31 Siulai 2022, Sāpate Nimá – Ko Hono Vahevahe ʻo e Ongoongoleleí (miniti ʻe 50)

Vakai Fakalūkufuá 

Ko e taumuʻa ʻo e fakataha ko ʻení ke fakatokangaʻi mo aleaʻi fakataha ʻa e fiefia mo e ngaahi tāpuaki ʻoku maʻu mei hono vahevahe ʻo e ongoongolelei ʻo Sīsū Kalaisí. Fakatefito e fakatahá ʻi he ongo kaveinga ngāue ko ʻeni:

1. Tokoniʻi ʻa e talavou takitaha ke teuteu mo ngāue fakafaifekau, mo tokoniʻi ʻa e finemui takitaha ʻoku holi ke teuteu mo ngāue fakafaifekaú.
2. Tokoniʻi ʻa e mēmipa takitaha ke vahevahe ʻa e ongoongolelei ʻo Sīsū Kalaisí ʻi ha ngaahi founga angamaheni mo fakanatula ʻaki hono ngāueʻi ʻa e ngaahi tefitoʻi moʻoni ʻo e ʻofá, vahevahé, mo e fakaafé.

Muimui ki he fakahinohino ʻa e Laumālié ʻi hoʻo teuteú. Faiako ʻi ha founga te ne poupouʻi ai e kāingalotu ʻi homou uōtí pe koló ke nau kau ʻi he fealēleaʻakí, tautautefito ki he toʻu tupú. Kuo ʻoatu ʻa e fokotuʻutuʻu ko ʻení ke ke fakaʻaongaʻi ʻi hoʻo teuteu [ki he fakatahá]. Download PDF

Ko Hotau Fatongia Fakafuakava mo e Tāpuaki ke Malanga ʻAki ʻa e Ongoongolelei ʻo e Melinó (miniti ʻe 10)

Kamata e fakatahá ʻaki hano faka‘aliʻali e konga vitiō ko ʻeni mei he lea ʻa Palesiteni Lāsolo M. Nalesoní mei he konifelenisi lahi fakamuimuitahá.

Ngaahi fehuʻi ki he fealēleaʻakí (miniti ʻe 5): 

• Ko e hā ʻa e meʻa naʻá ke akó pe ko e hā ʻa e ngaahi ongo naʻá ke maʻu ʻi he lolotonga ʻo e pōpoaki ʻa e palōfitá?
• Ko e hā ʻoku fuʻu mahuʻinga ai ki he ʻEikí hono vahevahe ʻo e ongoongoleleí?
• Ko e hā hoʻo ongoʻi ki he fakamatala ʻa Palesiteni Nalesoni ʻo kau ki he ngaahi finangalo ʻa e ʻEikí ki he toʻu tangata kei tupu haké ʻi he fekauʻaki mo e ngāue fakafaifekaú?
• Ko e hā te tau lava ʻo fai fakataautaha mo fakakātoa ke fakahoko ʻa e meʻa ʻoku finangalo ʻe he ʻEikí meiate kitautolu fekauʻaki mo hono vahevahe ʻo e ongoongoleleí?

Teuteu ki he Ngāue Fakafaifekaú (miniti ʻe 10)

ʻOku vahevahe ʻi he ongo vitiō ko ʻení ha faleʻi meia Palesiteni M. Lāsolo Pālati mo ʻEletā Kuenitini L. Kuki ki he founga ʻe lava ai ʻa e toʻu tupú ʻo teuteu fakataautaha ki he ngāue fakafaifekaú pea mo e founga ʻe lava ke hoko ai ʻa e fāmilí, ngaahi kaungāmeʻá, mo e kau taki ʻo e Siasí ko ha ivi tākiekina leleí.

Ngaahi fehuʻi ki he fealēleaʻakí (miniti ʻe 5): 

• ʻE tokoniʻi fēfē ʻe he fāmilí, kau takí, mo e ngaahi kaungāmeʻá ʻa e fānaú mo e toʻu tupú ke nau mateuteu mo ngāué?
• Ko e hā ʻokú ke fai ʻi hoʻo hoko ko e toʻu tupú ke muimui ai ki he fakahinohino ʻa e palōfitá ke teuteu ki he ngāue fakafaifekaú?
• Te ke lava fēfē ʻi hoʻo hoko ko e toʻu tupú ʻo tokoniʻi hoʻo ngaahi kaungāmeʻá ke nau teuteu ke ngāué?

Ko e Ngaahi Tāpuaki ʻo e Ngāue Fakafaifekaú (miniti ʻe 8)

ʻI he vitoó ni, ʻoku vahevahe ʻe Palesiteni Pālati ʻene ʻausia fakataautaha ʻi heʻene fili ke ngāue fakafaifekau taimi kakato ʻi heʻene kei talavoú pea mo e ngaahi tāpuaki naʻa ne maʻu tuʻunga mei aí.

