I lenei tisipenisione atoa, ua saunoa soo le Au Peresitene Sili ma le Korama a Aposetolo e Toasefululua e uiga i sauniga ma feagaiga o le malumalu. I lalo ifo o loo i ai ni saunoaga sii, ua faatulagaina e ala i mataupu, o loo faapupula mai ai le ala na talanoaina ai nei autu paia i ni tulaga eseese. Kiliki e faalautele ai se vaega. O mea o maua ai, ua i ai se sooga ua saunia e maua ai le uluai pepa o faamatalaga.
Papatisoga ma le Faamauga
Peresitene Russell M. Nelson
“Soo se taimi e te faia ai soo se mea e fesoasoani ai i soo se tasi—po o le fea lava le itu o le veli—e laa ai agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faapena lona faigofie.”
Faamoemoe o Isaraelu, faigalotu a le autalavou i le lalolagi atoa, 3 Iuni, 2018
Peresitene Thomas S. Monson
“Ia, a’u uo talavou e, o ē o i ai i o outou tausaga o le talavou, ia i ai pea lava pea a outou vaaiga i le malumalu. Aua lava nei faia se mea o le a taofia ai oe mai le ulufale atu i ona faitotoa ma ‘ai ai i faamanuiaga paia ma le faavavau iina. Ou te faamalo atu ia te outou o ē o atu soo i le malumalu ma faia ai papatisoga mo e ua maliliu, i lo outou alapopō i taeao ina ia mafai ai ona outou auai i le faatinoga o na papatisoga a o lei amataina a’oga. Ou te le iloa po o le a se isi auala sili atu e amata ai se aso.”
“O Le Malumalu Paia—O Se Sulu i le Lalolagi, konafesi aoao Aperila 2011
Elder David A. Bednar
“Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. Ou te fautuaina outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu [tagai i le Mataupu Faavae ma Feagaiga 124:28–36]. Ma ou te uunaia outou ia fesoasoani atu i isi tagata ia iloa o latou talafaasolopito o aiga. A o outou tali atu ma le faatuatua i lenei valaaulia, o le a liliu atu o outou loto i tamā. … O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai i uunaiga faateleina a le tiapolo. A outou auai ma fiafia i lenei galuega paia, o le a malupuipuia outou i lo outou talavou ma i o outou olaga atoa.”
O Le a Liliu atu Loto o Fanau i o Latou Tamā, konafesi aoao Oketopa 2011
Elder Quentin L. Cook
“O le tuufaatasiga o le faateleina o fuainumera o malumalu ma tekinolosi fou e faataunuu ai o tatou tiutetauave paia o talafaasolopito o aiga mo o tatou tuaa, ua avea ai lenei mea ma taimi sili ona faamanuiaina i le talafaasolopito atoa. Ou te olioli i le tulagaese o le faamaoni o a tatou talavou i le faavasegaina o igoa ma le sailia o o latou tuaa ma faia galuega o le papatisoga ma le faamauga i le malumalu. O outou moni lava o faaola na valoia i le Mauga o Siona.”
“Tagai ia te Oe Lava i le Malumalu, konafesi aoao Aperila 2016
Elder Gary E. Stevenson
“Ua tuuina mai e le Au Peresitene Sili se valaaulia i ‘tagata matutua uma o le Ekalesia ia i ai se pepa faataga aoga o le malumalu ma ia asiasi soo i le malumalu’ i mea e faatagaina ai e le taimi ma tulaga, ma ua fautuaina tagata ‘e suia nisi o gaoioiga faafiafia i auaunaga i le malumalu.’ Na latou fautuaina foi ‘tagata fou ma le autalavou a le Ekalesia ua ta’i 12 tausaga le matutua ma luga atu, ina ia ola agavaa e fesoasoani i lenei galuega sili e ala i le avea ai ma tagata sui mo papatisoga ma faamauga.’ [Tusi a le Au Peresitene Sili, 11 Mati, 2003.]”
“O Fale [o Aiga] Paia, O Malumalu Paia, konafesi aoao Aperila 2009
Elder Richard G. Scott
“Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai.”
O Le Olioi i le Togiolaina o E Ua Maliliu, konafesi aoao Oketopa 2012
Ofusa ma Laei mo Sauniga o le Malumalu
Peresitene Russell M. Nelson
“O le laeiina o le ofusa o le malumalu e loloto lona taua faafaatusa. E faatusa i se tautinoga faifai pea. E faapei lava ona faaa’oa’o mai e le Faaola o le manaomia ona tumau e oo i le iuga, tatou te laeiina foi ma le faamaoni le ofusa o se vaega o le talita malosi a le Atua. O lea tatou te faailoa atu ai lo tatou faatuatua ia te Ia ma i Ana feagaiga o le faavavau faatasi ma i tatou.”
Sauniuniga a le Tagata Lava Ia mo Faamanuiaga o le Malumalu,” konafesi aoao Aperila 2001
Peresitene Russell M. Nelson
“Afai tou te fia mananao moni e iloa atili e uiga i le talafaasolopito o laei o le malumalu, sue mo oe lava ia i le Feagaiga Tuai. Ua tumu le Feagaiga Tuai i mau faasino i laei faapitoa o le malumalu.”
Aoaoga a Russell M. Nelson, 372.
Peresitene Boyd K. Packer
I le fesootai ai ma nei sauniga, i totonu o le malumalu o le a faaofuina aloia ai oe i le ofusa ma folafola atu ai faamanuiaga ofoofogia e o faatasi ai. E taua lou faalogologo toto’a a o faatinoina nei sauniga ma ia e taumafai ia manatua faamanuiaga folafolaina ma tuutuuga o le a faatinoina ai.”
Laei Paia o le Malumalu
“O ofutalaloa o Le Ekalesia a Iesu Keriso o le Au Paia o Aso e Gata Ai, ua iloa o ni ofutalaloa o le perisitua paia, ma e na o totonu lava o malumalu o le Au Paia o Aso e Gata Ai e laeiina ai, ma e faaleoleo mo faamanatuga aupito maualuluga o le faatuatua. O le pa’epa’e e faatusa i le mamā a’ia’i. E leai se faailoga po o se faatulagaga taualoa. O le aposetolo aupito matua ma le uso aupito fou e iloagatā pe a laei i le ala e tasi. E fai e alii ma tamaitai laei tutusa. O ofu faigofie ua tuufaatasia ai faatusa faalelotu e fesootai ai ma faiga ma mataupu faavae i tusitusiga anamua mai le tusi o Esoto.”
