O Avanoa ma Tiutetauave a Faiaoga o le OAE i le Seneturi 21

Elder M. Russell Ballard

O Le Korama a Aposetolo e Toasefululua

O Se Afiafi ma Elder M. Russell Ballard

Saunoaga i Faiaoga Faalelotu a le OAE • 26 Fepuari, 2016 • Tapeneko i Sate Leki

Ou uso e ma tuafafine, faafetai atu mo a outou taumafaiga tulagaese e faamanuia ia olaga o a tatou talavou o le Ekalesia.

Talu ai nei sa ou toe iloiloina ai le tusi fou E Ala i le Suesue ma le Faatuatua Foi: Selau Tausaga o Seminare ma Inisitituti o Mataupu Faalelotu. O se tala ofoofogia! A o ou faitau faasolosolo i ai, sa ou matauina ni matafaioi a le tamā o lo’u tamamatua o Iosefa F. Samita ma lo’u tamamatua o Melvin J. Ballard sa faia i le faavaeina ma le faalauteleina o a’oga a le Ekalesia.

O le asō o loo ou auauna nei i le mea sa la auauna ai foi muamua ona o la’u lava fesootaiga ma outou. Talu mai le 1985, sa ou maua ai le avanoa e auauna atu ai mo le 14 tausaga i le Fono Faatonu o A’oga, 7 tausaga lea sa ou i ai i le Komiti o le Pulega, ma le toeitiiti 4 tausaga o na tausaga sa ou auauna ai o se Taitaifono.

I lo’u taimi i le Fono Faatonu o A’oga, sa ou atiae ai se agaga faafetai maoae mo le Ofisa o Aoga a le Ekalesia. O le po nei ou te talanoa atu mo matua uma ma matuamatutua, ma e oo lava i matua o matuamatutua i le Ekalesia pe a ou faafetai atu ia te outou faiaoga ma taitai ma o outou aiga mo la outou auaunaga faamaoni. O le mea ua ausia e le OAE i totonu o le selau tausaga ua alu e ofoofogia. Peitai, e tele atu lo’u naunau i le isi 100 tausaga e sosoo ai ma le auala e mafai ona outou fesoasoani ai i a outou tamaiti aoga e feagai ma luitau o loo fesuisuia’i pea o le seneturi 21.

I se fonotaga faaleaoaoga a le Pulega Aoao, sa aoao ai e Peresitene Gordon B. Hinckley le mataupu o le “faatumauina o le mama o le aoaoga faavae ma le faatumauina o le Ekalesia i luga o le ala sa’o.” Sa ia saunoa, “E tatau ona tatou matua faaeteete lava. E tatau ona tatou mataala ia tatou le see ese ma [le ala]. I a tatou taumafaiga ia avea ma se tagata muamua e faia se mea, ma fou ma ese ai, atonu tatou te aoao atua ni mea e ono le ogatusa atoa ma aoaoga faavae autu o lenei Ekalesia toefuataiina a Iesu Keriso. … E tatau ona tatou nofouta atili. … E tatau ona tatou avea ma ni leoleo i luga o le olo.”¹

A o agai atu i luma aoga a le Ekalesia i le seneturi 21, e manaomia e outou taitoatasi ona iloiloina soo se suiga e tatau ona outou faia i le ala tou te sauniuni ai e aoao atu, pe faapefea ona aoao atu, ma po o le a foi e te aoao atua pe afai e ao ona e fausiaina se faatuatua le femoumoua’i i olaga o a tatou talavou pele.

Ua uma na aso a fesili se tamaitiiti aoga i se fesili faamaoni ae tali atu se faiaoga, “Aua e te popole fua!” Ua uma na aso a faailoa mai e se tamaitiiti se atugaluga ae tuu atu se molimau a se faiaoga e fai ma tali ua faamoemoe e aloese ai mai le faafitauli. Ua uma na aso sa puipuia ai tamaiti aoga mai tagata na osofaia le Ekalesia. O le mea e lelei ai, ua tuuina mai e le Alii lenei fautuaga talafeagai ma tumau ia te outou faiaoga: “Ma talu ona ua le i ai i tagata uma le faatuatua, ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.”²

Ua faapitoa lava le faatatauina o lenei mau i le asō ona e le o tamaiti aoga uma e i ai le faatuatua talafeagai e fetaiai ai ma luitau o loo i luma atu ma ona e toatele i latou ua mauaina e ala i le Initoneti ia malosiaga faataumaoi o se lalolagi ua faateleina le matele i le faaletino lea ua fai ma fili o le faatuatua, aiga, ma tulaga faatonuina o le talalelei. Ua salalau atu le Initoneti i le salafa o le lalolagi i le toetoe lava o aiga uma ma i lima ma mafaufau uma o a outou tamaiti aoga.

