Tus uas Ua Siab Dawb
Yog ib qho zoo kawg nkaus uas peb nyob no hmo no nrog peb tus yaj saub uas peb hlub, Thawj Tswj Hwm Thomas S. Monson, puas yog?
Christmas yog ib lub caij tshwj xeeb heev—thaum peb pom lwm tus nrog rau qhov muag tshiab, thaum peb qhib siab me ntsis ntxiv kom txawj pom tej yam zoo nkauj nyob ib puag ncig thiab muaj lub siab dawb ncav tes pab lwm tus me ntsis ntxiv.
Thaum peb laus lawm, yog peb tau hmoov zoo, tej lub sij hawm peb nco qab tias kev ua ib tug me nyuam yeej zoo li cas.
Qhov uas peb xav tias ib tug uas peb hlub npaj ua ib yam dab tsi zoo rau peb—thiab peb kev zoo siab vim peb npaj ua ib yam dab tsi zoo rau lawv—qhov ntawd ua rau peb lub siab sov so thiab ua rau peb muaj kev hlub puv npo. Nrog rau cov teeb ci, tej yam zoo nkauj uas dai rau ub rau no, tej kev ua yeeb yam txog Yexus txoj kev yug los, es tsis yog ib qho xav tsis thoob uas Christmas yog ib lub caij uas txhua tus nyiam.
Muaj cov nkauj zoo mloog thiab. Tsis muaj dab tsi uas qhia lub ntsiab ntawm lub caij no zoo ib yam li ib zaj nkauj Christmas. Txawm cov suab nkauj zoo siab, ua rau yus rov xav txog, los sis nco txog yav tas los, Christmas tshoov tib neeg lub siab kom lawv sau tej zaj nkauj zoo kawg. Cov nkauj Christmas no txhawb peb lub siab thiab ua rau peb nco qab yog vim li cas peb zoo siab.
Hnub no peb zoo siab uas peb muaj cib fim mloog cov nkauj zoo los ntawm Pawg Qoj Nkauj Nyob ntawm Tshav Tuam Tsev thiab cov Neeg Maumoos lub Tsev Kheej Pawg Hu Nkauj.
Cov nkauj uas pawg no hu thiab qoj yeej zoo mloog ua rau kuv xav tias cov tim tswv nyob saum ntuj ceeb tsheej los mloog thiab koom ua ke hu nkauj.
Carol of the Bells
Pawg hu nkauj nyuam qhuav hu ib zaj nkauj Christmas zoo kawg nkaus, yog zaj “Carol of the Bells” uas muaj neeg xub hu nkauj nyob hauv lub Teb Chaws Amelikas thaum xyoo 1921.
Thaum ntawd, zaj nkauj no tsis yog ib zaj uas hu nkauj thaum lub caij Christmas. Lub hauv paus ntawm zaj no yog ib zaj Ukranian thaum ub hu ua “Shchedryk,” uas txhais hais tias, “Tus uas Ua Siab Dawb.”
Tej tsev neeg Ukrainian tau hu zaj nkauj no thaum pib xyoo tshiab. Tej lus uas siv thaum ub hais txog ib tug noog uas ya mus rau hauv ib tsev neeg lub tsev thiab qhia lawv tias lawv yuav muaj hmoov zoo thaum xyoo tshiab ntawd.1
Kuv nyiam zaj ntawd.
Kuv nyiam qhov uas zaj ntawd hais txog kev cia siab.
Puas zoo ib yam li zaj uas hais txog Christmas? Txawm peb xav tias lub ntiaj teb no tsaus ntuj nti—thaum muaj teeb meem, thaum muaj neeg uas poob siab thiab ntxhov siab txhawj xeeb, thaum muaj kev tu siab thiab kev nyuaj siab—peb hu nkauj txog “kev zoo siab rau neeg ntiaj teb” thiab “thov kom tib neeg nyob kaj siab lug”2 vim Khetos tau los “ci mus rau txhua tus uas nyob hauv qhov tsaus ntuj.”3
Lub Caij rau Kev Ua Siab Dawb
Yeej tsim nyog uas zaj nkauj Christmas uas peb nyuam qhuav mloog thaum ub hu ua “Tus uas Ua Siab Dawb.” Vim Christmas yeej yog ib lub caij rau txoj kev ua siab dawb.
