E rūru’u te mau fāfaura’a o te hiero ia tātou i te Atua ’e i te tahi ’e te tahi

E mau vāhi mo’a ’e te tura te mau hiero. Tē fa’ariro nei mātou i te mau hiero ’ei fare nō te Fatu ’o Iesu Mesia. E mea ta’a ’ē rā i te mau fare purera’a a te ’Ēkālesia, i reira mātou e fa’atupu ai te mau purera’a ha’amorira’a i te sābati ’e te tahi atu mau ’ohipara’a. ’Ua ha’amo’ahia te mau hiero te ’ohipa mo’a roa a’e a te Atua.

’Ua ’ī te mau hiero i te tāpa’o. ’Ei hi’ora’a, e ’ō’omo te feiā e haere nei i te hiero i te ’ahu ’uo’uo au noa ’ei tāpa’o nō te vi’ivi’i ’ore ’e te ’aifāito i mua i te Atua. E ha’apūra’a mo’a ’e te hau te mau hiero, i reira te feiā ’āpe’e o Iesu Mesia e nehenehe ai e tū’ati hōhonu atu ā iāna.

Te mea faufa’a roa atu, te mau hiero e mau vāhi ïa i reira mātou e nehenehe ai e rave i te mau fafaura’a mo’a ’e te Atua.

E nehenehe mātou e ha’apūai i tō tātou mau aura’a ’e te Atua ’e ’ia fa’ari’i i te mau ha’amaita’ira’a ta’a ’ē nō ’ō mai iāna ra nā roto i te mau fafaura’a. Te hō’ē fafaura’a ’o te hō’ē ïa parau fafau mo’a i rotopū i te Atua ’e tāna mau tamari’i. E hōro’a te Atua i te mau tītaura’a nō te fafaura’a, ’e i muri iho e hōro’a ’oia ia mātou te mā’itira’a ’ia fa’ari’i i te reira.
E rave tātou i te bāpetizora’a ’ei hi’ora’a.

’Ia bāpetizo-ana’e-hia mātou, e parau fafau mātou i te Atua e tāvini mātou iāna, e ha’apa’o i tāna mau fa’auera’a ’e e rave i te i’oa o Iesu Mesia i ni’a ia mātou. E mai te mea e rave mātou i te reira, ’ua parau fafau mai te Atua e fa’a’ore i tā mātou mau hara, e ha’amaita’i ia mātou ma tōna Vārua Mo’a ’e e hōro’a mai ia mātou te ora mure ’ore i mua i tōna aro.

E fa’a’āpī mātou i te mau fafaura’a ’o tā mātou i rave i te bāpetizora’a, ’a rave ai mātou i te ’ōro’a mo’a, ’o tei pi’i-ato’a-hia ’auhō’ēra’a, i te mau sābati ato’a i te fare purera’a. Teie ’ōro’a ’o te hōho’a ïa i muri a’e te ’ōro’a o te Pane Hope’a ’o tā Iesu i ha’amau i pīha’i iho i tāna mau ’āpōsetolo hou tōna pohera’a.

I muri a’e te bāpetizora’a, e nehenehe te mau melo pa’ari o Te ’Ēkālesia a Iesu Mesia i te Feiā Mo’a i te mau Mahana Hope’a nei, e rave i te mau fafaura’a hau atu ’e te Atua i roto i te hiero. E ha’apūai teie mau fafaura’a ’e mau parau fafau i tō rātou aura’a ’e ’ōna ’e e hōpoi mai i te mau ha’amaita’ira’a rahi atu ā.

’Ōro’a hiero

Te aura’a o te ta’o ’ōro’a hiero [endowment] ’oia ho’i « tao’a hōro’a ». I roto i te ’ōro’a hiero, e rave te mau melo pa’ari o te ’Ēkālesia i te mau fafaura’a hanahana, tae noa atu te parau fafau ’ia ha’apa’o i te mau fa’auera’a a te Atua ’e ’ia hōro’a i tō rātou taime ’e tā rātou tārēni i te ’ohipa a te Fatu. ’Ei fa’aho’ira’a, e fa’ari’i te mau melo i te mau ha’amaita’ira’a mai te ’ite rahi a’e i te fa’anahora’a a te Atua, te pūai rahi a’e nō te pe’e i te hi’ora’a o te Mesia, ’e te rāve’a e ora ’e te Atua ē a muri noa atu.

Tāʼatiraʼa

Hō’ē o te mau ’oa’oa rahi i roto te ’evanelia a Iesu Mesia o te parau fafau ïa ē, e nehenehe te mau tā’amura’a ’utuāfare e vai noa i’ō atu i tō tātou orara’a tāhuti nei. I roto i te hiero, e tīhonohia te mau ’utuāfare ’aore rā e « tā’ati-’āmui-hia » nō te tau mure ’ore.

I te roto i te ’ōro’a tā’atira’a i te fa’aipoipora’a, e tūturi te tāne ’e te vāhine fa’aipoipo i mua i te fata nō te rave i te fafaura’a ’e te tahi i te tahi ’e i te Atua. E parau fafau rāua i te fa’atura ’e i te here hope roa i te tahi ’e te tahi ’e e tapu rāua i te pe’e i te mau ha’api’ira’a ’e i te hi’ora’a o Iesu Mesia. ’Ei fa’aho’ira’a, e parau fafauhia ia rāua ē, e vai noa tō rāua fa’aipoipora’a ’e tō rāua ’utuāfare ē a muri noa atu.

Te ’ohipa nā ni’a i te i’oa o te mau tupuna i pohe

Tē ti’aturi nei mātou i te hō’ē Atua parauti’a ’e te hāmani maita’i ’o tē ’ore roa e pāto’i ’ia fāna’o te hō’ē ’o tāna mau tamari’i i te mau ha’amaita’ira’a o te ao mure ’ore, nō te mau tupura’a te ’ore e vī ia rātou.

I roto i te hiero, tē rave nei mātou i te mau bāpetizora’a, te mau ’ōro’a hiero ’e te mau tā’atira’a nā ni’a i te i’oa o te mau tupuna, ’o tei ’ore i fāna’o i te reira mau ’ōro’a hou rātou ’a pohe ai. I roto i teie ’ohipa, nā te hō’ē ta’ata ora e mono ’aore rā e rave nā ni’a i te i’oa o te hō’ē ta’ata i pohe.

E ravehia teie mau ’ōro’a mo’a i roto noa i te mau hiero. Tē ti’aturi nei mātou ē, e nehenehe tō tātou mau tupuna e mā’iti e fa’ari’i ’aore rā e pāto’i i teie pūpūra’a tei ravehia ma te here nō rātou.