Autalavou o le Tofi Tautupu: O A Mea O Le A Outou Filifilia?

Elder Russell M. Nelson

O Le Korama a Aposetolo e Toasefululua

Ata

Faigalotu a le OAE mo Talavou Matutua • 6 Setema, 2013 • Iunivesite o Polika Iaga–Hawaii

Ua ma faafetai lava ma lo’u toalua o Wendy, e faatasi ma outou. Mai le Cannon Activities Center i le lotoa o le BYU–Hawaii, o loo tatou faasalalau atu ai i faapotopotoga o talavou matutua i le lalolagi atoa. Matou te faafeiloai atu ia i latou o le taimi muamua lenei ua auai ai i se faigalotu a le OAE. A o e lesitala ai i ni faalapotopotoga o aoaoga maualuluga, o le a e manao e auai foi i ni vasega inisitituti faapea ai ma nei faigalotu ina ia faatumauina ai se paleni faaleagaga i au aoaoga o le poto salalau. Ma afai o le a le pine ae e agai atu i se misiona, ua silisili atu foi lo matou faafetai. O le a e i ai i le galuega a le Alii mo se taimi atoa.

Ou te aumaia faamanuiaga ma alofaaga o Peresitene Thomas S. Monson, Peresitene Henry B. Eyring, Peresitene Dieter F. Uchtdorf, faapea ma a’u uo pele o le Korama a Aposetolo e Toasefululua. Ou te aumaia foi alofaaga mai le Fono Faatonu o le Ofisa o Aoga a le Ekalesia, faapea ma Elder Paul V. Johnson, o le Komesina o le Ofisa o Aoga a le Ekalesia.

E toatolu failauga ua mavae atu i a tatou faigalotu a le OAE i lenei tausaga. Tou te manatuaina i latou? O le lauga a Peresitene Dieter F. Uchtdorf sa faaautu i le “O Le A le Upumoni?” Sa ia aoao i tatou i le auala e maua ai le upumoni sao i se vaitau ua matua faateleina ai faamatalaga ua maua, ae o le tele lava e le moni. O le autu o le lauga a Elder David A. Bednar o le “Ina Ia Tatou ‘Le … Solomuli’ (MF&F 19:18).” Sa ia faamalosia o tatou agaga a o ia aoaoina i tatou i le auala e faateleina ai lo tatou faatuatua e ala i se fesili mamana lea na fesoasoani ai i se ulugalii talavou a o tauivi le tane ma le kanesa. O le fesili sa tuu atu e Elder Bednar o le, “E i ai sou faatuatua e le faamaloloina oe?” Sa faamalosia e Elder William R. Walker a tatou molimau e uiga i le galuega ma le faataitaiga le mafaatusalia a le tatou pele o Peresitene Thomas S. Monson.

O le aso, o le autu o lau savali o le “Autalavou o le Tofi Tautupu¹: O A Mea O Le A Outou Filifilia?”

O Outou, i le avea ai ma autalavou o le tofi tautupu, o ni atalii ma ni afafine moni o le Atua, ua fananau mai i lenei taimi patino i le talafaasolopito o le lalolagi mo se faamoemoega aupito sili ona taua. E ui e foliga mai ua faavaivaia uiga mama ma tulaga faatauaina faalelotu o malo i le salafa o le kelope, ae o talavou o lenei Ekalesia e ao lava ona avea ma ave fu’a o tulaga faatonuina a le Alii ma ni sulu o le malamalama e tosina mai ai isi ia te Ia. E tulagaese lou faasinomaga ma le faamoemoega.

O le a lou faasinomaga? O outou o le fanau o le feagaiga. O le a le feagaiga? O le feagaiga lea na osia e le Atua ma le tama ia Aperaamo ina ua folafola atu ia Aperaamo e faapea “o lau fanau e manuia ai aiga uma o le lalolagi.”² O outou foi o le fanau o le aso folafolaina,³ o lenei vaitau o le talafaasolopito o le lalolagi o le a folafola faalauaitele atu i le salafa o lenei paneta.

