Tus Neeg Txais uas Siab Zoo thiab Muaj Kev Ris Txiaj
Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Yog ib lub caij zoo heev uas muaj txhua xyoo! Thaum kuv mloog nkauj, pom lub teeb, thiab huab cua no no, ua rau kuv xav txog ntau lub sij hawm hauv kuv lub neej thaum lub hwj huam ntawm Christmas ua rau kuv lub siab sov so thiab txhawb nqa kuv tus ntsuj plig.
Ib yam li nej feem coob, kuv xav tias tej yam ntawm Christmas uas kuv nco ntsoov thiab xav zoo txog yeej los ntawm thaum kuv yog ib tug me nyuam. Txawm peb tsis muaj nyiaj txiag ntau, kuv niam kuv txiv xav kom lawv cov me nyuam muaj kev xyiv fab thiab xav tsis thoob thaum lub caij Christmas. Lawv tau khwv ua hauj lwm kom Christmas thiaj yog ib lub caij tshwj xeeb rau peb tsev neeg.
Peb cov uas yog me nyuam ib leeg ua txiaj ntsim rau ib leeg. Muaj ib xyoos, kuv nco qab tias kuv kos duab pub rau kuv tus muam rau lub caij Christmas. Kuv daim duab yeej tsis zoo pes tsawg, tiam sis kuv tus muam saib nws rau nqi. Ua rau kuv hlub nws heev! Lwm xyoo kuv tus tij laug, uas hlob kuv 12 xyoos, muab ib qho khoom plig uas muaj nqi heev rau kuv. Nws tau nrhiav ib ceg ntoo hauv tshav ua si nyob ze peb lub tsev thiab txua ntoo ua ib rab riam me me. Nws yeej yooj yim, tsis yog ib qho zoo nkauj, tiam sis kuv saib qhov khoom plig ntawd rau nqi vim nws los ntawm kuv tus tij laug!
Ib txoj kev xyiv fab loj tshaj plaws ntawm lub caij Christmas puas yog qhov uas yus pom cov me nyuam lub ntsej muag zoo siab thaum lawv txais ib qho khoom plig uas nej tau muab qhwv rau lawv?
Tiam sis, thaum peb laus zuj zus, qhov uas peb txawj txais tej txiaj ntsim nrog kev zoo siab thiab kev ris txiaj yeej ploj mus. Tej lub sij hawm tej tug neeg txais tsis tau ib lub txiaj ntsim, los sis txais tsis tau lwm tus txoj kev hais zoo txog lawv thiab tsis txaj muag los sis tsis xav tias lawv yuav tsum muab dab tsi rov qab. Lawv ua yuam kev xav tias txoj kev txais ib lub txiaj ntsim raws li qhov tsim nyog yog muab ib yam uas muaj nqi tshaj rau tus uas pub rau lawv. Lwm tus tsis pom qhov tseem ceeb ntawm ib lub txiaj ntsim—lawv xav txog qhov sab nraud los sis nws muaj nqi npaum li cas thiab tsis xav txog lub ntsiab raws li tus uas siab ncaj pub xav txog.
Ua rau kuv nco txog ib lub sij hawm uas yog hmo kawg ntawm tus Cawm Seej lub neej. Nws hu Nws cov thwj tim los rau Nws, muab mov mog ntais nrog lawv, thiab qhia tej lus tseem ceeb rau lawv. Nej puas nco qab tias thaum lawv noj mov, Yexus sawv ntawm rooj los, nchuav dej hauv ib lub tais, thiab pib ntxuav Nws cov thwj tim txhais ko taw?
Thaum Nws los rau Ximoos Petus, tus neeg nuv ntses tsis kam, nws hais tias, “Kuv yeej tsis pub koj ntxuav kuv ko taw ib zaug li.” Tus Cawm Seej ua siab ntev hais: “Yog kuv tsis ntxuav koj ko taw, koj yuav tsis tau ua kuv tus thwj tim lawm.”1
Kuv paub tias Petus xav tias muaj tej yam uas tsim nyog ua rau nws tsis txais lub txiaj ntsim no thiab nws xav tias nws ua qhov yog. Tiam sis thaum lub sij hawm ntawd nws tsis tau to taub meej txog qhov tseem ceeb ntawm sab ntsuj plig uas Yexus xav pub rau nws.
Thaum lub caij Christmas peb hais ntau txog kev pub rau lwm tus, thiab peb yeej paub tias, “Thaum yus pub rau luag yus zoo siab heev dua thaum yus tau luag li,”2 tiam sis kuv xav tias tej lub sij hawm peb tsis nco qab los sis peb tsis pom zoo qhov uas kev ua ib tug txais txiaj ntsim tseem ceeb npaum li cas.
Ntau xyoo dhau los, muaj ib hnub Christmas es ib tus me nyuam ntxhais txais ib pob khoom uas muaj cov hlaws zoo nkauj heev. Tus ntxhais txiv hais kom nws ua ib qho rau nws ib tug txheeb ze uas tau koom rau lawv tsev neeg txoj kev sib sau ua kev lom zem.
