Na Siganisucu—na Gauna ni Loloma, Veiqaravi, kei na Veivosoti Vakai Keda
Au dau taleitaka na nodra marau kei na nanamaki na gone ena gauna ni Siganisucu! Au nanuma lesu noqu nanamaki voli vaka-lewe ni Lalai niu tubu cake tiko mai Argentina. Ena dua na yabaki, a kerei keimami na qasenivuli ni Lalai me keimami samaka na neimami iyaya ni vakatatalo makawa, savata na uludra, vakavinakataka na nodra vinivo, me keimami na laki lolomataka vei ira na cauravou kei na goneyalewa lalai era curu tiko e valenibula ena gauna ni Siganisucu.
Ena macawa au a savata tiko kina noqu matakau makawa, a tarogi au o tinaqu na cava au cakava tiko vei ira. Au a kaya ni sa kerei keimami o qasenivuli ni Lalai me keimami cakava oqo, a qai kaya mai o tinaqu, “E dodonu talega mo solia e dua na nomu iyaya ni vakatatalo ka vou vei ira na gone oqo.”
Au a qai kaya lesu, “Na cava meu na cakava kina oqori?”
A qai kaya mai e dua na ka sa dau tu ga kei au ena veiyabaki kece oqo. A qai kaya mai, “Cris, e ka vinaka dina meda solia e dua na ka eda dau taleitaka, na ka e dredre meda dau solia ni da dau vakamareqeta, e dua na ka ena wili vakasolibula. Oqo na isolisoli taumada nei Tamada Vakalomalagi kivei keda. A tala mai na Luvena, o Jisu Karisito—sega ni dua na luvena walega. A talai mai na Luvena Daulomani uasivi sara me rawa ni da laki bula vata tale kei Koya.”
Ena yabaki o ya niu sa solia e dua na noqu iyaya ni vakatatalo taleitaki, au sa mai kila vinaka cake na isolisoli nei Tamada Vakalomalagi kivei keda—na Luvena Daulomani, o Jisu Karisito, a mai solia ena loloma ka soliwale na Nona bula baleti keda.
Ena veiyabaki, me tiki tiko ni neitou marautaka na Siganisucu, a dau wilika o tamaqu mai na ivolanikalou totoka nei Luke:
“Ena gauna ko ya sa tukuni yani na lewa i Sisa Akusito, me volai na lewe ni vanua taucoko. …
“A ra sa dui lako kecega na tamata me ra volai, ko ira yadua ki na nodra koro.
“Sa lako cake talega ko Josefa e Kalili, mai na koro ko Nasareci, ki Jutia, ki na koro i Tevita, a yacana ko Peceliema. …
“Me volai kei Meri ko koya sa musu vua me watina, a sa bukete tiko.
“Ia ni rau sa tiko mai kea, sa yaco na nona siga me vakasucu kina.
“A sa vakasucuma na nona ulumatua na gonetagane, a sa viviraka vua na isulu ni gone, ka vakadavora ena nodra tikina na manumanu; ni sa sega na tiki ni bure me nodratou.
“A sa so na ivakatawa ni sipi ena vanua ko ya era sa tiko mai na vanua veico, a ra veivuke me vakatawa na sipi ena bogi.
“Ka raica sa dua na agilosi ni Turaga sa rairai vei ira, a sa cila vakavolivoliti ira na iukuuku ni Turaga, a ra sa rere vakalevu.
“A sa kaya vei ira na agilosi, dou kakua ni rere, raica au sa kauta mai vei kemudou e dua na itukutuku vinaka mo dou reki vakalevu kina kei ira kecega na tamata.
“ Ni sa sucu vei kemudou ena siga oqo ena koro i Tevita, na iVakabula ko Koya na Karisito na Turaga.
“Ia, oqo na kena ivakatakilakila vei kemudou,dou na kunea na gone sa viviraki vua na isulu ni gone, a sa davo ena nodra tikina na manumanu.