O le a la lou faamoemoega? O outou uso e na muai faauuina i se malo i le muai olaga ina ia tauaveina le perisitua.⁴ Mafaufau i lena mea! Ma o outou tuafafine pele, na filifilia outou a o lei faavaeina le lalolagi e fanauina ma tausia ia fanau a le Atua, ma i le faia o lea mea, tou te faamamaluina ai le Atua.⁵ Pe ua outou mafaufau ea tuafafine i le uiga moni o le avea ma ni soa foafoa faatasi ma le Atua?

O outou uma taitoatasi alii talavou ma tamaitai talavou na tofia e lo outou Tama Faalelagi e fausia le malo o le Atua i luga o le fogaeleele i le taimi nei ma saunia se nuu e taliaina le Faaola pe a Ia pulea ma nofotupu o le Mesia o le Meleniuma. O lo outou tofi tautupu, faasinomaga, faamoemoega, ma le tofiga paia ua vavaeese ai outou mai isi uma tagata.

Ae e le mafai foi e o outou tofi tautupu po o outou faauuga ma tofiga i le muai olaga ona laveaiina pe faaeaina outou. O le a laveaiina ma faaeaina outou, e ala i a outou faaiuga patino ma pe a outou filifili e maua le mana o le Togiola a le Alii i o outou olaga. Ua outou iloa “ua saoloto agaga uma e filifili lona ola ma le tagata o le a ia avea ai.”⁶ O lena mataupu faavae sili e faavavau o le faitalia e taua i le fuafuaga a lo tatou Tama. O lea, o outou le autalavou o le tofi tautupu, o a mea o le a outou filifilia?

Pe o le a outou filifili ea ia faateleina le poto?

O le aotauina o lau mea lena e fai. E leai se isi tagata e mafai ona ia mauaina mo oe. Po o fea lava o e i ai, atiae se manao loloto ia aoaoina. Mo i tatou o le Au Paia o Aso e Gata Ai, o le aotauina ua le na o se avanoa, o se tiutetauave faalelotu. O le mamalu o le Atua o le atamai lea.⁷ O le mea moni, o lo tatou aotauina e mo le faavavau.

“Soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu.

“Ma afai e maua e se tagata le poto ma le tomai sili atu i le olaga lenei … , o le a maua e ia le avanoa tele atu i le lalolagi a sau.”⁸

O sea vaaiga mamao mo se taimi umi o le a fesoasoani ia te oe e fai ni filifiliga lelei e uiga i le aotauina. Ou te manatua se talanoaga i le tele o tausaga ua mavae ma se tamaitiiti aoga i le aoga maualuga e 16 tausaga. Sa le mautonu o ia e uiga i lana tautinoga faalelotu ma lē mautinoa ai po o le a sana matata. Sa ia tomanatu e uiga i le gafatia o le avea ma se fomai o vailaau. Sa ia fesili mai ia te au i se fesili faigofie: “E fia tausaga na e faaaluina ina ia avea ai ma se fomai tipitipi o le fatu?”

Sa vave ona ou faitauina le taimi: “Mai le taimi na ou faauu ai mai le aoga maualuga seia oo i le taimi muamua na maua ai lou totogi mo le tautua o se fomai tipitipi, sa ou faaaluina ai le 14 tausaga.”

“Oka!” sa ia tali mai. “Ua umi tele lena mo au!”

Ona ou fesili lea i ai, “O le a lou matua o le a i ai i le 14 tausaga mai le taimi nei pe afai e le avea oe ma se fomai tipitipi o le fatu?”

“E tutusa lava,” sa ia tali mai ai. “E tutusa lava!”

E i ai se mea sa ou naunau ai lava i le alii talavou lenei. O nisi taimi ou te ave ai o ia i lau taavale i lana auala masani i taeao po e tiliva le nusipepa. I le aluga o tausaga na faasolo malosi ai lona faatuatua. Sa avea o ia ma se faifeautalai mamana. Na ia filifili e tulitulimatagauina lana sini faaleaoaoga. Muamua, na ia faaipoipo atu i lana manamea i le malumalu. Ona oo lea a o ia aoga i mea tau vailaau ma taotoga, na avea i laua ma ni matua o le fanau e toafa. O le taimi nei ua faamaonia atoatoa o ia e le fono faatonu o se fomai tipitipi o le fatu—i le maea ai o aoaoga ma suesuega faigata i se vaitau o le 14 tausaga.