E mafai ona outou fesoasoani atu i tamaiti aoga e ala i le aoaoina o i latou i le uiga o le tuufaatasia o le suesue ma le faatuatua a o latou aoao. Aoao i latou e ala i le faataitaiina o lenei tomai ma le metotia i le vasega.

Sa matauina e Peresitene Harold B. Lee e faapea:

“Matou te faamanatu atu ia te outou o le mauaina o le malamalama e ala i le faatuatua e le o se ala faigofie lea i le aoaoina. O le a manaomia ai se taumafaiga tele ma se tauiviga faifai pea e ala i le faatuatua. …

I se aotelega, o le aoao e ala i le faatuatua e le o se galuega mo se tagata paie. Sa fai mai se tasi, ona o se taunuuga, o sea faagasologa faapenei e manaomia ai le gagau o le agaga atoa, o le gauai atu o le mafaufau atoa o le tagata ma fesootai atu i le Atua—e tatau ona faia le fesootaiga sa’o. Ua na o le pau lena o le auala e oo mai ai le “malamalama e ala i le faatuatua.’”³

O le malamalama e ala i le faatuatua o le a fua mai ai se molimau manino, ma o se molimau manino e i ai le mana e suia ai olaga, e pei ona faaalia e ni tala se tolu.

Muamua, sa tuua e Phoebe Carter le aiga ina ia potopoto faatasi ma le Au Paia i Ohaio i le vaitau o le 1830. Sa ia ta’ua, “Sa maofa a’u uo i la’u faaiuga, e pei foi ona ou ofo, ae sa i ai se lagona i totonu ia te a’u na uunaia a’u. O le loto faavauvau o lo’u tina i lo’u tuua o le aiga sa toetoe lava a le mafai ona ou lavatia, ma ana le seanoa le agaga na ou lagonaina semanu ou te le alu.”⁴

Sa mulimuli ia Phoebe i le perofeta ma potopoto faatasi ma le Au Paia i Ohaio ma mulimuli ane taunuu i Iuta, i le mea na maliu ai o ia o se tasi faamaoni o le Au Paia o Aso e Gata Ai ma se faletua na paaga tutusa ma lana tane, le Peresitene o le Ekalesia o Uilifoti Uitilafi.

O le isi tala e sau mai le talaaga o le soifuaga o Marion G. Romney.

A o avea ma se tamaititi aoga i le kolisi, sa tonu ia Marion e le mafai ona auauna atu o ia i se misiona ona o tulaga tautupe a lona aiga. I se tasi taimi, sa ia faalogo ai ia Elder Melvin J. Ballard o saunoa. O loo tusia i le talaaga o le soifuaga e faapea, “Sa lilo i manatu [o Marion] o le savaliga o lona olaga, i se taimi puupuu lava, o le a suia atoa ai lava [lona olaga].”

E faaauau pea le tala: “Sa tau atu e le [tama o Marion] i lana fanau … e matua tele lava le eseesega i le va o se tagata e ola i lalo o musumusuga a le Agaga ma le tagata e le ola ai, e pei lava o se eseesega i le va o se laau o loo ola ma se pogati pala. Ma o le taimi muamua lena … na malamalama atoatoa ai Marion i le [uiga] o le i ai i lalo o le uunaiga a musumusuga. Sa faatumulia e se lagona ootia ma matuitui lona loto. … Sa lei ootia lava o ia i se taimi muamua e pei o lea taimi, a o faalogo atu i upu a lenei Aposetolo sili ona fou i lena taimi. …

Sa matuai faaosofia … le taulealea o Marion. O le susulu mai o fofoga o le Aposetolo ma le faamaoni o lana molimau na faatumulia ai o ia i se manao le mafaafitia e alu i se misiona. … Sa ia iloaina o ana fuafuaga mo nisi aoaoga e tatau ona tolopoina.”⁵

Sa lei pine, ae malaga atu Marion i Ausetalia, lea sa ia auauna atu ai ma le faamaoni. Mulimuli ane, sa avea o ia ma se Aposetolo malosi ma se uso o le Au Peresitene Sili.

O le tala mulimuli sa faamatalaina e Peresitene Boyd K. Packer e uiga i se aafiaga sa faia e se faiaoga matua ia William E. Berrett. O le faiaoga, o se tagata liliu mai mai Nouei, sa le lelei tele ona tomai i le gagana FaaPeretania. Ae ui i tapulaa o lea faiaoga, ae sa ta’ua e Peresitene Packer e faapea “[Sa] molimau atu Uso Berrett e sili atu ma le faatasi, ‘E mafai ona faamafanafanaina o tatou lima i le afi o lona faatuatua.’”⁶

Mulimuli ane, sa avea William ma faauluuluga o seminare, inisitituti ma a’oga a le Ekalesia.