Laei Paia o le Malumalu
“E toatele le Au Paia o Aso e Gata Ai faamaoni, e ofuina se ofusa i totonu o o latou lavalava, ma e i ai sona taua loloto faalelotu. E talitutusa mamanu i lavalava tauagafau masani i totonu, e aumai i ni vaega se lua ma e masani lava ona ta’ua o le ‘ofusa o le malumalu.’… O ofusa paia o le malumalu e laeiina e tagata matutua o le Ekalesia “o e na faia folafolaga paia o le faamaoni i poloaiga a le Atua ma le talalelei a Iesu Keriso i malumalu o Le Ekalesia a Iesu Keriso o le Au Paia o Aso e Gata Ai. I tagata o le Ekalesia, o laei tauagafau o le malumalu, o loo faia i totonu o laei masani, faatasi ai ma ofu faafaatusa e faia i le taimi o tapuaiga i le malumalu, e “avea ma sui o le tulaga paia ma patino o lo latou sootaga ma le Atua ma la latou tautinoga e ola i ni olaga lelei faamamaluina.”
Sauniga Amata o Faaeega Paia – Mulumuluga ma le Faauuga
Peresitene Gordon B. Hinckley
“[E] i ai se sini i talaatu o le Toetu. O le faaeaga lea i le malo selesitila o lo tatou Tama. O le a ausia e ala i le usiusitai i poloaiga a le Atua. O le a amata i le taliaina o ia e avea mo tatou Tama e Faavavau ma lona alo e avea ma o tatou Togiola soifua. O le a aofia ai le auai i sauniga eseese, taitasi e taua ma e tatau ai. O le uluai sauniga o le papatisoga e ala i le faatofu i le vai, a aunoa ma lena, e le mafai ona ulu atu se tagata i le malo o le Atua, e pei o la le Faaola. Ona tatau ai lea ona sosoo ma le fanauina i le Agaga, le meaalofa o le Agaga Paia. Ona faasolosolo ai lea i le aluga o tausaga o le a oo mai, mo alii, le faauuga i le perisitua, sosoo ai ma faamanuiaga o le malumalu mo alii ma tamaitai o e agavaa e ulu atu i ai. O nei faamanuiaga o le malumalu e aofia ai o tatou mulumuluga ma faauuga ina ia mafai ona tatou mama i luma o le Alii. E aofia ai le sauniga o le aoaoga lea e tuuina mai ai ia i tatou se faaeega paia o tautinoga ma faamanuiaga e faaosofia ai i tatou i amioga e ogatasi ma mataupu faavae o le talalelei. E aofia ai sauniga o le faamauga lea e faapea o mea e fusifusia i le lalolagi e fusifusia foi i le lagi, e tuuina atu ai le faaauauina o le aiga.”
Malumalu ma Galuega Faalemalumalu, Ensign, February 1982
Peresitene Spencer W. Kimball
“Na faaee atu e Iosefa Samita i luga o aposetolo e toasefululua ia ki uma ma le pule ma le mana na umia e ia lava, ma sa ia mauaina mai le Alii. Na ia tuu atu ia i latou uma faaeega paia uma, mulumuluga ma faauuga uma, ma faatinoina ia i latou o sauniga o faamauga.”
Ia Viia Oe le Atua, mo le Perofeta, konafesi aoao ia Oketopa 1972.
Peresitene Boyd K. Packer
“O sauniga o mulumuluga ma le faauuga e tele ina ta’ua i totonu o le malumalu o sauniga amata. O le a lava mo o tatou faamoemoega le na ona fai atu faapea: O mulumuluga ma faauuga e fesootai ma le faaeega paia—e tele ina faafaatusa i le natura, ae o loo folafola mai ai faamanuiaga mautinoa, i le taimi nei faapea foi faamanuiaga i le lumanai.”
Saunia e Ulufale Atu i le Malumalu Paia
Elder James E. Talmage
“I matu o le potu papatiso o loo i ai avanoa ma potu e faigofie ona sui ai e faaaoga e alii, ae i saute o loo i ai foi potu talafeagai e sui ai mo tuafafine. Ua faia foi potu e faatino ai sauniga patino o faauuga. I nei sauniga e na o tamaitai e faatautaia mo tamaitai, a o alii mo alii.”
O Le Maota o le Alii [1976], 83
Elder Robert D. Hales
“I le malumalu, ua faamatala mai ai le ata o le faaolataga, ma osia ai feagaiga paia. O nei feagaiga, faatasi ma le ofuina o ofusa o le malumalu paia, e faamalosia ma puipui ai le tagata ua faia ona faaeega paia mai mana o le tiapolo. A uma ona maua o latou lava faaeega paia, e mafai e le alii talavou po o le tamaitai talavou ona auai i le malumalu ma faatino sauniga eseese ina ia avanoa ai faamanuiaga faaleperisitua mo i latou ua maliliu ae lei maua le avanoa e maua ai nei faamanuiaga i le olaga nei.”
Faamanuiaga o le Perisitua, konafesi aoao ia Oketopa 1995
Vaaiga Aoao i le Faaeega Paia
Peresitene Russell M. Nelson
“O le malumalu e faatumulia moni i le upumoni. O upumoni o le fuafuaga a le Tama ua folasia mai ma le manino ma le mana ia i tatou. O upu o le upumoni e uiga i lo tatou Tama, o Lona Alo, ma Lo La’ua sootaga ia i tatou, o loo fofogaina i feagaiga ma sauniga o le malumalu. O le malumalu o se fale o faaaliga lea e vaimamā ai i luga o o tatou agaga le upumoni ma faamanino ai lo tatou malamalama [tagai i le Mataupu Faavae ma Feagaiga 109:15]. Tatou te aoao ai i lo tatou faasinomaga faavavau ma le faamoemoega ma folafolaga ofoofogia a le Alii. E moni na folafolaga, aua o lo tatou Atua o se Atua o le upumoni ma e le mafai ona pepelo [tagai Eteru 3:2]. … Afai e o o tatou uso ma tuafafine i le malumalu e saili ai le malosiaga ma le malamalama, o le a aoaoina i latou e le Alii lava Ia e uiga i upumoni ia e sili ona taua ia i latou i taimi latou te manaomia ai.”
Teachings of Russell M. Nelson, 373.
Peresitene Ezra Taft Benson
“O tulafono faaselesitila, e tino mai i sauniga patino e ō le Ekalesia a Iesu Keriso, e faataunuuina e ala i feagaiga e faia i le faitalia. O tulafono e faaleagaga. O le mea lea, ua faauuina ai e lo tatou Tama o i le Lagi ni maota paia, ua ta’ua o malumalu, ina ia mafai ai ona faamatala atoatoa nei tulafono. O tulafono e aofia ai le tulafono o le usiusitai ma le taulaga, le tulafono o le talalelei, le tulafono o le ola mamā, ma le tulafono o le faapaiaga.”
