Te Tupuanga O Te Puka A Momoni

Na roto ia Iosepha Timete oki, e te roa e te mana o te Atua, kua akauriia te Tuatua Tapu taito, koia oki te Puka a Momoni ki te reo papaa, e kua akakite mai aia i te tika anga no te reira au mea i raveia ana. Kua akapapu tikai aia e, i Sepetema po 21, 1823, kua kimi atu aia i te Atua na roto i te pure, ina kua rauka takere ana oki iaia tetai araveianga Tapu. Teia tana i tuatua mai.

Tei te kapiki atu au ki te Atua, e kite akera au i te marama i te mama anga mai ki toku pia, ko tei tupu marie ua mai ïa, e marama takiri akera toku pia mei te tu rai o te ra i te avatea, i taua taime rai kua mama mai tetai tangata ki te pae i toku roi moe, ma te tu ua i te reva, kare oki tona nga vaevae i pakia ki te taua.

E kakau pu teatea rava tona. Tona teatea kare atu e apinga enua nei e aiteiaʼi taku i kite ana; me kore ra, taku i irinaki ana e, e apinga enua tetai ka rauka kia aite ki tona teatea i te kaka. Kare e kakau i tona nga rima, i runga ua ake i te pauanga, mei te reira katoa tona nga vaevae, kare rai e kakau i runga ua ake i te porotata. Kare katoa tona upoko e te kaki i tapokiia Kua kite rai au e, kare ona kakau ke atu mari ra ko teia kakau pu, no te mea te tuera ua ra, kua kite atu au ia roto i tona umauma.

Kare te teatea e ko tona kakau anake, mari ra, ko tona kopapa katoatoa. Kua kaka ïa i runga ake i ta te vaa ka tuatua, e tona mata mei te uira rai ïa. Kua marama pu ua toku pia, ina ra kare e kaka rava ana mei tei takapini iaia uaorai. I toku akara anga mua kiaia, e mataku tikai au, ina ra, kua rere ke atu te mataku iaku.

Kua kapiki mai aia i toku ingoa, e kua na ko maira kiaku e karere aia i tonokia mai mei mua mai i te aroaro o te Atua kiaku, e ko Moronai tona ingoa, e e angaanga ta te Atua i anoano iaku kia rave, e ka riro oki toku ingoa i te akakinoia e te akameitakiia i roto i te au basileia katoatoa e te au kopu, e te au reo, e ka tuatuaia ïa i te meitaki e te kino i te au iti tangata katoatoa.

Kua karanga maira aia e, e puka tetai tei vaioia, kua tataia ki runga i tetai papa auro, tei reira te tata anga o te aronga tei noo ana ki teia enua, tei reira oki to ratou katirianga mai. E kua tuatua mai oki aia e, tei roto katoa i reira te ki anga o te evangelia mutu kore, mei tei akakiteia mai e te Akaora ki te aronga taito tei noo ana ki reira.

Tera oki tetai, e rua oki toka i roto i te ana ario, e ko teia toka nei kua tamouia te reira ki runga i te paruru umauma, e kua tuatuaia i te Urima e te Tumima. Kua vaioia ïa ma te au papa; e ko tei akono i te reira, e tei taangaanga i teia toka nei, ko te akara ïa o te tuatau mua, e kua teateamamao oki te Atua i te reira no te akakoroanga no te akauri i te puka.

· · · · · · ·

E kua tuatua akaou mai aia kiaku, e me rauka iaku taua au papa tei tuatuaia e ïa, kare ra i tae mai ake te tuatau no te reira, auraka rava au e akaari atu i te reira ki tetai ua atu tangata, auraka katoa rai te paruru umauma e te Urima e te Tumima, mari ra, kia ratou ko taku e akaueia atu kia akaari, me kare au e akarongo, ka akakoreia au. Te tuatua ua ra aia kiaku no teia au papa nei, e kua ngaa maira te orama kiaku, e kite iora au i te ngai vairanga o taua au papa ra, e no te marama meitaki oki, kua papu meitaki iaku te ngai kia aere au kia akara.

Kia oti i teia araveianga, kite akera au i te marama i roto i toku pia i te taokotai akaou anga mai ki runga i teia tangata tei tuatua mai kiaku, e kua akapera ua mai rai e kua poiri akaou, mari ra tei runga ua iaia, e kare i roa ana, mei te tu mua rai, kua tu ua tetai marama ki runga i te rangi, e kua kake atu aia ki runga e ngaro ke atu, kua vai poiri ua toku pia mei te tu rai i mua ake ka aere mai ei te marama rangi.

