Tej Txiaj Ntsim uas Los Saum Ntuj Los
Tub Hluas
Tsis muaj ib tug tub hluas uas tos ntsoov hnub Christmas zoo li kuv. Kuv nyiam heev! Kuv niam kuv txiv yeej txawj hloov peb lub tsev los ua ib qhov chaw nyob zoo hauv lub caij no no. Muaj tej khoom zoo nkauj uas peb muab dai, cov nkauj, cov teeb, tej khoom noj, thiab tej khoom plig. Kuv yeej tos ntsoov qhib kuv tej pob khoom plig. Txhua xyoo kuv yeej sau ib daim ntawv qhia tias kuv xav tau tej yam twg tiag tiag.
Vim peb nyob hauv ib daim liaj teb, txhua hnub Christmas ua ntej peb qhib peb tej khoom plig, peb twb hnav khaub ncaws kom tiv tau huab cua no no thiab pub peb cov tsiaj noj. Tsis muaj ib yam dab tsi zoo dua li qhov uas peb ua peb tej hauj lwm tiav lawm thiab tsuag tsuag rov qab mus hauv koom nrog kev ua koob tsheej ntawd.
Kuv nyuam qhuav pib kawm txog tus txiv neej, Yexus Khetos, tus uas peb ua koob tsheej txog Nws hnub yug. Tiam sis zoo li yog ib qho zoo rau peb. Yeej yog Nws hnub yug, tiam sis peb twb tau tag nrho cov khoom plig. Txhua tus me nyuam yeej yuav nyiam xwb xwb! Christmas yog txhua yam uas zoo.
Zoo siab uas thaum sij hawm dhau mus, kuv to taub tus Cawm Seej zoo dua ntxiv—Nws txoj kev yug los thiab hnub yug, Nws lub neej thiab txuj ci tseem ceeb, Nws lub hwj chim thiab tej kev txi, Nws txoj Kev Theej Txhoj thiab txoj Kev Sawv Rov Los, tiam sis qhov tseem ceeb tshaj yog Nws lub yeeb koob thiab txoj kev hlub uas tsis muaj leej twg to taub. Muaj tseeb tiag, Christmas yog ib yam zoo heev, tiam sis muaj li ntawd vim Yexus Khetos yog tus uas zoo tag nrho. Los yog hais tias, Yexus Khetos yog tus uas zoo kawg nkaus!
Ua Tub Txib
Ib yam li cov tub hluas ntxhais hluas feem coob, kuv tos ntsoov txog lub sij hawm kuv yuav ua tau ib tug tub txib, tiam sis thawj zaug uas kuv tsis nyob hauv tsev thaum lub caij Christmas ua rau kuv poob siab me ntsis. Ob peb hlis ua ntej txog kuv hnub yug thib 19, ntshe kuv tsuas xav txog kev mus ua tub txib xwb. Kuv hluas dua kuv cov phooj ywg thiab cov uas nrog kuv kawm ntawv, thiab lawv feem coob twb mus ua tub txib lawm, tseg kuv ib leeg xwb. Kuv xav tias kuv tau npaj ua ib tug tub txib thiab. Tsuas muaj ib yam uas tav kev xwb: kuv hnub yug.
Tom qab kuv tos ntev tsis ntev, twb txog sij hawm rau kuv mus hauv lub MTC. Thaum lub Kaum Ob Hlis Ntuj, kuv tau caij nyab hoom mus rau kuv qhov chaw tshaj tawm txoj moo zoo nyob hauv Santiago, Chile. Twb txog lub sij hawm kuv mus tau, thiab qhov zoo tshaj plaws yog qhov uas tsis ntev ces yuav txog hnub Christmas. Kuv twb paub hais tias kuv tau npaj rau qhov zoo tshaj plaws uas yuav muaj los rau kuv lub neej.
Tiam sis thaum kuv tawm nyab hoom los, kuv tau kawm hais tias ntau yam tsis zoo li nyob hauv Utah lawm. Tsis ntev twb yuav txog Christmas tiag tiag, tiam sis zoo li yog lub caij sov. Kuv tsis paub cov daus nyob qhov twg? Cov tsho tiv no thiab khau looj plab hlaub nyob qhov twg?
Tsis ntev ces kuv pib kawm txog tej teeb meem ntawm txoj hauj lwm no. Kuv nkees tom qab caij nyab hoom tas thiab tej lub sij hawm kuv pib tsaug zog thaum peb qhia lwm tus. Kab lig kev cai txawv heev, kuv tsis to taub yam lus ntawd—yeej tsis zoo li yam lus uas kuv tau kawm nyob hauv lub MTC—thiab cov zaub mov txawv tiag. Thiab hais txog zaub mov mas, kuv tus khub thiab kuv ntshe wb noj ib yam dab tsi phem vim wb ob leeg raug mob plab heev. Ces, koom nrog txhua yam li no los, muaj ib hmo thaum kuv nyob hauv Chile tsis ntev lawm, muaj av qeeg.