A Vision and a Hope for the Youth of Zion, Brigham Young University devotional, April 12, 1977
Peresitene Boyd K. Packer
“O iina e mafai ai e tagata o le Ekalesia ua faaagavaaina i latou lava ona auai i sauniga aupito sili ona faaeaina ma paia o sauniga faaola ia ua uma ona faaalia mai i tagata. O iina e mafai ai ona mulumuluina ma faauuina ma aoaoina ma faaeeina ma faamauina. Ma a oo ina tatou mauaina nei faamanuiaga mo i tatou lava, ua mafai ona tatou faatautaia mo i latou ua maliliu e aunoa ma le mauaina o lena lava avanoa.”
O Mai i le Malumalu, Ensign, Oketopa 2007
Elder Robert D. Hales
“E faateleina lo tatou naunau e toe foi atu i le Tama Faalelagi, e le gata i le taumamafa i le faamanatuga, a o lo tatou agavaa e maua se pepa faataga o le malumalu. … I le avea ai la ma e umia pepa faataga o le malumalu, tatou te faamautuina ni mamanu o le ola e faapei o Keriso. E aofia ai i nei mea le usiusitai, faia o osigataulaga e tausi ia poloaiga, alofa o le tasi i le isi, o le mama i mafaufauga ma amioga, ma le tuuina atu o i tatou lava i le fausiaina o le malo o le Atua. E ala mai i le Togiola a le Faaola ma le mulimuli i nei mamanu autu o le faamaoni, tatou te maua ai le “mana mai luga” e fetaia’i ai ma faigata o le olaga. Tatou te matua manaomia lenei mana faalelagi i aso nei nai lo se isi lava taimi muamua. O lea mana e na o sauniga o le malumalu tatou te maua ai.
O Le Manatuaina Pe O Ai i Tatou: O Le Faamanatuga, le Malumalu, ma le Ositaulaga e Ala i le Auauna Atu, konafesi aoao Aperila 2012
Elder James E. Talmage
“O le faaeega paia i le malumalu, e pei ona sa faatautaia i malumalu i ona po nei, e aofia ai faatonuga e faatatau i le taua ma le faasologa o tisipenisiona ua mavae. … O lea faagasologa o faatonuga e aofia ai se tolaulauga o mea sili ona iloga na tutupu i le vaitau o le foafoaga, le tulaga o o tatou uluai matua i le Faatoaga o Etena, o lo la’ua le usita’i ma le faate’aga na sosoo ai mai lena nofoaga matagofie, o lo la tulaga i le lalolagi tuufua ma pagatia ina ua faasalaina e ola e ala i le galulue ma le afu, o le fuafuaga o le faaolataga lea e mafai ai ona togiolaina le soligatulafono maoae.
O Le Maota o le Alii [1976], 84
Elder James E. Talmage
“O sauniga o le faaeega paia ua fai ma faatusa o matafaioi patino i le vaega a le tagata lava ia, e pei o le feagaiga ma le folafolaga e tausia le tulafono o le amio mama a’ia’i ma le legavia, ia agaalofa, agalelei, onosai ma le mama atoatoa; ina ia tuuto atu uma taleni ma mea ua maua i le faasalalauina o le upumoni ma le siitiaina o tagata; ina ia faatumauina le tuuto atu i le puna o le upumoni; ma saili atu i auala uma e saofaga ai i le tapenapenaga tele ina ia saunia le lalolagi e talia lona Tupu,—le Alii o Iesu Keriso. O le faia ai o feagaiga taitasi ma le mauaina o matafaioi taitasi, ua fofogaina mai ai se faamanuiaga folafolaina, e faalagolago i le tausiga ma le faamaoni o tuutuuga.”
O Le Maota o le Alii, 100
Tulafono o le Usiusitai
Peresitene Thomas S. Monson
“Ou uso e ma tuafafine, o le suega tele lava o lenei olaga o le usiusitai. ‘O le a tatou tofotofoina ai i latou,’ na fetalai ai le Alii, ‘e vaai pe latou te faia mea uma o soo se mea e poloaiina ai i latou e le Alii lo latou Atua.’ Na tautino mai le Faaola: ‘Aua o i latou uma o e e fia mauaina se faamanuiaga i lo’u lima ia mau i le tulafono na tofia mo lena faamanuiaga, ma ona tulaga, e pei ona sa faatutuina mai i luma atu o le faavaega o le lalolagi.’ E leai se isi faataitaiga sili atu o le usiusitai o i ai nai lo lo tatou Faaola lava ia. E faatatau ia te Ia, na ta’ua ai e Paulo, ‘E ui o ia o se Alo, ae o mea sa tiga ai o ia, na aoaoina ai o ia ia usiusitai, ma faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.’”
O Le Usiusitai e Aumaia ai Faamanuiaga, konafesi aoao Aperila 2013
Peresitene Gordon B. Hinckley
E tuuina atu la’u molimau ia te outou, o le fiafia o le Au Paia o Aso e Gata Ai, o le filemu o le Au Paia o Aso e Gata Ai, o le alualu i luma o le Au Paia o Aso e Gata Ai, o le faamanuiaina o le Au Paia o Aso e Gata Ai, ma le faaolataga e faavavau ma le faaeaga o lenei nuu o loo taoto lea i le savavali usiusitai i fautuaga a le perisitua a le Atua.”
Afai Tou te Gauai ma Usiusitai, konafesi aoao, Oketopa 1971
Peresitene James E. Faust
“O le usiusitai e taitai atu ai i le saolotoga moni. O le tele o lo tatou usitai i upumoni faaalia, o le tele lena o lo tatou faasaolotoina. … E faapei lava ona tuuina atu e le faatonuga le ola ma le matagofie i le lalolagi i le taimi na pogisa ai ma gaogao ‘i’ī, e faapena foi ona faia ia i tatou. E fesoasoani le usiusitai tatou te atia’e ai le gafatia atoatoa ua finagalo ai lo tatou Tama Faalelagi mo i tatou ina ia avea ai ma tagata selesitila e agavaa i se aso e ola ai i Lona afioaga.”
Usiusitai: O Le Ala i le Saolotoga, konafesi aoao Aperila 1999
Elder Jeffrey R. Holland
“O le usiusitai, ua le na o le uluai tulafono o le lagi. O le usitai o le uluai tulafono lea o mea uma. O mea uma ua ou iloa e taua, e manaomia ai lena uluai tautinoga e usitai i le afioga ma le finagalo o le Alii. O le uluai feagaiga lea tatou te osia i le malumalu.”
