Mei he kuonga muʻá, kuo fakakau ʻe he houʻeiki tangatá mo fafiné ʻa e hiva toputapú, ngaahi founga kehekehe ʻo e lotú, vala fakalotu fonu ʻi he fakataipé, ngaahi fakaʻilongá mo e ngaahi ouau ke fakahaaʻi ʻenau loto moʻoni ke faimateaki ki he ʻOtuá.
ʻOku kehekehe mo lahi ʻa e ngaahi founga fakahaaʻi ko ʻení ʻo hangē ko e fāmili ʻo e tangatá. Ka ʻoku nau maʻu kotoa pē ʻa e taumuʻa tatau: ke fakafehokotaki ʻa e tokotaha tuí mo e meʻa ʻoku nau faimateaki ʻakí ʻi he founga fakafoʻituitui tahá—ke ʻunu ofi ange ki he ʻOtuá.
Ko kinautolu ko ia ʻi tuʻa ʻi ha tui fakalotu pau, ʻe ngalikehe ʻa e ngaahi ouaú mo e teungá. Ka ko kinautolu ʻoku kau ki aí, te nau lava ʻo ueʻi ʻa e ongo mālohi taha ʻo e laumālié, fakaʻaiʻai kinautolu ke failelei, pea aʻu ʻo tanumaki ha tōʻonga ngāue tokoni ʻi he moʻuí kotoa.
Ko e teunga ʻo e taaupoʻoú. Ko e teunga ʻo e faifekaú. Ko e pūlou faka-Siu ki he lotú. Ko e tatā faka-Mosilemí. Ko e kofu tōtōlofa ʻo e taulaʻeiki faka-Putá. Ko ha konga kotoa ia ʻo ha ʻata fakalūkufua ʻo e faimateaki ʻa e tangatá ki he ʻOtuá.
ʻOku ʻikai fakaʻaliʻali kotoa ki he kakaí ʻa e teunga fakalotu peheé. ʻOku ʻi ai ha teunga ʻe niʻihi ʻoku toki hā pē ʻi he ngaahi feituʻu lotu makehe. Hangē ko ʻení, ko e pulupulu fakatemipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ʻiloa ko e pulupulu ʻo e lakanga fakataulaʻeiki māʻoniʻoní, ʻoku tui pē ia ʻi loto ʻi he ngaahi temipale ʻa e Siasí mo tauhi ki he ngaahi ouau toputapu taha ʻo ʻenau tuí. ʻOku fakafofongaʻi ʻe he teunga hina faingofuá ʻa e maʻá mo e tuʻunga tataú. ʻOku ʻikai toe fakafaikehekeheʻi ʻa e taki motuʻa taha ʻo e Siasí mo e mēmipa foʻou tahá ʻi heʻena tui ʻa e teunga tataú. ʻOku tui ʻe he houʻeiki tangatá mo fafiné ʻa e teunga ʻoku faitatau, ʻa ia ʻokú ne fakataipe ʻa e fakamanatu ʻo e ngaahi ngāue fakatemipale ne fakamatalaʻi ʻi he Fuakava Motuʻá.
ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ʻikai ha teunga fakalotu makehe ke tui ʻi tuʻa ki he lotu angamaheni ʻi he Sāpaté.
Ka neongo ia, ʻoku tui ʻe he Kāingalotu faivelenga tokolahi ha kāmeni ʻi loto ʻi honau valá ʻoku ʻi ai hono mahuʻinga fakalotu. ʻOku konga ua ʻa e teunga taau ko ʻení pea ʻoku faʻa ui ia ko e “kāmeni temipalé.”
ʻOku faʻa ui hala ʻe he kakai ʻe niʻihi ʻa e kāmeni temipalé ʻoku faimana pe ko e “meʻaloto maná.” ʻOku ʻikai ngata pē ʻi he hala ʻa e ngaahi leá ni, ka ʻoku fakamamahi foki ia ki he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻikai ha meʻa ʻe faimana pe fakapulipuli ʻi he kāmeni temipalé, pea ʻoku kolea ʻe he kāingalotu ʻo e Siasí ʻa e fakaʻapaʻapa mo e tokaʻi tatau mo ia ʻe fakahoko ki ha toe tui fakalotu kehe ʻe he kakai angaleleí.
ʻOku tui e ngaahi kāmeni ʻo e temipalé ʻe he kau mēmipa kakai lalahi ʻo e Siasí ʻa ia kuo nau fakahoko ha ngaahi palōmesi toputapu ʻi he temipalé ke tauhi e ngaahi fekau ʻa e ʻOtuá pea moʻui ʻaki e ongoongolelei ʻo Sīsū Kalaisí.
Ki he kāingalotu ʻo e Siasí, ʻoku hanga ʻe he kāmeni temipale ʻoku tui loto ʻi he vala angamahení mo e ngaahi pulupulu fakataipe ʻoku tui lolotonga e moihū ʻi he temipalé, ʻo fakafofongaʻi ha tuʻunga toputapu mo fakataautaha ʻo honau vā fetuʻutaki mo e ʻOtuá pea mo ʻenau tukupā ke moʻui fakaʻeiʻeiki mo leleí.