Uso e ma tuafafine, aua nei fefefe e tulitulimatagauina a outou sini—e oo lava i a outou miti! E leai ni auala ‘alo e tau atu i tulaga aupito silisili ma atamai. O le aotauina o le eseesega lea i le va o le moomoo maimau pe ana mafai ona e fesoasoani atu i isi tagata ma le mafai ona fesoasoani atu ia i latou.

O le isi fesili lenei: O le a le ituaiga o olaga o le a e filifilia?

O outou, i le avea ai ma autalavou o le tofi tautupu, ua faamoemoeina e ola i se olaga e ese ai nai lo isi. Ua outou iloa le mea sa tau atu e Paulo i le taulealea o Timoteo: “ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”⁹ Filifili e mafaufau ma ia amio e ese mai ia i latou o le lalolagi. Filifili ia ese ou foliga vaaia ma vaai mo se faatosinaga mo le lelei o le a avea ai oe. E pei ona fai mai Sister Ardeth G. Kapp i se tasi taimi, “E le mafai ona avea oe ma se laveai soifua, pe afai e te foliga e pei lava o isi tagata aau uma i luga o le matafaga.”¹⁰

I le avea ai ma autalavou o le tofi tautupu, ua i ai se mea maoae tou te amata ai i le olaga. Ae ua i ai foi sa outou tiutetauave faaopoopo. “Aua o ia o le ua tuu atu i ai mea e tele, e tele mea ua manaomia mai ai.”¹¹ O se vaega o na mea manaomia o le avea lea ma se isi tagata fou faaopoopo. Sa e mafaufau ea ia te oe lava ia o se tagata fou faaopoopo o le vaegaau? Ina ua papatisoina oe, sa toe lesitalaina moni oe i le vaegaau a le Alii.¹² I le muai olaga, sa outou tau faatasi ai ma Iesu Keriso i le Taua i le Lagi. O le taimi nei o le taua i le va o malosiaga o le lelei ma le leaga o loo faaauauina iinei i le lalolagi. E moni lava.¹³ I le itu a le Atua o loo i ai Iesu Keriso, na muai faauuina e avea ma Faaola o le lalolagi.¹⁴ I le isi itu o loo i ai Satani—o se fouvale—o se e faaumatiaina le faitalia.¹⁵

O le fuafuaga a le Atua ua faatagaina ai le fili e faaosooso outou ina ia outou mafai ai, i le taimi nei i le lalolagi faaletino ona faaaoga lo outou faitalia e filifili ai le lelei i lo le leaga, e filifili ai e salamo, ia filifili ai e o mai ia Iesu Keriso ma talitonu i Ana aoaoga ma mulimuli i Ana faataitaiga. Oka se tiutetauave ina tele ma se faatuatuaina tele!

O lo outou saolotoga e filifili ua manino lava lona faamalamalamaina i le Tusi a Mamona: “Ua saoloto tagata e tusa ma la le tino. … Ua latou saoloto e filifili le saolotoga ma le ola e faavavau, … pe filifili le faatagataotauaina ma le oti, e tusa ma le faatagataotauaina ma le mana o le tiapolo; ona ua saili o ia ia pagatia tagata uma e pei o ia lava.”¹⁶ O a mea o le a outou filifilia?

O se isi fuaiupu o loo faaali mai ai e faapea “e lei avea lava le amioleaga ma fiafia.”¹⁷ E toatele le autalavou ua taumafai e luiina le upumoni ma toilalo ai i taimi uma!

O lo outou saolotoga e faatino ai mo oe lava e matua totonugalemu lava i lo outou alualu i luma ma le fiafia e faavavau lea e faaaogaina ai e le fili ni taumafaiga maoae e faavaivaia ai.¹⁸ E moni lava, o Satani o se tagata e le malolo, o lona uiga e le moe lava o ia. E toatele outou ua iloaina lena mea!

O le isi fesili lenei: Pe o le a e faavaeina ni mea faamuamua e fesoasoani ai ia te oe ia faia ni filifiliga i le olaga?