“A ra sa lewe vuqa na kai lomalagi era sa tiko kaya vakasauri na agilosi a ra sa vakavinavinaka vua na Kalou ka kaya,
“Sa nona na Kalou na vakarokoroko ena veiyasana e cake sara, a sa veivinakati rawa ko ira e vuravura a sa lomani ko ira na tamata.”1
Kemuni na taciqu kei na ganequ, eda na marautaka vakacava na vakacegu vata oqo kei na veivinakati vei ira na tamata?
Niu vakasamataka vakatitobu na taro oqo ena vica vata na macawa, niu kila tiko ni Siganisucu e gauna ni soli-ka, e tolu na itavi me caka—e votu mai vei au—na kena dina e tolu na iloloma eda rawa ni solia. Sa dina sara, meda solia na iloloma oqo ena loma taucoko ni yabaki, ia ena gauna totoka ni Siganisucu, eda nanuma kina na iloloma ni Luvena ka raica meda na muria vakacava na Nodrau ivakaraitaki ni tubu cake tiko noda igu kei na gagadre meda soli ka.
1. Na Siganisucu sa gauna ni solia na noda loloma.
Na Tamada Vakalomalagi, kei na noda iVakabula, o Jisu Karisito, rau sa ivakaraitaki cecere ni loloma. A vakavulica e dua na ivolanikalou lomani: “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”2
E vakavulici keda na iVakabula ena ivakaraitaki meda lomana na tamata kecega. A vakavulica talega vei keda meda lomana na Kalou ka lomani ira na wekada me vakataki keda.
E vakamacalataka o Elder John A. Widtsoe:
“Eda na sega beka ni kila vinaka na ituvaki taucoko ka bibi ni loloma, ia e tiko na veivakatovolei ena dau qai laurai kina.
“Sa dau vakayavutaki ga na loloma ena dina. … Na lasu kei na lawaki, se dua tale na voroki ni lawa savasava, sa ivakadinadina ni sa yali na loloma. Ena rusa na loloma ni sega na dina. … O koya gona, … [ni dua] e cakacaka lasu vei ira sa daulomana, se cakava vua na veika e saqata na dina, e sega ni lomani koya dina.
“Tomani tale, na loloma e sega ni vakacudruya se vakararawataka se vakamavoataki koya e lomana. … Na yaloca sa yali mai kina na loloma … me vaka sa yali na dina mai na sega ni dina. …
“Na loloma sa dua na kaukauwa dina e cakacakataki. Ena vukei koya sa daulomani. Ke tiko na gagadre, e dau saga na loloma me solia. Ke tiko na malumalumu, ena vukea na loloma ena kaukauwa. … Na loloma e sega ni veivuke e loloma lasulasu se veivukiyaki.
“E vinaka me vaka na veivakatovolei oqo, e tiko e dua tale e cecere cake. Na loloma dina e solibula ena vukui koya e lomana. … Sa ikoya oya na iotioti ni veivakatovolei. A soli Koya na Karisito, solia na Nona bula, me baleti keda, ka yaco me kaya kina na dina ni nona loloma me baleti ira na tacina kei na ganena e vuravura.”3
Sa sureti keda, na Luvena, na Tamada Vakalomalagi, meda solia ka solibulataka na loloma oqo. “Mo dou dau soli,” e kaya na iVakabula, “ka na soli vei kemudou.”4 “Dou a rawata walega, mo dou solia walega.”5
2. Na Siganisucu sa gauna ni solia na noda veiqaravi.
A veiqaravi vakai Koya ga na Turaga ka iVakabula kivei ira na tamata, laveti ira cake na tabakisobu, solia na inuinui vei ira na yalolailai, ka vakasaqarai ira sa yali tu. A dolava na matadra na mataboko, vakabulai ira na tauvimate kei na lokiloki me ra lako rawa tale, ka vakabulai ira sa mate tu.