Mo Phoebe, Marion, ma William, o le faalogo atu i se molimau manino na avea ma pogai na suia ai o latou olaga e faavavau. E mafai foi ona moni lea mea mo a outou tamaiti aoga. Peitai, i le tulaga moni o le lalolagi i aso nei, atonu o le a le lava ai le molimau manino i taimi uma. Sa mama ma paia Phoebe, Marion, ma William ma sa saoloto mai ponokalafi ma mea faalelalolagi, a o aoaoina ai i latou e faifeautalai musuia, faiaoga, ma taitai. Sa faigofie ona ulufia e le Agaga o latou loto agavaivai ma mama.

O aso nei, ua matua ese lava le tulaga ua i ai, ona o nisi o a outou tamaiti aoga ua aafia i ponokalafi ma mea faalelalolagi a o lei oo mai i a outou vasega.

Sa na o se tupulaga e tasi talu ai sa faatapulaaina ai le mauaina e a tatou talavou o faamatalaga e uiga i lo tatou talafaasolopito, aoaoga faavae, ma faiga masani mai punaoa na lolomiina e le Ekalesia. Sa toaitiiti lava ni nai tamaiti aoga na mauaina nisi faauigaga mai isi auala. Sa tele lava ina ola o tatou talavou i se olaga malupuipuia.

O a tatou mataupu aoaoina i lena taimi, e ui sa lelei ona faamoemoega, ae sa lei sauniaina ai tamaiti aoga mo aso nei—o se aso ua maua vave ai e tamaiti aoga toetoe lava o mea uma e uiga i le Ekalesia mai manatu uma talafeagai. O le asō, o mea latou te vaaia i luga o a latou tamai masini feaveai e foliga mai e luitauina ai le faatuatua e pei foi ona siitiaina ai le faatuatua. E toatele o tatou talavou ua masani tele i le Google i lo le talalelei, ua toatele atu ua gauai atu i le Initoneti i lo musumusuga, ma ua toatele atu ua aafia i le Facebook i lo le faatuatua.

I le tulaga o nei luitau, sa faamaonia talu ai nei e le Fono Faatonu o A’oga se galuega taimua i seminare ua ta’ua o le Taulotoina o Aoaoga Faavae. I le fausia ai mai mea ua uma ona faia i le taulotoina o mau, o le a taulai atu ai lenei galuega taimua fou i le fausiaina ma le faamalosia o le faatuatua o a tatou tamaiti aoga ia Iesu Keriso ma le faamausaliina o i latou i se tomai faateleina ia ola ma faaaoga le talalelei i o latou olaga. O le taaina atu i tusitusiga paia ma upu a perofeta, o le a latou aoaoina ai le auala e faatino ai le faatuatua ia Keriso e maua ai le iloa faaleagaga ma le malamalamaaga e uiga i Lana talalelei. Ma o le a latou maua ni avanoa e aoao ai pe faapefea ona faaaoga le aoaoga faavae a Keriso ma mataupu faavae o le talalelei i fesili ma luitau latou te faalogo ma vaai i ai i aso uma i a latou uo ma luga o ala faasalalau o agafesootai.

O lenei galuega taimua ua musuiaina ma talafeagai lelei. O le a i ai se faatosinaga matagofie i o tatou talavou. Peitai, o le tulaga manuia o le Taulotoina o Aoaoga Faavae, atoa ai ma isi uma polokalama o suesuega i le OAE, o le a faalagolago lea i se faaopoopoga taua ia te outou.

I le tulaga o nei luitau, o a ni ou avanoa ma ni tiutetauave o ni faiaoga o le OAE i le seneturi 21? E manino lava, e tatau ona e alofa i le Alii, Lana Ekalesia, ma au tamaiti aoga. E tatau foi ona e tuu atua foi se molimau manino ma le faamaoni ma fai soo. Ma le isi, ua sili atu i lo se isi lava taimi i lo tatou talafaasolopito, ua manaomia ai foi e a outou tamaiti aoga ona faamanuiaina e ala i le aoaoina o anotusi ma talaaga faaleaoaoga faavae ma talafaasolopito e ala i le suesue ma le faatuatua e faafeao e le molimau manino ina ia mafai ai ona latou lagonaina se liuga faatagata matua ma tumau i le talalelei ma se tuuto atu i le olaga atoa ia Iesu Keriso. O le liuga faatagata matua ma tumau o lona uiga o le a latou “nonofo i totonu o le vaa ma pipii mau” i lo latou olaga atoa.⁷

Mo oe ia malamalama i anotusi ma talaaga faaleaoaoga faavae ma talafaasolopito o tusitusiga paia ma lo tatou talafaasolopito, o le a manaomia ona e suesue mai “tusi e sili ona lelei,” e pei ona faatonuina ai e le Alii. O “tusi e sili ona lelei” e aofia ai tusitusiga paia, o aoaoga a perofeta ma aposetolo o aso nei, ma suesuega faaleatamai sili ona lelei a le Ekalesia o loo maua. E ala atu i au oe lava taumafaiga filiga e aoao e ala i le suesue ma le faatuatua, o le a e mafai ai ona fesoasoani i au tamaiti aoga e aoao ni tomai ma ni uiga e talafeagai e tuueseese ai faamatalaga faatuatuaina ia o le a siitia ai i latou i luga ma upumoni le atoatoa ma faauigaga le sa’o o aoaoga faavae, talafaasolopito, ma faiga masani ia o le faatoilaloina ai i latou.

