ʻAi ke ke ʻIloʻi Kimautolu

ʻIo! ʻOku mau tui ko Sīsū Kalaisí ko e ʻAlo Ia ʻo e ʻOtuá pea mo e Fakamoʻui ʻo e māmaní, pea ʻoku mau fāifeinga ke muimui kiate Ia. Hangē ko e ngaahi siasi faka-Kalisitiane lahi, ʻoku kehe ha ngaahi meʻa pau ʻi heʻemau tuí mei homau ngaahi kaungāʻapí. Ka ko ha kau muimui mateaki kimautolu ʻo Kalaisi mo ʻEne ngaahi akonakí. ʻOku tokoni ʻa e ngaahi konga makehe mo fakaʻofoʻofa ʻo ʻemau tui fakalotú ke fakaloloto ʻa e mahino ʻoku mau maʻu kia Sīsū mo ʻEne ongoongoleleí.

ʻIo! ʻOku mau tui ko e Tohi Tapú ko e folofola ia ʻa e ʻOtuá. ʻOku mau ako maʻu pē ia ʻi homau ngaahi ʻapí pea ʻi he lotú, pea ʻoku mau feinga ke moʻui ʻaki hono ngaahi akonakí. ʻOku mau tui ʻoku ngāue fakataha ʻa e Fuakava Motuʻá mo e Fuakava Foʻoú mo e Tohi ʻa Molomoná, ʻa ia ko ha fakamoʻoni ʻe taha ʻo Sīsū Kalaisí, ke hoko ko ha fakamoʻoni ʻo Sīsū pea ʻomi ha mahino kakato ange ki he palani ʻa e ʻOtuá.

ʻOku kehe ʻa e ngaahi temipalé ia mei homau ngaahi falelotu fakaʻaho ʻoku fai ai ʻemau ngaahi lotu ʻi he Sāpaté. Ko homau feituʻu māʻoniʻoni tahá ia, kuo tuku mavahe maʻá e ngāue toputapu taha ʻa e ʻOtuá. ʻOku ʻākilotoa ʻa e ngaahi meʻa ʻoku mau fai ʻi he temipalé ʻe he talaʻofa ko ia te tau lava ʻo nofo mo e ʻOtuá mo homau ngaahi ʻofaʻangá ki he taʻengatá. ʻOku mau tukupā kakato ange ʻi he temipalé ke muimui kia Sīsū Kalaisi. ʻOku tau fai ha ngaahi palōmesi ki he ʻOtuá, hangē ko e palōmesi ke tauhi ʻEne ngaahi fekaú mo fakatapui kitautolu mo e meʻa kotoa ʻoku tau maʻú kiate Ia. ʻOku fakatahaʻi ʻa e husepānití mo e uaifí pea mo e mātuʻá pea mo e fānaú, pe “silaʻi” kinautolu ki he taʻengatá. Pea ʻoku mau fai ʻa e ngāue tatau ki heʻemau ngaahi kuí, ʻo ʻoange ʻa e faingamālie ke nau tali ʻa e ngaahi tāpuaki ko iá ʻi he moʻui ka hokó ʻo kapau te nau fili ki ai.

ʻIo! ʻOku mau tui ko e fānau kotoa kitautolu ʻa e ʻOtuá pea ʻoku ʻatā ʻEne ngaahi tāpuaki kuo talaʻofa maí kiate kitautolu kotoa ʻi heʻetau feinga ke muimui ki Heʻene folofolá, ʻo tatau ai pē pe ko e hā hotau ʻulungāngá pe ko hotau kuohilí. Ko e Siasí ko ha feituʻu ia ke ako mo tupulaki ai ʻa e tokotaha kotoa pē. Mahalo te ke maʻu ha fakakaukau pau ʻoku ʻikai ke ke ongoʻi ʻoku totonu ke ke ʻi ai, ka ko hono moʻoní ʻoku omi homau kāingalotú mei he ngaahi puipuituʻa mo e ngaahi meʻa kehekehe ʻoku nau mahuʻingaʻia ai. Haʻu ʻo ʻaʻahi mai, pea mahalo te ke ʻohovale ʻi he tokotaha ʻe tangutu ʻi he sea ʻi ho tafaʻakí.