Tus me nyuam ntxhais zoo siab thiab pib ua hauj lwm tsim ib qho uas nws xav tias yuav zoo kawg. Nws xaiv tus neeg uas nws xav muab rau—ib tug phauj laus uas yeej tsis zoo siab thiab nyaum heev.
Tus me nyuam ntxhais xav tias, “Tej zaum yog kuv ua saws tes rau nws, ces yuav ua rau nws zoo siab.”
Yog li ntawd tus me nyuam ntxhais xaiv txhua lub hlaws thiab rau siab ua kom lub txiaj ntsim no yuav ua ib qho tshwj xeeb rau nws tus phauj.
Thaum nws ua tiav lawm, nws mus rau nws tus phauj, muab saws tes rau nws thiab qhia nws tus phauj tias nws tau tsim thiab ua rau nws tus phauj ib leeg xwb.
Sawv daws tswm seeb thaum tus phauj siv nws ib tug ntiv tes thiab ntiv tes xoo khaws saws tes ntawd zoo nkaus li nws tuav ib cov qwj qias neeg. Nws saib khoom plig ntawd, ua nws qhov muag me me thiab caws nws lub qhov ntswg, thiab muab saws tes rov qab poob rau tus me nyuam ntxhais txhais tes. Ces nws tig mus es tsis tau hais ib lo lus thiab pib tham nrog lwm tus.
Tus me nyuam ntxhais ntsej muag liab vim nws txaj muag. Nws poob siab heev nws thiaj li maj mam tawm chav mus.
Nws niam nws txiv sim nplij nws lub siab. Lawv sim pab nws to taub tias nws saws tes yeej zoo nkauj—tsis hais nws tus phauj ua dab tsi los. Tiam sis tus me nyuam ntxhais yeej tsis zoo siab txhua zaus nws xav txog lub sij hawm no.
Ntau xyoo dhau los, thiab tus me nyuam ntxhais—kuj yog ib tug phauj—es nws nco qab ntsoov, nrog kev tu siab, txog hnub uas nws lub txiaj ntsim raug xyeej.
Txhua lub txiaj ntsim uas lwm tus muab rau peb—qhov tseem ceeb yog ib lub txiaj ntsim uas lwm tus muab los ntawm nws lub siab los rau peb—yog ib lub cib fim kom txhawb nqa thiab ua rau txoj kev hlub loj hlob. Thaum peb ua siab zoo thiab ua siab dawb txais tej ntawd, peb qhib qhov rooj rau kev sib raug zoo nrog tus uas muab lub txiaj ntsim rau peb. Tiam sis thaum peb tsis ris txiaj los sis tsis kam txais ib lub txiaj ntsim, peb ua rau tus muab rau peb mob siab, thiab tsis tas li ntawd peb ua rau peb tus kheej mob siab ib yam thiab.
Tus Cawm Seej qhia tias tsuas yog peb “yuav hloov ua zoo li me nyuam yaus, ces [peb] yuav tsis tau mus saum ntuj ceeb tsheej.”3
Thaum peb pom cov me nyuam txoj kev muaj siab thiab xav tsis thoob thaum lub caij no, tej zaum peb yuav tau kom peb tus kheej rov qab nco txog ib qho cwj pwm ntawm cov me nyuam uas zoo heev---yog qhov uas lawv ua siab dawb siab zoo txais tej txiaj ntsim.
Tsis ua rau peb xav tsis thoob uas tus Cawm Seej yog tus yam ntxwv zoo tag nrho txog kev ua siab dawb pub rau lwm tus thiab kev ua siab zoo txais ntawm lwm tus. Thaum Nws nyob hauv Npethanis, thaum nws txoj hauj lwm qhuab qhia hauv lub ntiaj teb yuav luag tiav lawm, ib tug poj niam nqa ib hwj roj tsw qab kim heev uas muab nalaudas ua tuaj rau Nws. Yexus cia tus poj niam pleev lub txiaj ntsim uas muaj nqi heev no rau Nws lub taub hau.
Tej tug uas pom qhov no pib npau taws. Lawv hais tias, “Nws nkim nyiaj xwb.” Cov roj no kim heev. Tej zaum lawv muag tau nyiaj ntau thiab muab cov nyiaj ntawd mus pub rau cov neeg pluag. Lawv tsuas pom tias lub txiaj ntsim muaj nqi npaum li cas tiam sis tsis pom tus nqi tseem ceeb ntawm sab ntsuj plig.
Tiam sis tus Cawm Seej to taub lub cim thiab kev hlub ntawm lub txiaj ntsim ntawd, thiab Nws ua siab dawb txais.