O au filifiliga o le a le faapea o mea uma lava i le va o le lelei ma le leaga. O le tele lava o filifiliga e i le va o ni filifiliga lelei se lua. E le o upumoni uma lava e tutusa o latou taua, o lea la e manaomia ona e faavaeina ni mea faamuamua. I au sailiga o le malamalama, ia iloa o upumoni e aupito sili ona taua e mafai ona e aoaoina e sau mai le Alii. I Lana Tatalo Faatoga i Lona Tama, na faamautu ai e le Faaola Lava Ia lenei mea. Sa Ia fetalai, “O le ola e faavavau foi lenei, ia latou iloa oe le Atua moni e toatasi atoa ma le ua e auina mai o Iesu Keriso lea.”¹⁹ E sili i lo mea uma lava o loo e saili ai e aoao, saili ia iloa le Atua, lou Tama Faalelagi, ma Lona Alo o Iesu Keriso. Ia iloa i Laua ma alofa ia i Laua e pei ona ou iloa.

O se isi mau i mea e faamuamua ua fesoasoani ai ia te au i lou olaga atoa o le tasi lea: “Ia outou muai saili e fausia le malo o le Atua, ma faatu lana amiotonu, ma o nei mea uma o le a faaopoopo atu ia te outou.”²⁰

E sili atu i lo mea uma i lenei lalolagi, e te manao ai ia faia ni filifiliga lea e taitai atu ai i le taunuuga aupito sili ona maualuga ma mamalu o le ola e faavavau. O le mamalu sili lena o le Atua mo oe.²¹ Filifili le ola e faavavau e fai ma au mea e aupito sili ona faamuamua! Suesue i tusitusiga paia, e pei o le vaega e 76 ma le 88 o le Mataupu Faavae ma Feagaiga, ina ia mafai ai ona malamalama atili i faamanuiaga eseese o loo faatalitali mai ia i latou e filifilia le ola e faavavau ma i latou e le filifilia le ola e faavavau. Filifili le ola e faavavau e fai ma au mea aupito sili ona faamuamua ma matau le auala e sologa lelei ai isi filifiliga.

O se isi fesili: O ai o le a outou filifili tou te fegalegaleai faatasi?

I le avea ai ma autalavou o le tofi tautupu, o le a outou feofeoai faatasi ma le toatele o tagata lelei o e e talitonu foi i le Atua. Pe o i latou o ni Iutaia, Katoliko, Porotesano, po o Musalemi, e iloa e e talitonu o loo i ai moni lava se upumoni a’ia’i! I le savali talu ai a Peresitene Uchtdorf, na ia faamamafa ai e faapea o loo i ai moni lava le sao ma le sese, ma o le solia ma le loto i ai o se tasi o poloaiga a le Atua o le agasala moni lava lena. O e talitonu i le Atua o loo i ai foi se loto fuatiaifo. E usiusitai ē talitonu i tulafono faalemalo ma faalelagi ma le loto i ai, e oo lava i tulafono ia atonu e le faamalosia tele.

Faatasi ai ma lau tautinoga e usiusitai i tulafono faalemalo ma faalelagi, e te tu ai i se moli mumu, e tusa lava pe le o i ai se isi taavale. Ua e iloaina, i le avea ai ma se atalii o le Atua, e tusa lava pe le maua oe e leoleo, pe afai e te gaoi, fasioti tagata, pe mulilua, o nei amioga e sese, ma o le a faamasinoina oe e le Atua i se taimi mulimuli. Ua e iloaina o taunuuga o le le taalo i tulafono ua le na o le faaletino ae faavavau foi.

A o e faagasolo i le malaga o le olaga, o le a e oo foi ina masani ma tagata e le talitonu i le Atua. O le toatele o i latou e lei mauaina lava se upumoni paia ma e le iloaina le mea e saili i ai. Ae o outou o le autalavou o le tofi tautupu tou te o atu e laveai mai i latou. I se faitau aofai tele, o loo outou tali atu ai i le valaau a le perofeta a le Atua mo nisi faifeautalai. Matou te matua faafetai lava mo faifeautalai taitasi! O le toatele o outou ua maea ona faamisiona; o isi o loo sauniuni e o.