Ua Asiasi Elder Jeffrey R. Holland i Filipaina, Faasoa Atu le Savali e uiga i le Alofa, Newsroom.ChurchofJesusChrist.org
Elder L. Tom Perry
“Muamua, e manaomia ona tatou usitai i tulafono a le Alii. O se tasi lenei o uluai lesona na aoao atu ia Atamu ma Eva: o le usiusitai e aumaia ai le faatuatua. E aumaia ai faamanuiaga o le lagi. O le le usiusitai e aumaia ai le lototiga ma le faavauvau. O le mulimuli i le tulafono o le usiusitai e aumaia ai le tulaga manaomia ia tuuina atu i tatou lava e auauna atu i fanau a lo tatou Tama o i le Lagi. O le ositaulagaina o a tatou mea o i ai ina ia manuia ai o tatou uso ma tuafafine, o le tofotofoga taualuga lea o le talalelei. O se tasi o faamoemoega o le aafiaga i le olaga nei o le vaai lea pe o le a tatou mulimuli i le apoapoaiga a le Faaola ia ‘outou muai saili le malo o le Atua, ma lana amiotonu; ona faaopoopoina atu lea o ia mea uma ia te outou’ [tagai Mataio 6:33].”
Faauta, ua Faaali Mai e le Alii ia te A’u o Mea Sili ma le Ofoofogia, konafesi aoao Oketopa 1992
Elder Joseph B. Wirthlin
“Matou te mananao uma ia te outou ia manuia i lenei olaga ma ia agavaa mo meaalofa silisili a le Atua—o le ola faavavau i le malo selesitila. Ina ia ausia a outou sini i lenei olaga faitino ma faamaonia outou lava ua agavaa mo faamanuiaga faavavau, aoao e usita’i. E leai lava se isi auala. O le usiusitai e aumaia ai le malosiaga sili ma le mana i o outou olaga.”
Ola i le Usiusitai, konafesi aoao Aperila 1994
Tulafono o le Taulaga
Peresitene Russell M. Nelson
“Ua poloaiina pea i tatou ia tatou faia taulaga, ae le toe faia i le faamaligi o toto o manu. E faataunuuina le taulaga silisili e mafai ona tatou avatu, i le tatou taumafai lea ia avea i tatou ma tagata e sili ona paia. Tatou te faia lena mea e ala i le usiusitai i poloaiga a le Atua. O lona uiga, ua felavesai tumau le tulafono o le usitai ma le taulaga. Mafaufau i poloaiga e usitai i le Upu o le Poto, e tausia le aso Sapati ia paia, e totogi faamaoni le sefuluai. A tatou usiusitai i ia tulafono faapea ma isi poloaiga, e i ai se mea matagofie e oo ia i tatou. Tatou te pulea lelei i tatou lava! E avea i tatou ma soo! E avea i tatou ma ni tagata paia—faapei o lo tatou Alii!”
O Lesona mai ia Eva, konafesi aoao Oketopa 1987
Peresitene Harold B. Lee
Ua sili ai ona avea la tatou fuafuaga o le uelefea i le taimi nei ma faatinoga ‘ua faatulagaina’ e iloa ai po o le a le lelei o le saunia o lenei ekalesia e ola i lenei fuafuaga, ina ia, faapei o le faailoaga fiafia o se nuu i lenei konetineta, e pei ona tusia i se tusitusiga paia anamua ua tatou ta’ua o le Tusi a Mamona, i le mavae ai o lo latou liua i le Alii, ‘sa leai se mauoa ma se mativa, pologa ma se saoloto, ae sa … tofusia i latou uma i le meaalofa mai le lagi’ ma ‘sa le mafai ona i ai o ni tagata e sili atu ona fiafia’ i luga o le fogaeleele (4 Ni. 1:3, 16) e ala i le ola atoatoa ai i le tulafono o le taulaga ma le faapaiaga.”
Aoao Atu le Talalelei o le Faaolataga, konafesi aoao Oketopa 1972
Peresitene M. Russell Ballard
“E masani lava, o le mea muamua e mafaufau i ai tagata pe a latou faalogo i le ‘tulafono a Mose’ o le taulaga e osi i manu. Ae o le natura matautia o le taulaga i le toto na afua ai ona fesili nisi, ‘E mafai faapefea e se na gaoioiga ona i ai se faiā ma le talalelei o le alofa?’ E mafai ona sili atu so tatou malamalama i le tali i lena fesili pe a tatou malamalama i faamoemoega tetele e lua mo le tulafono o le taulaga. O faamoemoega ia e faatatau ia Atamu, Aperaamo, Mose, ma Aposetolo o le Feagaiga Fou, ma e faatatau foi ia i tatou i aso nei pe a tatou talia ma ola i le tulafono o le taulaga. O ona faamoemoega tetele e lua o le tofotofo ma faamaonia i tatou ma fesoasoani ia i tatou e o mai ia Keriso.”
O Le Tulafono o le Taulaga, Liahona, Mati 2002
Elder L. Tom Perry
“Pe o se mea ea e ofo ai i le Alii, mai lava i le amataga, na finagalo ia faamautu lana fuafuaga i mafaufau o ana fanau iinei i le lalolagi? Faatasi ai i tulafono na tuuina atu ia Atamu ma Eva, sa faatuina le tulafono o le taulaga e faamanatu atu ai ia i la’ua le mea sili o le a tupu i le taulotoaiga o taimi. … Mai lava i lena taimi seia oo ina afio mai le Faaola i le lalolagi, i soo se taimi sa i ai le perisitua, sa ofoina atu ai e le tagata ia taulaga e faamanatu atu ai ia te ia le taimi o le a afio mai ai le Atalii o le Tagata i le lalolagi e faia le taulaga āoāo mo i tatou uma.”
Faamanatuga o le Talisuaga a le Alii, konafesi aoao Aperila 1996
Elder Neal A. Maxwell
“O le osigataulaga moni a le tagata lava ia, sa lē o le tuuina o se manu i luga o le fatafaitaulaga. Nai lo lena, o se naunautaiga e tuu le manu o loo i totonu o i tatou i luga o le fatafaitaulaga ina ia faaumatia! O le ‘taulaga lena i le Alii … o se loto momomo ma se loto salamo,’ (Mataupu Faavae ma Feagaiga 59:8), o se muai manaoga e amo le satauro, ao ‘lafoai ese [a tatou] agasala ina ia ‘iloa le Atua’ (Alema 22:18) aua o le faafitia o oe lava e muamua mai le taliaina atoa o Ia.”
Deny Yourselves of All Ungodliness, konafesi aoao Aperila 1995
Tulafono o le Talalelei
Peresitene Russell M. Nelson
“I le avea ai ma tagata taitoatasi o le Ekalesia, o oe ma a’u e auai i le ‘ala a le Alii lava ia.’ E le itiiti ifo ma le ta’itasi i se masina, tatou te anapopogi ai ma tatalo ma saofagā atu taulaga limafoai i tupe e mafai ai e epikopo ona faasoasoa atu fesoasoani. O se vaega lea o le tulafono o le talalelei. E mafai e i tatou taitoatasi ona fesoasoani moni i e matitiva ma e le tagolima, i le taimi nei, ma soo se mea o i ai i latou. O i tatou foi, o le a faamanuiaina ma puipuia mai le liliuese e ala i le faia o na mea.”
