Propetikanhong mga Pagtulun-an bahin sa mga Templo

Presidente Russell M. Nelson

“Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel. Ingon lang niana ka yano.”

Paglaom sa Israel, tibuok kalibotan nga debosyonal sa kabatan-onan, Hunyo 3, 2018

Presidente Thomas S. Monson

“Karon, akong batan-ong mga higala nga mga tin-edyer, itumong kanunay sa inyong panan-aw ang templo. Ayaw pagbuhat og bisan unsa nga makapugong ninyo sa pagsulod ug pag-ambit sa sagrado ug mahangtorong mga panalangin didto. Gidayeg nako kadtong miadto na sa templo aron sa pagpahigayon sa mga bunyag alang sa mga patay, momata og sayo sa buntag aron makaapil sa maong mga bunyag sa dili pa magsugod ang klase. Wala koy laing mahunahunaan nga mas maayo sa pagsugod sa adlaw.”

Ang Balaan nga Templo—Ang Suga sa Kalibotan, Abril 2011 nga kinatibuk-ang komperensiya

Elder David A. Bednar

“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na [tan-awa sa Doktrina ug mga Pakigsaad 124:28–36]. Ug awhagon ko kamo sa pagtabang sa ubang tawo sa pag-ila sa ilang mga family history. Kon motuman mo niini nga pagdapit uban sa hugot nga pagtuo, ang inyong kasingkasing mobati sa inyong mga amahan. ... Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensiya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi.”

Ang mga Kasingkasing sa mga Anak Mobati, Oktubre 2011 nga kinatibuk-ang komperensiya

Elder Quentin L. Cook

“Ang kombinasyon sa pagdaghan sa mga templo ug sa pag-uswag sa teknolohiya aron mabuhat nato ang atong sagrado nga responsibilidad sa family history alang sa atong mga katigulangan nakapahimo niini nga labing bulahan nga panahon sa tibuok kasaysayan. Malipayon ako sa talagsaong kamatinud-anon sa atong mga batan-on sa pag-indexing ug sa pagpangita sa ilang mga katigulangan ug dayon sa pagbuhat sa pagbunyag ug pagkompirma diha sa templo. Kamo tinuod nga apil sa gipanagna nga mga manluluwas sa Bukid sa Zion.”

Hunahunaa ang Inyong Kaugalingon nga anaa sa Templo, Abril 2016 nga kinatibuk-ang komperensiya

Elder Gary E. Stevenson

“Ang Unang Kapangulohan midapit sa ‘hamtong nga mga miyembro sa pagbaton og magamit karon nga rekomend sa templo ug mobisita kanunay sa templo’ diin ang panahon ug ang kahigayonan motugot ug miawhag sa mga miyembro ‘nga ang pipila ka mga kalihokan sa paglingaw-lingaw pulihan og pagserbisyo sa templo.’ Miawhag usab sila sa ‘mas bag-o nga mga miyembro ug sa mga kabatan-onan sa Simbahan kinsa mga 12 anyos ug pataas sa pagpuyo nga takos aron sa pagtabang niining mahinungdanon nga buhat pinaagi sa pagserbisyo isip mga proxy alang sa mga bunyag ug mga pagkompirma.’ [Sulat sa Unang Kapangulohan, Mar. 11, 2003.]”

Sagrado nga mga Panimalay, Sagrado nga mga Templo, Abril 2009 nga kinatibuk-ang komperensiya

Elder Richard G. Scott

“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi.”

Ang Hingpit nga Kalipay sa Pagtubos sa mga Patay, Oktubre 2012 nga kinatibuk-ang komperensiya

Presidente Russell M. Nelson

“Ang pagsul-ob sa garment alang sa templo adunay lawom nga simbolikanhong kahulogan. Kini nagrepresentar og nagpadayon nga pasalig. Ingon nga ang Manluluwas nagpakita og ehemplo sa panginahanglan sa paglahutay ngadto sa kataposan, kita nagsul-ob sa garment sa matinud-anong paagi isip kabahin sa makapalahutay nga hinagiban sa Dios. Sa ingon kita nagpakita sa atong hugot nga pagtuo diha Kaniya ug diha sa Iyang mahangtoron nga mga pakigsaad ngari kanato.”

