Ngaahi Akonaki Fakapalōfita ʻi he Temipalé

Palesiteni Russell M. Nelson

“Ko ha taimi pē ʻokú ke fai ai ha faʻahinga meʻa ʻoku tokoni ki ha taha ʻi ha faʻahinga tafaʻaki pē ʻo e veilí—ke laka ki muʻa ʻi he fai ha ngaahi fuakava mo e ʻOtuá mo fakahoko ʻa e papitaiso mo e ngaahi ouau fakatemipale ʻoku fiemaʻú, ʻokú ke tokoni ai ke tānaki ʻa ʻIsileli. ʻOku faingofua pehē pē.”

ʻAmanakiʻanga ʻo ʻIsilelí, fakamafola fakaemāmani lahi ʻa e toʻu tupú, 3 ʻo Sune, 2018

Palesiteni Thomas S. Monson

“Ka, ʻe hoku ngaahi kaungāmeʻa kei talavou ʻi he toʻu tupú, fakakaukau maʻu pē ki he temipalé. ʻOua naʻá ke fai ha meʻa te ne taʻofi koe mei haʻo hū atu ʻi hono ngaahi matapaá ʻo maʻu e ngaahi tāpuaki toputapu mo taʻengata ʻi aí. ʻOku ou fakamālō atu kiate kimoutolu ʻoku ō maʻu pē ki he temipalé ke fakahoko ʻa e papitaiso maʻá e kau pekiá, ʻoku ʻā hengihengia ke ke lava ʻo kau ʻi he faʻahinga papitaiso ko iá, kimuʻa pea toki kamata ʻa e akó. ʻOku ʻikai ke u lava ʻo mafakakaukaua ha toe founga lelei ange ke kamata ʻaki ha ʻaho.

Ko e Temipale Māʻoniʻoní—Ko ha Maama ki Māmani, konifelenisi lahi ʻo ʻEpeleli 2011

ʻEletā David A. Bednar

“ʻOku ou fakaafeʻi atu ʻa e toʻu tupu ʻo e Siasí ke mou ako mo maʻu ʻa e Laumālie ʻo ʻIlaisiaá. ʻOku ou poupou atu ke mou ako, ke kumi ki hoʻomou ngaahi kuí, pea teuteuʻi kimoutolu ke fai ʻa e ngaahi papitaiso fakafofonga ʻi he fale ʻo e ʻEikí maʻa homou kāinga kuo pekiá [vakai, Tokāteline mo e Ngaahi Fuakava 124:28–36]. ʻOku ou tapou atu ke mou tokoni ki ha kakai kehe ke ʻilo honau ngaahi hisitōlia fakafāmilí. ʻI hoʻomou tali ʻa e fakaafe ko ʻení ʻi he loto tuí, ʻe liliu ai homou lotó ki he ngaahi tamaí. ... ʻE fakaʻau hoʻomou fakamoʻoni mo e ului ki he Fakamoʻuí ke loloto mo tolonga ange. Pea ʻoku ou palōmesi atu ʻe maluʻi ʻa kimoutolu mei he ivi tākiekina mālohi ʻo e filí. ʻI hoʻomou kau mo manako ʻi he ngāue māʻoniʻoni ko ʻení, ʻe maluʻi kimoutolu ʻi hoʻomou tupu haké pea ʻi he kotoa ʻo hoʻomou moʻuí.”

ʻE Liliu ʻa e Loto ʻo e Fānaú, konifelenisi lahi ʻo ʻOkatopa 2011

ʻEletā Quentin L. Cook

“ʻOku hanga ʻe he fakatahaʻi ʻo e lahi ange e ngaahi temipalé mo e fakalakalaka ʻo e tekinolosiá ke fakahoko hotau ngaahi fatongia toputapu he hisitōlia fakafāmilí ki heʻetau ngaahi kuí, ʻo ʻai ʻeni ko e taimi mohu tāpuekina taha ʻi he hisitōliá kotoa. ʻOku ou fiefia ʻi he faivelenga kāfakafa ʻa hotau toʻu tupú ʻi he fakahokohoko fakamotuʻaleá mo e kumi ʻenau ngaahi kuí pea fakahoko ʻa e papitaiso mo e hilifakinima ʻi he temipalé. ʻOkú ke kau moʻoni ʻi he kau faifakamoʻui ʻi he Moʻunga ko Saioné, naʻe kikiteʻí.”

Sio Kiate Koe ʻi he Loto Temipalé, konifelenisi lahi ʻo ʻEpeleli 2016

ʻEletā Gary E. Stevenson

“Kuo fakaafeʻi ʻe he Kau Palesitenisī ʻUluakí ʻʻa e kau mēmipa lalahi ʻo e Siasí ke ʻi ai haʻanau lekomeni temipale ʻoku kei ʻaonga mo ʻaʻahi lahi ange ki he temipalé ʻi he feituʻu ʻe lava ai ʻi honau taimí mo honau tūkungá pea mo poupouʻi ʻa e kau mēmipá ʻke fetongi ha niʻihi ʻo e ngaahi ʻekitivtī fakafiefiá ʻaki e ngāue fakatemipalé.’ ʻOku nau toe poupouʻi foki ʻa e ʻkau mēmipa foʻou ange mo e toʻu tupu ʻo e Siasí ʻoku taʻu 12 mo motuʻa angé ke nau moʻui taau ke tokoni ʻi he ngāue maʻongoʻongá ni ʻaki haʻanau hoko ko ha kau fakafofonga ʻi he papitaisó mo e hilifakinimá. [Tohi ʻa e Kau Palesitenisī ʻUluakí, 11 ʻo Māʻasi 2003.]”

Sacred Homes, Sacred Temples, konifelenisi lahi ʻo ʻEpeleli 2009

ʻEletā Richard G. Scott

“ʻOku fiemaʻu nai ʻe kimoutolu kei talavoú ha founga pau ke fakaʻauha ai ʻa e mālohi ʻo e filí ʻi hoʻomou moʻuí? Fakafemoʻuekinaʻi kimoutolu ʻi he fekumi ki hoʻomou ngaahi kuí, teuteuʻi honau ngaahi hingoá ki he ngaahi ouau fakafofonga ʻoku maʻu ʻi he temipalé, pea mou ō ki he temipalé ʻo fakafofongaʻi kinautolu ke nau maʻu ʻa e ouau ʻo e papitaisó mo e meʻafoaki ʻo e Laumālie Māʻoniʻoní. ʻI hoʻo fakaʻau ke matuʻotuʻa angé, te ke lava leva ke kau ʻi he ngaahi ouau kehé. ʻOku ʻikai ke u lava ʻo mafakakaukauʻi ha meʻa ʻe toe lelei ange ke ne maluʻi koe mei he ivi ʻo e filí ʻi hoʻo moʻuí.

Ko e Fiefia ʻi Hono Huhuʻi ʻo e Kau Pekiá, konifelenisi lahi ʻo ʻOkatopa 2012

Palesiteni Russell M. Nelson

“ʻOku ʻi ai ha fakataipe loloto mahuʻinga hono tui ʻo e kāmeni fakatemipalé. ʻOkú ne fakafofongaʻi ha tukupā taʻe-tūkua. ʻOku tau tui maʻu pē ʻa e kāmení ko ha konga ʻo e teunga-tau tuʻumaʻu ʻo e ʻOtuá ʻo hangē ko hono fakafōtunga ʻe he Fakamoʻuí ʻa e fiemaʻu ke kātaki ki he ngataʻangá. ʻOku tau fakafōtunga ai ʻetau tui kiate Ia mo ʻEne ngaahi fuakava taʻengata mo kitautolú.

Personal Preparation for Temple Blessings, konifelenisi lahi ʻo ʻEpeleli 2001

Palesiteni Russell M. Nelson

“Kapau ʻoku mou fie ʻilo lahi ange moʻoni ki he tukufakaholo ʻo e vala temipalé, fekumi tonu ki ai ʻi he Fuakava Motuʻá. ʻOku fonu ʻa e Fuakava Motuʻá ʻi he ngaahi fakamatala ki he vala makehe ʻo e temipalé.

Ngaahi Akonaki ʻa Lāsolo M. Nalesoní, 372

Palesiteni Boyd K. Packer

“Fekauʻaki mo e ngaahi ouau ko ʻení, ʻe fakakofuʻi tonu koe ʻaki ʻa e kāmení ʻi he temipalé mo palōmesi atu ha ngaahi tāpuaki fakaofo fekauʻaki mo ia. ʻOku mahuʻinga ke ke fakafanongo tokanga ʻi he taimi ʻoku fakahoko ai ʻa e ngaahi ouau ko ʻení mo ke feinga ke manatuʻi ʻa e ngaahi tāpuaki ʻoku talaʻofá pea mo e ngaahi tuʻunga ʻe fakatokangaʻi ai kinautolú”

Haʻu ki he Temipalé

Vala Temipale Toputapú

“Ko e ngaahi pulupulu fakatemipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ui ia ko e ngaahi pulupulu ʻo e lakanga fakataulaʻeikí, ʻoku tui pē ʻi he ngaahi temipale ʻo e Kau Māʻoniʻoni ʻi he Ngaahi ʻAho Kimui Ní mo tuku ki he ngaahi sākalamēniti māʻolunga taha ʻo e tuí. ʻOku fakataipe ʻe he hinehiná ʻa e haohaoá. ʻOku ʻikai ha fakafaikehekeheʻi pe fakatuʻutuʻunga. Ko e ʻaposetolo ʻuluakí mo e mēmipa foʻou tahá ʻoku ʻikai lava ʻo fakafaikehekeheʻi ʻi he taimi ʻokú na teuteu tatau aí. ʻOku tui ʻe he houʻeiki tangatá mo e houʻeiki fafiné ʻa e teunga meimei tatau. ʻOku fakatahaʻi ʻe he kiʻi pulupulú ʻa e fakataipe fakalotú mo e ongo fakakuonga muʻá ʻi he ngaahi tohi fakakuonga muʻa ʻa ʻEkesōtosí.”