I Le Ala a le Alii Lava Ia, konafesi aoao Aperila 1986
Peresitene Ezra Taft Benson
“Tatou te osifeagaiga e ola i le tulafono o le talalelei. O le tulafono o le talalelei e fusia uma ai tulafono, mataupu faavae ma sauniga e alagatatau mo lo tatou faaeaga. Tatou te ioe e faaaoga le faatuatua ia Iesu Keriso ma le salamo faamaoni e fanau mai i se loto momomo ma le agaga salamo. A o tatou faatinoina sauniga o le papatisoa ma faamauga, ma faaauau i le faatuatua ma le tatalo, e ufitia e le mana o le taulaga togiola a le Faaola a tatou agasala ma faamamaina i tatou mai le amioletonu uma. … O le tulafono o le talalelei e tele atu nai lo le na o le malamalama i le ata o le faaolataga. E aofia ai le taliaina o sauniga ma mana o faamauga e taualuga i se tagata ua faamauina i le ola e faavavau. ‘O le toefanauina,’ na saunoa ai le Perofeta o Iosefa Samita,‘e maua mai i le agaga o le Atua e ala i sauniga.’”
Teachings of Ezra Taft Benson, 337
Peresitene Ioane Teila
“Peitai na oo ina tatau ai ia Atamu ona usitai, matau, ma tausia le tulafono o le talalelei, ma na oo foi ina tatau ai i ana fanau, o ē o le a umia lena lava faaeaga ma faamanuiaga, ona matau ma tausia foi lena lava tulafono.”
The Gospel Kingdom, 279
Peresitene Uilifoti U. Uitilafi
“O i latou uma e taliaina mataupu faavae o le talalelei a Keriso, o le a faasaoina i latou i na mataupu. O ia o lē ola ai i se tulafono o le a faasaoina e lena tulafono. Soo se tagata e ola i le tulafono o le talalelei o le a faasaoina ma mauaina le faaeaga ma le mamalu e ala i lena mea.
The Discourses of Wilford Woodruff, 22
Elder Bruce R. McConkie
I le auiliiliga faai’u, o le talalelei a le Atua e le o tusia i ni mataitusi ua pepē o faamaumauga o tusitusiga paia, ae i olaga o le Au Paia. E le o tusia i se peni ma se vaitusi i laupepa na faia e le tagata, ae o faatinoga ma galuega i le tusi o le ola o tagata taitasi e talitonu ma usiusitai. O loo vaneina i aano ma ivi ma sulugatiti o i latou o ē ola i se tulafono selesitila, o le tulafono lea o le talalelei. O loo i ai iina ina ia faitauina e isi, muamua, e i latou o ē vaaia galuega lelei a le Au Paia, o le a tali atu e ala i le viia o lo tatou Tama o i le lagi (tagai Mata. 5:16) ma faai’u ai e le Faamasino Sili lea e avea ai le olaga o tagata uma o se tusi tatala.”
Our Gospel Came Not Unto You in Word Only…, konafesi aoao Oketopa 1968
O Le Tulafono o le Ola Mamā
Peresitene Russell M. Nelson
“O le ituaiga soifuaga o le Faaola e lelei. O Lana ala e aofia ai le legavia a o le’i faaipoipoina ma le faamaoni a’ia’i i totonu o le faaipoipoga. O le ala a le Alii ua pau lea o le ala mo i tatou e maua ai le fiafia tumau. O Lana ala e aumai ai le mafanafana faifaipea i o tatou agaga ma le filemu faifaipea i o tatou aiga. Ae o le mea sili i lo mea uma, o Lana ala e taitai atu ai i tatou ia te Ia ma lo tatou Tama Faalelagi, i le ola faavavau ma le faaeaga. O le ute tonu lava lea o le galuega ma le mamalu o le Atua.”
Faaiuga mo le Faavavau, konafesi aoao Oketopa 2013
Peresitene Dallin H. Oaks
“O le mana e foafoa ai le ola faaletino o se mana sili lea ona faaeaina na tuuina mai e le Atua i Ana fanau. O lona faaaogaina o loo faatonu mai i le poloaiga muamua a le Atua ia Atamu ma Eva (tagai Kenese 1:28), ae o isi poloaiga taua na tuuina mai e faasa ai lona faaaogaina sese (tagai Esoto 20:14; 1 Tesalonia 4:3). O le faamamafa tatou te tuuina i le tulafono o le ola mama o loo faamatalaina e ala i lo tatou malamalama i le faamoemoega o o tatou mana e foafoa ai fanau i le faataunuuina o le fuafuaga a le Atua. O le faaaogaina o o tatou mana foafoa i fafo atu o noataga o le faaipoipoga i le va o se alii ma se tamaitai, o se agasala ma o le tetee lea i le fuafuaga a le Atua mo le faaeaga o Ana fanau.”
Leai Ni Atua Ese, konafesi aoao Oketopa 2013
Elder David A. Bednar
“Ou te folafola atu o le usiusitai i le tulafono o le ola mama o le a faateleina ai lo tatou fiafia i le olaga nei, ma mafai ai ona tatou agai i luma i le faavavau. O le ola mama ma le amioatua i le taimi nei, ma sa i ai lava, ma o le a avea pea lava ma mea e ‘silisili ona pele ma taua i lo mea uma’ (Moronae 9:9).”
“Matou Te Talitonu i le Nofo Mama, konafesi aoao Aperila 2013
Elder Neil L. Andersen
“E toatele ia tagata matutua nofofua i le Ekalesia ua sili atu lo latou matutua ma o latou tausaga talavou matutua. E ui e ese mai lo latou olaga o loo i ai i le taimi nei ma se olaga sa faamoemoe i ai, ae o loo latou tausia le tulafono o le legavia. E mafai ona avea ma se tofotofoga o lo latou faatuatua. Ou te faailoa atu lo’u faaaloalo tele ma le faamemelo mo nei soo o Keriso.”
Tofotofoga o Lou Faatuatua, konafesi aoao Oketopa 2012
O Le Aiga: O Se Folafolaga i le Lalolagi
“O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te ta’utino atu o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina. Matou te toe ta’utino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai. Matou te ta’utino atu o le ala ua foafoaina ai le ola faitino, ua faatuina i le finagalo paia. Matou te faamaonia le paia o le ola ma lona taua i le fuafuaga e faavavau a le Atua.”