A o outou feofeoai ai ma tagata le talitonu, ia nofouta foi atonu o loo i ai ni nai tagata o le a le popole i lou tulaga manuia.²² O le taimi lava e te faia ai lena faaiuga---i le taimi tonu e te iloatino ai lena mea---sola ese vave mai ia i latou ma aua nei toe foi i ai.²³

O le mea e faanoanoa ai, o le a e feiloai i tagata o loo matua saili ma le faananau mo se mea e foliga mai ia i latou e pei o se mea fiafia ae ua avatu ai i latou i lalo i le tifato maseesee o le agasala. Ia faaeteete i lena ala agasala! Soo se fiafiaga lava i le agasala ua na o sina taimi puupuu, ma manatuaga pagatia e faaleagaina i le atuatuvale ma le tausalaina. O le faaleagaina i le agasala o le tuufaatasiga lea na mamanuina faalelagi e tuufaatasia ai le tane ma le ava ua na o se atigi faatusa ua le aoga. O aafiaga solitulafono taitasi ua aveesea ai lona uiga loloto ma manatuaga matagofie.

Toe tasi lava le fesili: Pe o le a e filifili le saolotoga po o le nofopologa?

O malosiaga faatiapolo ua salalau solo. O loo outou nonofo moni lava i “teritori o loo i ai le fili.”²⁴ O se mala o ponokalafi matautia ua faulai. Ua ia maileia ai tagata uma e gauai atu i ana mailei matautia.

O lenei mea na muai silafia e le Alii, lea na fetalai, “Ma o lenei Ou te faailoa atu ia te outou se mealilo, o se mea lea o loo faia i totonu o potu faalilolilo, e aumai ai lo outou faafanoga i le aluga o le taimi, ma sa outou le iloaina.”²⁵ Ona ia faaopoopo mai lea o se lapataiga lona lua: “Ma Ou te toe fai atu ia te outou, ua saili e le fili o loo i potu faalilolilo o outou ola.”²⁶

Mafaufau i le anoanoai o tagata, i le tele o potu faalilolilo, o loo saili e faaumatia lou ola ma le fiafia i le taimi nei! Uso e ma tuafafine afai o outou matamata i ata ponokalafi, tuu nei loa! Ia matua tuu lava! O se mea faataumaoia e pei o le lepela, o se vaisu e pei o fualaau faasaina, ma e lamatia e pei o le vailaau oona.

E le fou faaosoosoga faaletino. Sa lapatai mai le Aposetolo o Peteru e uiga i lenei mailei lava e tasi ina ua ia tusia:

“Latou te maileia i tuinanau o le tino … o e [mama]. …

“Ua latou folafola atu ia te i latou le saolotoga, a o i latou lava ua fai ma pologa o le amio leaga; aua pe a toilalo se tasi i se tasi, ua nofo pologa o ia ia te ia.”²⁷

Aloese mai le nofo pologa, ou uso ma tuafafine pele. Afai o loo e matamata i le taimi nei i ponokalafi, ia tuu! Ma tuu nei loa! Saili atu mo se fesoasoani mai lau epikopo. E leai ma se tasi ua lava sona atamai e faatoilalo ai le fili na o ia lava, i le taimi lava e faatamaia ai e ponokalafi.

Ia sei ou see atu i se isi fesili ogaoga: Pe o le a e filifili e mulimuli i le Alii po o filosofia a tagata?

Mo se faataitaiga, ua salalau solo finauga i le lalolagi e faapea ua tulaga lamatia le lalolagi i le soona toatele o tagata ma ua tatau ai i ulugalii ona faatapulaa le aofai o a latou fanau. Ua outou faalogo i lena mea? Peitai, i le Konakaresi lona lima a Aiga i le Lalolagi, i le 2009, sa ma faalogo ai ma Sister Nelson i se tagata atamai a o ia tuu atu se pepa lea na ia faia ai se saunoaga mataina. Fai mai a ia, “Afai e faamatuu atu i alii, tamaitai, ma se tamaitiiti o loo ola nei i le lalolagi se kuata eka o fanua, o tagata uma lava e 6.8 piliona o le a ofi i le atunuu o Pasila, faatasi ai ma le 20 pasene o Pasila e tuua e le faaaogaina.²⁸ Mai lena mea, faamata ua soona tumu ea le lalolagi?