Thaum qhov no tshoov peb lub siab, tej lub sij hawm peb siv sij hawm ntau heev nrhiav lub khoom plig zoo tshaj plaws rau peb cov phooj ywg thiab tsev neeg. Peb nrhiav kev pab lwm tus thiab muaj kev zoo siab. Peb txais kev tshoov siab siv sij hawm nrog cov uas peb hlub. Peb haj yam saib tau cov uas xav tau kev pab, thiab peb pheej ncav tes muab kev pab rau lawv. Tag nrho tej yam peb ua zoo li no yeej yog ua raws li tus Cawm Seej tus yam ntxwv ua siab dawb, tus uas peb hwm Nws txoj kev yug los.
Tiam sis peb txhua tus paub hais tias feem ntau ua rau Christmas ploj mus thaum peb khwv heev vim peb yuav tsum yuav khoom, them tej nuj nqi, thiab mus ub mus no.
Kuv tsis xav kom peb coj li neeg qia dub, tiam sis tej yam uas kuv nco ntsoov thaum lub caij Christmas yog tej kev pub khoom plig, mus koom ua ke nrog cov neeg coob coob, thiab mus koom tej kev ua koob tsheej uas ua rau neeg los nyob ua ke.
Yeej tsim nyog uas peb zoo siab ua tej no. Tiam sis yeej muaj ntau yam ntxiv.
Yog li ntawd, kuv caw peb txhua tus, thaum lub caij Christmas no, kom peb siv sij hawm me ntsis nyob twj ywm nco txog thiab ua tsaug rau “Tus uas Ua Siab Dawb.”
Cia li xav txog peb Leej Txiv Saum Ntuj Ceeb Tsheej txoj kev hlub tshua thiab lub siab hlub uas nyob tas mus li.
Thaum peb yuav khoom plig—thaum peb pub rau lwm tus thiab txais—thov kom peb yuav siv sij hawm xav txog tej txiaj ntsim ntau nplua mias uas Vajtswv tau foom pub rau peb, uas yog nws cov me nyuam.
Lub Txiaj Ntsim ntawm Kev Ris Txiaj
Tej zaum tib neeg yeej tsis saib tej yam rau nqi heev—tsis hais tej yam uas muaj nqi heev los yog. Nov yog ib qho uas peb kawm los ntawm zaj dab neeg txog kaum tus neeg mob ruas nyob hauv Yexus lub caij nyoog. Cov neeg raug txom nyem no muaj mob heev ua rau lawv yuav tsum nyob cais phooj ywg, tsev neeg, thiab txhua tus, es cov neeg mob ruas no thov Vajtswv Leej Tub kho lawv kom zoo.
Ib yam li nej twb paub lawm, tom qab qhov txuj ci tseem ceeb no, cuaj tus neeg mob ruas zoo siab mus vim lawv tau koob hmoov zoo.
Tsuas muaj ib tug uas rov qab los xwb.
Los ntawm kaum tus no tsuas muaj ib tug uas siv sij hawm hais ua tsaug xwb. Tsuas muaj ib tug uas “pom hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug. Nws txhos caug ntua ntawm Yexus ko taw ua Yexus tsaug.”4
Tej zaum tsis tshua muaj leej twg uas txo hwj chim ris txiaj niaj hnub no zoo ib yam nyob hauv zaj dab neeg no. Tiam sis thaum muaj neeg hais ua tsaug li no, tej no tshoov peb lub siab thiab ua rau peb xav suav peb cov koob hmoov.