Personal Preparation for Temple Blessings, April 2001 general conference

Presidente Russell M. Nelson

“Kon kamo gusto gayod nga mahibalo og dugang pa mahitungod sa kasaysayan sa sinina sa templo, kamo mismo ang mangita niini diha sa Daang Tugon. Ang Daang Tugon napuno sa mga pakisayran sa espesyal nga sinina sa templo.”

Teachings of Russell M. Nelson, 372

Presidente Boyd K. Packer

“Kalabot niini nga mga ordinansa, sa sulod sa templo opisyal ka nga sul-oban sa sapot [garment] ug saaran og katingalahan nga mga panalangin kalabot niini. Mahinungdanon nga ikaw maminaw pag-ayo samtang kini nga mga ordinansa gipahigayon ug nga imong hinumdoman ang mga panalangin nga gisaad ug ang mga kondisyon nga aron kini matinuod.”

Pangadto Kamo sa Templo

Sagradong Sinina sa Templo

“Ang mga kupo [robe] sa Ang Simbahan ni Jesukristo sa mga Santos sa Ulahing mga Adlaw, nailhan isip mga kupo sa balaang pagkapari, isul-ob sa sulod lamang sa mga templo sa mga Santos sa Ulahing mga Adlaw ug gireserba alang sa kinatas-an nga mga sakramento sa hugot nga pagtuo. Ang puti nagsimbolo sa kaputli. Walay posisyon o ranggo. Ang labing senior nga apostol ug ang labing bag-o nga miyembro dili mailhan kon magsul-ob sa samang paagi. Ang mga lalaki ug mga babaye managsama ra og isul-ob nga sinina. Ang yano nga mga sapot inubanan sa relihiyoso nga simbolismo nga may koneksiyon sa kinaraan nga mga tulumanon ug mga baroganan makita diha sa karaang mga kasulatan gikan sa basahon sa Exodo.”

Sagradong mga Panapot sa Templo

Sagradong Sinina sa Templo

“Daghang matinud-anon nga mga Santos sa Ulahing mga Adlaw nga nagsul-ob og garment ilawom sa ilang sinina nga adunay lawom nga relihiyoso nga kahulogan. Susama og desinyo sa ordinaryo nga ligdong nga pang-ilawon nga sinina, duha kini ka piraso ug kasagaran ginganlan kini og ‘garment sa templo.’ ... Ang mga garment sa templo sul-obon sa hamtong nga mga miyembro sa Simbahan kinsa nakahimo og sagrado nga mga pakigsaad sa pagkamaunongon ngadto sa mga sugo sa Dios ug sa ebanghelyo ni Jesukristo diha sa mga templo sa Ang Simbahan ni Jesukristo sa mga Santos sa Ulahing mga Adlaw. Sa mga miyembro sa Simbahan, ang ligdong nga garment sa templo, sul-obon ilawom sa normal nga sinina, uban sa simbolikanhong mga sapot nga isul-ob atol sa pagsimba diha sa templo, nagrepresentar sa sagrado ug personal nga aspeto sa ilang relasyon sa Dios ug sa ilang pasalig sa pagpuyo og maayo, talahuron nga mga kinabuhi.”

Sagradong mga Panapot sa Templo

Presidente Gordon B. Hinckley

“Adunay usa ka tumong lapas pa sa Pagkabanhaw. Kana mao ang kahimayaan didto sa gingharian sa atong Amahan. Kini maangkon pinaagi sa pagkamasulundon ngadto sa mga sugo sa Dios. Magsugod kini sa pagdawat kaniya isip atong Amahan sa Kahangtoran ug sa iyang anak isip atong buhi nga Manunubos. Maglakip kini sa pag-apil diha sa lainlaing mga ordinansa, matag usa importante ug kinahanglanon. Ang una niini mao ang bunyag pinaagi sa pagpaunlod sa tubig, kon wala kini, sumala sa Manluluwas, ang usa ka tawo dili makasulod sa gingharian sa Dios. Kinahanglang adunay mosunod nga pagkatawo sa Espiritu, ang gasa sa Espiritu Santo. Dayon ang sunod-sunod sa tibuok katuigan nga moabot, alang sa mga lalaki, iorden ngadto sa pagkapari, pagasundan sa mga panalangin sa templo alang sa mga lalaki ug mga babaye kinsa takos nga mosulod sa dinhi niini. Kini nga mga panalangin sa templo naglakip sa atong mga paghugas ug mga pagdihog nga kita mahimong malimpyo sa atubangan sa Ginoo. Naglakip kini sa tulumanon sa panudlo diin kita pagatugahan og mga obligasyon ug mga panalangin nga mag-awhag kanato og pamatasan nga nahisubay sa mga baroganan sa ebanghelyo. Naglakip kini sa mga ordinansa sa pagselyo diin kanang gibugkos dinhi sa yuta pagabugkoson didto sa langit, naghatag alang sa pagpadayon sa pamilya.”