Vala Temipale Toputapú

Vala Temipale Toputapú

“ʻOku tui loto ʻe ha Kāingalotu faivelenga tokolahi ha kāmeni ʻi honau valá ʻa ia ʻoku ʻi ai hano mahuʻinga fakalotu moʻoni. ʻOku meimei ke sīpinga tatau pē mo e ngaahi vala loto angamahení, ʻa ia ʻoku konga ua pea ʻoku faʻa ui ko e ʻkāmeni fakatemipale.’ ... ʻOku tui ʻa e ngaahi kāmeni fakatemipalé ʻe he kau mēmipa lalahi ʻo e Siasí kuo nau ʻosi fai ʻa e ngaahi palōmesi toputapu ʻo e anganofo ki he ngaahi fekau ʻa e ʻOtuá mo e ngaahi fekau ʻo e ongoongolelei ʻa Sīsū Kalaisí ʻi he ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ki he kau mēmipa ʻo e Siasí, ko e kāmeni molumalu ʻo e temipalé, ʻoku tui loto ʻi he vala angamahení, fakataha mo e fanga kiʻi pulupulu fakataipe ʻoku tui ʻi he lolotonga ʻo e lotu ʻi he temipalé, ʻoku nau fakafofongaʻi ʻa e tafaʻaki toputapu mo fakafoʻituitui ʻo ʻenau feohi mo e ʻOtuá pea mo ʻenau tukupā ke moʻui lelei mo fakaʻeiʻeikí.”

Vala Temipale Toputapú

Palesiteni Gordon B. Hinckley

“[ʻO]ku ʻi ai ha taumuʻa ʻoku ope atu ʻi he Toetuʻú: Ko e hākeakiʻi ia ʻi he puleʻanga ʻo ʻetau Tamaí. ʻE lava ke maʻu ia ʻi he talangofua ki he ngaahi fekau ʻa e ʻOtuá. ʻE kamata ʻaki hono tali Ia ko ʻetau Tamai Taʻengata mo hono ʻaló, ko hotau Huhuʻi. ʻE kau ai ha kau ʻi ha ngaahi ouau kehekehe, ʻo nau takitaha mahuʻinga mo fiemaʻu. Ko e ʻuluaki ʻi he ngaahi meʻa ko ʻení ko e papitaiso ʻi he fakauku ʻi he vaí, ka ʻikai ia, fakatatau mo e Fakamoʻuí, he ʻikai ke lava ha taha ʻo hū ki he puleʻanga ʻo e ʻOtuá. Kuo pau ke muiaki mai ai ʻa e fanauʻi ʻi he Laumālié, ko e meʻafoaki ʻo e Laumālie Māʻoniʻoní. Pea hokohoko mai ʻi he ngaahi taʻu hono hokó, hono fakanofo ʻa e houʻeiki tangatá, ki he langa fakataulaʻeikí, hoko ai mo e ngaahi tāpuaki ʻo e temipalé ki he houʻeiki tangata mo fafine ʻoku moʻui taau ke hū ki aí. ʻOku kau ʻi he ngaahi tāpuaki fakatemipale ko ʻení hono fufulu mo pani kitautolu ke tau lava ʻo maʻa ʻi he ʻao ʻo e ʻEikí. ʻOku kau ai ʻa e ouau fakahinohino ʻa ia ʻoku foaki mai ai ha fakakoloa ko ha fatongia mo e ngaahi tāpuaki ʻoku nau fakaʻaiʻai kitautolu ke tau ʻulungaanga taau mo e ngaahi tefitoʻi moʻoni ʻo e ongongoleleí. ʻOku kau ai ʻa e ouau silá ʻa ia ko e meʻa ʻoku nonoʻo ʻi māmaní ʻoku nonoʻo ia ʻi he langí, ke lava ai ʻa e fāmilí ʻo hoko atu.”

Temples and Temple Work, Ensign, Fēpueli 1982

Palesiteni Spencer W. Kimball

Naʻe foaki ʻe Siosefa Sāmita ki he kau ʻaposetolo ʻe toko hongofulu mā uá ʻa e ngaahi kī mo e mafai kotoa ʻokú ne maʻú pea kuó ne maʻu mei he ʻEikí. Naʻá ne foaki kiate kinautolu ʻa fakakoloa kotoa, ʻa e fufulú mo e paní kotoa, pea mo foaki kiate kinautolu ʻa ngaahi ouau ʻo e silá.”

We Thank Thee, O God, for a Prophet, konifelenisi lahi ʻo ʻOkatopa 1972

Palesiteni Boyd K. Packer

“Ko e ouau ʻo e fufulú mo e paní ʻoku faʻa talanoa lahi ki ai ʻi he temipalé ko e ouau ʻinisitoli. ʻE feʻunga pē ki heʻetau taumuʻá ke tau lea ʻaki pē ʻa e fakalea ko ʻení: ʻOku fekauʻaki mo e ʻenitaumení ʻa e fufulú mo e paní—meimei fakataipe pē hona natulá, ka ʻoku talaʻofa mai ai ha ngaahi tāpuaki pau, mo vave pea mo ha ngaahi tāpuaki foki ʻi he kahaʻú.

Ko e Teuteu ke Hū ki he Temipale Māʻoniʻoní

ʻEletā James E. Talmage

“ʻOku ʻi he fakatokelau ʻo e faiʻanga papitaisó ha ngaahi loki teuteu lalahi mo lelei ʻoku fakaʻaongaʻi ʻe he houʻeiki tangatá, pea ʻi he tafaʻaki fakatongá ha ngaahi loki teuteu ʻoku tuʻunga taau tatau pē ki he houʻeiki fafiné. Kuo fakaʻatā foki mo ha ngaahi loki ʻoku fakahoko ai ha ngaahi ouau pani ʻe niʻihi. ʻI he ngaahi ouau ko ʻení, ko e houʻeiki fafine pē ʻoku nau fakahoko ki he houʻeiki fafiné, pea tangata pē ki he houʻeiki tangatá.”

Ko e Fale ʻo e ʻEikí [1976], 83

ʻEletā Robert D. Hales

“ʻOku fakamatalaʻi ʻi he temipalé ʻa e palani ʻo e fakamoʻuí mo fakahoko ai ʻa e ngaahi fuakava toputapú. ʻOku hanga ʻe he ngaahi fuakavá ni, fakataha mo hono tui ʻo e kāmeni fakatemipale toputapú, ʻo fakamālohia mo maluʻi ʻa e tokotaha ʻoku maʻu ʻenitaumení mei he ngaahi mālohi ʻo e filí. ʻI he hili ʻa e maʻu honau ʻenitaumení, ʻe lava leva ʻa e talavoú pe finemuí ke ʻalu ki he temipalé ʻo fakahoko ʻa e ngaahi ouau fakafofongá ke lava ʻo maʻu ʻa e ngaahi tāpuaki ʻo e lakanga fakataulaʻeikí ʻe kinautolu kuo pekia kae ʻikai maʻu ha faingamālie ke maʻu ʻa e ngaahi tāpuaki ko ʻení ʻi he lolotonga ʻo e moʻui fakamatelié.”

Blessings of the Priesthood, konifelenisi lahi ʻo ʻOkatopa 1995

Palesiteni Russell M. Nelson

“Ko e temipalé ‘oku fonu moʻoni ʻi he moʻoní. ʻOku fakaʻatā mahino mo mālohi mai ai ʻa e ngaahi moʻoni ʻo e palani ʻa e Tamaí. ʻOku fakalea ʻi he ngaahi fuakava mo e ngaahi ouau ʻo e temipalé ʻa e ngaahi lea moʻoni fekauʻaki mo ʻetau Tamaí mo Hono ʻAló, pea mo ʻEna fengāueʻaki mo kitautolú. Ko e temipalé ko ha fale ia ʻo e fakahā ʻoku taumalingi mai ai ʻa e moʻoní ki hotau laumālié mo fakamāmaʻi ʻetau mahinó [vakai, Tokāteline mo e ngaahi Fuakava 109:15]. ʻOku tau ʻilo ai hotau tuʻunga taʻengatá mo e taumuʻá pea mo e ngaahi palōmesi fakaofo ʻa e ʻEikí. ʻOku moʻoni ʻa e ngaahi palōmesi ko iá, he ko hotau ʻOtuá ko e ʻOtua ʻo e moʻoni pea ʻoku ʻikai ke lava ʻo loi [vakai, ʻEta 3:2]. ... Kapau ʻe ō hotau kakai tangatá mo e kakai fefiné ki he temipalé ʻo kumi ha ivi mo ha mahino, ʻe akoʻi kinautolu ʻe he ʻEikí tonu pē fekauʻaki mo e ngaahi moʻoni ʻoku mahuʻinga tahá ʻi honau taimi faingataʻaʻiá.”

Ngaahi Akonaki ʻa Lāsolo M. Nalesoní, 373.

Palesiteni Ezra Taft Benson

“Ko e ngaahi fono faka-silesitiale, ʻoku ʻi he ngaahi ouau ʻo e Siasi ʻo Sīsū Kalaisí, ʻoku tauhi pea ʻaki ha ngaahi fuakava loto-fiemālie ki ai. Ko e ngaahi fonó ʻoku fakalaumālie. Ko ia, kuo fakamafaiʻi ai ʻe he Tamai ʻi Hēvaní ha ngaahi ungaʻanga māʻoniʻoni, ʻoku ui ko e ngaahi temipale, ʻe lava ke fakamatalaʻi kakato ai ʻa e ngaahi fono ko ʻení. ʻOku kau ʻi he ngaahi fonó ʻa e fono ʻo e talangofuá mo e feilaulaú, fono ʻo e ongoongoleleí, fono ʻo e angamaʻá, mo e fono ʻo e fakatapuí.