Ena gauna ni Siganisucu, au dau nanumi ira na daukaulotu—cauravou kei na goneyalewa daukaulotu, qase daukaulotu, kei ira na peresitedi ni kaulotu e vuravura taucoko—ni ra sa matataki Jisu Karisito, era sa solia wale na nodra gauna kei na veiqaravi kivei ira na kawatamata. Au nanumi ira na tacida kei na ganeda era vakayagataki gauna vakalevu ena yalodina ena nodra veikacivi. Ena gauna talega oqo, au nanumi ira na tagane kei na yalewa era veiqaravi tiko vakamataivalu me vakadeitaka noda taqomaki. Vinaka vakalevu na nomuni veiqaravi!
Ia e dina ke da sega ni qarava tiko na Turaga se noda matanitu ena veiqaravi tudei, sa tawayalani na veimadigi meda na veiqaravi kina. Na vosa kei na cakacaka vinaka ena rawa me kauta tani na noda icolacola bibi ka vakamarautaka na yaloda! Sa sureti keda kece tiko na Tamada Vakalomalagi meda veiqaravi yani. Ni sa cakava oqo “ena qai vosa na Tui ka kaya vei [keda], au sa kaya vakaidina vei kemuni, Ni kemuni a cakava vua e dua sa lailai vei ira oqo, ni a cakava vei au.”6
3. Na Siganisucu sa gauna ni solia na noda veivosoti.
Na vosoti ira na tamata ena kauta mai na vakacegu kei na reki ki na noda bula. E vakavulica o Peresitedi Heber J. Grant: “E sega tale ni dua na ka mena kabiti keda mai kina vakalevu na Yalo ni Turaga me vakataka na noda … yalovinaka, veikauwaitaki, dauloloma, vosota vakadede ka veivosoti. E sega tale ni dua na ka mena kauta vakalevu mai vei keda na reki me vakataka noda tu vakarau ka lomada sara meda vosota nodra caka ca vei keda o ira na wekada, ka sega tale ni dua na ka mena kauta vakalevu mai na rusa me vakataka na noda vakaukauwataka na yaloda ka yaloca ka sauma na ca vei ira sa tiko voliti keda.”7
Me rawa ni vosoti na noda ivalavala ca, sa gadrevi me da vosoti ira na tani.
Na noda vosoti ira na tani ena rawa kina vei keda me da vakamalumalumutaka na yalocudrucudru, na yaloca, se na via sosomitaka na ca. O cei beka vei keda ena via vakila tiko veika vakaoqo ena Siganisucu? Na veivosoti e rawa ni vakabula na mavoa vakayalo ka kauta mai na vakacegu kei na loloma e rawa duadua ga ni solia na Kalou.
E gadrevi keda na Tamada Vakalomalagi meda veivutuni ka vosoti ira na tamata yadua—oka kina oi keda. Me vaka a cauraka o Elder Jeffrey R. Holland: “se vakacava na levu ni kena bera o nanuma ni o sa bera tu kina, se vakacava na levu ni madigi o nanuma ni o sa calata, se vakacava na levu ni cala o nanuma ni o sa cakava se na taledi o nanuma ni sega ni tu vei iko, se vakacava na yawa ni vanua o nanuma ni o sa lakova mai vale kei na matavuvale kei na Kalou, au vakadinadinataka ni o sega ni sa lako sivita na vanua e rawa ni yacova na loloma vakalou. E sega ni rawa vei iko mo lutudromu sivita na rarama tawavakaiyalayala ni Veisorovaki i Karisito.”8
Kemuni na taciqu kei na ganequ, ena gauna ni Siganisucu oqo, meda sa solia ga na iloloma vinaka duadua. Meda sa solibulataka ena yalo ni vakavinavinaka na nona iyaya ni vakatatalo vinaka duadua—sega ni kena sa makawa tu. Meda sa qai solia na isolisoli ni loloma, na iloloma ni veiqaravi kivei ira sa tiko voliti keda, kei na iloloma dina ni veivosoti. Ni da sa veivutuni, sa na vosoti keda o Koya na Savasava i Isireli. Au kila ni bula tiko o Koya. Sai Koya na nodra Tui na Tui, na Tui ni Sautu, na noda iVakabula, na noda Dauveivueti, ka sa noda iTokani. Ena yaca i Jisu Karisito, emeni.