Temples and Temple Work, Ensign, February 1982

Presidente Spencer W. Kimball

“Gitugyan ni Joseph Smith ngadto sa napulog duha ka apostoles ang tanang yawe ug awtoridad ug gahom nga siya mismo aduna ug nga iyang nadawat gikan sa Ginoo. Siya mihatag kanila sa matag pagtuga, matag paghugas ug pagdihog, ug nangalagad ngadto kanila sa mga ordinansa sa pagselyo.”

We Thank Thee, O God, for a Prophet, October 1972 general conference

Presidente Boyd K. Packer

“Ang mga ordinansa sa paghugas ug pagdihog sagad gitawag didto sa templo nga pasiuna [initiatory] nga mga ordinansa. Igo na alang sa atong mga katuyoan nga mohisgot lamang sa mosunod: Kauban sa endowment mao ang mga paghugas ug mga pagdihog—sagad simbolohanon, apan nagsaad og tino, dihadiha nga mga panalangin ingon man sa umaabot nga mga panalangin.”

Pagpangandam sa Pagsulod sa Balaan nga Templo

Elder James E. Talmage

“Sa amihanang bahin sa bunyaganan mao ang halapad ug komportable nga mga lawak ilisanan nga gamiton sa kaigsoonan nga mga lalaki, ug sa habagatang bahin ang susama nga nindot nga mga lawak ilisanan alang sa kaigsoonan nga mga babaye. Adunay gigahin usab nga mga lawak diin ang piho nga mga ordinansa sa pagdihog ipahigayon. Dinhi niini nga mga seremonya mga babaye lamang ang mangalagad ngadto sa mga babaye, ug ang mga lalaki ngadto sa mga lalaki.”

The House of the Lord [1976], 83

Elder Robert D. Hales

“Sa templo, ang plano sa kaluwasan gipasabot ug ang sagrado nga mga pakigsaad gihimo. Kini nga mga pakigsaad, uban sa pagsul-ob sa sagrado nga mga garment sa templo, makapalig-on ug makapanalipod sa natugahan nga tawo batok sa mga gahom sa kaaway. Human makadawat sa ilang kaugalingong mga pagtuga, ang batan-ong lalaki o batan-ong babaye mahimong motambong sa templo ug mopahigayon sa puli nga mga ordinansa aron ang mga panalangin sa pagkapari maanaa niadtong mga namatay na nga walay oportunidad nga makadawat niini nga mga panalangin atol sa pagka-mortal.”

Blessings of the Priesthood, October 1995 general conference

Presidente Russell M. Nelson

“Ang templo sa pagkatinuod puno sa kamatuoran. Ang mga kamatuoran bahin sa plano sa Amahan giablihan ngari kanato uban sa kaklaro ug gahom. Ang mga pulong sa kamatuoran mahitungod sa atong Amahan, Iyang Anak, ug sa Ilang relasyon ngari nato gipamulong diha sa mga pakigsaad ug sa mga ordinansa sa templo. Ang templo usa ka balay sa pagpadayag diin ang kamatuoran nagdagayday sa atong mga kalag ug naglamdag sa atong mga panabot [tan-awa sa Doktrina ug mga Pakigsad 109:15]. Atong mahibaloan ang atong mahangtorong kailhanan ug katuyoan ug ang katingalahan nga mga saad sa Ginoo. Kadto nga mga saad tinuod, kay ang atong Dios usa ka Dios sa kamatuoran ug dili mamakak [tan-awa sa Ether 3:2]. ... Kon ang atong mga kaigsoonan moadto sa templo nga nagtinguha og kalig-on ug panabot, sila pagatudloan sa Ginoo Mismo mahitungod sa mga kamatuoran nga labing mahinungdanon ngadto nila sa panahon sa ilang panginahanglan.”