A Vision and a Hope for the Youth of Zion, fakataha lotu ʻa e ʻUnivēsiti Pilikihami ʻIongí, 12 ʻo ʻEpeleli 1977

Palesiteni Boyd K. Packer

“ʻE lava ke kau ʻa e kāingalotu ʻo e Siasí ʻoku nau fakafeʻungaʻi kinautolú, ʻi he ngaahi ouau māʻolunga mo toputapu taha ʻo e ngaahi ouau huhuʻi kuo fakahā ki he faʻahinga ʻo e tangatá. ʻE ala fufulu mo pani ai kitautolu pea fakahinohinoʻi mo fakakoloaʻi pea mo silaʻi. Pea ko e taimi kuo tau maʻu ai ʻa e ngaahi tāpuaki ko ʻení maʻatautolú, te tau lava leva ke ngāue maʻa kinautolu kuo pekia kae ʻikai maʻu ʻa e faingamālie tataú.”

Come to the Temple, Ensign, October 2007

ʻEletā Robert D. Hales

“ʻOku fakautuutu ʻa ʻetau fie foki ki he Tamai Hēvaní ʻi heʻetau moʻui taau ke maʻu ha lekomeni temipalé, ʻo tānaki atu ki hono maʻu ʻo e sākalamēnití. Pea ʻi heʻetau hoko ko e kau maʻu lekomeni temipale ʻoku ʻosi maʻu ʻenitaumení, ʻoku tau tā ai ha sīpinga ʻo e moʻui faka-Kalaisí. ʻOku kau heni ʻa e talangofuá, feilaulau ke tauhi ʻa e ngaahi fekaú, feʻofaʻakí, maʻa ʻi he fakakaukaú mo e tōʻongá, mo e foaki meiate kitautolu ki he langa e puleʻanga ʻo e ʻOtuá. ʻOku fakafou ʻi he Fakalelei ʻa e Fakamoʻuí pea mo e muimui ki he ngaahi tefitoʻi sīpinga ko ʻeni ʻo e moʻui faivelengá, ʻa ʻetau maʻu ʻa e ʻmālohi mei ʻolunga’ ke fehangahangai mo e ngaahi faingataʻa ʻo e moʻuí. ʻOku tau fiemaʻu ʻa e mālohi fakalangí ni he ʻahó ni ʻo laka ange ia ʻi ha toe taimi. Ko e mālohí ia ʻoku tau toki maʻu pē ʻi he ngaahi ouau fakatemipalé.

ʻIloʻi Kitautolu: Ko e Sākalamēnití, Temipalé, mo e Feilaulau ʻi he Tokoní, konifelenisi lahi ʻo ʻEpeleli 2012

ʻEletā James E. Talmage

Ko e ʻenitaumeni fakatemipalé, ʻi hono fakahoko ʻi he ngaahi temipale ʻi onopōní, ʻoku kau ai ha fakahinohino fekauʻaki mo e mahuʻinga pea mo e fakahokohoko ʻo e ngaahi kuonga kimuʻá. ʻOku kau ʻi he fakahinohino ko ʻení hano fakamatala ʻo e ngaahi meʻa māʻolunga taha ʻi he kuonga ʻo e fakatupú, tuʻunga ʻo ʻetau ʻuluaki mātuʻá ʻi he Ngoue ko ʻĪtení, ʻena talangataʻá pea mo e nunuʻa ʻo kapusi ai kinaua mei he nofoʻanga fiefiá, hona tuʻunga ʻi he maama fakataʻelata mo mamahí ʻi he taimi naʻe tukupā ai ke na ngāue mo pupuhaʻiá, mo e palani ʻo e huhuʻí ʻe lava ai ke fakaleleiʻi ʻa e maumaufono lahí.”

Ko e Fale ʻo e ʻEikí [1976], 84

ʻEletā James E. Talmage

“ʻOku fakafōtunga ʻe he ngaahi ouau ʻo e ʻenitaumení ha fatongia pau ʻi he tafaʻaki ʻa e tokotahá, hangē ko e fuakava mo e palōmesi ke tauhi pau ʻa e fono ʻo e angatonú mo e angamaʻá, ke mavaʻofa, faʻa-foaki, faʻa-kātaki mo haohaoa; ke foaki ʻa e talēnití mo e koloá fakatouʻosi ki he fakamafola ʻo e moʻoní pea mo hiki hake ʻa e faʻahinga ʻo e tangatá; māteakiʻi ʻa e moʻoní; mo feinga ʻi he founga kotoa pē ke tokoni ki he teuteuʻi lahi ʻo e māmaní ke lava ʻo mateuteu ke tali hono Tuʻi—ko e ʻEiki ko Sīsū Kalaisí. ʻI he fakahoko ʻo e fuakavá takitaha mo tali ʻo e fatongia takitahá, ʻoku fakahoko leva ha tāpuaki naʻe talaʻofa, makatuʻunga ʻi hono tauhi faivelenga ʻo e ngaahi tuʻungá.”

Ko e Fale ʻo e ʻEikí, 100

Palesiteni Thomas S. Monson

“Siʻoku kāinga, ko e sivi maʻongoʻonga taha ʻo e moʻui ní ko e talangofuá. ʻNaʻe folofola ʻa e ʻEikí, “Pea te tau siviʻi ʻa kinautolu ʻi he meʻá ni, ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú.' Naʻe fakahā ʻe he Fakamoʻuí: ʻHe ko kinautolu kotoa pē ʻoku fiemaʻu ha tāpuaki mei hoku nimá, te nau tauhi ʻa e fono ʻa ia naʻe fokotuʻu ki he tāpuaki ko iá, pea mo hono ngaahi tuʻunga ʻo iá, ʻo hangē ko ia naʻe fokotuʻu ʻi he teʻeki ai ke ʻai ʻa e tuʻunga ʻo e māmaní.ʻ ʻOku ʻikai ha faʻifaʻitakiʻanga maʻongoʻonga ange ʻi hotau Fakamoʻuí. Naʻe pehē ʻe Paula, kau kiate Ia: ʻNeongo ko e ʻAló ia, ka naʻe akoʻi ia ke talangofua ʻe he ngaahi meʻa naʻá ne kātakiʻí; pea kuo fakahaohaoa ia, peá ne hoko ko e tupuʻanga ʻo e fakamoʻui taʻengata kiate kinautolu kotoa pē ʻoku talangofua kiate iá.'”

ʻOku ʻOmi ʻe he Talangofuá ʻa e Ngaahi Tāpuakí, konifelenisi lahi ʻo ʻEpeleli 2013

Palesiteni Gordon B. Hinckley

“ʻOku ou fakamoʻoni atu ko e fiefia, nonga, fakalakalaka, tuʻumālie, pea mo e fakamoʻui mo e hākeakiʻi taʻengata ʻo e Kāingalotu ʻi he Ngaahi ʻAho Kimui Ní, ʻoku makatuʻunga ia ʻi he ʻaʻeva talangofua ki he ngaahi faleʻi ʻa e lakanga fakataulaʻeiki ʻo e ʻOtuá.”

If Ye Be Willing and Obedient, konifelenisi lahi ʻo ʻOkatopa 1971

Palesiteni James E. Faust

“ʻOku fakaiku ʻa e talangofuá ki he tauʻatāina moʻoní. Ko e lahi ange ʻetau talangofua ki he moʻoni kuo fakahaá, ko e lahi ange ia hotau fakatauʻatāinaʻí. … Hangē ko e foaki ʻo e moʻuí mo e fakaʻofoʻofá ki māmani ʻi he taimi naʻe fuofuanoa ai mo lalá, ʻoku pehē pē kiate kitautolu. ʻOku tokoni ʻa e talangofuá ke tau fakatupulaki ʻa e tuʻunga kakato ʻoku fakaʻamua heʻetau Tamai Hēvaní maʻatautolu ʻi heʻetau hoko ko e kakai fakasilesitiale ʻe taau ʻi ha ʻaho ke nofo ʻi Hono ʻaó.”

Obedience: The Path to Freedom, konifelenisi lahi ʻo ʻEpeleli 1999

ʻEletā Jeffrey R. Holland

“Ko e talangofuá ʻoku ʻikai ko e ʻuluaki fono pē ia ʻo e langí. Ko e talangofuá ko e ʻuluaki fono ia ʻo e meʻa kotoa pē. Ko e meʻa kotoa pē ʻoku ou ʻiloʻi ʻoku mahuʻinga ʻoku fiemaʻu ai ʻa e ʻuluaki tukupā ke talangofua ki he folofola pea mo e finangalo ʻo e ʻEikí. Ko e ʻuluaki fuakava ia ʻoku tau fakahoko ʻi he temipalé.