Sa ou siakia lena faatusatusaga. E sao lelei. Ou te augani atu ia te outou ia talitonu i le Alii, o le na fetalai mai “ua tumu le lalolagi, ma ua lava ma totoe mea o i ai.”²⁹

O se isi mea moni e faapea o loo outou ola i se taimi ua maualuga ai le leai o ni galuega, le le mautu o fefaatauaiga tautupe i le lalolagi atoa. E toe faapea atu, o se vaifofo faalelalolagi o le tagai lea i isi tali i le fuafuaga a le Atua. Ae ua tatou iloa o faaipoipoga ma aiga malolosi ua fesoasoani moni lava i le tamaoaiga ia uluola. Ma e le o tuua na o i tatou i na lagona.

Sa tusia e le tagata atamai ia Dr. Patrick F. Fagan³⁰ e faapea: “O le maa faavae taua lea e faalagolago i ai le manuia o le tamaoaiga, [o le] aiga o matua faaipoipo—aemaise lava le aiga o loo toatele ai tamaiti o loo tapuai i vaiaso uma. …

“… O faaipoipoga uma lava e fatu ai se aiga fou, se iunite faaletamaoaiga tutoatasi lea e faagaoioia tupe maua, tupe faaalu, faasao, ma saofaga.”³¹

Sa faaopoopo mai Dr. Fagan e faapea o le “tina faaipoipo i le fale na te faia se aafiaga sili atu i le tamaoaiga nai lo le tama faaipoipo i le fale faigaluega. … E ui e saofaga atu le tama i le tamaoaiga i le taimi nei, ae o le tina e saofaga atu i le tamaoaiga i le taimi nei ma le lumanai.”³²

Ua faamautu mai e le lipoti a Dr. Fagan ia manatu faavae na faailoa i tausaga ua mavae e le Au Peresitene Sili ma Aposetolo e Toasefululua i le “O Le Aiga: O Se Folafolaga i le Lalolagi.” Ou te faamoemoe o loo tofu outou uma ma se kopi. Suesue i ai ma le totoa. A o osofaia ai le aiga i le lalolagi atoa, o upumoni o le folafolaga i le aiga o le a outou saogalemu ai.

O outou le autalavou maoae o le tofi tautupu, e manaomia ona outou malamalama i taunuuga tetele o taua a malo i le taimi nei e uiga i le faauigaga moni o le faaipoipoga. O le finauga o loo i ai nei o loo aofia ai le fesili pe ao ona faaipoipo tagata e toalua o le itupa e tasi. Afai e i ai sau fesili e uiga i le tulaga o le Ekalesia i lenei vaega po o soo se isi lava mataupu taua, ia mafaufau loloto i ai ma le agaga tatalo, ona gauai atu lea i savali faaperofeta i le konafesi aoao a le Ekalesia ia Oketopa a sau. O na lauga musuia, faaopoopo i ai ma musumusuga mai le Agaga Paia, o le a aumaia i lou mafaufau se malamalama atoatoa ma moni atu.

O finauga e uiga i le faaipoipoga o se tasi lea o le tele o feteenaiga o le a luiina ai oe i le lumanai. I le tetee atu i leo malomaloa o le fili, o outou, i le avea ai ma autalavou o le tofi tautupu, o le a filifili e tutu atu mo le Alii ma Lana upumoni. Manatua upu o le viiga lenei. Ia toe faitau i ai. Ia taulotoina. O lenei viiga e mo na o outou lava:

Vaivai ea fanau a Siona
E puipui mea tonu nei?
A malosi mai le fili,
Tou te sola ese ea? Leai!

Ia tutumau i faatuatuaga,
Na pele i matua ma e na fasia,
I poloai,
a le Alii,
Tumau pea ma faamaoni.33

Na valoia e le Aposetolo o Paulo le mala o o tatou aso. O lana faamatalaga e tai foliga i le tatou talafou i le 10 i po uma. Faafofoga foi!

“O ona aso e gata ai e oo mai ai aso faigata.

“Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga,

“O e le lotoaiga, o e tuumavaega, o e faatuaupua, o e faasaua, o e le alolofa i tagata amio lelei,

“O e faalata, o e soona fai, o e ua faafefeteina, o e ua tele le manao i mea faafiafia ae leai se manao i le Atua;

“O e ua peiseai ua amio Atua; a o le mana ua i lea mea ua latou teena: ia e alo ese lava i tagata faapena.”³⁴

O le faaiuga lena o lana lapataiga.