Yog thawj hnub Christmas uas kuv tsis nyob hauv tsev, thiab kuv mob kawg nkaus. Kuv pw hauv ib lub txaj nyob hauv ib lub teb chaws uas kuv tsis paub, kuv sim to taub ib yam lus uas yeej tsis nkag siab, nrog ib tug neeg nyob uas kuv tsis paub hlo li. Cov tub txib tej hauj lwm yeej zoo li no los, thiab vim li cas kuv rawm xav ua li no?
Tiam sis txawm muaj tej teeb meem zoo li no, kuv pib hlub cov neeg nyob hauv teb chaws Chile kawg siag kawg ntsws. Lawv yeej zoo heev thiab yooj yim rau kuv hlub lawv—thiab lawv feem coob xav xav kawm zaj lus txog tus Cawm Seej. Nyob hauv lub ntiaj teb no, qhov chaw uas tib neeg xav paub txog ib tug Cawm Seej, ces ua rau kuv xav tias tej ntoo Christmas thiab thom khwm uas puv khoom plig yeej tsis tseem ceeb npaum li yav tas los. Yog tias Khetos tau ncaim Nws tsev saum ntuj los rau hauv lub ntiaj teb no kom raug txom nyem thiab tuag rau peb, kuv yeej ncaim tau kuv tsev thiab raug ob peb yam teeb meem yog kuv qhia tau Nws txoj moo zoo.
Lub caij Christmas ntawd qhia kuv txog kev xyiv fab los ntawm kev pab tib neeg txais tau Leej Txiv Saum Ntuj Ceeb Tsheej lub txiaj ntsim zoo tshaj plaws, Nws txoj hau kev zoo siab—thiab kev zoo siab yog qhov uas txhua leej txhua tus xav tau, tsis yog thaum lub caij Christmas xwb, tiam sis nyob mus ib txhis.
Yawg Ntsuag Hluas thiab Kev Sib Yuav
Ob peb xyoo tom qab kuv ua tub txib tas lawm, kuv tau muaj ib qho teeb meem tshiab. Kuv poob siab, nkees, thiab kho siab. Ob peb hlis ua ntej, kuv tus poj niam uas kuv twb yuav ze li ob xyoos los nws tau tso lub ntiaj teb no tseg thaum nws lub tsheb raug sib tsoo, tshuav kuv thiab wb tus me nyuam ntxhais uas muaj 7 hli xwb.
Kuv yog ib tug tub kawm ntawv es kuv twb kawm, ua hauj lwm, thiab kawm ua leej txiv kuv ib leeg xwb. Yuav luag txog hnub Christmas, thiab thaum lwm tus yuav rov qab mus tsev nrog lawv tsev neeg thiab cov uas hlub lawv hauv lub caij phav no, vim kuv yuav tsum ua hauj lwm, kuv tau nyob ntawm lub tsev kawm ntawv. Kuv kho siab heev thiab tu siab kawg. Christmas twb los txog lawm, ces sij hawm dhau mus xwb.
Yuav luag ib xyoos tom qab ntawd, thaum yuav txog lub caij Christmas dua, kuv tseem tsis tau yuav poj niam. Nim no, cov vaj lug kub qhia tias yeej tsis zoo rau ib tug txiv neej nyob nws ib leeg (saib Chiv Keeb 2:18), thiab kuv yeej pom zoo rau cov lus ntawd. Kuv xav tau ib tug khub, thiab kuv tus me ntxhais xav tau ib leej niam.
Kuv xav tias, “Tej zaum tsis muaj leej twg xav tau kuv, tiam sis nyaj txhua tus poj niam yuav xav tau ib tug me ntxhais mos liab tiag tiag rau lub caij Christmas yom? Tsis yog ib tug me nyuam roj hmab—tiam sis ib tug me nyuam tiag tiag?” Thiab zoo siab heev, yog leej twg xav tau tus me nyuam mos liab, ces nws yuav tsum yuav kuv thiab.
Kuv twb nyiam ib tug ntxhais hluas hu ua Nancy nyob hauv kuv hoob kawm txog biology, tiam sis yuav luag txog lub sij hawm kawv ntawv tiav thiab kuv tseem tsis tau ua siab loj nrog nws tham. Tej zaum Vajtswv tau pab kuv vim hais tias muaj ib hnub, muaj hmoov, es wb ob leeg tau tawm qhov chaw xeev ntawv thaum tib lub sij hawm. Nov yog kuv lub cib fim. Kuv pib nrog nws tham ces hmo ntawd, kuv tau hu Nancy thiab thov nws nrog kuv mus ua si. Wb mus ib zaug, ces ib zaug ntxiv, ces ib zaug ntxiv. Tiam sis, kuv paub tias yuav luag txog lub caij Christmas, thiab Nancy yuav rov qab mus tsev. Kuv yuav ua li cas kom wb txoj kev sib nyiam me ntsis uas nyuam qhuav pib loj tuaj?