Elder Jeffrey R. Holland Visits Philippines, Shares Message on Love, Newsroom.ChurchofJesusChrist.org

ʻEletā L. Tom Perry

“ʻUluakí, ʻoku fiemaʻu ke tau talangofua ki he ngaahi fono ʻa e ʻEikí. Ko e taha ʻeni ʻo e ngaahi ʻuluaki lēsoni naʻe akoʻi ki a ʻĀtama mo ʻIví: ʻOku ʻomai ʻe he talangofuá ʻa e tuí. ʻOkú ne ʻomai ʻa e ngaahi tāpuaki ʻo langí. ʻOku ʻomai ʻe he talangataʻá ʻa e loto mamahí mo e mole ʻo e ʻamanakí. ʻOku hoko mai ʻi he tuʻa ʻo e fono ʻo e talangofuá ʻa e fiemaʻu ke foaki ʻetau moʻuí ʻi he tokoni ki he fānau ʻa ʻetau Tamai Hēvaní. Ko e feilaulauʻi ko ia ʻa e meʻa ʻoku tau maʻú ke tokoni ki hotau ngaahi tokouá mo e tuofāfiné ko e sivi taupotu taha ia ʻo e ongoongoleleí. Ko e taha ʻo e ngaahi taumuʻa ʻo e aʻusia fakamatelié ke vakai pe te tau muimui ki he faleʻi ʻa e Fakamoʻuí ke ʻfuofua kumi ki he puleʻanga ʻo e ʻOtuá, mo ʻene māʻoniʻoní; pea ʻe fakalahi [atu] ʻa e ngaahi meʻá ni kotoa pē kiate kimoutolu’ [vakai, Mātiu 6:33].”

Behold, the Lord Hath Shown unto Me Great and Marvelous Things, konifelenisi lahi ʻo ʻOkatopa 1992

ʻEletā Joseph B. Wirthlin

“ʻOku tau loto kotoa ke tau lavameʻa ʻi he moʻuí ni pea mo feʻunga ke maʻu ʻa e maʻoangoʻonga taha ʻi he ngaahi meʻaʻofa ʻa e ʻOtuá—ʻa e moʻui taʻengata ʻi he puleʻanga fakasilesitialé. Ke aʻusia hoʻo ngaahi taumuʻa ʻi he moʻui fakamatelie ko ʻení mo fakamoʻoniʻi ʻokú ke taau mo e ngaahi tāpuaki taʻengatá, ako ke ke talangofua. ʻOku ʻikai pē ha toe founga. ʻOku ʻomai ʻe he talangofuá ha ivi mo ha mālohi lahi ki hoʻomou moʻuí.

Live in Obedience, konifelenisi lahi ʻo ʻEpeleli 1994

Palesiteni Lāsolo M. Nalesoni

“ʻOku kei fekauʻi pē kitautolu ke tau feilaulau, kae ʻikai ko e lilingi e toto ʻo e fanga monumanú. ʻOku tau aʻusia ʻa e ongoʻi māʻolunga taha ʻo e feilaulaú ʻi heʻetau ʻai ke tau toputapu pe māʻoniʻoni angé. ʻOku tau fai ʻeni ʻi heʻetau talangofua ki he ngaahi fekau ʻa e ʻOtuá. Ko ia, ko e ngaahi fono ʻo e talangofuá mo e feilaulaú ʻokú na fetuiaki. Fakakaukau ki he ngaahi fekau ke talangofua ki he Lea ʻo e Potó, ke tauhi ʻa e ʻaho Sāpaté ke māʻoniʻoní, mo e totongi vahehongofulu totonú. Ko e taimi ʻoku tau talangofua ai ki heni pea mo e ngaahi fekau kehé, ʻoku hoko ha meʻa fakaʻofoʻofa kiate kitautolu. ʻOku tau mapuleʻi kitautolu! ʻOku tau hoko ko ha kau ākonga! ʻOku tau hoko ʻo toputapu mo māʻoniʻoni ange—ʻo hangē ko hotau ʻEikí!”

Lessons from Eve, konifelenisi lahi ʻo ʻOkatopa 1987

Palesiteni Harold B. Lee

“Ko ʻetau palani uelofea lolotongá ʻe lava ʻo hoko ko ʻetau ako ʻfokotuʻutuʻu’ ia ke ʻilo ʻa e tuʻunga mateuteu ʻo e siasí ni, ke moʻui ʻaki ʻa e palani ko ʻení, hangē ko e ʻilo fiefia ʻe he kakai ʻo e konitinēniti ko ʻení, hangē ko hono lekooti ʻi he folofola fakakuonga muʻa ʻoku tau ui ko e Tohi ʻa Molomoná, ʻi he hili ʻenau ului ki he ʻEikí, ʻnaʻe ʻikai ha maʻumeʻa mo e masiva, pe pōpula mo e tauʻatāina, ka naʻa nau hoko kotoa … ʻo nau maʻu ʻinasi ʻi he meʻafoaki fakalangíʻ pea ʻko e moʻoni ʻe ʻikai ke lava ʻo ʻi ai ha kakai ʻoku lahi hake ʻenau fiefiá [ʻi he funga ʻo] māmaní (4 Nīfai 1:3, 16) ʻi heʻenau moʻui kakato ʻaki ʻa e fono ʻo e feilaulaú mo e fakatapuí.”

Teach the Gospel of Salvation, konifelenisi lahi ʻo ʻOkatopa 1972

Palesiteni M. Russell Ballard

“ʻOku meimei, ko e ʻuluaki meʻa pē ʻoku fakakaukau ki ai ʻa e kakaí ʻi heʻenau fanongo ki he ʻfono ʻa Mōseséʻ ko e feilaulau ʻaki e monumanú. Kuo hoko ʻa e natula fakalilifu ʻo e feilaulau totó ʻo fakaiku ke fehuʻi ai ʻe ha niʻihi, ʻʻE lava fēfē ha faʻahinga ngāue pehē ke fekauʻaki mo e ongoongolelei ʻo e ʻofá?’ ʻE lava ʻo mahino lelei ange kiate kitautolu ʻa e tali ki he fehuʻi ko iá ʻi ha taimi ʻe mahino ai kiate kitautolu ʻa e ongo tefitoʻi taumuʻa ki he fono ʻo e feilaulaú. Ko e ongo taumuʻá ni naʻe fekauʻaki ia mo ʻĀtama, Mōsese, mo e kau ʻAposetolo ʻo e Fuakava Foʻoú, pea ʻoku fekauʻaki mo kitautolu he ʻahó ni ʻi heʻetau tali mo moʻui ʻaki ʻa e fono ʻo e feilaulaú. Ko hono ongo tefitoʻi taumuʻá ke siviʻi mo fakamoʻoniʻi ai kitautolu pea mo tokoni ʻi heʻetau haʻu ki a Kalaisí.”

The Law of Sacrifice, Liahona, Māʻasi 2002

ʻEletā L. Tom Perry

“ʻOku toe ʻi ai nai ha ofo ʻi he fiemaʻu ʻe he ʻEikí, mei he kamataʻangá pē, ke fakatō-kakano ʻa ʻene palaní ke nofomaʻu ʻi he fakakaukau ʻa ʻene fānau ʻi māmaní? Naʻe kau ʻi he ngaahi fono naʻe fai ki a ʻĀtama mo ʻIví, ʻa hono fokotuʻu ʻo e fono ʻo e feilaulaú ke fakamanatu kiate kinaua ʻa e meʻa maʻongoʻonga ʻe hoko ʻi he vahevahenga-mālie ʻo taimí. Talu mei ai ʻo aʻu ki he hāʻele mai ʻa e Fakamoʻuí ki māmaní, ko e taimi pē naʻe ʻi ai ai ʻa e lakanga fakataulaʻeikí, naʻe faifeilaulau ʻa e tangatá ke fakamanatu kiate ia ʻa e taimi ʻe hāʻele mai ai ʻa e Foha ʻo e Tangatá ki māmani ke fakahoko ʻa e feilaulau lahi maʻatautolu kātoá.

Sacrament of the Lord’s Supper, konifelenisi lahi ʻo ʻEpeleli 1996

ʻEletā Neal A. Maxwell

“Ko e feilaulau fakafoʻituitui moʻoní naʻe ʻikai ko ha hili ia ʻo ha monumanu ʻi ha ʻesi-feilaulaú. Ka, ko e loto-fiemālie ke fakafou ʻiate kitautolu ki he funga ʻōlitá pea tuku ke vela ai! ʻOku pehē ʻa e ʻfeilaulau ki he ʻEikí … ʻo e loto mafesifesi mo e laumālie fakatomalá,ʼ (Tokāteline mo e Ngaahi Fuakava 59:8), ko e fakamelomelo ki he fua ʻo e kolosí, kae siʻaki ʻ[kotoa] ʻa ʻetau ngaahi angahalá; ka tau ʻilo ʻa e ʻOtuáʻ (ʻAlamā 22:18) he ʻoku muʻomuʻa ʻa e siʻaki kitautolú ʻi hono tali kakato Iá.”

Deny Yourselves of All Ungodliness, konifelenisi lahi ʻo ʻEpelei 1995

Palesiteni Russell M. Nelson

“ʻI hotau tuʻunga ko e kau mēmipa fakafoʻituitui ʻo e Siasí, ʻokú ta kau ʻi he ʻfounga pē taha ʻa e ʻEikí. Meimei tuʻo taha ʻi he māhina, ʻoku tau ʻaukai ai mo lotu pea mo foaki lahi ki he sinoʻi paʻanga ʻokú ne ʻai ke lava ʻe he kau pīsopé ʻo tufa ai ha tokoní. Ko e konga ʻeni e fono ʻo e ongoongoleleí. Te tau lava takitaha ʻo tokoni moʻoni ki he paeá mo faingataʻaʻiá, ʻi he taimí ni pea ʻi ha feituʻu pē ʻoku nau ʻi ai. Pea ʻe tāpuakiʻi foki mo kitautolu mo maluʻi mei he hē mei he moʻoní ʻi heʻetau fai iá.”