Teachings of Russell M. Nelson, 373

Presidente Ezra Taft Benson

“Ang celestial nga mga balaod, nag-uban sa piho nga mga ordinansa nga iyaha sa Simbahan ni Jesukristo, pagatumanon pinaagi sa boluntaryo nga mga pakigsaad. Ang mga balaod espirituhanon. Busa, ang atong Amahan sa Langit nag-orden og piho nga balaang mga kadangpan, gitawag og mga templo, diin kini nga mga balaod hingpit nga mapasabot. Ang mga balaod naglakip sa balaod sa pagkamasulundon ug sakripisyo, ang balaod sa ebanghelyo, ang balaod sa kaputli, ug ang balaod sa pagpahinungod.”

A Vision and a Hope for the Youth of Zion, Brigham Young University devotional, April 12, 1977

Presidente Boyd K. Packer

“Didto ang mga miyembro sa Simbahan nga mohimo sa ilang kaugalingon nga sarang makaapil sa [labing mahimayaon] ug sagrado nga matubsanon nga mga ordinansa nga gipadayag ngadto sa mga tawo. Didto kita mahimong mahugasan ug madihogan ug matudloan ug ma-endowed ug ma-sealed. Ug kon madawat nato kining mga panalangin alang sa atong kaugalingon, kita mahimong mopahigayon sa mga ordinansa alang niadtong nangamatay na nga wala makaangkon sa samang kahigayonan.”

Pangadto Kamo sa Templo, Liahona, Oktubre 2007

Elder Robert D. Hales

“Ang atong mga tinguha nga makabalik sa Langitnong Amahan motubo kon kita, agi og dugang sa pag-ambit sa sakramento, mahimong takos nga makaangkon og rekomend sa templo. ... Unya, isip na-endowed na nga may rekomend sa templo, magpakabuhi kita sama ni Kristo. Naglakip kini sa kamasulundon, pagsakripisyo sa pagtuman sa mga sugo, paghigugmaay, pagkalimpyo sa hunahuna ug buhat, ug pagtabang nga matukod ang gingharian sa Dios. Pinaagi sa Pag-ula sa Manluluwas ug sa pagsunod sa mga sumbanan sa kamatinud-anon, madawat nato ang ‘gahom gikan sa kahitas-an’ sa pagsagubang sa mga hagit sa kinabuhi. Mas gikinahanglan nato karon kining balaanong gahom. Kini gahom nga madawat lamang nato pinaagi sa mga ordinansa sa templo.”

Pag-ila sa Kaugalingon: Ang Sakramento, ang Templo, ug Sakripisyo sa Pagserbisyo, Abril 2012 nga kinatibuk-ang komperensiya

Elder James E. Talmage

“Ang pagtuga diha sa templo, ingon nga gipangalagad diha sa moderno nga mga templo, naglangkob og instruksiyon kalabot sa kahulogan ug pagkasunod-sunod sa miaging mga dispensasyon. ... Kini nga pamaagi sa instruksiyon naglakip sa labing nailhan nga mga panghitabo sa panahon sa paglalang, sa kahimtang sa atong unang mga ginikanan didto sa Tanaman sa Eden, sa ilang pagsupak ug ang gisangpotan nga pagpapahawa gikan nianang malipayon nga puy-anan, sa ilang kahimtang didto sa mingaw ug awaaw nga kalibotan sa dihang gisilotan nga magpakabuhi pinaagi sa paghago ug sa singot, sa plano sa katubsanan diin ang dakong kalapasan mabayran.”

The House of the Lord [1976], 84

Elder James E. Talmage

“Ang mga ordinansa sa pagtuga adunay nag-uban nga piho nga mga obligasyon sa habig sa indibidwal, sama sa pakigsaad ug saad sa pagsunod sa balaod sa higpit nga mga hiyas ug kaputli, nga mahimong mahigugmaon, manggiloy-on, masinabtanon ug putli; sa pagpahinungod sa talento ug mga materyal nga mga pamaagi aron sa pagpakatap sa kamatuoran ug sa pagbayaw sa [tawhanong] kaliwatan; sa pagpadayon sa debosyon ngadto sa kawsa sa kamatuoran; ug sa pagpangita sa tanang paagi aron makatampo ngadto sa dakong pagpangandam nga ang yuta mahimong andam sa pagdawat sa iyang Hari—si Ginoong Jesukristo. Sa pagbaton sa matag pakigsaad ug sa pagdawat sa matag obligasyon usa ka gisaad nga panalangin ihatag, nagdepende sa matinud-anong pagsunod sa mga kondisyon.”