Kuv kawm txog ib tug neeg zoo li no uas nyob hauv Africa. Vim nws xiam hoob khab, tus txiv neej no yeej ib txwm mus tsis taus kev. Nws yuav tsum siv sij hawm feem ntau nyob hauv nws niam nws txiv lub tsev. Nws ua tsis tau hauj lwm; nws ua si nrog nws cov phooj ywg tsis tau; nws ua tsis tau tej yam yooj yim uas peb ua tau uas tsis xav txog.
Ces nws hnov xov zoo heev! Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yuav nqa ib co laub tuaj rau ib qho chaw nyob ze nws lub tsev!
Nws thov ib tug phooj ywg thauj nws mus rau qhov chaw ntawd, thiab nws saib ntau tus txiv neej, poj niam, thiab me nyuam uas xiam hoob khab zaum hauv tej lub laub tshiab.
Nws xav zaum hauv ib lub laub heev! Nws lub neej yuav hloov ntau heev yog tias tsuas muaj tib lub sij hawm nws mus tau nws tus kheej!
Nws tos ntsoov mus txog thaum kawg, ces yog nws thib.
Ob tug txiv neej pab nws zaum hauv lub rooj zaum thiab, yog thawj zaug ntawm nws lub neej uas nws mus tau nws tus kheej!
Thaum xub thawj nws txav mus me ntsis xwb. Tiam sis sij hawm zuj zus mus nws thiaj li swm lub laub ntawd, ces nws ua siab loj mus ub mus no.
Nws tau tig, kiv, thiab mus ceev. Nws yoj nws ob txhais tes thaum nws mus ceev dhau nws tus phooj ywg.
Zoo li nws txawj ya!
Saib nws lub ntsej muag yus pom tias nws xyiv fab heev.
Tiam sis tom qab ib chim, nws rov qab mus rau lwm tus thiab nws siab tu npaj kom lwm tus pab nws tawm lub laub ntawd.
“Koj tab tom ua dab tsi?” nws tus phooj ywg nug.
Tus txiv neej luag thiab tshoom xub pwg. Nws hais tias, “Yog lwm tus thib tam sim no lawm.”
Tus tub txib pab tib neeg ntawm lub Koom Txoos txhos caug ze nws thiab hais tias, “Lub laub no yog koj li.”
Tus txiv neej ntseeg tsis tau. Nws twb xav tias nws tuaj saib hais tias yuav zoo li cas yog nws zaum hauv ib lub laub tau ib chim xwb.
Nws nug hais tias, “Puas yog kuv li tiag tiag?”
“Yog mas.”
“Tiam sis kuv tsis muaj nyiaj.”
“Yog koj li. Yog ib qho khoom plig los ntawm cov neeg uas hlub koj.”
Thaum nws to taub hais tias yuav muaj li no tiag tiag, tus txiv neej txo hwj chim no ntsia nws tus phooj ywg.
Nws ntsia tus tub txib.
Nws sim ua kom txhob los kua muag, tiam sis nws ua tsis tau. Thaum nws los kua muag, nws luag vim nws muaj kev xyiv fab heev.
Nws tus phooj ywg thiab tus tub txib los kua muag nrog nws.
Nws hais lus ntxhi hais tias, “Ua tsaug.”
Nws khawm nkawd ob leeg, zaum hauv nws lub laub, ces nws qw nrov nrov, “whoop!” luag loj heev, thiab rov qab ncig mus.
“Kuv txawj ya!” nws qw thaum nws mus rau ub rau no.
Tus txiv neej no to taub hais tias kev ris txiaj yog dab tsi.
Vajtswv txoj Kev Tshav Ntuj
Peb puas tau muaj kev ris txiaj dawb huv npaum li no? Thaum lub caij Christmas no, thiab tas xyoo no, kuv thov kom peb yuav nco ntsoov Tus uas Ua Siab Dawb—peb tus Vajtswv, peb Leej Txiv, peb tus Tswv Yug Yaj thiab tus uas Pab peb.