In the Lord’s Own Way, konifelenisi lahi ʻo ʻEpeleli 1986

Palesiteni Ezra Taft Benson

“ʻOku tau fuakava ke moʻui ʻaki e fono ʻo e ongoongoleleí. ʻOku fālute ʻe he fono ʻo e ongoongoleleí ʻa e ngaahi fono, ngaahi tefitoʻi moʻoni, mo e ngaahi ouau kotoa ʻoku fiemaʻu ki hotau hākeakiʻí. ʻOku tau loto fiemālie ke tui ki a Sīsū Kalaisi mo fakatomala fakamātoato, ʻa ē ʻoku tupu mei he loto mafesifesi mo e laumālie fakatomalá. Ko e taimi ʻoku tau talangofua ai ki he ngaahi ouau ʻo e papitaisó mo e hilifakinimá, pea hoko atu ʻi he tuí mo e lotú, ʻoku kāpui leva ʻe he feilaulau fakalelei ʻa e Fakamoʻuí ʻa ʻetau ngaahi angahalá pea fakamaʻa kitautolu mei he taʻe-angatonu kotoa. ʻOku ope atu ʻa e fono ia ʻo e ongongoleleí ʻi he mahino pē ʻo e palani ʻo fakamoʻuí. ʻOku kau ai hono maʻu ʻo e ngaahi ouaú mo e ngaahi mālohi ʻo e silá ʻoku tumutumu ʻaki hono silaʻi ki he moʻui taʻengatá. Naʻe pehē ʻe he Palōfita ko Siosefa Sāmitá, ʻʻʻoku maʻu ʻi he laumālie ʻo e ʻOtuá ʻo fou ʻi he ngaahi ouaú.’”

Teachings of Ezra Taft Benson, 337

Palesiteni John Taylor

“Ka naʻe aʻu ʻo fiemaʻu ke talangofua ʻa ʻĀtama, fakahoko, pea mo tauhi ʻa e fono ʻo e ongoongoleleí, pea naʻe aʻu foki ʻo toe fiemaʻu ke tauhi ʻe hono hakó, ʻa ia te nau maʻu ʻa e hākeakiʻi mo e ngaahi tāpuaki tataú, ke nau tauhi mo fakahoko ʻa e ngaahi fono tatau.”

The Gospel Kingdom, 279

Palesiteni Wilford W. Woodruff

“Ko kinautolu kotoa ʻoku nau tali moʻoni ʻa e ngaahi tefitoʻi moʻoni ʻo e ongoongolelei ʻo Sīsū Kalaisí ʻe fakahaofi ia kinautolu. Ko ia ʻoku talangofua ki ha fonó ʻe maluʻi ʻe ia ʻa kinautolu. Ko ha taha pē ʻokú ne tauhi ʻa e fono ʻo e ongoongoleleí ʻe fakahaofi ia mo ne maʻu ʻa e hākeakiʻí mo e nāunaú, ʻe ia.”

The Discourses of Wilford Woodruff, 22

ʻEletā Bruce R. McConkie

“Ko hono aofangatukú, ko e ongoongolelei ʻa e ʻOtuá ʻoku tohi, ʻo ʻikai ʻi he ngaahi mataʻitohi tamatemate ʻo e ngaahi lekooti fakafolofolá, ka ʻi he moʻui ʻa e Kau Māʻoniʻoní. ʻOku ʻikai tohi ʻaki ia ha peni mo ha vaitohi ʻi ha pepa ʻoku faʻu ʻe he tangatá, kae ʻaki ʻa e ngaahi tōʻonga mo e ngāue ʻi he tohi ʻo e moʻui ʻa e tokotaha tui mo talangofua takitaha. ʻOku tohitongi ia ʻi he kakano mo e hui pea mo e uoua ʻo kinautolu ʻoku nau moʻui ʻaki ʻa e fono fakasilesitialé, ʻa ia ko e fono ʻo e ongoongoleleí. ʻOku ʻi ai ia ke lau ʻe ha niʻihi kehe, ʻuluakí, ʻe kinautolu, ʻoku mamata ki he ngāue lelei ʻa e Kau Māʻoniʻoní, te nau tali ia ʻaki hano fakahīkihikiʻi ʻetau Tamai ʻi he langí (vakai, Mātiu 5:16) pea aofangatuku ʻe he Fakamaau Maʻongoʻonga ʻokú ne tokaimaʻananga e moʻui ʻa e taha kotoá.”

Our Gospel Came Not Unto You in Word Only…, konifelenisi lahi ʻo ʻOkatopa 1968

Palesiteni Russell M. Nelson

“Ko e founga moʻui ʻa e Fakamoʻuí ʻoku lelei. ʻOku kau ʻi Heʻene foungá ʻa e angamaʻa kimuʻa ʻi he malí mo e anganofo kakato he lolotonga ʻo e nofomalí. Ko e founga ʻa e ʻEikí ko e founga pē taha ia ke tau aʻusia ai ʻa e fiefia tuʻuloá. ʻOku ʻomai Heʻene foungá ha fiemālie maʻu pē ki hotau laumālié mo ha nonga ʻoku tolongá ki hotau ngaahi ʻapí. Pea ko e lelei tahá, ʻoku taki kitautolu ʻe Heʻene foungá kiate Ia ʻi ʻapi mo ʻetau Tamai Hēvaní, ki he moʻui taʻengatá mo e hākeakiʻí. Ko e ʻelito ʻeni ʻo e ngāue mo e nāunau ʻo e ʻOtuá.”

Ngaahi Fili ki ʻItānití, konifelenisi lahi ʻo ʻOkatopa 2013

Palesiteni Dallin H. Oaks

“Ko e mālohi ko ia ke fakatupu ha moʻui fakamatelié ko e mālohi māʻolunga taha ia kuo foaki ʻe he ʻOtuá ki Heʻene fānaú. Ko hono fakaʻaongaʻí naʻe tuʻutuʻuni ia ʻe he ʻuluaki fekau ʻa e ʻOtuá ki a ʻĀtama mo ʻIví (vakai, Sēnesi 1:28)), ka naʻe foaki mo ha ngaahi fono mahuʻinga kehe ke tapui hono fakaʻaongaʻi halá (vakai, ʻEkesōtosi 20:14; 1 Tesalonaika 4:3). Ko e fakamamafa ʻoku tau ʻai ki he fono ʻo e angamaʻá ʻoku fakamatalaʻi ʻaki ia ʻetau mahino ki he taumuʻa ʻo hotau mālohi fakatupu ʻi he fakahoko ʻo e palani ʻa e ʻOtuá. Mavahemei he ngaahi haʻi ʻo e nofomali ʻi he vahaʻa ʻo ha tangata mo ha fefiné, ko e fakaʻaongaʻi kotoa pē ʻo e ngaahi mālohi ke fakatupu ha moʻui, ʻi ha faʻahinga tūkunga pē, ko e angahala pea ʻoku fehangahangai ia mo e palani ʻa e ʻOtuá ki he hākeaiʻi ʻo ʻEne fānaú.”

ʻIkai mo ha ʻOtua Kehe, konifelenisi lahi ʻo ʻOkatopa 2013

ʻEletā David A. Bednar

“ʻOku ou palōmesi atu ʻe hanga ʻe he talangofua ki he fono ʻo e angamaʻá ʻo fakatupulekina ʻetau fiefia ʻi he moʻui fakamatelié mo ʻai ke tau lava ʻo fakalakalaka ʻi ʻitāniti. Ko e angamaʻa mo e angatonu he taimi ní, ʻe hoko maʻu ai pē ko e meʻa ʻmahuʻinga mo lelei taha ʻi he meʻa kotoa pē’ (Molonai 9:9).”

ʻOku Mau Tui ki he Angamaʻá, konifelenisi lahi ʻo ʻEpeleli 2013

ʻEletā Neil L. Andersen

“ʻOku tokolahi ha kau taautaha ʻi he Siasí kuo fuoloa ʻenau mavahe hake mei honau ngaahi fuofua taʻu lalahí. Neongo ʻoku kehe ʻa e tuʻunga ʻo ʻenau moʻuí mei heʻenau ʻamanakí, ka ʻoku nau tauhi ʻa e fono ʻo e angamaʻá. ʻE lava ke hoko ko hano ʻahiʻahiʻi ʻo ʻenau tuí. ʻOku ou fakahoko atu ʻeku fakaʻapaʻapa lahi mo ʻeku tanganeʻia ʻi he kau ākonga ko ʻeni ʻa Kalaisí.”

ʻAhiʻahiʻi ʻo Hoʻomou Tuí, konifelenisi lahi ʻo ʻOkatopa 2012

Ko e Fāmilí: Ko ha Fanongonongo ki Māmani

“Ko e ʻuluaki fekau naʻe ʻoange ʻe he ʻOtuá ki a ʻĀtama mo ʻIví naʻe fekauʻaki ia mo ʻena malava ke hoko ko ha ongomātuʻa, ko e husepāniti mo e uaifí. ʻOku mau fakahā ai heni ʻoku kei tuʻu maʻu pē ʻa e fekau ko ia ʻa e ʻOtuá ki Heʻene fānaú ke nau fanafanau mo fakatokolahi ʻa e māmaní. ʻOku mau toe fakahā foki heni kuo ʻosi tuʻutuʻuni ʻe he ʻOtuá ke toki ngāue ʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine, kuó na ʻosi mali fakalao ko ha husepāniti mo ha uaifi. ʻOku mau fakahā heni ko e founga ko ia ʻoku fakatupu ai ʻa e moʻui fakamatelié, ko ha tuʻutuʻuni fakalangi ia. ʻOku mau fakamoʻoni atu ki hono haohaoa ʻo e moʻuí pea mo hono mahuʻinga ʻi he palani taʻengata ʻa e ʻOtuá.”