Kua noo manakonako ua au no teia angaanga tei tupu, ma te umeremere i tei tuatuaia mai kiaku e teia karere umere. E ina, i toku manakonakoanga, kua kite akaou atura au i toku pia i te marama akaou anga, kare i roa ana, ko taua karere rangi maira ki te pae i toku roi.

Kua akamata akaou maira aia i te tuatua i te au mea ravarai tana i tuatua mai ana i tona aerenga mua, ma te kore rava e ngai tuke, e kua akakite katoa mai aia kiaku i te akavaanga maata te ka tae mai ki te enua nei, e te takoreanga na roto i te onge, te koke, e te maki mate, e ka tae mai teia au tumatetenga ki te enua nei i teia uki nei. I te oti anga o teia au mea nei, kua kake akaou atura aia ki runga mei tei mua ana.

I teia taime nei, kua oonu rava teia angaanga ki runga i toku manako, e kua rere ke atu te moe mei toku mata, kua takoto iora au ma te akaavai e te poitirere maata no taku i akarongo e taku i kite. Ina ra, e maata ua atu rai toku poitirere, i toku kite akaou anga mai i taua karere rai ki te pae i toku roi e kua tuatua aia te au tuatua tei tuatuaia e ïa, e kua kapiti ua mai aia i tetai i te na ko anga mai e, ka timata a Satani iaku, (no runga ïa i te tu o te kopu tangata o toku metua, kare oki ratou i te aronga apinga nui) kia rauka te au papa auro, kia oko atu te reira, kia apinga nui matou.

Ko tana ia i arai mai iaku, i te na ko anga mai e, auraka rava oku e akakoroanga ke me rauka mai teia au papa nei mari ra, kia akakaka i te Atua, e auraka rava ei manako ke, mari ra ei te akatumu i te basileia o te Atua. me kore ra, kare e rauka iaku te reira.

I muri ake i te toru o te aravei anga, kua kake akaou atu aia ki te rangi mei tei mua rai, e kua noo eumiumi ua au no teia kite tei tae mai kiaku, e i muri ua ake i te oki anga atu o te karere tapu, kua kakaoa te moa, kare i roa atu ana te kake maira te ata ao, no reira kua pou rava te po i to maua pukapukaanga.

Kua moe atu au e kare i roaia ana kua ara mai, e mei tei matauia oki, kua aere atu ki te angaanga matau, ina ra, kia tamata au i te angaanga, mei taku rai i matau i te rave, kua kite au e kare takiri toku kopapa e maroiroi ana. Toku metua, i te angaanga i te pae iaku, kua kite aia i tetai tarevake iaku, no reira kua karanga mai aia, e aere au ki te kainga. Kua tamata atura au kia aere atu ki te kainga, ina ra, i toku tikoti atu anga na roto i te aua i te ngai i angaangaʼi maua, kua paruparu rava au, e kua topa au ki raro, e kua ngaro te ao iaku.

Ko te mea mua tikai taku i rongo ake ko te tuatuaanga mai o tetai reo kiaku, e kua kapiki mai i toku ingoa. E kia akara akera au ki runga, kua kite atura au i taua karere ra, i te tu ua anga i runga ake i toku upoko, kua takapiniia e te marama mei tei mua ana. I reira kua tuatua mai aia kiaku i te au mea tana i tuatua mai ana kiaku i te po anga ake, e kua akaue mai iaku e aere au e akakite ki toku metua i te orama e te au akaueanga tei rauka mai iaku.

Kua akapera atu au, kua oki atu au ki toku metua e kua akakite atu au kiaia i te au mea katoatoa. Kua karanga mai aia kiaku e na te Atua te reira, e kua karanga mai aia kiaku kia aere au kia rave i te au mea ravarai tei akaueia mai kiaku kia rave.

Kua akaruke iora au i ta maua ngai angaanga, e kua aere atu au ki te ngai ta te karere i akaite mai i te vairanga anga o te au papa, e no te mea oki, te marama ua ra iaku te ngai i vai ei no te orama taku i kite ana, no reira ngoie ua iaku i te kite i te ngai i vai ei, i toku taeanga atu ki reira.