O Le Aiga: O Se Folafolaga i le Lalolagi
Mo Le Malosi o le Autalavou
“Pe a e mama atoatoa mai tulaga feusuai, ua e saunia oe lava e osia ma tausia feagaiga paia i le malumalu. Ua e saunia oe lava e fausia se faaipoipoga malosi ma ia aumaia fanau i le lalolagi o se vaega o se aiga faavavau ma le agaalofa. Ua e puipuia oe lava mai le faaleagaina faaleagaga ma faalelagona lea e oo mai le faia o sootaga vavalalata faalefeusuai i fafo atu o le faaipoipoga. Ua e puipuia foi oe lava mai faamai matautia. O le tumau o le mama mai feusuaiga e fesoasoani ia te oe ia e talitonu ia te oe lava ma fiafia moni ma faaleleia ai ou gafatia i le faia o faaiuga lelei i le taimi nei ma i le lumanai. O le tulaga faatonuina a le Alii e uiga i le mama atoatoa i tulaga feusuai e manino ma e le masuia. Aua lava nei e faia ni sootaga feusuai a o lei faaipoipo, ma ia e faamaoni atoatoa i lou toalua pe a uma le faaipoipoga. … Aua nei auai i ni talanoaga po o soo se ala o faasalalauga e faaosofia ai lagona feusuai. Aua nei auai pe matamata i soo se ituaiga o ponokalafi.”
O Le Tulafono o le Faapaiaga
Peresitene Ezra Taft Benson
“Tatou te osifeagaiga e ola i le tulafono o le faapaiaga. O lenei tulafono tatou te tuuto atu ai o tatou taimi, taleni, malosi, meatotino ma tupe mo le fausiaina o le malo o le Atua i le lalolagi ma le faatuina o Siona. Seiioga ua ola se tagata i tulafono o le usiusitai, taulaga, le talalelei, ma le ola mama, e le mafai e ia ona ola i le tulafono o le faapaiaga, o le tulafono lea e faatatau i le malo selesitila. “Aua afai tou te mananao Ou te tuu atu ia te outou se nofoaga i le lalolagi selesitila, e ao ina outou saunia outou lava i le faia o mea ua Ou poloaiina ai outou ma manaomia mai ia te outou. (MF&F 78:7).”
Teachings of Ezra Taft Benson, 121
Peresitene Spencer W. Kimball
“[T]atou te faapaiaina o tatou taimi, taleni, ma mea ua tatou maua pe a valaauina ai e o tatou taitai ma uunaia ai e ala i musumusuga a le Agaga. I totonu o le Ekalesia, e faapei foi o le polokalama o le Uelefea, e mafai ona tatou atina’e tomai uma, manaoga amiotonu uma, uunaiga ‘anoa uma. Pe o se volenitia, tamā, faiaoga o aiga, epikopo, po o se tuaoi, pe o se faiaoga asiasi, tina, tausiaiga, po o se uo—e lava avanoa tatou te avatu ai mea uma tatou te maua. Ma a o tatou foai atu, tatou te iloa ai o ‘taulaga e aumaia ai faamanuiaga a le lagi!’ (Viiga, nu. [15]) Ma o le taunuuga, tatou te iloa ai e le o se osigataulaga lava.”
Becoming the Pure in Heart, konafei aoao Aperila 1978
Elder D. Todd Christofferson
“O lo tatou olaga i le lalolagi o se tausimea o le taimi ma filifiliga ua tuuina mai e lo tatou Foafoa. O le upu tausimea e faamanatu mai ai le tulafono o le faapaiaga a le Alii (tagai, mo se faataitaiga, Mataupu Faavae ma Feagaiga 42:32, 53) lea e i ai sana matafaioi faale-tamaoaiga, ae e sili atu nai lo lena, o se faaaogaaga o le tulafono faaselesitila i le olaga iinei ma le taimi nei (tagai Mataupu Faavae ma Feagaiga 105:5). Ina ia faapaiaina o lona uiga o le vaetofia lea po o le tuuina atu o se mea e paia, ma tuuto atu i faamoemoega paia. O le manuia moni i lenei olaga, e maua mai i le faapaiaina o o tatou olaga—o lona uiga, o o tatou taimi ma filifiliga—i faamoemoega o le Atua (tagai Ioane 17:1, 4; Mataupu Faavae ma Feagaiga 19:19). I le faia o lena mea, tatou te faatagaina ai o Ia e siitia i tatou i lo tatou taunuuga e aupito sili ona maualuga.”
Toe Manatunatuga i se Olaga Faapaiaina, konafesi aoao Oketopa 2010
Elder Neal A. Maxwell
“E matele lava ina tatou mafaufau o le faapaiaina lava ia, o le faamatuu atu lea o a tatou meatotino, pe a faatonuina ai mai le lagi. Ae o le faapaiaina moni lava ia, o le faamatuuina atu lea o oe lava i le Atua. O le loto, agaga, ma le mafaufau o upu autu ia a Keriso i le faamalamalamaina o le uluai poloaiga, lea tatou te taumafai e usitaia i taimi uma, ae le na o le aso ma i ē luā (tagai Mata. 22:37). Afai tatou te tausia, ona faapaiaina ai lea atoatoa o a tatou galuega e faamanuiaina ai o tatou agaga (tagai 2 Ni. 32:9).”
Faapaia au Faatinoga, konafesi aoao Aperila 2002
Peresitene Henry B. Eyring
“E faafofoga ma tali mai le Tama Faalelagi i tatalo a Lana fanau i le salafa o le lalolagi… Ua oo atu na augani ia te Ia talu lava ona Ia tuuina o alii ma tamaitai i le fogaeleele.
Talu ai e faafofogaina e le Alii a latou tagi ma lagonaina lou lotoalofa mo i latou, o lea na Ia saunia ai lava mai le amataga o taimi ni auala mo Ona so’o e fesoasoani ai. Na Ia valaaulia Ana fanau ina ia faapaiaina o latou taimi, o a latou mea e maua, ma i latou lava e auai atu faatasi ma Ia e auauna atu ai i isi. O Lana auala e fesoasoani ai sa faaigoaina i nisi taimi o le ola i le tulafono o le faapaiaga.”
