Peresitedi Russell M. Nelson—me da bulataka na ivunau cecere e rua ena ivakarau cecere ka savasava cake. Kevaka o sega ni nuitaka ni rawa ni vakaimawe nomu sasaga, vakasamataka mada na vosa vakaibalebale ni Aferika oqo: “Kevaka o nanuma ni o sa rui ka lailai mo cakava e dua na veisau, ia o se bera vakadua ni sotava e dua na namu ena dua na bogi.”
E sega ni gadrevi me da lako sara ki na vanua tabu me da duatani kina se me da toro volekata na noda iVakabula. Na Siganisucu e dua na gauna eda rawa ni vakanamata kina ena noda iloloma yadua vua na iVakabula ena noda lomani ira ka vukei ira tikoga na tani. Io e sega ni yawa sara ki Peceliema vei keda kece. Sa qai vakatau vei keda me da kauti Karisito mai me tiki ni noda bula—me da ciqoma na isolisoli e solia tu vei keda ka solia Vua na iloloma mai vuniyaloda. Au lomani Koya kau vakadinadinataka na Nona loloma sega ni oti rawa vei keda yadua ena yaca i Jisu Karisito, emeni.