The House of the Lord, 100

Presidente Thomas S. Monson

“Akong mga kaigsoonan, ang labing dako nga pagsulay niini nga kinabuhi mao ang pagkamasulundon. ‘Kita mosulay kanila dinhi, aron pagsuta kon sila mobuhat ba sa tanang butang bisan unsa ang isugo sa Ginoo nga ilang Dios ngadto kanila.’ Mipahayag ang Manluluwas, ‘Alang sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin, ug sa mga kinahanglanon niini, ingon nga gitukod sa wala pa ang katukuran sa kalibotan.’ Walay laing labaw nga ehemplo sa pagkamasulundon ang anaa kay sa atong Manluluwas. Bahin Kaniya, si Pablo nakaobserbar: ‘Bisan og siya mao ang Anak sa Dios, nakat-on siya sa pagkamasinugtanon pinaagi sa iyang mga pag-antos; kay nahingpit man siya, nahimo siyang tinubdan sa dayon nga kaluwasan alang sa tanan nga masinugtanon kaniya.’”

Ang Pagkamasulundon Makahatag og Panalangin, Abril 2013 nga kinatibuk-ang komperensiya

Presidente Gordon B. Hinckley

“Magpamatuod ako kaninyo nga ang kalipay sa mga Santos sa Ulahing mga Adlaw, ang kalinaw sa mga Santos sa Ulahing mga Adlaw, ang kauswagan sa mga Santos sa Ulahing mga Adlaw, ang kausbawan sa mga Santos sa Ulahing mga Adlaw, ug ang mahangturon nga kaluwasan ug kahimayaan niini nga katawhan naggikan sa paglakaw diha sa pagkamasulundon sa mga tambag sa pagkapari sa Dios.”

If Ye Be Willing and Obedient, October 1971 general conference

Presidente James E. Faust

“Ang pagkamasulundon mosangpot sa tinuod nga kagawasan. Kon mas mosunod kita sa gipadayag nga kamatuoran, mas mahimo kitang gawasnon. ... Ingon nga ang mando nakahatag og kinabuhi ug katahom sa yuta sa dihang kini ngitngit pa ug walay porma, maingon usab kini ngari kanato. Ang pagkamasulundon makatabang kanato nga mapalambo ang hingpit nga potensiyal sa mga gitinguha sa atong Langitnong Amahan alang kanato nga mahimong celestial nga mga binuhat takos nga mopuyo sa Iyang presensya sa umaabot.”

Obedience: The Path to Freedom, April 1999 general conference

Elder Jeffrey R. Holland

“Ang pagkamasulundon dili lamang ang unang balaod sa langit. Ang pagkamasulundon mao ang unang balaod sa tanang butang. Ang tanang butang nga akong nahibaloan nga mahinungdanon nagkinahanglan nianang pasiuna nga pasalig sa pagsunod sa pulong ug kabubut-on sa Ginoo. Mao kini ang unang pakigsaad nga atong himoon diha sa templo.”

Elder Jeffrey R. Holland Visits Philippines, Shares Message on Love, Newsroom.ChurchofJesusChrist.org

Elder L. Tom Perry

“Una, kinahanglan nga magmasulundon kita ngadto sa mga balaod sa Ginoo. Mao kini ang usa sa unang mga leksiyon nga gitudlo ngadto ni Adan ug ni Eva: ang pagkamasulundon magdala og hugot nga pagtuo. Magdala kini sa mga panalangin sa langit. Ang pagkamasinupakon magdala og kasakit ug kawalay paglaom. Human sa balaod sa pagkamasulundon moabot ang panginahanglan sa paghatag sa atong kaugalingon diha sa pagserbisyo sa mga anak sa atong Amahan sa Langit. Ang pagsakripisyo sa unsay anaa nato aron makabenepisyo ang atong mga kaigsoonan mao ang kinadak-ang pagsulay sa ebanghelyo. Usa sa mga katuyoan sa mortal nga kasinatian mao ang pagmatuod kon kita mosunod ba sa tambag sa Manluluwas nga ‘unaha ninyo pagpangita ang gingharian ug ang pagkamatarong gikan sa Dios; ug unya kining tanang mga butanga igadugang ra kaninyo’ [tan-awa sa Mateo 6:33].”