Aoao i latou e uiga i luitau latou te fetaiai pe a faalagolago i le Initoneti e taliina ni fesili o mea e i ai le taua e faavavau. Faamanatu ia i latou e lei fai mai Iakopo, “Afai ua leai se poto i so outou, ina ole atu ia i le Google!”⁸

O tagata atamamai e le faalagolago i le Initoneti ia iloaina ma togafitia ni luitau faalelagona, faalemafaufau, ma faaletino o le soifua maloloina, aemaise lava i luitau e lamatia ai le ola. Ae, latou te saili atu i tagata atamamai o le soifua maloloina, o e ua aoaoina ma laiseneina e fono faatonu faamamaluina faafomai ma faalesetete. E oo foi i na vaega, o tagata atamamai e saili atu lava i se manatu lona lua.

Afai o le ala talafeagai lea e fai e maua ai ni tali mo ni faafitauli faalelagona, faalemafaufau, ma faaletino o le soifua maloloina, e sili atu ona talafeagai pe a oo ina lamatiaina le ola e faavavau. A i ai i se mea le gafatia e taufaamatauina lo tatou olaga faaleagaga, a tatou sootaga sili ona taua faaleaiga, ma lo tatou auai ai i le malo, e tatau ona tatou saili ni taitai mafaufau ma faatuatua e fesoasoani ia i tatou. Ma, pe afai e talafeagai ai, e tatau ona tatou talosagaina i latou e i ai se aoaoga faaleatamai talafeagai, potomasani, ma tomai faapitoa mo se fesoasoani.

O le mea tonu lea ou te faia pe a ou manaomiaina se tali i au lava fesili e le mafai ona ou taliina e au lava ia. Ou te sailia le fesoasoani mai la’u Usoga i le Korama a le Toasefululua faapea ai ma isi e i ai ni tomai faapitoa i matata o talafaasolopito ma aoaoga faavae a le Ekalesia.

E tatau ona avea oe ma tagata muamua, i fafo mai o aiga o au tamaiti aoga, e faailoa atua puna faapoloaiga i autu atonu e itiiti se iloaina pe feteenai ina ia mafai e au tamaiti aoga ona fuatiaina soo se mea latou te faalogo i ai pe faitau i ai e faatusatusa mulimuli ane i mea ua e aoaoina ai i latou.

Ua outou silafia tatou te tuu atu ni puipuiga faafomai i a tatou faifeautalai pele a o lei auina atua i latou i misiona ina ia mafai ona puipuia i latou mai faamai e ono aafia pe faaumatia ai i latou. I se faiga faapena, faamolemole ae tou te lei auina atua i latou i le lalolagi, ia puipuia au tamaiti aoga e ala i le tuuina atu i ai o faaliliuga faamaoni, atamai, ma saolele o aoaoga faavae o le talalelei, o tusitusiga paia, lo tatou talafaasolopito, ma autu na e malamalama sese i ai i nisi taimi.

E fia ta’ua ni nai autu ia e itiiti le iloaina pe feteenai, ou te talanoa e uiga i le tele o ava, maa a tagatavaai, o tala eseese e uiga i le Uluai Faaaliga, le faagasologa o le faaliliuga o le Tusi a Mamona po o le Tusi a Aperaamo, faafitauli o itupa, ituaiga ma le perisitua, po o se Tina Faalelagi.

O taumafaiga ia saunia lelei a tatou talavou o le a pa’u atu pea ia te outou faiaoga o le OAE. Faatasi ai ma na manatu i mafaufau, saili se taimi e mafaufau ai i ou avanoa ma ou tiutetauave.

Ua matua silafia atoatoa e taitai o le Ekalesia i aso nei lo tatou mauaina lē faatapulaaina o faamatalaga, ma o loo tatou faia ai ni taumafaiga tulagaese ia saunia anotusi ma malamalamaaga maoti o aoaoga o le Toefuataiga. O se faataitaiga sili lava o lenei taumafaiga, o tala o Autu o le Talalelei e 11 (11 Gospel Topics) o loo i le LDS.org o loo maua ai ni faauigaga paleni ma faatuatuaina o mea moni mo mataupu feteenai ma lē masani ai e faatatau i le Ekalesia.

E taua lou iloaina o anotusi i nei tala e pei o lou iloaina o lou tuālima. Afai e i ai ni au fesili e uiga i na mea, faamolemole fesili i se tasi ua suesueina ia mea ma malamalama i ai . I ni isi upu, “saili i le aoaoina, e ala lava lea i le suesue ma le faatuatua foi” a o e taulotoina le anotusi o nei tala.

