詹森長老的講道
與總會持有權柄人員一夕談
2020年2月5日，星期三
今晚我哋好高興可以同你哋一齊。我同吉兒喺歐洲同嗰度美好嘅人一齊服務咗四年，所以當納爾遜會長叫我哋返去教會教育機構度服務嗰陣，我哋真係好驚喜同高興。可以再次同你哋呢一群費盡心力去幫助年輕人學習同生活耶穌基督福音嘅人緊密咁聯繫，真係好似返到屋企一樣。
睇到自己同其他人喺生命旅程入面嘅兜兜轉轉，令我諗起我哋邁向永生嘅旅程。對於我哋呢啲接受咗耶穌基督同佢贖罪嘅人嚟講，我哋生命嘅模式係好相似嘅。我哋運用對救主嘅信心，就算面對挑戰都要跟從主。我哋悔改我哋嘅罪，接受必要嘅教儀，同埋持守到底。但係我哋每個人生命入面嘅細節都好唔同，每個人遇到嘅挑戰都唔一樣。
諗吓李海嘅家庭進入應許地嘅旅程。佢哋獨特嘅旅程，為我哋自己嘅旅程帶嚟另一番見解。佢哋知道佢哋朝住應許地嘅方向行，但係佢哋唔知道所有事，連目的地或者準確嘅路線都唔知道。佢哋喺途中面對好嚴峻嘅挑戰。就算係唔會埋怨嘅尼腓，佢都話佢哋「遭受了許多痛苦和困難，是的，多得無法全部寫下來」。1
佢哋一路上被帶領。事實上，李海喺之前嗰晚被告知「他第二天啟程，進入曠野」。2第二朝，佢發現利阿賀拿放咗喺佢帳幕嘅門口，為佢哋嘅旅程提供神聖嘅指引。但係擁有咗利阿賀拿，唔代表會改變佢哋同應許地之間地理上嘅阻隔。利阿賀拿冇縮短到，佢哋需要橫越嘅阿拉伯半島或者嗰啲海洋嘅路程。佢哋依然要面對漫長艱難旅程入面嘅種種挑戰，邁步向前。但係利阿賀拿的確指引佢哋「走在曠野中較富饒的地帶」，3，如果佢哋唔懶惰，利阿賀拿會幫佢哋行一條直接嘅路線。4
由於喺旅程上佢哋遇到嘅困難，拉曼同雷米爾抱怨。有啲困難嘅出現係因為佢哋自己嘅行為。即使當佢哋跟從指示正確咁行，佢哋依然要食生嘅肉，同忍受沙漠猛烈嘅陽光。就好似拉最同雷米爾咁，有啲人認為佢哋唔會面對挑戰。如果佢哋做正確嘅事，所有嘢都會變得容易。事實並唔係咁。我哋係會受到鞏固同指引，但並唔代表我哋唔會面對挑戰。
雖然佢哋一班人一齊行，其實佢哋每個人同時都各自有自己嘅旅程。雖然佢哋嘅旅程令佢哋身處喺相同嘅地方，但係佢哋每個人永恆嘅軌跡都好唔一樣，因為永恆嘅軌跡係根據佢哋喺旅途中做嘅個人決定同行為而定嘅。
我哋每個人喺今生都有為我哋個人度身訂造嘅旅程，但係我哋亦會同其他人分享旅程嘅一部分。例如，我哋喺福音進修班同福音研究所，以及教會教育上共同努力嗰陣，我哋就喺同一個旅程上喇。我哋有個目標——我哋大致上知道我哋去緊邊度，但係我哋唔知道途中嘅所有障礙或者路線嘅每個細節。
我哋每個人同大家一齊行呢個旅程都可以選擇用邊種方式。我哋可以埋怨。我哋可以感到喜樂。就算面對挑戰，我哋都可以感恩。對某啲人嚟講，教會政策或者措施嘅改變會為佢哋帶嚟挑戰。我好高興見到福音進修班&同福音研究所，點樣回應強調以家庭為中心、教會從旁輔助，呢個受靈啟發嘅福音學習方式嘅轉變。
我哋一定會有挑戰。藉住跟隨主嘅指引，我哋可以克服呢啲挑戰，從中汲取教訓。先知約瑟‧斯密話：「很顯然地，主依據要完成的事工賜給我們權力，依照我們眼前的挑戰賜給我們力量，也依照我們的需要賜給我們恩典和幫助。」5
我哋接受指引，會幫助我哋旅程中走入嗰條最直接嘅路線，同埋經過曠野中最富饒嘅地帶。我哋有來自先知嘅指引。我知道我哋係由先知、先見同啟示者所帶領。呢個係幾咁大嘅祝福！我哋係由教會教育理事會所帶領，我哋仲有韋伯弟兄同佢嘅團隊，同埋其他受靈啟發嘅領袖。除此之外，如果我哋喺我哋個別指派上遇到特定嘅問題，我哋每個人係有資格去接受個人指引嘅。
教會教育理事會，同埋理事會嘅執行委員會每個月都會開會。我哋喺呢啲會議度接受指示同教導。我哋亦好蒙福每年有一次「與總會持有權柄人員一夕談」，咁多年嚟我哋接受到非常有幫助同埋針對性嘅指引，幫助我哋(分別作為一個組織同埋個人)行走喺我哋嘅旅途上。
我祈求我哋可以打開我哋嘅心去接受來自主嘅指引同指示。我知道主活著，佢會幫助同指引我哋。
奉耶穌基督嘅名，阿們。
我哋而家有機會同大衛·貝納長老一齊。貝納長老係教會教育理事會同埋理事會嘅執行委員會成員。佢領導教會教育機構，令大家獲益良多。早於超過20年前，佢就以瑞克斯學院校長嘅身份出席理事會會議。佢用信心同極大嘅努力，主力帶領瑞克斯學院轉型到楊百翰大學愛達荷分校嘅嗰個旅程。
大衛·貝納長老喺2004年10月7日，蒙按立同按手選派為耶穌基督後期聖徒教會十二使徒定額組成員。喺召喚到十二使徒定額組之前，貝納長老係一名教育家，擔任楊百翰大學愛達荷分校嘅校長。
蘇珊·貝納姊妹係楊百翰大學嘅畢業生。佢同貝納長老結咗婚44年，有三名兒子。
我哋而家一齊嚟聽吓查德·韋伯弟兄同埋貝納長老嘅對話啦。