Ko e Fāmilí: Ko ha Fanongonongo ki Māmani

Ki Hono Fakamālohia ʻo e Toʻu Tupú

“Ko e taimi ʻokú ke haohaoa fakasekisuale aí, ʻokú ke teuteuʻi koe ke ke fakahoko mo tauhi ʻa e ngaahi fuakava toputapu ‘i he temipalé. ʻOkú ke teuteuʻi koe ke ke fokotuʻu ha nofomali ʻoku mālohi pea ʻomai ha fānau ki māmani ko ha konga ʻo ha fāmili taʻengata mo ʻofa. ʻOkú ke maluʻi ai koe mei he maumau fakalaumālie mo fakaeloto ʻoku hoko ʻi he fakahoko ʻa e ngaahi feohi fafale fakasekiluale ʻoku teʻeki fai ha malí. ʻOkú ke toe maluʻi ai foki koe mei ha ngaahi mahaki fakatuʻutāmaki. ʻE tokoni hoʻo kei haohaoa fakasekisualé ke ke lotolahi mo fiefia moʻoni pea mo fakaleleiʻi hoʻo malava ke fai ha ngaahi fili lelei ʻi he lolotongá ni pea ʻi he kahaʻú. Ko e tuʻunga ʻa e ʻEikí ki he haohaoa fakasekisualé ʻoku mahino mo ʻikai toe liliu. ‘Oua naʻá ke fakahoko ha fetuʻutaki fakasekisuale kimuʻa peá ke toki mali, peá ke anganofo kakato ki ho malí ʻi he hili ‘a e malí. ʻOua naʻá ke kau ʻi ha ngaahi fealēleaʻaki pe faʻahinga mītia te ne fakatupu ha ngaahi ongo fakasekisualé. ʻOua naʻá ke kau ʻi ha faʻahinga founga pē ʻo e ponokalafí.”

Ki Hono Fakamālohia ʻo e Toʻu Tupú: Haohaoa Fakasekisualé

Palesiteni Ezra Taft Benson

“ʻOku tau fuakava ke moʻui ʻaki ʻa e fono ʻo e fakatapuí. Ko e fono ko ʻení ke fakatapui hotau taimí, ngaahi talēnití, iví, koloá, mo e paʻangá ki hono langa hake e puleʻanga ʻo e ʻOtuá ʻi he māmaní pea mo e fokotuʻu ʻo Saioné. Ka ʻikai ke moʻui ʻaki ʻe ha taha ʻa e fono ʻo e talangofuá, feilaulaú, ʻo e ongoongoleleí, mo e angamaʻá, he ʻikai ke ne lava ʻo tauhi ʻa e fono ʻo e fakatapuí, ʻa ia ko e fono ia fekauʻaki mo e puleʻanga fakasilesitialé. “He kapau ʻoku mou loto ke u foaki kiate kimoutolu ha nofoʻanga ʻi he maama fakasilesitialé, kuo pau ke mou teuteuʻi ʻa kimoutolu [ʻaki] hono fai ʻo e ngaahi meʻa ʻa ia kuó u fekau kiate kimoutolu mo fiemaʻu meiate kimoutolú (T&F 78:7)”

Ngaahi Akonaki ʻa ʻEselā Tafu Penisoní, 121

Palesiteni Spencer W. Kimball

“ʻOku [tau] fakatapui hotau taimí, ngaahi talēnití, mo e meʻa kotoa pē, ʻo ka fiemaʻu ʻe hotau kau takimuʻá pea mo hono ueʻi ʻe he fanafana ʻa e Laumālié. Te tau lava ʻi he Siasí, pea ʻi he polokalama Uelofeá foki, ke fakahaaʻi ʻa e meʻa kotoa ʻoku tau lavá, holi māʻoniʻoni ki aí, mo e ongo kotoa ʻo e fakakaukaú. ʻOku ʻi ai ha faingamālie feʻunga ke foaki ai ʻetau lelei tahá, tatau ai pē pe ko ha taha tokoni, tamai, faiako fakaʻapi, pīsope, pe kaungāʻapi, tatau ai pē pe ko ha faiako ʻaʻahi, faiako, faʻē, taha tauhi ʻapi, pe kaungāmeʻa. Pea ʻi heʻetau foakí, ʻoku tau ʻilo ai ʻoku ʻʻomai ʻe he feilaulaú ʻa e ngaahi tāpuaki ʻo e langí!’ (Ngaahi Himi, fika [16] Pea ʻi he ikuʻangá, te tau toki ʻilo ta naʻe ʻikai ko ha feilaulau ia.”

Becoming the Pure in Heart, konifelenisi lahi ʻo ʻEpeleli 1978

ʻEletā D. Todd Christofferson

“Ko ʻetau moʻui ʻi māmaní ko hatau fatongia fakaetauhi ʻi he taimí mo e ngaahi fili kuo foaki ʻe hotau Tupuʻangá. ʻOku fakamanatu mai ʻe he foʻi lea ko e fatongia tauhí ʻa e fono ʻo e fakatapui ʻa e ʻEikí (hangē ko ʻení, vakai, Tokāteline mo e Ngaahi Fuakava 42:32, 53), ʻa ia ʻoku ʻi ai hono fatongia fakaʻekonōmika, ka, ʻoku mahulu hake ai, ko hano fakaʻaongaʻi ʻo e fono fakasilesitialé ki he moʻuí, ʻi heni ʻi he taimi ní (vakai, Tokāteline mo e Ngaahi Fuakava 105:5). Ko e fakatapuí ko e tuku mavahe pe fakatapuʻi ha faʻahinga meʻa ke toputapu, ʻo tukutaha ki ha ngaahi taumuʻa māʻoniʻoni. Ko e lavameʻa moʻoni ʻi he moʻui ní ʻoku maʻu ia ʻi hono fakatapui ʻetau moʻuí—ʻa ia ko hotau taimí mo ʻetau ngaahi filí—ki he ngaahi taumuʻa ʻa e ʻOtuá (vakai, Sione 17:1, 4; Tokāteline mo e Ngaahi Fuakava 19:19). ʻI heʻetau fai ʻení, ʻoku tau fakangofua ai Ia ke Ne ʻohake kitautolu ki hotau ikuʻanga māʻolunga tahá.”

Fakakaukauloto ki ha Moʻui Kuo Fakatapui, konifelenisi lahi ʻo ʻOkatopa 2010

ʻEletā Neal A. Maxwell

ʻOku tau faʻa lau ko e fakatapuí ko ha tukuange ia ʻetau koloa fakaemāmaní ʻi he taimi ʻoku tuʻutuʻuni fakalangi mai aí. Ka ko e fakatapui moʻoní ko e momoi ʻo kita ki he ʻOtuá. Ko e ngaahi foʻi lea ʻa Kalaisi ʻi hono fakamatalaʻi ʻo e ʻuluaki fekaú, ko e loto, laumālie, mo e ʻatamai, ʻa ia ʻoku fakaʻaongaʻi maʻu pē, kae ʻikai ʻi ha taimi pē ʻe niʻihi (vakai, Mātiu 22:37). Kapau te tau tauhi ia, ʻe toki fakatapui kakato leva ʻa ʻetau ngaahi ngāué ke tolonga fuoloa hono ʻaongá ki hotau laumālié (vakai, 2 Nīfai 32:9).”

Consecrate thy Performance, konifelenisi lahi ʻo ʻEpeleli 2002

Palesiteni Henry B. Eyring

“ʻOku fanongo ʻa ʻetau Tamai Hēvaní ki he ngaahi lotu ʻa ʻEne fānaú ʻi he funga ʻo māmaní... Kuo aʻu hake kiate Ia ʻa e ngaahi tautapa ko iá, talu mei he taimi naʻá Ne tuku ai ʻa e tangatá mo e fefiné ʻi he māmaní.

Koeʻuhí ʻoku fanongo ʻa e ʻEikí ki heʻenau tangí mo ongoʻi ʻa hoʻo manavaʻofa lahi kiate kinautolú, kuó Ne foaki mai ai talu mei he kamataʻanga ʻo taimí, ha ngaahi founga ke tokoni ai ʻEne kau ākongá. Kuó Ne fakaafeʻi ʻEne fānaú ke fakatapui honau taimí, ʻenau koloá, mo ʻenau moʻuí ke kau fakataha mo Ia ʻi hono tokoniʻi ʻo e niʻihi kehé. Naʻe ui ʻEne founga tokoní ʻi ha taimi ko e moʻui ʻaki ʻa e fono ʻo e fakatapuí.”

Ngaahi Faingamālie ke Fai Lelei, konifelenisi lahi ʻo ʻEpeleli 2011

ʻEletā David A. Bednar

“Ko e fakatapuí ʻoku fekauʻaki pea mo langa ia ʻi he feilaulau. ʻOku ʻuhinga ʻa e foʻi lea fakatapuí ke tanumaki mo ʻtuku mavahe ki ha taumuʻa toputapu.’ Ko e feilaulaú ko e meʻa ia ʻoku tau foaki, tukulolo, momoi, pe tuku ange. Ko e fakatapuí, ʻi he tafaʻaki ʻe tahá, ke fakatupulaki kakato mo fakatapui ki ha taumuʻa toputapu. … ʻI heʻetau moʻui ʻaki ʻa e fono ʻo e fakatapuí, ʻoku ʻikai ngata pē ʻi heʻetau loto ke foaki ha faʻahinga meʻá mo e meʻa kotoa ʻoku tau maʻu koeʻuhí ko e ongoongoleleí—ka ʻoku tau toe palōmesi foki ke fakatupulaki pea mo līʻoa hotau lelei tahá—ʻa hotau taimí, hotau ngaahi talēnití, pea mo e meʻa kotoa ʻoku tau malavá—ki he langa e puleʻanga ʻo e ʻOtuá ʻi he māmaní. Ko ʻetau fakapapaú leva: Te u foaki au mo e meʻa kotoa te u lava ʻo aʻusiá, pea te u moʻui ʻaki ʻa e ongoongolelei ʻo Sīsū Kalaisí. Ko e tefitoʻi moʻoni ʻo e feilaulaú ko ha fono siʻi ange ia ʻi he teuteu ki he tefitoʻi moʻoni ʻo e fakatapuí. ʻOku kau mo fālute ʻa e feilaulaú ʻe he fakatapuí, mo toe lahi ange. … Ko e fakatapui moʻoní ʻoku fakatupu ia ʻe he ʻofa haohaoá mo ʻomai ha holi lahi ange ke tokoni. ʻI he ngaahi ʻaho kimui ní, ʻoku fiemaʻu ha meʻa lahi ange meiate kitautolu ʻi heʻetau hoko ko e fānau ʻo e fuakavá, ʻo laka ange ʻi heʻetau paʻangá, koloá, mo hotau taimí. ʻOku fiemaʻu ke tau fakatapui ki he ʻEikí ʻa ʻetau moʻuí kakato.”