E tatau foi ona e masani i le uepisaite o le Joseph Smith Papers ma le vaega o le talafaasolopito o le Ekalesia i le LDS.org ma isi punaoa ua saunia e tagata atamamai faamaoni o le Ekalesia.

O le taumafaiga mo le suesueina lautele o le talalelei ma le puipuiga faaleagaga e ala i se suesuega magafagafa o le aoaoga faavae ma le talafaasolopito, e vaavaalua ma se molimau ola, o le vaifofo aupito sili lea ua tatou maua e fesoasoani ai i tamaiti aoga ia aloese ai pe taulimaina ai foi ni fesili po o se masalosalo po o ni lamatiaga o le faatuatua atonu latou te fetaiai i lenei vaitau o faamatalaga.

A o totogiina e outou o faiaoga le tau ia malamalama atili ai i lo tatou talafaasolopito, aoaoga faavae, ma faiga masani—ia sili atu i lo le taimi nei—o le a outou saunia e tuuina atu ni tali magafagafa, faaeteete, ma musuia i fesili a a outou tamaiti aoga.

O se tasi ala e iloa ai po o a fesili o loo i ai i au tamaiti aoga o le faalogo atu lea ma le totoa ia i latou.

O le ma teineitiiti muamua lava, ina ua lima ona tausaga, sa ‘a’e mai i luga o o’u vae a o faitauina la’u nusipepa. Sa ia tau mai ia te au se mea na taua ia te ia, ae sa ou lei gauai atu ia te ia. O lea sa aapa mai ai ona tamai lima, toso atu i lalo le nusipepa, uu atu ou foliga i ona lima, ma pulatoa mai i ou mata, ma fai mai, “Tama, e te le o faalogo mai ia te au!” Sa sa’o o ia—ma sa ou sese i le le faalogo atu ia te ia. O faiaoga lelei uma e tatau ona avea ma ni tagata e faalogo lelei.

E faaopoopo i le faalogo atu i au tamaiti aoga, ia uunaia i latou i le vasega po o ni taimi patino taitoatasi e fai atu ni fesili ia te oe e uiga i soo se autu lava.

O se tasi o fesili aupito sili ona taua e mafai ona fesili ai au tamaiti aoga o le “Aisea?”

A tatou fesili atu ma se manaoga faamaoni ia malamalama, [ona avea lea] o le “Aisea?” ma se fesili maoae. O le fesili lea e mananao faifeautalai e fesili ai a latou tagata sailiili. Aisea ua tatou i ai iinei? Aisea e tutupu ai mea leaga i tagata lelei? Aisea e tatau ai ona tatou tatalo? Aisea e tatau ai ona tatou mulimuli ia Keriso? O le tele lava o le taimi o le fesili “aisea” e taitai atu ai i musumusuga ma faaaliga. O le iloaina o le fuafuaga o le faaolataga a lo tatou Tama Faalelagi o le a fesoasoani lea e taliina le tele o fesili “aisea.” O le a ou talanoa atu atili i lenei mea i ni nai minute.

O le tasi matauga mulimuli lenei e uiga i le taliina o fesili. E taua le aoao atu o au tamaiti aoga e faapea e ui e maua i le talalelei le anoanoai, a leai o le tele, o tali i le tele o fesili taua o le olaga, ae o nisi fesili e le mafai ona taliina i le olaga faaletino ona tatou te le mauaina faamatalaga manaomia mo ni tali talafeagai. E pei ona tatou aoaoina i le Iakopo: “Faauta, ua silisili ma ofoofogia galuega a le Alii. Ua le masuesueina lava le loloto o ana mealilo, ma e le mafai e le tagata ona iloa ona ala uma. Ma e leai se tasi na te iloa ona ala vagana ai ua faaalia ia te ia.” ⁹

O se upu lenei o le lapataiga: Faamolemole ia iloa atonu e oo ina e talitonu, e pei o le toatele o au tamaiti aoga, o oe o se tagata tomai faapitoa o tusitusiga paia, aoaoga faavae, ma le talafaasolopito. O se suesuega talu ai nei sa faaalia ai e faapea o le “faateleina lava o le manatu o tagata latou te iloaina ia autu o le faateleina foi lena o lo latou manatu ua tele atu lo latou malamalama i lo mea latou te iloaina, e oo lava i le tulaga latou te manatu sese ai ua iloa ni mea ae le moni, atoa ai ma faamatalaga sese.”¹⁰

O lenei faaosoosoga o le “manatu ua iloaina mea uma,” e tatau lava ona outou aloese mai ai faiaoga o le OAE. E sa’o atoatoa le faapea atu, “Ou te le iloa.” Peitai, o le taimi lava e te fai atu ai lena tala, ua ia te oe se tiutetauave e saili ni tali aupito sili e te mafaia i ni fesili magafagafa e fesili ai au tamaiti aoga.¹¹