Nws hais rau cov uas yws yws hais tias, “Cia nws ua nws.” “Ua cas yuav ua rau nws nyuaj siab? ... Tus poj niam no yeej ua raws li nws ua tau: Nws muab roj tsw qab hliv rau kuv lub cev, twb yog nws tu kuv lub cev tseg rau hnub uas faus kuv.”4
Kuv cov kwv tij thiab cov muam, kuv cov phooj ywg zoo, peb yog neeg uas txais txiaj ntsim zoo li cas? Peb puas ua raws li tus Cawm Seej, pom tias neeg pub txiaj ntsim rau peb los ntawm kev hlub?
Hauv peb lub caij nyoog, tus Cawm Seej hais tias cov uas “txais txhua yam nrog kev ua tsaug puv npo ces yuav raug ua kom muaj yeeb koob heev,”5 thiab “tej uas nyob hauv lub ntiaj teb tag nrho yog [lawv] tug.”6
Kuv cia siab hais tias lub caij Christmas no thiab txhua hnub peb yuav xav txog ntau lub txiaj ntsim uas peb Leej Txiv Saum Ntuj Ceeb Tsheej tau muab rau peb. Kuv cia siab hais tias peb yuav txais tej lub txiaj ntsim no nrog lub siab ua Vajtswv tsaug thiab kev zoo siab ib yam li ib tug me nyuam yaus.
Kuv lub siab sov so thaum kuv xav txog tej lub txiaj ntsim uas Leej Txiv Saum Ntuj Ceeb Tsheej tau ua siab dawb siab zoo pub rau peb: lub txiaj ntsim tus Vaj Ntsuj Plig Dawb Huv, txuj ci tseem ceeb ntawm kev zam txim, kev tshwm sim thiab kev coj, kev kaj siab lug ntawm tus Cawm Seej, qhov paub tseeb thiab kev nplij siab hais tias tau kov yeej txoj kev tuag—thiab ntau yam ntxiv.
Qhov tseem ceeb, Vajtswv tau muab lub txiaj ntsim uas yog Nws Tib Leeg Tub, uas muab nws txoj sia txi “kom tus uas ntseeg nws yuav tsis tuag, tiam sis yuav tau txoj sia ntev dhawv mus ib txhis.”7
Peb puas tau txo hwj chim txais tej txiaj ntsim no, nrog kev xyiv fab? Los sis peb puas muab tej yam tso tseg vim peb khav theeb los sis peb xav tias peb ua tau peb tus kheej? Peb puas hnov tau Leej Txiv txoj kev hlub los ntawm tej lub txiaj ntsim no? Peb puas txais tej no kom peb yuav sib raug zoo nrog tus uas Pub Txhua Yam Los sis peb puas xav txog lwm yam peb thiaj tsis nco qab txog tej yam uas Vajtswv pub rau peb txhua hnub?
Peb paub tias “Vajtswv hlub tus uas ua siab dawb pub rau lwm tus,”8 tiam sis nws tsis hlub tus uas ua siab dawb siab zoo txais txiaj ntsim los?
“Yog tias muab ib lub txiaj ntsim rau ib tug neeg, tiam sis nws tsis kam txais lub txiaj ntsim ntawd, ces yuav muaj nqi dab tsi rau nws? Saib seb, nws tsis zoo siab rau qhov uas tau muab rau nws, yeej tsis zoo siab rau tus uas tau muab lub txiaj ntsim ntawd rau nws.”9
Txawm peb tau ua neej nyob dhau 9 los sis 90 lub caij Christmas los, peb txhua tus yog cov me nyuam---peb txhua tus yog peb Leej Txiv Saum Ntuj Ceeb Tsheej cov me nyuam.
Yog li ntawd, peb txhua tus muaj peev xwm muaj kev xav tsis thoob thiab kev zoo siab li ib tug me nyuam yaus thaum lub caij Christmas no. Peb txhua tus muaj peev xwm hais tias, “Kuv lub siab muaj kev xyiv fab puv nkaus, thiab kuv yuav xyiv fab nyob hauv kuv tus Vajtswv”10—tus uas Pub txhua lub txiaj ntsim zoo.
Nrog koj, thiab tag nrho cov uas xav ua raws li tus Khetos uas siab zoo, kuv hu nrov qhuas peb tus Vajtswv uas muaj hwj chim vim nws pub txiaj ntsim uas yog Nws Leej Tub rau peb.
Thaum lub caij Christmas no thiab txhua lub sij hawm, kuv thov kom peb yuav ua li ib tug me nyuam yaus pom qhov zoo kawg nkaus ntawm Vajtswv Leej Tub txoj kev yug los. Kuv thov kom peb yuav tsis pub tej txiaj ntsim zoo xwb, tiam sis peb kuj yuav ua siab zoo txais thiab. Thaum peb ua li ntawd, lub hwj huam ntawm lub caij no yuav ua rau peb lub siab loj thiab peb txoj kev xyiv fab yuav loj hlob tuaj. Los ntawm Yexus Khetos lub npe dawb ceev, amees.