“O Avanoa e Fai Ai Mea Lelei, konafesi aoao Aperila 2011
Elder David A. Bednar
“O le faapaiaga e fesootai i le, ma fausia i luga o le taulaga. O le upu faapaiaina o lona uiga ia atia’e ma ‘tuuto i se faamoemoega paia.’ O taulaga o mea o le a tatou ofoina atu, tuuina atu, faamatuu atu, pe lafoa’ia. O le faapaiaga, i se isi itu, o le atiina a’e atoatoa ma tuuto atu i se faamoemoega paia. … A o tatou ola ai i le tulafono o le faapaiaga, ua tatou naunau e le gata ina ofo atu o soo se mea ma mea uma tatou te maua mo le manuia o le talalelei—ae ua tatou folafola atu foi e atia’e ma tuuto atu o tatou tagata aupito sili—o tatou taimi, o a tatou taleni, ma o tatou gafatia ua matua faateleina—i le fausiaina o le malo o le Atua i le fogaeleele. O la tatou tautoga o le: O le a ou ofoina atu a’u ma mea uma e mafai ona avea ai au, ma o le a ou ola mo le talalelei a Iesu Keriso. O le mataupu faavae o le taulaga o se tapenaga o le tulafono e maualalo ifo mo le mataupu faavae o le faapaiaga. O le faapaiaga e aofia ai ma ufitia ai taulaga ma isi mau mea. … O le faapaiaga moni e faaosofia e le alofa mama ma e fua mai ai se manao faateleina e auauna atu. I nei aso e gata ai, e tele atu ua manaomia mai ia i tatou o ni fanau o le feagaiga nai lo a tatou tupe, oloa, ma taimi. E manaomia ona tatou faapaia atu i le Alii o tatou agaga atoa.”
Na ‘oto mai se saunoaga i se faigalotu na tuuina atu i le BYU-Idaho, “Your Whole Souls as an Offering Unto Him,” David A. Bednar, January 5, 1999
Faamauga
Peresitene Russell M. Nelson
“Uso e ma tuafafine, e le tumau ‘oa faaletino ma mamalu o le lalolagi. Ae o la oulua mafutaga o se ava, tane, ma le aiga e mafai. Na pau le umi o le olaga faaleaiga e faamalieina ai moomooga aupito maualuluga o le tagata soifua, o le faavavau. E leai se ositaulaga faapea ua telē naua mo le mauaina o faamanuiaga o se faaipoipoga faavavau. Ina ia agavaa, e manaomia e le tagata le na ona faafitia o ia lava mai mea e le paia, ma faamamaluina sauniga o le malumalu. O le osia ma le tausia o feagaiga paia o le malumalu, tatou te faamautu ai lo tatou alolofa i le Atua, o a tatou ava/tane, ma lo tatou lolofa moni i a tatou fanau—e oo lava ia i latou e le’i fananau mai. O o tatou aiga o le taula’iga o a tatou galuega aupito sili ma le olioli i lenei olaga; e faapena foi i le faavavau atoa, i le taimi e mafai ai ona tatou ‘mautofi i nofoalii, malo, itumalo,… mana, ma pulega, … faaeaga ma le mamalu.’ E mafai ona avea nei faamanuiaga e le mafaatauina o ni ō tatou pe afai tatou te faatulagaina lelei o tatou fale i le taimi nei ma pipiimau ai ma le faamaoni i le talalelei.”
Ia Faatulaga Lelei Lou Aiga, konafesi aoao Oketopa 2001
Peresitene Dallin H. Oaks
“O le faamoemoega o Le Ekalesia a Iesu Keriso o le Au Paia o Aso e Gata Ai, o le fesoasoani i fanau uma a le Atua ia malamalama i lo latou gafatia ma ausia lo latou taunuuga silisili ona maualuga. Ua i ai lenei Ekalesia e tuuina atu i atalii ma afafine o le Atua mea e manaomia e ulufale atu ai ma le faaeaga i le malo selesitila. O se ekalesia e faatotonugalemu i le aiga lenei i aoaoga ma faiga faavae. O lo tatou malamalama i le natura ma le faamoemoega o le Atua le Tama e Faavavau, ua faamatalaina ai lo tatou taunuuga ma lo tatou sootaga i lona aiga e faavavau. O la tatou aoaoga i talitonuga faalelotu e amata mai i matua faalelagi. O lo tatou faamoemoega sili ia avea faapei o i laua. I lalo o le fuafuaga alofa a le Tama, ua faataunuu ai nei mea uma e ala i le Togiola a le Toatasi na fanaua e le Tama, o lo tatou Alii ma le Faaola, o Iesu Keriso. I le avea ai ma matua faalelalolagi, ua tatou auai i le fuafuaga o le talalelei e ala i le saunia o tino faitino mo fanau agaga a le Atua. O le atoaga o le faaolataga e faavavau o se mataupu faaleaiga.
Liliuese ma le Toefuataiga, konafesi aoao Aperila 1995
Peresitene Henry B. Eyring
“O mea uma tatou te faia e tatau ona i ai le faaipoipoga faaselesitila e fai ma ona taulaiga ma faamoemoega. O lona uiga e tatau ona tatou tauivi ina ia faamauina i se soa e faavavau i totonu o le malumalu a le Atua. E tatau foi ona tatou uunaia isi ia osia ma tausia ia feagaiga e fusia faatasi ai se tane ma se ava, faatasi ma o latou aiga, i lenei olaga ma le olaga a sau.
O Aiga e Faavavau, konafesi aoao Aperila 2016
Peresitene Boyd K. Packer
“O le taunuuga silisili o gaoioiga uma i le Ekalesia o le vaaia lea o se tane ma lana ava ma le la fanau o fiafia i le aiga, ua puipuia e mataupu faavae ma tulafono o le talalelei, faamau ma le saogalemu i feagaiga o le perisitua e faavavau.”
E Taitaiina Foi i Latou e le Tama Itiiti,, konafesi aoao Aperila 2012
Peresitene Dieter F. Uchtdorf
“Ou te faafetai ua ou auai i se ekalesia e faatauaina le faaipoipoga ma le aiga. Ua lauiloa tagata o Le Ekalesia a Iesu Keriso o le Au Paia o Aso e Gata Ai i le lalolagi atoa mo le i ai o nisi o ulugalii ma aiga sili ona lelei e mafai ona e mauaina. I se vaega, ou te talitonu ai ua mafua lenei mea ona o upumoni taua na toefuatai mai e Iosefa Samita e faapea o faaipoipoga ma aiga e tatau ona faavavau. E le o faamoemoeina aiga ina ia faia na o ni mea ia sologa lelei atili iinei i le lalolagi ona lafoai ese lea pe a tatou oo atu i le lagi. Ae, o na mea o le faatulagaga a le lagi. O le faatusa lena o se mamanu faaselesitila ma se faataitaiga o le aiga e faavavau o le Atua.
E Viia i Latou O E Laveai, konafesi aoao Aperila 2016
“O Le Aiga: O Se Folafolaga i le Lalolagi”
“O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”
Faamanuiaga o le Tapuai i le Malumalu
Peresitene Russell M. Nelson
O tagata taitoatasi e soifua mai i lenei lalolagi o se suli o tupulaga o mātua. O loo ia i tatou se faanaunauga faalenatura e fesootai atu i o tatou tuaa. O lenei manao e mau i o tatou loto, e tusa lava po o le a le matua. Manatunatu i le sootaga faaleagaga lena e fausia pe a fesoasoani se tamaitai talavou i lona tinamatua e tuu i totonu faamatalaga i le komepiuta, po o le vaai o se alii talavou i le igoa o le tamā o lona tamamatua i faamaumauga o se tusiga igoa. Pe a liliu atu o tatou loto i o tatou tuaa, e i ai se mea i totonu o i tatou e suia. Tatou te lagonaina o i tatou o se vaega o se mea e sili atu nai lo o i tatou lava. O o tatou faananauga masani mo sootaga faaleaiga, e faataunuuina pe a sosoo faatasi i tatou ma o tatou augatama e ala i sauniga paia o le malumalu.”