I le aoaoina ai o au tamaiti aoga ma le tali atu i a latou fesili, se’i ou lapataia outou ia aua nei faasoa atua ni tala e te faamoemoe e siitia ai le faatuatua ae le o faamaonia e moni, po o ni malamalamaaga ma ni faamatalaga ua leva o a tatou aoaoga faavae ma faiga masani mai le tuanai. E atamai lava le faia o se faiga masani le suesueina o upu a perofeta ma aposetolo soifua; ia lava lou iloa i mataupu o loo i ai nei i le Ekalesia, aiaiga faavae, ma faamatalaga e ala i le mormonnewsroom.org ma le LDS.org; ma faailoa galuega a tagata atamamai, faamamaluina, ma mafaufau ma le faamaoni o le Ekalesia e faamautinoa ai e te le o aoao atua ni mea lē moni, mea ua pāsiā, pe le talafeagai, ma tulagaese.

O tusitala na faia suesuega i “manatu ua iloa mea uma” sa matauina e faapea “o se lagona ua iloa mea uma, aemaise lava i tagata atamamai ua manatu ua latou iloa mea uma, e mafai ona faalotovaivaia moni ai lava isi tagata mai le a’otauina o i latou lava i vaega patino ia ua latou manatu ua latou iloaina.”

Sa matauina e le sui peresitene atamai o le BYU e faapea, “O le avea ma se tagata atamai i se mataupu e mafai ona matua faafiafiaina aemaise lava pe a gauai mai tamaiti aoga ma tagata faigaluega i mea uma tatou te fai atu ai. Peitai, a aunoa ma se tuuto loloto e faaauau pea le aoaoina o le a tatou pa’u’u atu i le manatu ua tatou iloa mea uma, ma e leai ma se tasi e fiafia i se tagata e manatu na te iloaina mea uma.’”¹²

Ou te toe ta’u atu le lapataiga a Peresitene Hinckley, “Ia tatou matua faaeteete. E tatau ona tatou mataala ia tatou le o ese mai [le ala].”¹³

E faaopoopo atu i le avea ai ma tagata aoao i le olaga atoa, e tatau foi ona e faia mea na i lou lava olaga patino ia e faatagaina ai le Agaga Paia e galue i totonu ia te oe. O na mea e manaomia ona e faia e aofia ai tatalo faamaoni i aso uma, anapogi faamaoni, suesuega faisoo ma le mafaufau loloto i tusitusiga paia ma upu a perofeta soifua, faia o le aso Sapati ma aso fiafia, taumafa i le faamanatuga ma le lotomaualalo ma manatua pea le Faaola, tapuaiga i le malumalu i le tele e mafai ai, ma le mea mulimuli, aapa atu i e le tagolima, matitiva, ma tuuatoatasi—i tagata uma e lata atu ma ē i le lalolagi atoa.

Ina ia faataunuuina ou avanoa ma tiutetauave ma le talafeagai, faiaoga pēlē, e tatau ona e faatinoina mea o loo e aoao atua!

Ia lototele e saili atu i fautuaga ma faasa’oga mai ia i latou e te faatuatuaina—o se toalua, o taitai perisitua, po o supavaisa. Fesili ia i latou po o fea e mafai ona e faaleleia i le avea patino o oe ma soo. E taua patino lenei mea mo tatou aufaigaluega tumau, i latou o loo totogiina i tupe paia o le sefuluai a le Ekalesia. E tatau ona e aloese mai soo se mea na te tulieseina le Agaga.

Ma le isi, ia fai soo sau oe lava ia faatalanoaga patino ma oe lava ia i nisi taimi ma iloiloina le 2 Nifae 26:29–32, Alema 5:14–30, ma le Mataupu Faavae ma Feagaiga 121:33–46 O le a fesoasoani lena e faailoa ituaiga o faaosoosoga atonu o loo tatou feagai uma ai. Afai e manaomia ona suia se mea i lou olaga, ona faia lea o se faaiuga ia foiaina.

Aloese mai le faaosoosoga o le fesiligia o faamoemoega o e tou te galulue faatasi. Ae, ia tagai toto’a i lou lava loto ma sailiili ou lava manaoga ma faamoemoega. Ona faatoa mafai lea e le Faaola ona suia lou loto ma faaogatusa ou lava manaoga ma faamoemoega faatasi ma Lona [finagalo].

O le tupulaga faiae o le Meleniuma e manaomia ona iloaina, malamalama, taliaina, ma auai i le fuafuaga o le faaolataga a le Atua. O le malamalama i le fuafuaga o le a latou maua ai se malamalamaaga paia latou te tagai ai ia i latou lava o ni atalii ma ni afafine o le Atua, lea e maua ai se vaaiga e malamalama ai toetoe lava i aoaoga faavae uma, faiga masani, ma aiaiga faavae o le Ekalesia.

