Laei Paia o le Malumalu

Mai aso anamua, sa opogi e alii ma tamaitai musika paia, ituaiga eseese o tatalo, laei faalelotu ua tumu i faafaatusa, o tāga, ma sauniga e faailoa atu ai o latou lagona sili ona patino o le tuuto atu i le Atua.

O ituaiga eseese o nei vaega o uiga faaalia e lautele ma eseese e pei o le aiga o tagata. E ui i lea, e tutusa uma lava le faamoemoega autu: ina ia fesootai le tagata talitonu ma le faamoemoega o lo latou tuutoga i le auala aupito sili ona patino—ina ia matua faalatalata atu ai i le Atua.

I a i latou o i fafo atu o se faatuatuaga patino, o sauniga ma ofu e ono le masani ai. Ae mo tagata auai, e mafai ona latou gaepuina lagona loloto o le agaga, uunaia i latou e faia le lelei, ma e oo lava i le mamanuia o le alafua o se olaga atoa o le auaunaga.

O le masani a le taupousa. O le ofutalaloa a le patele. O le pulupulu tatalo a le tagata Iutaia. O le pulou a le Musalemi. O le ofutalaloa lanu moli a le monike Puta. O i latou uma o se vaega o le ie lalaga mauoa o le tuuto atu o tagata soifua i le Atua.

E le o laei faalelotu uma e faailoaina faalauaitele. O isi laei e vaaia i na o nofoaga faapitoa lava o tapuaiga. Mo se faataitaiga, o ofutalaloa o le malumalu o Le Ekalesia a Iesu Keriso o le Au Paia o Aso e Gata Ai, lea e iloa o le ofutalaloa o le perisitua paia, e na o totonu lava o malumalu o Le Au Paia o Aso e Gata Ai e ofuina ai ma e faapolopoloina mo sauniga aupito sili ona paia o lo latou faatuatuaga. O ofu papae faigofie e fai ma faatusa o le mama ma le tulaga tutusa. O le taitai aupito sinia o le Ekalesia ma le tagata aupito fou e le iloa le eseesega pe a laei i le auala e tasi. O alii ma tamaitai e laeiina laei tutusa, lea e fafaguina ai faailoga faalelotu e faamanatu ai faiga faalemalumalu o loo faamatalaina i le Feagaiga Tuai.

I totonu o Le Ekalesia a Iesu Keriso o le Au Paia o Aso e Gata Ai, e leai ni ofu faalelotu faapitoa i fafo mo sauniga o tapuaiga masani i Aso Sa.

Peitai, e toatele Au Paia o Aso e Gata Ai e laeiina ofusa o le malumalu i lalo ifo o o latou laei lea e i ai se uiga taua loloto. O lenei ofualalo tauagafau e sau i ni vaega se lua ma e masani lava ona ta’ua o le “ofusa o le malumalu.”

O nisi tagata latou te faasino sese atu i nei ofusa o le malumalu o ni ofu maneta poo ni “ofuvae maneta.” O nei upu e le gata ina le talafeagai, ae e faatiga foi i tagata o Le Ekalesia a Iesu Keriso o le Au Paia o Aso e Gata Ai. E leai se mea e faamaneta pe faalilolilo e uiga i ofusa o le malumalu, ma e talosagaina e tagata o le Ekalesia tulaga tutusa o le faaaloalo ma le maaleale o le a tuuina atu i soo se faatuatuaga lava mai tagata o le agalelei.

O ofusa paia o le malumalu e laeiina e tagata matutua o le Ekalesia o e na osia folafolaga paia i le malumalu e tausia poloaiga a le Atua ma ola i le talalelei a Iesu Keriso.

I tagata o le Ekalesia, o ofusa tauagafau o le malumalu e laeiina i lalo o ofu masani ma ofutalaloa faafaatusa e laeiina i taimi o tapuaiga faalemalumalu e faatusa i se tulaga paia ma patino o lo latou sootaga i le Atua ma lo latou tuuto atu e ola i ni olaga lelei, faamamaluina.