Behold, the Lord Hath Shown unto Me Great and Marvelous Things, October 1992 general conference

Elder Joseph B. Wirthlin

“Kaming tanan gusto nga kamo magmalamposon niini nga kinabuhi ug mahimong sarang alang sa labing mahinungdanong mga gasa sa Dios—kinabuhing dayon didto sa celestial nga gingharian. Aron makab-ot ang inyong tumong niining mortal nga kinabuhi ug mapamatud-an ang inyong kaugalingon nga takos sa mahangtorong mga panalangin, pagkat-on sa pagsunod. Walay laing paagi. Ang pagkamasulundon magdala og dakong kalig-on ug gahom nganha sa inyong mga kinabuhi.”

Live in Obedience, April 1994 general conference

Presidente Russell M. Nelson

“Gisugo gihapon kita sa pagsakripisyo, apan dili sa pagpaagas og dugo sa mga hayop. Ang atong labing taas nga panabot sa pagsakripisyo makab-ot samtang atong gihimo ang atong kaugalingon nga mas sagrado o balaan. Kini atong gihimo pinaagi sa pagkamasulundon sa mga sugo sa Dios. Sa ingon, ang mga balaod sa kamasulundon ug sakripisyo maayo kaayo nga pagkalambigit. Ikonsiderar ang mga sugo sa pagsunod sa Pulong sa Kaalam, sa pagbalaan sa adlaw nga Igpapahulay, sa pagbayad og matinuoron nga ikapulo. Samtang magtuman kita niini ug sa ubang mga sugo, usa ka talagsaong butang ang mahitabo kanato. Mahimo kitang disiplinado! Mahimo kitang mga disipulo! Mahimo kitang mas sagrado ug balaan—sama sa atong Ginoo!”

Lessons from Eve, October 1987 general conference

Presidente Harold B. Lee

“Ang atong kasamtangan nga plano alang sa kaayohan mahimong maayo nga ‘pasiuna’ nga mga kalihokan aron makita kon unsa kaandam kini nga simbahan sa pagsunod niini nga plano, aron, sama sa malipayong naamgohan sa katawhan niini nga kontinente, sumala sa narekord diha sa karaang kasulatan nga atong gitawag og Basahon ni Mormon, human nga silang tanan nakabig ngadto sa Ginoo, ‘walay adunahan ug kabos, ulipon ug gawasnon, apan silang tanan … nag-ambit sa langitnon nga gasa’ ug ‘sa pagkamatuod wala nay mga katawhan nga labaw pa ka malipayon sa tanan nga mga katawhan’ sa ibabaw sa yuta (4 Ne. 1:3, 16) pinaagi sa hingpit nga pagsunod sa balaod sa sakripisyo ug pagpahinungod.”

Teach the Gospel of Salvation, October 1972 general conference

Presidente M. Russell Ballard

“Kasagaran, ang unang butang nga mahunahunaan sa mga tawo kon makadungog sila og ‘balaod ni Moises’ mao ang pagsakripisyo og hayop. Ang ingon og ngilngig nga matang sa sakripsiyo sa pagpaagas og dugo ang hinungdan nga makapangutana ang uban, ‘Sa unsang paagi nga ang ingon niana nga matang sa kalihokan adunay kalambigitan sa ebanghelyo sa paghigugma?’ Mas masabtan nato ang tubag niana nga pangutana kon atong masabtan ang duha ka dagkong katuyoan sa balaod sa sakripisyo. Kini nga mga katuyoan nagamit kang Adan, Abraham, Moises, ug sa mga Apostoles sa Bag-ong Tugon, ug kini magamit ngari kanato karon kon kita modawat ug mosunod sa balaod sa sakripisyo. Ang duha ka dagkong katuyoan niini mao nga kita masulayan ug mapamatud-an ug aron matabangan kita sa pagduol ngadto kang Kristo.”