Tei te oire oki ko Manchester, Ontario County, New York, tetai tuaivi tano rai tona maata, e ngai teitei te reira. Tei te opunga o taua tuaivi ra, kare i mamao rava mei te take, e tei raro ake i tetai toka tau ua te maata, te vairanga o te au papa tei roto i tetai pia toka. Ko teia toka nei, e petetue e te punupunu a rotopu i te tua ki runga, e e angiangi, atu a te ope, no reira e kitea uaiaʼi a rotopu ki runga ake i te one, kareka te au ope e takapini ake, tei raro ïa i te one.

Te keri ra au i te one, kua rave mai au i tetai rakau era, e kua tauru akera au na raro i te toka, e kua taki mai au ki runga. E kia akara au ki roto, te vai ua ra te au papa te Urima e te Tumima, e te paruru umauma, mei tei tuatuaia mai e te karere. Ko te pia vairanga no teia au papa nei kua maaniia te reira ki tetai au toka tei tapiriia ki tetai tu timeni. I raro i te toe o te pia, kua taravaia e rua toka, e ko te mou teia i te au papa, e tetai au mea.

Kua tamata akera au kia rave mai i te reira, ina ra kua araiia mai au e te karere, e kua akakite akaou mai aia kiaku, e kare i tae ake te taime e raveiaʼi, e kare rai e tae, e tae ua atu e a mataiti mei teia nei rai, e kua akakite katoa mai aia, e kia tae ua mai rai au ki konei okotai taime i te mataiti, ei reira oki maua e aravei ei e kia rave tamou ua rai au i te reira, e tae ua atu ki te tuatau e rauka mai ei iaku te au papa.

E mei tei akaueia mai oki kiaku, kua aere atu au i te openga o to au mataiti ravarai, e te au taime ravarai ka aravei ua rai au i taua karere ra e ka rauka mai iaku tetai au apiianga, e tetai kite ou mei iaia mai i te taime e aravei ei maua no runga i ta Atua ka rave, e i te tu o te akaaereanga o tona basileia i te au ra i muri nei.

· · · · · · ·

Kua roa rai, kua tae te tuatau no te rave anga mai o te au papa, te Urima e te Tumima, e te paruru umauma. I te ra rua ngauru ma rua, o Sepetema mataiti tai tausani e varu anere e rua ngauru ma itu, mei tei matauia i roto i te au mataiti tei topa ki muri, kia aere au ki te ngai rai i vai ei te au papa, ina ko taua karere rai tei aere mai kiaku, e kua akakite mai aia kiaku kia rave au i te au papa, e teia tana akamatakiteanga. Naku e akono i te reira; tera, me mako kore au, me ngaro, ka tipu keia au; ina ra, me ka tamata pakari au i te akono i te reira, e tae ua atu ki te taime ka oki mai aia, te krere, e te tiki i te reira, ka paruruia te reira.

Kua kite vave au i te tumu i pakari ei te akoanga mai iaku e kia akono au i te reira, e te tumu oki i tuatua mai ei te karere kiaku e, kia akono meitaki au i te au mea mei tei orongaia mai kiaku, e me oti taku angaanga, ka tiki akaou mai rai aia i te reira au mea.

Kare oki i roa atu ana kua kitea e, tei toku rima te reira, kua tamata pakariia kia rauka atu mei ko nei iaku. Kua tamataia te au ravenga katoatoa.

Kua pakari rava atu te takinga kino anga i to mua ana, e kua inangaro te au tangata katoatoa e kia rauka teia au papa nei, mei toku nei rima, me ka rauka.

Kareka ra i te pakari o te Atua, kua vai rai te reira ki toku nei rima, kia oti ua atu te angaanga tei akakoroia kia rave au. Kia tau oki mei tei tuatuaia mai, kua tiki mai te karere i te reira. E kua oronga atu au i te reira kiaia, e tei iaia atu rai te reira e tae rava mai ki teianei rā, koia oki te rā rua o Me mataiti tai tausani e varu anere e toru ngauru ma varu.

Akara ki roto i te Pearl of Great Price kapi 50–54 e te History of the Church of Jesus Christ of Latter-day Saints. Puka 1. Pene 1-6. No te katoatoa o taua mea ra.

Ko te akapapaanga taito, no roto mai te reira i te enua mei te reo o te au tangata e tuatua mai mei roto i te one pueu, e tei akauriia ki te reo o teia tuatau nei na roto i te aroa e te mana o te Atua, mei tei tuatuaia mai e te karere tapu, ko tei neneiia ïa ki to te ao nei i te mataiti 1830 tei tuatuaia e ko te Puka a Momoni.