Nzambe Azali Ebandeli ya Bosolo Nyonso.

Ntango mosusu, tokoki koyoka mobulungano na oyo etali bomoi na biso to mpe kozanga koyeba na oyo etali makambo ekoya. Tokoki kozwa nzela na biso liboso elongo na Tata na biso ya Lola ya bolingo mpe Mwana na Ye, Yesu Klisto, oyo bazali ebandeli ya bosolo.

Bosolo ezali boyebi ya makambo lokola ezali mpenza. Ndakisa, ya solo Nzambe alingi yo mpe akoki kosunga kobongola bomoi na yo. Nzambe ayebi biso moko, mpe Ye asalelaka Molimo Mosantu mpo na kosalisa biso toyeba nini ezali solo.

Tata na Lola atindaki Mwana na Ye, Yesu Klisto, mpo na koteya biso ndenge nini ya kozala na esengo mpe kozwa ntina na bomoi na biso.

Yesu azali ndakisa ya kokoka na biso na lolenge ya kobika. Mateya na Ye esalaka lokola mwinda ya bokambi oyo ekoki kokamba biso na kimya. Moto nyonso oyo alingi kolanda Yesu Klisto akoki kozwa mwinda oyo; Ye alaki ete nyonso akoluka Ye akomona Ye.

Molimo Mosantu, azali motindami ya Tata na Lola mpe Yesu Klisto. Ezali na ndenge ebele oyo Molimo Mosantu akoki kosalisa komema biso mpene ya Nzambe. Molimo Mosantu

• Abondisaka (tala Yoane 14:16–17, 26; Moroni 08:26; Malongi mpe Mayokani 36:2).
• Amonisaka mpe atatolaka bosolo (tala 2 Nefi 32:4– 5; Alma 5:46–47; Malongi mpe Mayokani 8:2–3).
• Apesaka litatoli ya Tata mpe Mwana (tala Yoane 15:26; 3 Nefi 11:32, 36).
• Asantisaka mpe apetolaka (tala Alma 13:10–12; 3 Nefi 27:19–20; Moroni 6:4).

Bondela Tata na Yo ya Bolingo na Lola.

Nzambe alingi biso mpe alingi koyoka biso. Ye alaki ete ntango tosambeli, Ye akopesa biso eyano mpe litambwisi.

Yesu ateyi biso ndenge nini ya kosambela na Bibilia (Matai 6:9–13) mpe Buku ya Mormon (3 Nefi 18:19).

Zala na kondima

Bibilia eteyi ete “bondimi ezali ntina ya makambo oyo tozali kolikya, elembeteli ya makambo oyo emonanaka te” (Baebele 11:1). Ntango tozali na kondima, toponi kondima ete Tata na Lola mpe Yesu Klisto bakosunga biso tomona esengo mpe ntina na bomoi na biso.

Yeba Molimo Mosantu

Nzambe asololaka na biso na nzela ya Molimo Mosantu na banzela ebele. Na kati ya Bibilia, mbala mingi elimbolamaka lokola “kaka mongongo ya moke” (tala 1 Mikonzi 19:11–12), kasi mutu nyonso akoyoka Molimo Mosantu na lolenge na ye moko. Mpo na yo, Molimo Mosantu akoyokama lokola:

• Mayoki ya bolingo, esengo, kimya, mpe bolamu (Bagalatia 5:22-23).
• Bopole mpe bokambi ya bomoi na yo (Malongi mpe Mayokani 8:2–3).
• Makanisi na kati na yo mpe mayoki na motema na yo (1 Bakolinti 2:9–11).
• Pole ezwi esika ya molili (Alma 19:6).

Bolanda Ndakisa ya Mobikisi

Yesu atie ndakisa ya suka mpo na banso kati na biso. Soki tolingi toyeba nini ezali solo, Tokoki kolanda ndakisa Na Ye mpe kosala nini Ye asalaki.

Oyo ezali komonana ndenge nini?

• Lakisa bolingo mpe bolingani na basusu mpe na Nzambe.
• Tala ndenge misala yango esalaka yo omiyoka.
• Kanisa ndenge misala yango ebongolaka bomoi na yo.