E Sosoo Tupulaga i le Alofa, konafesi aoao Aperila 2010
Peresitene Thomas S. Monson
“Aisea ua toatele naua ai ua naunau e tuuina atu le anoanoai o mea ina ia maua ai faamanuiaga o le malumalu? O i latou o ē malamalama i faamanuiaga e faavavau e maua mai i le malumalu, ua latou iloa e leai se taulaga e telē naua, leai se tau ua mamafa tele, leai se tauiviga ua faigata naua ia maua ai na faamanuiaga. E leai se mamao e le mafai ona laasia, leai ni mea faalavefau e le mafai ona foia, e leai foi ni faigata e le mafai ona onosaia. Ua latou iloa o sauniga faaola e maua i le malumalu e mafai ai i se aso ona tatou foi i lo tatou Tama Faalelagi i se mafutaga faaleaiga e faavavau, ma faae’eina ai i faamanuiaga ma le mana mai luga, e taua ai a tatou taulaga ma taumafaiga uma.”
“O Le Malumalu Paia—O Se Sulu i le Lalolagi, konafesi aoao Aperila 2011
Peresitene Gordon B. Hinckley
“Ou te talitonu e leai se tagata o le Ekalesia ua mauaina le mea aupito maualuga ua ofoina atu e lenei Ekalesia seia ona ia mauaina faamanuiaga o le malumalu i totonu o le maota o le Alii.”
O Ni Nai Mafaufauga e Uiga i Malumalu, Faatumauina o Tagata Liliu Mai, ma le Galuega Faafaifeautalai, konafesi aoao Oketopa 1997
Peresitene Howard W. Hunter
“I lena agaga, ou te valaau atu i le Au Paia o Aso e Gata Ai ia tepa taulai i le malumalu o le Alii o se faatusa sili o lo outou auai i lana ekalesia. O le moomooga sili lava o lo’u loto ia agavaa tagata uma o le Ekalesia e ulu atu i le malumalu. O le a fiafia le Alii pe a agavaa tagata matutua uma o le ekalesia—ma tauaveina—se pepa faataga aoga o le malumalu. O mea e ao ina tatou faia tatou te agavaa ai mo se pepa faataga o le malumalu, o mea moni lava ia e mautinoa ai le fiafia o le tagata lava ia ma aiga. Ia avea i tatou ma tagata-auai i le malumalu. Ulu soo atu i le malumalu e tusa ma avanoa e te maua. I tautau se ata o le malumalu i lo outou fale ina ia mafai ona vaai i ai a outou fanau. A’oa’o atu i latou i faamoemoega o le maota o le Alii. Ia latou vave fuafua mai i lo latou laiti e ulu atu i ai ma ia tumau le agavaa mo lena faamanuiaga.”
Talaatu o Folafolaga Silisili Ese ma le Taua, konafesi aoao Oketopa 1994
Elder David A. Bednar
“O le Agaga o Elia e aafia ai tagata i totonu ma fafo o le Ekalesia. Ae peitai, i le avea ai ma tagata o le Ekalesia toefuataiina a Keriso, ua ia te i tatou le tiutetauave o le feagaiga e sailia o tatou augatama ma tuuina atu mo i latou ia sauniga faaola o le talalelei. ‘E le mafai ona atoatoa i latou e aunoa ma i tatou’ (Eperu 11:40; tagai foi Teachings: Joseph Smith, 475). Ma ‘e le mafai foi ona tatou atoatoa e aunoa ma o tatou aiga ua maliliu’ (Mataupu Faavae ma Feagaiga 128:15). O mafuaaga na tatou te faia ai sailiga o talafaasolopito o aiga, fausia malumalu, ma faia sauniga sui mo e ua maliliu. O mafuaaga na na auina mai ai Elia e toefuatai mai le mana o faamauga e fusifusia ai i le lalolagi faapea foi ma le lagi. O i tatou o sui o le Alii i le galuega o le faaolataga ma le faaeaga lea o le a puipuia ai ‘le lalolagi atoa mai le taia ai i se fetuu’ (Mataupu Faavae ma Feagaiga 110:15) pe a toe afio mai o Ia. O lo tatou tiute lea ma se faamanuiaga silisili.”
O Le a Liliu atu Loto o Fanau i o Latou Tamā, konafesi aoao Oketopa 2011
Elder Quentin L. Cook
“Ua manino le aoaoga faavae o le aiga e faatatau i talafaasolopito o aiga ma galuega o le malumalu. Sa faatatau le faatonuga a le Alii i le uluai faaaliga lea i le ‘papatisoga mo o outou [aiga ua] maliliu.’ O la tatou matafaioi faaleaoaoga faavae ua faatatau lea i o tatou lava tuaa. E mafua lenei mea ona o le faatulagaga faaselesitila o le lagi e faavae lea i aiga. Ua uunaia e le Au Peresitene Sili le au paia, aemaise lava le autalavou ma talavou nofofua matutua, ia faamamafa galuega o talafaasolopito o aiga ma sauniga mo igoa o o latou lava aiga po o igoa o tuaa o tagata o a latou uarota ma siteki. E manaomia ona tatou fesootai atu i o tatou aa ma lalā uma. O le manatu o le fesootai i malo e faavavau ua matua ofoofogia lava.”
O A’a ma Lalā, konafesi aoao Aperila 2014
Peresitene Boyd K. Packer
“E tusa lava po o le a le tagatanuu po o le atunuu, pe o se alii po o se tamaitai, e le afaina po o le a le galuega, e le afaina po o a aoaoga, e tusa lava foi po o le a le augatupulaga e ola ai se tagata, o le olaga o se malaga toe foi atu mo i tatou uma lava, o le toe foi atu i le afioaga o le Atua i Lona malo selesitila. O sauniga ma feagaiga e avea ma o tatou agavaa mo le taliaina i Lona afioaga. Ina ia maua ma le agavaa na mea o le tulimataiga i le olaga; ina ia tausia pe a maea o le lu’i lea o le olaga nei. O le taimi lava tatou te mauaina ai mo i tatou lava ma mo o tatou aiga, ua ia i tatou le matafaioi e tuu atu ai nei sauniga sui mo o tatou aiga ua maliliu, ioe mo le aiga uma o le tagata.”
O Feagaiga, Ensign, May 1987