Vim Nws yog tus uas Pub Txiaj Ntsim!
Nws yog Tus uas Muaj Siab Dawb!
Thaum peb, uas yog Nws cov me nyuam, thov kom tau noj tau haus, Nws tsis muab ib lub pob zeb rau peb.5 Tiam sis Nws muab tej txiaj ntsim zoo uas muaj nqi heev rau peb, peb thiaj tsis muaj peev xwm to taub. Nws pub rau peb:
-
Kev kaj siab lug.
-
Kev xyiv fab.
-
Cov koob hmoov ntau nplua mias.
-
Kev pov hwm.
-
Tau noj tau haus.
-
Kev pom zoo.
-
Kev cia siab.
-
Kev ntseeg.
-
Kev hlub.
-
Kev cawm seej.
-
Txoj sia nyob mus ib txhis.
Thaum lub caij Christmas no peb ua koob tsheej txog lub txiaj ntsim zoo tshaj plaws, lub txiaj ntsim uas qhib kev rau peb txais tau tag nrho tej txiaj ntsim no—yog qhov uas tus me nyuam mos liab yug los nyob hauv Npelehees. Vim Nws yug los, “lub qhov ntxa tsis muaj kev yeej, thiab txoj kev lwj siab ntawm txoj kev tuag twb raug nqos lawm nyob hauv Khetos. Nws yog qhov kaj thiab yog txoj sia ntawm lub ntiaj teb; muaj tseeb tiag, yog ib qho kaj uas tsis muaj kawg li, qhov uas tsaus tsis tau li.”6
Kuv zoo siab ua Vajtswv tsaug vim Nws ua siab dawb.
Nws cawm peb kom peb dim kev kho siab, kev nyuaj siab, thiab kev tsis tsim nyog.
Nws ua kom peb qhov muag thiaj pom thiab peb pob ntseg thiaj hnov. Nws muab kev tsaus ntuj hloov los ua kev tshav ntuj, kev nyuaj siab hloov los ua kev cia siab, thiab kev kho siab hloov los ua kev hlub.
Nws tso peb dim ntawm kev ua cev qhev thiab kev qia dub thaum yav tas los thiab qhib kev rau peb muaj kev zoo siab tam sim no thiab thaum yav tom ntej.
Nws yog tus uas peb teev tiam.
Nws yog peb tus Vajtswv.
Nws yog Tus uas Ua Siab Dawb.
Nws yog tus uas hlub tag nrho Nws cov me nyuam Nws thiaj li txib Nws Tib Leeg Tub los thiab txhua tus uas coj raws li Nws yuav tsis tuag, tiam sis yuav tau txoj sia ntev dhawv mus ib txhis.7
Vim muaj Yexus Khetos, peb tsis tas xav tias peb yog neeg pej kum. Peb yuav sawv rov los nrog cov ncaj ncees thaum Nws rov qab los! Thiab vim Nws ua neej zoo tag nrho thiab ua kev txi mus ib txhis, muaj ib hnub peb yuav sawv nrog cov tsim tswv saum ntuj ceeb tsheej thiab txais ib lub txiaj ntsim nyob mus ib txhis.8
Thaum lub caij Christmas no, thov kom peb yuav nco txog peb Leej Txiv Saum Ntuj Ceeb Tsheej uas ua siab dawb thiab ua peb tus Vajtswv uas Muaj Hwj Chim Tag Nrho tsaug, tus uas tau foom pub tis rau tag nrho Nws cov me nyuam kom lawv txawj ya. Kuv txo hwj chim thov li no thiab foom koob hmoov rau nej thaum lub caij Christmas no thiab txhua lub sij hawm, los ntawm peb tus Cawm Seej, Yexus Khetos, lub npe, amees.