Ang Service Mission

Kapag pinaglilingkuran natin ang mga anak ng Ama sa Langit, tinutulungan natin silang maniwala sa Diyos. “Sinabi ni Ammon sa kanya: Hindi, kundi magiging tagapagsilbi ninyo ako. Anupa’t si Ammon ay naging tagapagsilbi ni haring Lamoni. … Ngayon, nang makita ito ni Ammon ay tumaba ang kanyang puso sa kagalakan, sapagkat sinabi niya, ipakikita ko ang aking kapangyarihan sa kanila na kapwa ko mga tagapagsilbi, o ang kapangyarihan na nasa akin, sa pagpapanumbalik ng mga kawang ito sa hari, … nang maakay ko silang maniwala” (Alma 17:25, 29; idinagdag ang italics).

Kapag pinaglilingkuran natin ang iba, ipinapakita rin natin ang ating pagmamahal sa Ama sa Langit: “Kung kayo ay nasa paglilingkod ng inyong kapwa-tao, kayo ay nasa paglilingkod lamang ng inyong Diyos” (Mosias 2:17).

Ang Layunin ng Service Missionary

Ang ating layunin ay tulungan ang iba na lumapit kay Cristo sa pamamagitan ng paglilingkod sa kanila na tulad ng gagawin ng Tagapagligtas. Tayo ay boluntaryong naglilingkod sa mga organisasyon ng kawanggawa, sa mga gawain sa Simbahan, at sa komunidad. Tayo ay maglilingkod sa Kanyang pangalan sa bawat isa, tulad ng ginawa Niya, na nagpapahayag ng Kanyang mapagmahal na kabaitan.

Mahahalagang Layunin ng Isang Service Mission

• Magbigay ng pagkakataon sa lahat ng handang kabataang babae at kabataang lalaki na maglingkod sa Panginoon at mapag-ibayo ang kanilang patotoo tungkol sa Kanya.
• Tulungan ang bawat service missionary na maghanda sa habambuhay na paglilingkod.
• Magbigay ng kinakailangan at mahalagang paglilingkod sa mga organisasyon ng Simbahan at komunidad.

Ano ang isang service missionary?

Ang mga service missionary ay naglilingkod sa loob ng 6 hanggang 18 buwan (mga babae na edad 19–25) at 6 hanggang 24 na buwan (mga lalaki na edad 18–25). Nakatira sila sa kanilang tahanan at naglilingkod sa kanilang lugar. Naglilingkod sila nang halos full-time ayon sa kanilang kakayahan at situwasyon. Bawat service missionary ay binibigyan ng isang customized na karanasan sa misyon na iniakma sa kanyang mga talento, kasanayan, at kaloob. Sa kanilang misyon, karaniwan sa mga service missionary na maglingkod sa iba’t ibang assignment, kabilang na sa mga inaprubahang organisasyon ng kawanggawa, mga operasyon ng Simbahan, at mga pagkakataong maglingkod na ibinigay ng stake. Sa kabuuan ng kanilang misyon, ang mga service missionary ay naglilingkod sa Panginoon sa ilalim ng pamamahala ng kanilang mga stake president.

Sino ang maaaring maglingkod bilang service missionary?

Ang karapat-dapat na mga lalaki (edad 18 hanggang 25) at mga babae (edad 19 hanggang 25) na hindi makapaglingkod sa isang proselyting mission sa mga kadahilanang pisikal, mental, o emosyonal ay maaaring tawagin sa isang service mission. Ang isang karapat-dapat na lalaking hindi makapaglingkod sa proselyting mission ay walang tungkulin sa priesthood na maglingkod sa isang service mission.

Ang mga proselyting missionary na umuwi nang maaga dahil sa aksidente, karamdaman, o iba pang kondisyon sa kalusugan at may hangaring ipagpatuloy ang kanilang paglilingkod ay maaaring i-reassign sa service mission kung inirekomenda ng mga General Authority sa Missionary Department at stake president at inaprubahan ng Korum ng Labindalawa.

Paano tinatawag ang mga service missionary?

Ang mga kabataang lalaki at babae na hindi makapaglingkod ng full-time proselyting mission ay tinatawag na maging mga service missionary. Ang pagsusuri na ito ay ginagawa sa proseso ng missionary recommendation o pagkatapos maglingkod ang isang indibiduwal sa proselyting mission at umuwi bago ang inaasahang petsa ng pagtatapos ng misyon. Ang isang service missionary ay tinatawag ng Panginoon sa pamamagitan ng Kanyang propeta para maglingkod sa isang lugar na iniakma sa kanyang mga talento, kasanayan, at kaloob.