Na Rarama kei na Vu ni Bula kei Vuravura
Na itukutuku kilai levu ka vakaciriloloma duadua me baleta na sucu ni iVakabula ena kunei ena ikarua ni wase ni Luke ena Veiyalayalati Vou. Au dau vakasinaiti ena vakavinavinaka ena veigauna yadua au wilika kina me baleti Josefa kei Meri ena nodrau ilakolako ki Peceliema, na valenimanumanu lolovira, na sucu vakaciriloloma ni Turaga o Jisu Karisito, kei ira na agilosi era kauta voli na “itukutuku vinaka mo dou reki vakalevu kina … kei ira kecega na tamata” (Luke 2:10).
Na kena Vakalesui mai na kosipeli ena gauna e muri oqo sa vakarautaki kina e dua na itukutuku veitokani bibi ni nona sucu na iVakabula ena iVola i Momani. Na noqu itukutuku e vakavotuya mai na ikuri ni ivakamacala oqo ni imatai ni Siganisucu. Ni da vakasamataka vata na iwase ni italanoa oqo, kemuni na taciqu kei na ganequ, au sureti kemuni mo ni raitayaloyalotaki kemuni ena veika a yaco oqo ka kakua ni rogoca walega na vosa.
Au masuta me vukei kemuni na Yalo Tabu mo ni vakatauvatana na ivolanikalou oqo vei kemuni kei na nomuni matavuvale (raica na 1 Nifai 19:23) ka vakasinaita na yalomuni ena yalo dina ni Siganisucu.
Samuela na Leimani
Na noda itukutuku e tekivu ena vanua o Saraemala ni vo e vica na yabaki me sucu na iVakabula. A lako maliwai ira na tamata o Samuela na Leimani me vunautaka na veivutuni ka parofisaitaki Karisito. Yalovinaka tovolea mo raitayaloyalotaki iko ni o se qai yabaki 10 ka dua vei ira na lewevuqa era vakarorogo tiko vua e dua na parofita ni Kalou ni tukuna tiko na veika e se bera ni yaco.
A vunautaka o Samuela: “Raica, au sa tukuna vei kemudou e dua na ivakatakilakila; ena oti mada e lima na yabaki ena qai lako mai na Luve ni Kalou me vakabulai ira sa vakabauta na yacana.
“Ia sa vakaoqo na ivakatakilakila ni nona lako mai kau sa tukuna vei kemudou; ena cila mai lagi e dua na rarama levu sara ka na sega kina ni buto na bogi sa sucu kina; ia sa rarama sara ka sa vaka kina na siga vei ira na tamata.
“Ia ena yaco e dua na siga, dua na bogi kei na dua tale na siga me vaka ga e dua na siga ka sega kina na bogi; io oqo sa ivakatakilakila vei kemudou. …
“Raica ena cila mai e dua na kalokalo vou… ; oqo talega sa ivakatakilakila vei kemudou (Ilamani 14:2–5).
Nona Sucu na iVakabula
Ni sa toso na gauna, “sa vakayacori sara kina na veika era a yalataka na parofita; a sa rairai na ivakatakilakila ka vakayacori e vuqa na cakacaka mana vei ira na tamata” (3 Nifai 1:4).
Vakatayaloyalotaka mada ni sa sivi e lima na yabaki ka o sa yabaki 15 oqo. Se rawa ni o nanuma vinaka tiko na parofisai nei Samuela ni o vakasamataka na ituvaki ni bula o donumaka tu ena gauna oqo.
“A ra sa kaya eso na tamata ni sa oti na gauna me vakayacori kina na ka a yalataka o Samuela na Leimani.
“Era sa vakalialiai ira na wekadra ka kaya: Raica sa oti na gauna ka sega ni yaco na ka a yalataka ko Samuela; ia sa mate wale na nomuni vakabauta kei na nomuni namaka na veika oqo.
“A ra sa veitukutukunitaka yani me robota na vanua taucoko; era sa rarawa kina ko ira sa vakabauta, de sega ni yaco dina na veika sa yalataki tu.
“Ia era sa namaka toka ga na dua na siga, dua na bogi ka dua tale na siga ka sa yaco me vaka ga e dua na siga ka sega kina na bogi, me ra kila kina ni sa sega ni mate wale na nodra vakabauta.
“Era sa lokuca ko ira sa tawa vakabauta e dua na siga me ra na vakamatei kina ko ira sa vakabauta na ivakavuvuli ko ya, kevaka e sega ni rairai mai na ivakatakilakila sa yalataka tu ko Samuela na parofita” (3 Nifai 1:5–9).
Kemuni na taciqu kei na ganequ e rawa beka ni da sa tekivu ciqoma se na vakaivei beka me da waraka na ivakatakilakila ni Nona lako mai kei na noda sa na rawa talega ni vakamatei? Ena rawa beka vei kedaru me daru tudei tu ena vakabauta, se daru na yavalati ka kino yani?
Sa qai soli dina mai na ivakatakilakila ni sucu i Karisito ka a tukuna tu ko Samuela. Ena dua na draki ni veivakacacani vakalotu ena yabaki gone ni 15, o qoroya ena dua na bogi ni sa dromu yani na matanisiga ka sega ni lutu mai na buto.