O le faaaliga tonu a Paulo e uiga i le faafanoga faaleagaga o o tatou aso na sosoo mai ma lana faaiuga faamautinoa, ua tau mai ai ia i tatou lea auala tatou te saogalemu ai: “Talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.”³⁵

I lana fautuaga ou te fia faaopoopo atu i ai lau foi ia fautuaga: Ia faaauau pea ona suesue i tusitusiga paia. Faaau pea ona faia mea e fausia ai lo outou faatuatua ia Iesu Keriso. Ona matau lea o filifiliga atamai ia e te tosina gofie i ai e fai.

O le tou faatuatua ia Iesu Keriso ma Lana talalelei o le a outou maua ai le lototele e faaipoipo ai ma fanauina fanau i o outou aiga a o outou talavou ma mafai ona mauaina. Pe a outou matutua e pei o au, o le a outou faamemelo ia outou fanau, fanau a fanau, ma a latou fanau, e sili atu lava i soo se lauiloa po o le manuia lea e ono oo mai i se isi itu.

Ia mo se fesili ou te tatalo o le a outou mafaufau i ai i aso uma: O le a faapefea ona outou saunia mo la outou faatalanoaga patino ma le Faaola?

O outou le autalavou o le tofi tautupu e le atoatoa. E leai ma se tasi o i tatou e atoatoa. O lea, o outou, faatasi ai ma le toatele o i tatou, e matua faafetai lava mo le Togiola a le Faaola, lea ua maua ai le faamagaloga atoa pe a e salamo moni. Ua outou iloa foi o lo outou nonofo ai iinei i le olaga faaletino e puupuu lava. (O le faateleina lava o lou matua, o le faateleina foi lena o lou iloaina o lena mea.) E oo mai le taimi, o le a faauu ai outou taitoatasi mai lenei olaga maaleale ma see atu i le lalolagi e sosoo ai.

O loo faatalitali mai le aso faamasino ia i tatou taitoatasi. Ou te leiloa pe feilafi i penina le faitotoa o le lagi pe leai, ae ou te iloa, e pei ona iloa e tamaiti aoga uma o le Tusi a Mamona, e faapea “o le leoleo o le faitotoa o le Paia e Toatasi o Isaraelu; ma na te le faaaogaina se auauna iina; … ona o le Alii le Atua o lona suafa lea.”³⁶ Ioe, o le a tofu i tatou taitoatasi ma se faatalanoaga patino ma Iesu Keriso.

O aso uma i le lalolagi e te maua ai se taimi ma se avanoa e saunia ai mo lena faatalanoaga. Faamolemole ia iloa le mea lenei: A e filifili e ola i le itu a le Alii, o le a le tuua lava na o oe. Ua tuu atu e le Atua ia te oe le avanoa e maua ai Lana fesoasoani a o e faagasolo ai i le ala lamatia o le olaga nei. A e sasaa atu ma le filiga ma le naunautai lou loto ia te Ia i tatalo i aso uma, o le a Ia auina mai Ana agelu e fesoasoani ia te oe.³⁷ Ua Ia tuuina atu ia te oe le Agaga Paia ia faatasi i lou itu a o e ola agavaa ai. Ua Ia tuuina atu ia te oe tusitusiga paia ina ia mafai ona e taumafa atoatoa ai i afioga a Iesu Keriso.³⁸ Ua Ia tuuina atu ia te oe upu e faalogo i ai mai perofeta soifua.

Ua Ia tuuina atu ia te oe se avanoa e maua ai se faamanuiaga faapeteriaka. O le a e maua ai se malamalamaaga e uiga i lou sootaga ia Aperaamo, Isaako, ma Iakopo atoa ai ma le feagaiga na osia ma i latou ma a latou fanau. Ua maua foi i lou faamanuiaga faapeteriaka ia malamalamaaga e uiga i lou gafatia i le olaga iinei ma le olaga a sau. O nei mea taitasi uma ma isi fesoasoaniga faalelagi o le a fesoasoani ia te oe e filifili lelei ina ia mafai ai ona e tulimatai atu i le lua feiloaiga faafesagai, faatasi ma lo tatou Alii ma le Faaola.

O lau fesili mulimuli: O ai o le a e tuu i ai lou faatuatuaga?