The Law of Sacrifice, Liahona, March 2002

Elder L. Tom Perry

“Ikatingala ba nga ang Ginoo, gikan sa sinugdanan gayod, gusto nga ang iyang plano lig-ong matisok diha sa mga hunahuna sa iyang mga anak dinhi sa yuta? Uban sa mga balaod nga gihatag ngadto ni Adan ug ni Eva, ang balaod sa sakripisyo gimugna aron mapahinumdoman sila bahin sa mahinungdanong panghitabo nga mahitabo sa tunga-tunga sa panahon. ... Gikan niana nga panahon hangtod nga ang Manluluwas mianhi sa yuta, bisan unsang higayona nga adunay pagkapari, ang tawo mohalad og mga sakripisyo aron mapahinumdoman sila sa panahon nga ang Anak sa Tawo moanhi sa yuta aron maghimo sa labing dako nga sakripisyo alang natong tanan.”

Sacrament of the Lord’s Supper, April 1996 general conference

Elder Neal A. Maxwell

“Ang tinuod, personal nga sakripisyo dili gayod ang pagbutang og hayop sa altar. Hinuon, mao kini ang kaandam sa pagbutang sa hayop nga ania kanato diha sa ibabaw sa altar ug pasagdan kini nga maugdaw! Kana mao ang ‘sakripisyo ngadto sa Ginoo … nga usa ka masulub-on nga kasingkasing ug usa ka mahinulsulon nga espiritu,’ (Doktrina ug mga Pakigsaad 59:8), ang gikinahanglan sa dili pa mopas-an sa krus, samtang ‘mobiya sa tanan [natong] mga sala’ aron ‘makaila sa Dios’ (Alma 22:18) kay ang paglimod sa kaugalingon ang mag-una sa dili pa ang hingpit nga pagdawat Kaniya.”

Deny Yourselves of All Ungodliness, April 1995 general conference

Presidente Russell M. Nelson

“Isip indibidwal nga mga miyembro sa Simbahan, kamo ug ako moapil diha sa ‘kaugalingong paagi’ sa Ginoo. Labing menos kausa sa usa ka bulan, kita magpuasa ug mag-ampo ug mohatag og ubay-ubay nga mga halad ngadto sa mga pundo aron ang mga bishop makahatag og tabang. Kabahin kini sa balaod sa ebanghelyo. Matag usa nato makatabang gayod sa kabos ug timawa, karon, ug bisan asa man sila. Ug kita, usab, mapanalanginan ug mapanalipdan gikan sa pagbiya sa kamatuoran pinaagi sa pagbuhat sa ingon.”

In the Lord’s Own Way, April 1986 general conference

Presidente Ezra Taft Benson

“Kita nakigsaad nga mosunod sa balaod sa ebanghelyo. Ang balaod sa ebanghelyo naglangkob sa tanang balaod, mga baroganan, ug mga ordinansa nga kinahanglanon alang sa atong kahimayaan. Kita miuyon nga mopakita og hugot nga pagtuo diha ni Jesukristo ug tinuoray nga paghinulsol nga nagagikan sa usa ka masulub-on nga kasingkasing ug mahinulsulon nga espiritu. Sa atong pagtuman sa mga ordinansa sa bunyag ug pagkompirma, ug sa pagpadayon diha sa hugot nga pagtuo ug pag-ampo, ang gahom sa maulaong sakripisyo sa Manluluwas motabon sa atong mga sala ug kita malimpyohan gikan sa tanang pagkadili matarong. ... Ang balaod sa ebanghelyo mas labaw pa kaysa pagsabot sa plano sa kaluwasan. Naglangkob kini sa pag-ambit sa mga ordinansa ug sa mga gahom sa pagselyo nga labing mahinungdanong sa tawo nga maselyo ngadto sa kinabuhing dayon. ‘Ang pagpakatawo pag-usab,’ miingon si Propeta Joseph Smith, ‘moabot pinaagi sa espiritu sa Dios pinaagi sa mga ordinansa.’”

Teachings of Ezra Taft Benson, 337

Presidente John Taylor

“Apan mahinungdanon kini nga si Adan kinahanglang mosunod, moobserbar, ug motuman sa balaod sa ebanghelyo, ug mahinungdanon usab kini nga ang iyang kaliwatan, kinsa makaangkon sa sama nga kahimayaan ug mga panalangin, kinahanglan usab nga motuman ug moobserbar sa sama nga balaod.”

