Kot I ewe Popun Meinisin Ennet

Fan ekkoch, meni sipwe mefi tinisukun ekiek ussun manauach ika fatafatangaw ren ewe fansoun mwach. Sia tongeni kuna anen ach feinno mwach fiti Samach won Nang mi tong me Noun we, Jises Kraist, ir ekkewe popun ennet.

Ennet ina ewe mirititin mettoch usun ren weseweser. Awewe chok, mi ennet pwe Kot a tongeok me a tongeni anisi ne siwini manauom. Kot a sinei kich en me won winikapan, me I a nounou ewe Ngun mi Fel an epwe anisi kich ne esinna met mi pung.

Samach won Nang a tinato Noun we, Jises Kraist, an epwe aitikich ifa ussun ach sipwe pwapwa me kuna wewen non manauach.

Jises I ach minen appiru mi unusoch ren ifa ussun sipwe manau. An osukun a fis pwe ew saramen emwen minne a tongeni emweni kich ngeni kinamwe. Ion a mochen epwe tapweno mwirin Jises Kraist a tongeni wor ren ei saram; I a pwonei pwe meinisin ion mi kutta I epwe kuna I.

Ewe Ngunupin, ika Ngun mi Fel, mi ewe chon kuno noun Samach Won Nang me Jises Kraist. Mi chommong anen an ewe Ngun mi Fel epwe tongeni aninis ne uweikicheno ach sipwe arap ngeni Kot. Ewe Ngun mi Fel:

• Oururu (nengeni John 14:16–17, 26; Moronai 8:26; Doctrine and Covenants 36:2).
• Pwarano me pwarata ussun ennet (nengeni 2 Nifai 32:4–5; Alma 5:46–47; Doctrine and Covenants 8:2–3).
• Apasata kapasen pwarata ussun ewe Sam Noun we (nengeni John 15:26; 3 Nifai 11:32, 36).
• Epinipinino me enimenimochuno (nengeni Alma 13:10–12; 3 Nifai 27:19–20; Moronai 6:4).

Iotek ngeni Semom mi Tong won Nang

Kot a tongei kich me a mochen rong seni kich. I a pwon pwe nupwen sipwe iotek, I epwe ngeni kich ponuan me emwen.

Jises a aiti kich ifa ussun sipwe iotek non ewe Paipen (Matthew 6:9–13) me ewe Puken Mormon (3 Nifai 18:19).

Kopwe Nukuchar.

Ewe Paipen a osukuna pwe nuku ina ewe mettoch sia epinukunuku, ewe pisekin pwarata ren ekkewe mettoch sise tongeni kuna (Hebrews 11:1). Nupwen sia nukuchar, sia fini pwe sipwe nuku pwe Samach won Nang me Jises Kraist repwe anisi kich ach sipwe kuna pwapwa me wewen non manauach.

Esinna ewe Ngun mi Fel

Kot a kapas ngeni kich seni ewe Ngun mi Fel non sakofesenin napanapan. Non ewe Paipen, fan chommong a awewe ngeni ussun ew “kukkun mongungu mi mosonoson” (nengeni 1 Kings 19:11–12), nge meinisin repwe mefi ewe Ngun mi Fel non en me pusin anen ar repwe mefi. Ren en, ewe Ngun mi Fel meni epwe mefi ussun:

• Memefin tong, pwapwa, kinamwe, me murinno (Galatians 5:22-23).
• Fatafatochun me emwenin manauom (Doctrine and Covenants 8:2–3).
• Kokkot non om ekiek me memefin non netipom (1 Corinth 2:9–11).
• Rochopwak a siwin ngeni saram (Alma 19:6).

Tapweno Mwirin An ewe Chon Amanau Minen Appiru

Jises a forata ewe amuchunon minen appiru fan itach meinisin. Ika sia mochen sipwe sinei met mi pung, sia tongeni tapweno mwirin An minen appiru me fori met I a fori.

Ifa ussun nikinikin ei?

• Pwari tong me tong mi unusoch ngeni ekkoch me ngeni Kot.
• Nengeni ifa ussun ekkena mokutukut ra fori om kopwe mefi.
• Nengen sefani ifa ussun ekkana mokutukut ra siwini manauom.