Kuv twb tawm ib lub tswv yim. Nrog Nancy tus viv ncaus thiab nws tus hluas nraug txoj kev pab, kuv xav tias kuv yuav muab ib khoom plig rau Nancy txhua hnub rau 12 hnub ua ntej txog hnub Christmas.
Kuv lub tswv yim yeej mus zoo. Nancy tau txais tej khoom plig ntawd, tiam sis nws yeej tsis paub leej twg yog tus uas muab tej ntawd rau nws. Yog ib qho txuj ci uas nws tsev neeg tag nrho sim daws seb yog leej twg. Nancy tus viv ncaus thiab nws tus hluas nraug cog lus tias nkawd yuav tsis qhia tias nkawd pab kuv. Yeej yog ib txoj kev tuav hauv ntsiag to tiag tiag—tiam sis peb xav ua zoo xwb.
Tiam sis, muaj ib hmo nws tsev neeg kawm tau ib qho. Lub tswb qhov rooj nrov, tsev neeg khiav mus rau lub qhov rooj, thiab lawv pom ib lub tsheb uas mus ceev ceev. Lawv twb sau tus naj npawb rau daim phiaj tso cai, thiab hnub tom qab ntawd lawv hu qhov chaw tso cai rau neeg tsav tsheb seb yog leej twg lub tsheb. Lawv kawm hais tias yog ib tug nyob hauv tus viv ncaus tus hluas nraug tsev neeg. Lawv twb paub lawm. Nancy tus viv ncaus thiab nws tus hluas nraug lees hais tias lawv pab kuv txoj kev ntxias. Tiag tiag kuv zoo siab hais tias nws twb paub lawm vim Nancy thiab kuv twb nyob ua ke thaum hnub Christmas, thiab txij thaum ntawd los wb tseem sib tham.
Thiab zoo ib yam li kuv xav, Nancy xav tau ib tug me ntxhais mos liab tiag tiag rau lub caij Christmas. Nws hlub kuv tus ntxhais ib yam li yog nws li. Thiab zoo siab heev uas nws yuav tsum yuav kuv thiab. Wb twb sib yuav thaum lub caij sov tom qab ntawd. Yog ib lub txiaj ntsim zoo tshaj plaws uas kuv tau txais.
Kuv tab tom ua neej raws li Leej Txiv Saum Ntuj Ceeb Tsheej txoj hau kev zoo siab. Kuv tau muaj ib tsev neeg uas nyob mus ib txhis thiab wb tau ua kev sib khi ua ke. Lub txiaj ntsim uas yog kev sib yuav nyob mus ib txhis thiab tsev neeg yog ib lub txiaj ntsim uas txhua tus uas rau siab ntseeg txais tau, txawm yog hauv lub neej no los sis lub neej tom ntej. Muaj lub txiaj ntsim twg uas zoo dua nev?
Thaum kuv xav txog lub sij hawm uas kuv kho siab thiab nyuaj siab, kuv paub hais tias Yexus Khetos tau xav tias Nws nyob Nws ib leeg thiab txhua tus tau tso Nws tseg thiab. Nws paub kuv txoj kev mob, ntau tshaj txhua tus yuav paub. Txawm yog kuv kho siab ua luaj li, kuv yeej tsis tau xav tias Nws tau tso kuv tseg. Tsis yog Nws yog kuv tus Cawm Seej xwb; Nws yog kuv tus tij laug thiab kuv tus phooj ywg zoo tshaj plaws.
Tus Txiv Tsev Hluas
Wb tsev neeg pib loj tuaj, thiab ob peb xyoos tom qab ntawd kuv rov qab muaj kev txhawj xeeb heev. Thaum txog lub caij Christmas, Nancy thiab kuv wb ib leeg ntsia ib leeg thiab paub hais tias wb tsis tau muaj ib lub xees hlo li yuav khoom plig rau wb ob tug me nyuam xyoo ntawd.
Kuv nyuam qhuav kawm ntawv qib siab tiav lawm, thiab wb tseem tsis muaj nyiaj pes tsawg. Txawm yog kuv muaj ib txoj hauj lwm zoo, ua rau wb paub hais tias wb tsis tau muaj txaus them tus nqi ua neej. Tib yam zoo xwb yog qhov uas wb yeej them ib feem kaum tag nrho. Txawm yog tsis muaj leej twg paub txog wb qhov teeb meem, Leej Txiv Saum Ntuj Ceeb Tsheej thiab tus Cawm Seej paub, thiab Nkawd pib xa tej txuj ci tseem ceeb los rau lub caij Christmas.