Toʻo mei ha lea ʻi ha fakataha lotu naʻe fai ʻi BYU-Idaho, “Your Whole Souls as an Offering Unto Him,” David A. Bednar, 5 ʻo Sānuali 1999

Palesiteni Russell M. Nelson

“Ngaahi tokoua mo e tuofāfine, ko e koloa fakamāmaní mo e lāngilangí ʻoku ʻikai tolonga. Ka ko ʻetau feohi ko e uaifi, husepāniti, mo e fāmilí, ʻe lava. Ko e lōloa pē ʻo e moʻui fakafāmili ʻokú ne feau ʻa e fakaʻānaua tāumamaʻo ʻa e laumālie ʻo e tangatá ke taʻengata. ʻOku ʻikai ha feilaulau ʻe fuʻu lahi kae maʻu ʻa e ngaahi tāpuaki ʻo e mali taʻengatá. Ke taau mo ia, ʻe fiemaʻu ʻa e tokotahá ke ne sītuʻa mei he anga taʻemāʻoniʻoni kotoa pea tauhi ʻa e ngaahi ouau ʻo e temipalé. ʻI heʻetau fakahoko mo tauhi ʻa e ngaahi fuakava toputapu ʻo e temipalé, ʻoku tau fakahaaʻi ai ʻetau ʻofa ki he ʻOtuá, ki hotau hoá, pea mo ʻetau fakaʻapaʻapa moʻoni ki hotau hakó—aʻu kiate kinautolu ʻoku teʻeki fanauʻí. Ko hotau fāmilí ko e ʻelito ia ʻo ʻetau ngāue maʻongoʻonga tahá pea mo e fiefia ʻi he moʻui ko ʻení; pea ʻe pehē ia ʻi ʻitāniti kotoa, ʻi he taimi te tau lava ai ke ʻmaʻu ʻa e ngaahi nofoʻa fakatuʻi, ngaahi puleʻanga, ngaahi pule, … ngaahi mālohi, ngaahi lāngilangi, … hākeakiʻí mo e nāunaú.’ ʻE lava ke tau maʻu ʻa e ngaahi tāpuaki mahuʻingá ni kapau te tau fakamaau hotau falé ʻi he taimí ni pea pīkitai maʻu ai pē ki he ongoongoleleí.”

Set in Order Thy House, konifelenisi lahi ʻo ʻOkatopa 2001

Palesiteni Dallin H. Oaks

“Ko e taumuʻa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke tokoni ke mahino ki he kotoa ʻo e fānau ʻa e ʻOtuá ʻa e tuʻunga te nau ala aʻusiá pea mo aʻusia honau ikuʻanga māʻolunga tahá. ʻOku ʻi heni ʻa e siasí ke tokonaki maʻá e ngaahi foha mo e ngaahi ʻofefine ʻo e ʻOtuá, ʻa e ngaahi founga ke hū atu ai mo maʻu ʻa e hākeakiʻí ʻi he puleʻanga fakasilesitialé. Ko ha siasi ʻeni ʻoku fakatefito ʻi he fāmilí, ʻi hono tokāteliné mo e ngaahi ngāué. ʻOku fakamatalaʻi heʻetau mahino ki he natula mo e taumuʻa ʻa e ʻOtua ko e Tamai Taʻengatá ʻa hotau ikuʻangá pea mo ʻetau fengāueʻaki ʻi hono fāmili taʻengatá. “ʻOku kamata ʻetau tui fakalotú ʻi ha ongomātuʻa fakalangi. Ko e tumutumu ʻetau fakaʻamú ke hangē ko kinauá. ʻI he malumalu ʻo e palani ʻaloʻofa ʻa e Tamaí, ʻe malava ʻeni kotoa tuʻunga ʻi he fakalelei ʻa e ʻAlo pē Taha ʻo e Tamaí naʻe Fakatupú, ko hotau ʻEiki mo e Fakamoʻui ko Sīsū Kalaisí. ʻI heʻetau hoko ko e ngaahi matuʻa ʻi māmaní, ʻoku tau kau ai ʻi he palani ʻo e ongoongoleleí ʻaki haʻatau foaki ha ngaahi sino fakamatelie maʻá e fānau fakalaumālie ʻa e ʻOtuá. Ko e kakato ʻo e fakamoʻui taʻengatá ko ha meʻa fakafāmili.

Apostasy and Restoration, konifelenisi lahi ʻo ʻEpeleli 1995

Palesiteni Henry B. Eyring

“Ko e meʻa kotoa ʻoku tau faí ʻoku totonu ke hoko ai ʻa e mali fakasilesitialé ko hono ʻelito mo e taumuʻa. ʻOku ʻuhinga ia kuo pau ke tau feinga ke silaʻi ki ha hoa taʻengata ʻi he temipale ʻo e ʻOtuá. Kuo pau foki ke tau poupouʻi mo e niʻihi kehé ke nau fakahoko mo tauhi ʻa e ngaahi fuakava ʻokú ne haʻi fakataha ha husepāniti mo e uaifí, mo honau fāmilí, ʻi he moʻuí ni mo e moʻui ka hokó.

Ngaahi Fāmili Taʻengatá, konifelenisi lahi ʻo ʻEpeleli 2016

Palesiteni Boyd K. Packer

Ko e aofangatuku ʻo e ngāue kotoa he Siasí ko e fiefia ʻa ha husepāniti mo hono uaifí mo ʻena fānaú ʻi ʻapi, kuo maluʻi ʻaki e ngaahi tefitoʻi moʻoni mo e fono ʻo e ongoongoleleí, pea silaʻi malu ʻi he ngaahi fuakava taʻengata ʻo e lakanga fakataulaʻeikí.”

Pea ʻe Tataki ʻa Kinautolu ʻe ha Tamasiʻi Siʻi, konifelenisi lahi ʻo ʻEpeleli 2012

Palesiteni Dieter F. Uchtdorf

“ʻOku ou fakamālō ʻi heʻeku kau ki ha siasi ʻokú ne fakamahuʻingaʻi ʻa e nofomalí mo e fāmilí. ʻOku ʻiloa ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi māmani kotoa ʻi he ʻi ai ha niʻihi ʻo e ngaahi nofomali mo e ngaahi fāmili lelei taha te ke ala maʻú. ʻOku ou tui ki heni, ko hano konga, he ko e moʻoni mahuʻinga naʻe fakafoki mai ʻe Siosefa Sāmitá, ko e nofomalí mo e fāmilí ʻoku ʻuhinga ia ke taʻengata. ʻOku ʻikai fakataumuʻa ʻa e fāmilí ia ke ʻai pē ke tokamālie ange ʻa e ngaahi meʻá ʻi māmani pea liʻaki ʻi haʻatau aʻu ki hēvani. Ka, ko e lao kinautolu ʻo langí. Ko ha ʻata ia ʻo ha sīpinga fakasilesitiale mo ha fakataipe ʻo e fāmili taʻengata ʻo e ʻOtuá.”

Ko e Fakahīkihikiʻi ʻo Kinautolu ʻOku Fakahaofí, konifelenisi lahi ʻo ʻEpeleli 2016

“Ko e Fāmilí: Ko ha Fanongonongo ki Māmani”

“ʻOku fakangofuaʻi ʻe he palani fakalangi ʻo e fiefiá ʻa e feohi fakafāmilí ke tolonga atu ʻo ʻoua naʻa ngata pē ʻi faʻitoka. ʻOku hanga ʻe he ngaahi ouau mo e ngaahi fuakava toputapu ʻi he ngaahi temipale māʻoniʻoní ʻo ʻai ke lava ʻa e fakafoʻituituí ʻo foki ki he ʻao ʻo e ʻOtuá pea mo e ngaahi fāmilí ke fakatahaʻi ʻo taʻengata.”

Ko e Fāmilí: Ko ha Fanongonongo ki Māmani

Palesiteni Russell M. Nelson

“Ko e tangata kotoa pe ʻoku haʻu ki māmani ko ʻení ko e hako ia ʻo ha ngaahi toʻutangata ko e ngaahi mātuʻa. ʻOku tau maʻu ha fakaʻānaua fakanatula ke fehokotaki mo ʻetau ngaahi kuí. ʻOku nofo ʻa e holi ko ʻení ʻi hotau lotó, neongo pe ko e hā hotau taʻu motuʻá. Fakakaukau ki he ngaahi fehokotaki fakalaumālie ʻoku faʻu ʻi he taimi ʻoku tokoniʻi ai ʻe ha finemui ʻene kui fefiné ʻo fakahū ʻa e fakamatalá ki ha komipiuta pe ko e taimi ʻoku sio ai ha talavou ki he hingoa ʻo ʻene kui tangata hono uá, ʻi ha lekooti tohi kakai. Ko e taimi ʻoku liliu ai hotau lotó ki heʻetau ngaahi kuí, ʻoku ʻi ai ha meʻa ʻoku liliu ʻiate kitautolu. ʻOku tau ongoʻi ha konga ʻo ha faʻahinga meʻa ʻoku maʻongoʻonga ange ʻiate kitautolu. ‘Oku fakahoko ʻa e ngaahi fakaʻānaua naʻe fanauʻi mo kitautolu ke ʻi ai ha fehokotaki fakafāmilí, ʻi he taimi ʻoku fakafehokotaki ai kitautolu ki heʻetau ngaahi kuí ʻo fou ʻi he ngaahi ouau toptapu ʻo e temipalé.”

