God I Stamba blong Evri Trutok

Samtaem, yumi save gat filing ia blong konfius abaot laef blog yumi o gat tu tingting abaot fiuja. Yumi save faenem rod i go fored wetem Papa blong yumi long Heven we yumi lavem mo Pikinini blong Hem Jisas Kraes, we tufala i stamba blong trutok.

Trutok i save ia blong ol samting olsem we oli stap. Eksampol, i tru se God i lavem yu mo Hem i save helpem yu blong jenisim laef blong yu. God i save yumi wanwan, mo Hem i yusum Tabu Spirit blong helpem yumi blong luksave wanem we i tru.

Papa long Heven i bin sendem Pikinini blong Hem, Jisas Kraes, blong tijim yumi abaot olsem wanem blong stap hapi mo faenem mining long laef blong yumi.

Jisas i eksampol ia we i stret gud evriwan abaot olsem wanem blong stap laef. Ol tijing blong Hem oli olsem laet we i save lidim mo daerektem yumi blong kasem pis. Hem i bin promesem evriwan we oli lukaotem Hem se bambae oli faenem Hem, mo eni man we i wantem folem Jisas Kraes i save gat laet blong ia.

Tabu Spirit i wan mesenja blong Papa long Heven mo Jisas Kraes. I gat ol wei we Tabu Spirit i save help blong karem yumi i go kolosap long God. Tabu Spirit:

• Kamfot (Luk long Jon 14:16–17, 26; Moronae 8:26; Doktrin mo Ol Kavenan 36:2).
• I soem aot mo testifae long trutok (luk long 2 Nifae 32:4-5; Alma 5:46-47; Doktrin mo Ol Kavenan 8:2-3).
• I talemaot witnes blong Papa mo Pikinini (luk long Jon 15:26; 3 Nifae 11:32, 36).
• Mekem yumi kam tabu mo klin long sin (luk long Alma 13:10–12; 3 Nifae 27:19–20; Moronae 6:4).

Prea long Papa blong Yu long Heven We I Lavem Yu

God i lavem yumi mo i wantem blong harem yumi. Hem i promesem se taem yumi prea, bambae Hem i givim ol ansa mo lidim yumi.

Jisas i tijim yumi olsem wanem blong prea insaed long Baebol (Matiu 6:9–13) mo Buk blong Momon (3 Nifae 18:19).

Stap Fetful

Baebol i tijim yumi se “fet i givim yumi hop mo hem i soemaot long yumi ol samting ya we yumi no save luk, be oli stap” (Hibru 11:1). Taem yumi fetful, yumi jusum blong biliv se Papa long Heven mo Jisas Kraes bae Tufala i helpem yumi blong faenem hapines mo mining long laef blong yumi.

Luksave Tabu Spirit

God i toktok long yumi tru long Tabu Spirit long fulap wei. Long Baebol, plante taem oli tokbaot olsem wan “kwaet smol voes” (luk long 1 King 19:11–12), be evriwan bae oli filim Tabu Spirit long wei blong olgetawan. Long yu, yu maet filim Tabu Spirit olsem:

• Ol filing blong lav, glad, pis mo i gud fasin (Galesia 5:22-23).
• Klia tingting mo gaed long laef blong yu (Doktrin mo Kavenan 8:2–3).
• Ol aedia we i kam long maen mo ol filing blong hat blog yu (Fas Korin 2:9-11).
• Laet i tekem ples blong tudak (Alma 19:6).

Folem eksampol blong Sevya

Jisas i wan bes eksampol blong yumi evriwan. Sapos yumi wantem save wanem i tru, yumi save folem eksampol blong Hem mo mekem wanem Hem i mekem.

?Hemia i luk olsem wanem?

• Soem lav mo jareti long ol narafalawan mo long God.
• Lukluk se ol aksen ia oli mekem yu filim olsem wanem.
• Luklukbak long olsem wanem ol aksen ia i bin jenisim laef blong yu.