Ngaahi fehuʻi ki he fealēleaʻakí (miniti ʻe 5): 

• Ko kinautolu kuo ngāue fakafaifekaú, kuo tāpuekina fēfē hoʻo moʻuí ʻe he ʻausia ko iá?
• Ko e hā e meʻa ʻokú ke hanganaki fiefia atu ki ai—ʻi hoʻo hoko ko e toʻu tupú mo e kakai lalahí—ʻi he lolotonga hoʻo ngāue fakafaifekaú?

Ngaahi Potufolofola mo e Ngaahi Maʻuʻanga Tokoni Kehé 

• Tokāteline mo e Ngaahi Fuakava 18:13-16 mo e 62:3
• 3 Nīfai 18:24–25
• Tohi Tuʻutuʻuni Fakakātoá vahe 24 

ʻOfa, Vahevahe, Fakaafé (miniti ʻe 16)

ʻOku ʻatā kiate kitautolu takitaha ʻa e ngaahi tāpuaki mo e fiefia ʻo e ngāue fakafaifekaú. ʻOku tāpuekina e kāingalotu kotoa pē ʻo e Siasí ʻi heʻetau—ʻofa ki he ʻOtuá mo hotau kaungāʻapí—ʻi he ngaahi founga angamaheni mo fakanatulá; vahevahe ʻa e ongoongoleleí ko ha konga pē ia ʻo ʻetau moʻui fakatāutahá, fakafāmilí, mo e siasí; pea fakaafeʻi ʻa e niʻihi kehé ke nau omi ʻo mamata, omi ʻo tokoni, pea nau omi ʻo kau. ʻOku ʻomi ʻe hono vahevahe ʻo e ongoongoleleí ha fiefia kiate kitautolu, ki he ʻEikí, pea ki he niʻihi kehé; ʻokú ne ʻomi ʻa e Laumālie mo e mālohi ʻo e ʻOtuá ʻo lahi ange ki heʻetau moʻuí (Mōsaia 18:10, Sione 15:4-5); ʻokú ne maluʻi kitautolu mei he ʻahiʻahí (3 Nīfai 18:24-25); pea ʻokú ne ʻomi ʻa e fakamoʻui mo e fakamolemoleʻi ʻo e ngaahi angahalá (Tokāteline mo e Ngaahi Fuakava 62:3).  

ʻOku fakamatala ʻa e ongo vitiō ko ʻeni meia ʻEletā Kuenitini L. Kuki mo Keuli E. Sitīvenisoní ki he ngaahi akonaki ko ʻení.

Ngaahi fehuʻi ki he fealēleaʻakí (miniti ʻe 10):

• ʻOku ʻomi fēfē kitautolu ʻe hono vahevahe ʻo e ongoongoleleí ke tau ofi ange kia Sīsū Kalaisí?
• ʻE anga fēfē haʻo fakakau ʻi he founga angamaheni mo fakanatula ʻa e niʻihi kehé ʻi hoʻo moʻui ʻoku fakatefito ʻia Kalaisí?
• ʻE lava fēfē ʻe hotau uōtí pe koló ʻo fokotuʻu ha ʻātakai ʻoku faingofua ai ke ʻofa, vahevahe, mo fakaafeʻí?

Ngaahi Potufolofola mo e Ngaahi Maʻuʻanga Tokoni Kehé 

• Mātiu 28:18–20 
• Tohi Tuʻutuʻuni Fakakātoá vahe 23 

Lea Tukú, Fakaafé, mo e Fakamoʻoní (miniti ʻe 2)

• Fakaafeʻi ʻa e kalasí ke nau fakakaukauʻi ʻi he faʻa lotu ʻa e founga ke nau fetokoniʻaki ai kae tautautefito ki he toʻu tupú ʻi heʻenau teuteu ki he ngāue fakafaifekaú.
• Fakaafeʻi e kau taki fakauōtí mo e kāingalotú ke nau ngāue fakaetauhi kiate kinautolu ʻoku teʻeki ke nau fanongo ki he pōpoaki ʻa e palōfitá.
• Fakaafeʻi e toʻu tupú ke nau teuteu ki he ngāue fakafaifekaú pea fakaafeʻi honau ngaahi kaungāmeʻá ke nau fai ʻa e meʻa tatau.
• Fakaafeʻi ʻa e tokotaha kotoa pē ke nau ʻofa, vahevahe, pea fakaafeʻi fakamātoato ʻa kinautolu ʻoku nau feohí ʻi ha ngaahi founga angamaheni mo fakanatula.
• Fakamoʻoni ki he ongoongolelei kuo fakafoki maí pea mo e fiefia ʻi hono vahevahe ia mo e niʻihi kehé.