“A ra sa kurabui na tamata ni sa sega ni butobuto ena gauna sa bogi kina na vanua . …
“A ra sa kila sa voleka ni yaco mai na Luve ni Kalou; io, … ko ira kece na tamata … era sa bale sobu ki na qele ena levu ni nodra kidroa. …
“A sa sega ni butobuto ena bogi ko ya ka sa rarama me vaka ga na sigalevu tutu. A sa cabe tale na matanisiga ena mataka ka dua me vaka ga na kena ivakarau; ia me vaka na ivakatakilakila sa tukuni oti tu, era sa kila ni sai koya na siga sa sucu kina na Turaga.
“Ia sa yaco na veika kece sara era a sa tukuna oti tu na parofita.
“A sa rairai talega mai e dua na kalokalo vou me vaka sa tukuni tu” (3 Nifai 1:15, 17, 19–21).
Na siga a sucu kina ko Jisu e siga ni veivueti ena Vuravura Vou. Na rarama me vaka ni ivakatakilakila ni nona sucu na iVakabula sa vakabulai ira.
Nona Mate kei na Tucaketale na iVakabula
Ia, kemuni na taciqu kei na ganequ mo ni raitayaloyalotaka mada ni sa sivi e 30 na yabaki ka sa voleka ni yabaki 50. O se nanuma vinaka tikoga na ivakavuvuli nei Samuela kei na veika o kila ni o yabaki tinivakacaca ena gauna e soli mai kina na ivakatakilakila ni sucu ni Turaga.
E dua na ivakatakilakila ni mate nei Karisito sa tukuna oti tu o Samuela sai koya na tolu na siga ni butobuto (raica na Ilamani 14:27; 3 Nifai 8:3).
“A sa ubia na dela ni vanua taucoko e dua na butobuto loaloa, ka rawa vei ira era bula mai kina me ra vakila na cawa ni butobuto;
“Ia sa butobuto kecega na vanua ka sega ni rawa me vakacaudrevi na buka, se kadrala se cina; sa sega talega ni vakawaqaci rawa na buka … , a sa sega na rarama e kunei rawa;
“Ia sa sega tale ni laurai e dua tale na rarama se bukawaqa se dua na rarama lailai, na matanisiga se vula se kalokalo, ena vuku ni butobuto loaloa sa ubia tu na vanua taucoko.
“Ia sa butobuto tu na vanua ka sega na rarama me kunei ena tolu taucoko na siga;” (3 Nifai 8:20–23).
Ena vakaivei beka kevaka eda sotava na tolu na siga ni butobuto sega ni tukuni rawa vakaoya ka oti, ena dua na gauna lekaleka, qai soqoni vata kei ira e 2,500 na tamata ena valetabu e Vanuasautu? E rawa beka ni o raica na vakaturaga ni gauna oya ni sa siro sobu mai lomalagi na iVakabula ka kaya, “Raica koi Au ko Jisu Karisito. … koi Au na rarama kei na vu ni bula kei vuravura”? (3 Nifai 11:10–11; vakaikuritaki).
Ena vakasoqoni talei oqo ena Valetabu, e rua na malanivosa taumada a vakayagataka na iVakabula me vakamacalataki Koya kina “na rarama.” A parofisaitaka o Samuela e dua na ivakatakilakila ni rarama. A soli na ivakatakilakila ni rarama ena sucu ni iVakabula. Vei ira na lewevuqa era a vakasoqoni, sa vakaseyavutaki na butobuto rerevaki kei na taqaya mai vua na rarama dina, io o Jisu Karisito.
Na itukutuku ni imatai ni Siganisucu ena iVola i Momani e vukei keda me da vulica ka kila vakavinaka cake ni o Jisu Karisito na “rarama ka a cilava na butobuto” (raica naV&V 10:57–61). Ena veigauna kece ni noda bula, ena veituvaki kece ni bula eda sotava, kei na veibolebole kece e tu e matada, o Jisu Karisito na rarama ena vakaseyavutaka na rere, solia na veivakadeitaki kei na veidusimaki, ka vakavurea na vakacegu tudei kei na reki.
E vuqa na noda ivalavala tudei ni Siganisucu e oka kina na veimataqali cina—cina ena vunikau, cina e loma kei na cina e tuba ena noda itikotiko, kadrala ena noda teveli. Me vakananumi Koya na ivurevure ni rarama vei keda na veicina totoka ni veigauna ni vakacagicagi kece sara.
E loma ni salatu
Rarama serau mai.
Na inuinui kei na taqaya
Mai sotavi tu.
(“Koro ko Peceliema,” Sere ni Lotu, naba 123).
Au vakadinadinataka ni a sucu mai Peceliema ko Jisu, qarava ena qaqa na Nona itavi kei na veiqaravi ena bula oqo, ia ni noda Turaga sa vakaturi cake mai na mate, sa bula tiko nikua o Koya. Au vakadinadinataka ena yaca tabu i Jisu Karisito, emeni.