Muaj ib hnub lub tswb qhov rooj nrov. Yog ib tug neeg zej zog uas tuav ib lub phij xab uas puv khoom ua si. Nws hais tias, “Peb tab tom tu peb lub tsev thiab peb nrhiav tau tej khoom ua si no uas peb cov me nyuam tsis xav lawm. Peb xav paub seb neb ob tug me nyuam puas xav tau.” Nkawd yeej xav tau tiag!
Ib hnub ntxiv ces lub tswb qhov rooj nrov dua. Zaum no yog ib co mej zeej ntawm wb pawg ntseeg. Nkawd nyob ntawd tuav ib tug ntxhais hluas lub luv thij. Nkawd hais tias, “Wb tsis xav tau lub luv thij no ntxiv thiab wb xav txog neb tsev neeg. Neb puas xav tias neb tus ntxhais yuav siv?” Ua rau wb xyiv fab heev!
Ob peb lub lim tiam wb tus me nyuam tub tau ua kev sib tw kos duab hauv ib lub taj laj. Muaj ib hnub wb txais xov tooj qhia wb hais tias nws yog tus uas yeej kev sib tw ntawd. Nws twb yeej ib daim video uas cov me nyuam coob nyiam. Ua rau wb xav tsis thoob!
Tag nrho tej txuj ci tseem ceeb me me no—wb ob tug me nyuam yeej yuav muaj ob peb khoom plig. Wb tau them ib feem kaum, thiab Leej Txiv Saum Ntuj Ceeb Tsheej thiab tus Cawm Seej tau qhib rooj ntug thiab nchuav Nkawd tej koob hmoov los—zoo li los ntawm chaw tso pa hluav taws los rau peb.
Kuv tau xav txog qhov uas tus me nyuam Khetos yug los hauv ib qho chaw uas txo hwj chim heev, tiam sis lwm tus nrhiav tau Nws thiab muab tej txiaj ntsim uas muaj nqis rau Nws thiab. Vim kuv yog ib tug txiv tsev hauv lub ntiaj teb no, kuv yeej xav pub txhua yam rau kuv cov me nyuam.
Peb Leej Txiv Saum Ntuj Ceeb Tsheej xav zoo ib yam. Tiam sis Nws txoj kev hlub yeej zoo tag nrho, Nws thiaj li xav pub tag nrho tej yam Nws muaj rau peb. Yog ib lub txiaj ntsim uas peb yeej tsis txawj to taub.
Lus Xaus
Cov kwv tij thiab cov muam, peb txhua tus twb tau muaj los sis yuav muaj ib lub sij hawm thaum peb kho siab, mob, nyuaj siab, pluag, los yog nyob deb ntawm peb lub tsev. Zoo siab heev uas peb muaj ib Leej Txiv Nyob Mus Ib Txhis thiab ib tug Cawm Seej uas to taub peb. Thaum peb mus rau Nkawd, Nkawd yuav tuav peb tes thiab pab peb kov yeej txhua yam teeb meem.
Thiab cov kwv tij thiab cov muam, yuav muaj ib lub sij hawm thaum peb txhua tus paub ib tug uas kho siab, mob, nyuaj siab, pluag, los sis nyob deb ntawm tsev. Peb Leej Txiv thiab tus Cawm Seej tej zaum yuav coj peb mus pab lwm tus, thiab yog peb lub sam xeeb vim peb ua tau li ntawd.
Thaum kuv yog ib tug me nyuam, kuv xav tias Christmas yog ib hnub ib xyoos xwb. Thaum kuv yog ib tug neeg laus, kuv paub lawm hais tias Christmas yeej yog txhua hnub. Vim hais tias Leej Txiv Saum Ntuj Ceeb Tsheej thiab tus Cawm Seej, Yexus Khetos, muaj siab dawb siab zoo hlub peb, peb yog cov uas txais tau tej txiaj ntsim los saum ntuj los—txhua hnub. Tej txiaj ntsim uas suav tsis txheeb.
Kuv ris Leej Txiv thiab Leej Tub txiaj ntau kawg nkaus, kuv thiaj li zoo li Amoos puag thaum ub uas hais tias, “Kuv twb tsis muaj peev xwm hais feem me tshaj plaws uas kuv xav tau” (Amas 26:16).
Muaj tseeb tiag, yog Yexus Khetos hnub yug uas peb ua koob tsheej txog txhua lub caij Christmas, tiam sis vim hais tias Leej Txiv thiab Leej Tub yog neeg zoo, peb tseem tau txais tag nrho tej khoom plig. Kuv ua tim khawv txog qhov no los ntawm Yexus Khetos lub npe, amees.