O outou le autalavou o le tofi tautupu ua iloaina o le Atua o lo outou Tama. E alofa o Ia ia te outou. E finagalo o Ia ia outou fiafia. Tuu atu lou faatuatuaga ia te Ia.³⁹ Faatumau lau taulaiga i Lona malumalu paia. Ia agavaa e maua ou faaeega paia ma sauniga faamau. Ia tumau i le faamaoni i na feagaiga, ma alu soo i le malumalu. Manatua, o lau sini aupito sili ona mamalu o le mauaina lea o le meaalofa silisili o meaalofa uma a le Atua, o le ola e faavavau lea.⁴⁰ O sauniga o le malumalu e taua mo lena faamanuiaga.⁴¹

Ou te valaaulia outou e suesue ma le agaga tatalo i saunoaga faatusitusiga paia o lou faasinomaga, faamoemoega, ma le faamanuiaga, e pei ona faamauina i le vaega e 86 o le Mataupu Faavae ma Feagaiga. E mo na o outou lava! Faafofoga.

“O lea, ua faapea ona fetalai mai o le Alii ia te outou, o e ua faaauau ai pea le perisitua e ala i le gafa o o outou tama—

“Aua o outou o suli tatau i le tulafono, e tusa ma le tino, ma na natia mai le lalolagi faatasi ma Keriso i le Atua—

“O lea ua tumau ai pea lo outou ola ma le perisitua, ma e tatau lava ona tumau pea e ala atu ia te outou ma lo tou gafa seia oo i le toefuataiga o mea uma na fetalaia e fofoga o perofeta paia uma talu mai le amataga o le lalolagi.

“O lea, amuia lava outou pe afai tou te tumau pea i lo’u agalelei, o se malamalama i Nuuese, ma o se faaola i lo’u nuu o Isaraelu, e ala atu i lenei perisitua.”⁴²

Ioe, o outou moni lava o le autalavou o le tofi tautupu, na foafoaina i le faatusa o le Atua. O outou o suli tatau i le tulafono, ina ia faaosoosoina ma tofotofoina. E mafai ona outou filifili e avea ma se malamalama i le lalolagi, e fesoasoani e laveai le fanau a le Atua, ia maua le olioli, ma mulimuli ai mauaina le faamanuiaga o le ola e faavavau.

Ia, ina fesoasoani ia te outou i nei filifiliga taua ua i ai i o outou luma, ou te fia tuuina atu ai se faamanuiaga i o outou luga. E tusa ai ma ki o le faaaposetolo paia ua ou umia, ou te faamanuia ai outou ina ia outou taumamafa i afioga a Iesu Keriso ma faaaoga Ana aoaoga i o outou olaga. Ou te faamanuia ia te outou i le mana e ola ai e pei ona Ia finagalo tou te ola ai ma, e ala i a outou faataitaiga o le amiotonu, ia agavaa ai o se faatusa o se tagata o le Ekalesia e tauaveina Lona suafa paia. Ou te faamanuia ia te outou i le manuia i a outou sailiga faaleaoaoga ma faalegaluega, i le tulaga e mafai ai ona outou tuuina atu auaunaga taua i o outou uso a tagata. Ou te faamanuia ia te outou i le soifua maloloina ma le malosi manaomia e ausia ai le taunuuga paia o loo faapolopolo e le Atua mo outou taitoatasi, ina ia auala mai ia te outou, lo outou faia o Lona finagalo.

Ou te faamanuia outou ma tuu atu lau molimau o loo soifua le Atua! O Iesu o le Keriso. O Lana Ekalesia lenei o loo Ia taitaia e ala i Ana perofeta ma aposetolo. Tatou te alolofa ma lagolagoina Thomas S. Monson o le Peresitene o le Ekalesia a le Alii i aso nei. Ou te tuu atu lenei molimau ma le faamanuiaga ia te outou, ou uso e ma tuafafine, faatasi ma le faailoaga faamaoni o lou alofa mo outou taitoatasi, i le suafa paia o Iesu Keriso, amene.

© 2013 puletaofia e le Intellectual Reserve, Inc. Ua taofia aia tatau uma. Faamonia le FaaPeretania: 1/13. Faamaonia le faaliliuga: 1/13. Faaliliuga o le Youth of the Noble Birthright: What Will You Choose? Samoan. PD50048932 890