I le avea ai ma faiaoga o le OAE i le asō, e manaomia ona e taliaina le avanoa ma le tiutetauave e aoao tagata Meleniuma o le seneturi 21 i mataupu faavae sa’o e uiga i le fuafuaga, e aofia ai le aoaoga faavae o le faaipoipoga na faamaonia mai le lagi ma le matafaioi o le aiga e pei ona faamatala mai i le folafolaga i le aiga.¹⁴

O le aoaoga favae o le faaipoipoga e faavavau ma le aiga o se vaega taua o le fuafuaga o le fiafia a le Atua. E aofia ai o tatou lava aiga ua faamauina i le malumalu o se vaega o le aiga e faavavau a le Tama Faalelagi lava Ia i le malo selesitila. Ona e fesootai tonu lava i Lona lava aiga ma i Ana lava fanau agaga, ua aoaoina ai i tatou i le Kenese e faapea “na foafoaina e ia o le tane ma le fafine” ma Ia poloaiina Atamu le Tama ma Eva le Tina ia “fanafanau ma faatumuina le lalolagi.”¹⁵

Ua faamatalaina o le fuafuaga o le fiafia e amata ma faaiu i le aiga. O le mea moni, o le amataga o le aiga sa amata i le muai olaga, lea sa tatou nonofo ai o ni tagata o le aiga o o tatou Matua Faalelagi. Ma i le faaiuga, o tautinoga i totonu o le aiga ma mafutaga alofa o le a le gata e faaauau pea ona i ai ae faapena foi ona uluola e ala i le faagasologa o le foafoaga.¹⁶

O le vaega taua lea e fesootai ai mea uma—lea e faalagolago i ai le fuafuaga a le Atua ma lo tatou lava taunuuga ma lea e faalagolago foi i ai isi mea uma—o lo tatou Faaola o Iesu Keriso. O Lana taulaga togiola ua mafai ai mea uma lava, e aofia ai ae le faatapulaaina, se faaipoipoga e faavavau alofa ma fetausiai atoa ai ma le aiga.

Ua aoao i tatou e le Alii e leai se tagata nofotoatasi, e tusa lava pe amiotonu, e mafai ona mauaina mea uma ua i ai i lo tatou Tama Faalelagi mo Lana fanau. O se tagata toatasi ua na o le afa o le mea e manaomia, e le mafai ona uluola ae mafai ona nofo i le tikeri sili ona maualuga o le malo selesitila.¹⁷

E manaomia e au tamaiti aoga ona malamalama o le faamoemoega o le olaga faaletino o le avea atili lea e pei o le Atua e ala i le mauaina o tino faaletino, faaaogaina o le faitalia, ma le faataunuuina o matafaioi ia sa na o o tatou Matua Faalelagi na faia—matafaioi o le tane, ava, ma matua.

Ua faamauitnoa mai e perofeta o i latou uma e agavaa ma faalagolago ia Iesu Keriso ae e le o mafai ona faamauina i se soa pe maua foi se fanau i lenei olaga e mafai ona maua na avanoa i le lalolagi a sau.

Aoao a tatou talavou e faapea i totonu o le Ekalesia a le Alii, o loo i ai se avanoa mo tagata uma e tapuai, auauna atu, ma tuputupu ae faatasi ai o ni uso ma ni tuafafine i le talalelei. Faamanatu atu ia i latou le mea na aoao mai e Liae, o le sini ma le faamoemoe o le Atua mo Ana fanau uma e mafai ona otooto atu faapenei: “Na pa’u Atamu ina ia i ai tagata; ma ua i ai tagata, ina ia latou maua le olioli.”¹⁸

E finagalo le Atua ia tatou taliaina Lana faauigaga o le faaipoipoga ma usitaia Lana uluai poloaiga ia “fanafanau ma faatumuina”—e le gata ia faataunuuina Lana fuafuaga ae ia maua foi le olioli lea na mamanuina ai Lana fuafuaga e tuu atu i Ona atalii ma afafine.

E le na o tagata o le Ekalesia e iloaina lenei mataupu faavae. Sa matauina foi e le tusitala o le New York Times o David Brooks e faapea, “E le lelei atu tagata pe a tuu i ai se saolotoga faaletagata sili atu e fai ai mea latou te mananao i ai. E lelei atu i latou pe a tuu i ai ni tautinoga e sili atu i lo a latou lava filifiliga faaletagata lava ia—tautinoga i le aiga, Atua, matata faalegaluega ma le atunuu.”¹⁹

I le avea ai ma ni faiaoga o le Ekalesia, fesoasoani i a tatou talavou ia maua se malamalamaaga manino e uigai le fuafuaga o le fiafia a le Atua lea e oo mai ai le olioli moni i Ana fnaau. Fesoasoani ia i latou ia iloa, talia, ma auai [i le fuafuaga], ma puipuia. Mai o’u aafiaga o le 40 tausaga o se Pulega Aoao, o loo ou popole lava i le toatele o o tatou tagata o le Ekalesia, talavou ma matutua, e le o malamalama lava i le fuafuaga mo lo latou taunuuga paia e faavavau.