Generations Linked in Love, konfelenisi lahi ʻo ʻEpeleli 2010

Palesiteni Thomas S. Monson

“Ko e hā ʻoku tokolahi fau ai ha niʻihi ʻoku nau fie foaki lahi kae lava ʻo maʻu ʻa e ngaahi tāpuaki ʻo e temipalé? ʻOku ʻiloʻi ʻe kinautolu ʻoku mahino ki ai ʻa e ngaahi tāpuaki taʻengata ʻoku maʻu mei he temipalé, ʻoku ʻikai ha feilaulau ia ʻe fuʻu lahi, ʻikai ha mahuʻinga ʻe fuʻu mamafa, ʻikai ha feinga ʻe fuʻu faingataʻa kae lava ʻo maʻu ʻa e ngaahi tāpuaki ko iá. He ʻikai ha lau-maile ia ʻe fuʻu lōloa ke fonongaʻia, ha ngaahi fakafeʻātungia ʻe fuʻu lahi ke ikunaʻi, pe faingataʻa ʻe tōtuʻa ke kātekina. ʻOku mahino kiate kinautolu ko e ngaahi ouau fakamoʻui ʻoku maʻu ʻi he temipalé ʻoku nau fakaʻatā ke tau foki ʻi ha ʻaho ki heʻetau Tamai Hēvaní ʻi ha fehokotaki fakafāmili peá mo fakakoloaʻi ʻaki ʻa e ngaahi tāpuaki mo e mālohi mei ʻolungá, ʻoku nau taau mo ha feilaulau pē mo e feinga kotoa pē.”

Ko e Temipale Māʻoniʻoní—Ko ha Maama ki he Māmaní, konifelenisi lahi ʻo ʻEpeleli 2011

Palesiteni Gordon B. Hinckley

“ʻOku ou tui kuo ʻikai ha mēmipa ʻo e Siasí kuó ne maʻu ʻa e taupotu taha ʻe foaki ʻe he Siasi ko ʻení kae ʻoua kuó ne maʻu hono ngaahi tāpuaki fakatemipalé ʻi he fale ʻo e ʻEikí.”

Some Thoughts on Temples, Retention of Converts, and Missionary Service, konifelenisi lahi ʻo ʻOkatopa 1997

Palesiteni Howard W. Hunter

“ʻI he laumālie ko iá ʻoku ou fakaafeʻi ai ʻa e Kāingalotu ʻo e Siasí ke nau hanga ki he temipale ʻo e ʻEikí ko ha fakaʻilonga maʻongoʻonga ia hoʻo hoko ko e mēmipá. Ko e fakaʻānaua lahi taha ia hoku lotó ke moʻui taau ʻa e mēmipa kotoa ʻo e Siasí ke hū ki he temipalé. ʻE fakahōifua ki he ʻEikí kapau ʻe taau ʻa e mēmipa lalahi kotoa—mo ʻi ai— haʻane lekomeni ʻoku kei ʻaonga. Ko e ngaahi meʻa ko ia kuo pau ke tau fai mo ʻikai ke fai ka tau taau ai ke maʻu ha lekomeni temipalé, ko e ngaahi meʻa tonu ia te ne fakapapauʻi te tau fiefia fakafoʻituitui mo fakafāmilí. Tau hoko muʻa ko ha kakai ʻoku ʻalu ki he temipalé. ʻAlu maʻu pē ki he temipalé ʻo fakatatau mo e meʻa ʻoku lava ʻi homou ngaahi tūkunga fakafoʻituituí. Tauhi ha tā ʻo ha temipale ʻi homou ʻapí ke lava hoʻomou fānaú ʻo mamata ki ai. Akoʻi kinautolu fekauʻaki mo e ngaahi taumuʻa ʻo e fale ʻo e ʻEikí. ʻAi ke nau palani mei heʻenau kei iiki tahá ke ō ki ai pea moʻui taau maʻu pē mo e tāpuaki ko iá.”

Exceeding Great and Precious Promises, konifelenisi lahi ʻo ʻOkatopa 1994

ʻEletā David A. Bednar

“ʻOku faitokonia ʻe he Laumālie ʻo ʻIlaisiaá ʻa e kakai ʻi loto pea mo tuʻa ʻo e Siasí. Ka, ʻi heʻetau hoko ko e kau mēmipa ʻo e Siasi ʻo Kalaisi kuo fakafoki maí, ʻoku tau maʻu ai ʻa e fatongia fuakava ke fekumi ki heʻetau ngaahi kuí pea foaki kiate kinautolu ʻa e ngaahi ouau fakamoʻui ʻo e ongoongoleleí. “Ke ʻoua naʻa fakahaohaoa ʻa kinautolu taʻe-kau ai ʻa kitautolu” (Hepelū 11:40); vakai foki, Ngaahi Akonaki: Siosefa Sāmita, 550). Pea ʻʻoku ʻikai lava ke fakahaohaoaʻi ʻa kitautolu taʻe-kau ai ʻa hotau kau pekiá’ (Tokāteline mo e Ngaahi Fuakava 128:15). Ko e ngaahi ʻuhinga ʻeni ʻoku tau fai ai ʻa e fakatotolo ʻi he hisitōlia fakafāmilí, langa ʻo e ngaahi temipalé, mo fakahoko e ngaahi ouau fakafofongá. Ko e ngaahi ʻuhinga ʻeni naʻe fekauʻi mai ai ʻa ʻIlaisiā ke ne fakafoki mai ʻa e mafai faisila ko ia ʻokú ne nonoʻo ʻi māmani pea ʻi he langí. Ko e kau fakafofonga kitautolu ʻo e ʻEikí ʻi he ngāue ʻo e fakamoʻuí mo e hākeakiʻí, ʻa ia te ne taʻofi ke ʻoua naʻa “teʻia ʻa e māmaní kotoa pē ʻaki ha fakamalaʻiá’ (Tokāteline mo e Ngaahi Fuakava 110:15) ʻi Heʻene toe hāʻele maí. Ko hotau fatongia mo e tāpuaki maʻongoʻonga ʻeni.

ʻE Liliu ʻa e Loto ʻo e Fānaú, konifelenisi lahi ʻo ʻOkatopa 2011

ʻEletā Quentin L. Cook

Ko e tokāteline ʻo e fāmilí fekauʻaki mo e hisitōlia fakafāmilí mo e ngāue fakatemipalé, ʻoku mahino. Naʻe folofola ʻa e ʻEikí ʻi he ngaahi ʻuluaki fakahinohino ʻo e fakahaá ʻo kau ki he ʻpapitaiso homou kau pekiá.’ Ko hotau tufakanga fakatokāteliné ki heʻetau ngaahi kuí. ʻOku tupu ʻeni he ko e faʻunga fakasilesitiale ʻo e langí ʻoku makatuʻunga ia ʻi he ngaahi fāmilí. Kuo ʻosi poupouʻi ʻe he Kau Palesitenisī ʻUluakí ʻa e kāingalotú, ʻo tautautefito ki he toʻu tupú mo e kau taautaha kei talavoú, ke fakamamafaʻi ʻa e ngāue hisitōlia fakafāmilí pea mo e ngaahi ouau maʻa ʻenau ngaahi hingoa fakafāmilí pe ngaahi hingoa ʻo e kui ʻa e kau mēmipa honau uōtí mo e siteikí. ʻOku fiemaʻu ke fakafehokotaki hotau ngaahi tupuʻangá mo hotau ngaahi hakó fakatouʻosi. Ko e fakakaukau ʻo ʻetau fekauʻaki ʻi he nāunau taʻengatá ʻoku nāunauʻia moʻoni.”

Ngaahi Aká mo e Vaʻá, konifelenisi lahi ʻo ʻEpeleli 2014

Palesiteni Boyd K. Packer

“Neongo pe ʻoku tau tangataʻifonua ʻi fē pe ko e hā e matakalí, tangata pe fefine, neongo pe ko e hā ho tuʻunga fakaakó, pea ko e toʻutangata ʻoku moʻui ai ha taha, ko e moʻuí ko ha fononga foki ki ʻapi kiate kitautolu kātoa, foki ki he ʻao ʻo e ʻOtuá ʻi hono puleʻanga fakasilesitialé. “ʻOku hoko ʻa e ngaahi ouaú mo e ngaahi fuakavá ko ʻetau fakamoʻoni ke hū ʻaki ki Hono ʻaó. Ke maʻu kinautolu ʻi he tuʻunga tāú, ko e ngāue ia ʻi he moʻuí kotoa; ke pukepuke kinautolu ʻi he hili iá, ko e pole ia ʻo e moʻui fakamatelié. Ko ʻetau maʻu pē kinautolu maʻatautolu pea mo hotau fāmilí, ʻoku tau haʻisia leva ke fakahoko ʻa e ngaahi ouau fakafofonga ko ʻení maʻa hotau kau pekiá, ki he fāmili kotoa ʻo e tangatá.

Covenants, Ensign, Mē 1987