O lea la, a’u uo faiaoga, e tatau ona tatou tagai ma faatauaina nei avanoa e faamalamalama ai faaleaoaoga faavae ma faaleagaga, pe aisea tatou te talitonu ai o le malamalama i le fuafuaga sili o le fiafia a le Atua o le a taliina le tele o fesili “aisea” atonu e fesiligia ai i tatou. O le faailoaina atu o lo tatou talitonuga i se muai olaga i le mea sa tatou ola ai o ni fanau agaga a se Tama Faalelagi ma se Tina Faalelagi ua mafai ai ona tatou faamalamalama atu le mafuaaga na foafoaina ai lenei lalolagi. O le tasi faamoemoega taua o le olaga faaletino o le mafai lea ona tatou toe faia lea lava aafiaga faaleaiga e i tatou lava, ae o le taimi la lenei o ni matua nai lo le na o le avea ma fanau. Ia faapelepele i lou malamalamaaga autu o le aoaoga faavae ma le faamoemeoga o le fuafuaga a lo tatou Tama Faalelagi mo lo tatou fiafia e faavavau. Ma faaauau pea ona aoao atu.

I le faaiuga la ma le otootoga: Mai le saunoaga a Elder Kim B. Clark na muamua atu i lenei afiafi ua tatou aoao ai o outou o faiaoga na auina mai le Atua, ua faatumulia i le faatuatua, faamoemoe, lotomaualalo ma le alofa.²⁰

O manatu nei na ou faasoa atua ia te outou:

Aoao tamaiti aoga ia tuufaatasi le aoaoina e ala i le suesue ma le faatuatua ma le molimau manino. Aoao i latou ia nonofo i totonu o le vaa ma pipiimai!
Aoao tamaiti aoga ia pulea a latou masini feaveai ma taulai atu ia fesootai atili i le Agaga Paia nai lo le Initoneti.
Puipuia tamaiti aoga i upumoni o le fuafuaga o le faaolataga o loo maua i le talalelei a Iesu Keriso.
Ia taulotoina le anotusi o tala o Autu o le Talalelei.
Manatua o le “Aisea?” e mafai ona avea ma se fesili maoae e taitai atu i le malamalamaaga o le talalelei.
Aua e te manatu e te iloaina mea uma ma aua le fefe e fai atu, “Ou te le iloaina.”
Avea ma tagata e aoao i le olaga atoa.
Saili atu i fautuaga ma faasa’oga mai ia i latou e te faatuatuaina.
Mafaufau e faia mai lea taimi i lea taimi sau oe lava ia faatalanoaga patino e toeiloilo ai au sauniuniga faalealagaga, lou filiga, ma lou mataalia.
Aoao atu o le fuafuaga o le fiafia e amata ma faaiu i le aiga. Ia manatua le fuafuaga o le faaolataga i taimi uma.
Aoao atu o le faaipoipoga ma le aiga e aumaia le olioli tumau.
Manatua, o le tuufaatasia o le aoaoina e ala i le suesue, e ala i le faatuatua, ma e ala i le molimau manino e aumaia le liuaina moni ma le tumau faavavau.
E sili atu i lo mea uma, o le faatuatua malosi i le Togiola a le Alii o Iesu Keriso e taua mo lo tatou malosi ma le tuputupu ae.

O lenei, a’u uo pele o faiaoga, ia faamanuia e le Atua outou uma taitoatasi. Po o le a lava se avega o loo e tauaveina, ia aveesea. Ia outou maua le olioli ma le filemu lea e sau mai le iloaina e ala i a outou aoaoga ua outou pa’i atu i se ola, ua outou siitia se tasi o fanau a le Tama Faalelagi i lana faigamalaga lea e i ai se aso na te toe opomauina ai i Lona afioaga. Ou te tuu atu ia te outou la’u tautinoga ma la’u molimau ua ia i tatou le atoaga o le talalelei e faavavau a Iesu Keriso e pei ona toefuataiina mai e ala mai i le Perofeta o Iosefa Samita. O le atoaga o le talalelei ua i ai lea i o tatou lima. E tatau ona tatou avatua i o tatou mafaufau ma i o tatou loto ma aoao atu i le mana. Ia faamanuiaina i tatou uma taitoatasi e le Atua, o la’u tatalo faamaualalo lea ma faamanuiaga, i le suafa o Iesu Keriso, amene.

© 2016 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 12/15. Faamaonia le faaliliuga: 12/15. Faaliliuga o le “The Opportunities and Responsibilities of CES Teachers in the 21st Century.” Samoan. PD60001102 890