The Gospel Kingdom, 279

Presidente Wilford W. Woodruff

“Ang tanan nga mohangop sa mga baroganan sa ebanghelyo ni Kristo maluwas pinaagi niini. Siya nga nagsunod sa balaod mapanalipdan pinaagi niini. Bisan kinsa nga tawo nga nagsunod sa balaod sa ebanghelyo maluwas ug makadawat og kahimayaan ug himaya pinaagi niini.”

The Discourses of Wilford Woodruff, 22

Elder Bruce R. McConkie

“Sa kataposang pag-analisar, ang ebanghelyo sa Dios nahisulat, dili sa patay nga mga letra sa mga rekord sa kasulatan, apan diha sa mga kinabuhi sa mga Santos. Wala kini nahisulat pinaagi sa bolpen ug tinta diha sa papel nga hinimo sa tawo, apan pinaagi sa mga lihok ug mga binuhatan diha sa basahon sa kinabuhi sa matag nagtuo ug masulundon nga tawo. Nakaukit kini sa mga unod ug mga bukog ug sa mga kaugatan niadtong nagsunod sa celestial nga balaod, nga mao ang balaod sa ebanghelyo. Anaa kini aron basahon sa uban, una, niadtong kinsa, nakakita sa maayong mga binuhatan sa mga Santos, motubag pinaagi sa paghimaya sa atong Amahan sa langit (tan-awa sa Mat. 5:16) ug sa kataposan pinaagi sa Halangdong Maghuhukom kang kinsa ang matag kinabuhi sa tawo usa ka bukas nga basahon.”

Our Gospel Came Not Unto You in Word Only…, October 1968 general conference

Presidente Russell M. Nelson

“Ang paagi sa Manluluwas sa kinabuhi maayo. Ang Iyang paagi naglakip sa kaputli sa dili pa ang kaminyoon ug hingpit nga pagkamatinud-anon sulod sa kaminyoon. Ang paagi sa Ginoo mao lamang ang paagi nga kita makasinati og mahangtorong kalipay. Ang Iyang paagi nagdala og malungtarong kahupayan sa atong mga kalag ug padayon nga kalinaw sa atong mga panimalay. Ug labaw sa tanan, ang Iyang paagi naggiya kanato balik ngadto Kaniya ug sa atong Langitnong Amahan, ngadto sa kinabuhing dayon ug kahimayaan. Mao kini ang diwa sa buhat ug himaya sa Dios.”

Mga Desisyon alang sa Kahangtoran, Oktubre 2013 nga kinatibuk-ang komperensiya

Presidente Dallin H. Oaks

“Ang gahom sa pagmugna og kinabuhi maoy pinakahimaya nga gahom sa Dios nga Iyang gihatag sa Iyang mga anak. Ang paggamit niini anaa sa unang sugo sa Dios kang Adan ug Eva (tan-awa sa Genesis 1:28), apan ang ubang importante nga mga sugo gihatag aron magdili sa sayop nga paggamit niini (tan-awa sa Exodo 20:14; 1 Mga Taga-Tesalonica 4:3).Ang atong paghatag og gibug-aton sa balaod sa kaputli gipasabot pinaagi sa atong panabot sa katuyoan sa atong gahom sa pagmugna sa tawo sa pagtuman sa plano sa Dios.Kon wala makasal ang usa ka lalaki ug babaye, ang tanang paggamit sa pagmugna og tawo sa bisan unsa nga ang-ang usa ka sala ug supak sa plano sa Dios alang sa kahimayaan sa Iyang mga anak.”

Dili Magbaton og Laing mga Dios, Oktubre 2013 nga kinatibuk-ang komperensiya

Elder David A. Bednar

“Mosaad ko nga ang pagkamasulundon sa balaod sa kaputli makapalambo sa atong kalipay sa mortalidad ug mohimong posible sa atong pag-uswag sa kahangtoran. Ang kaputli ug hiyas sa karon, ug sa kanunay, mao ang ‘labing mahal ug bililhon labaw sa tanan nga mga butang’ (Moroni 9:9).”

Kita Nagtuo sa Pagkaputli, Abril 2013 nga kinatibuk-ang komperensiya

Elder Neil L. Andersen

“Adunay daghang single adult sa Simbahan nga dili na kaayo mga batan-on. Samtang ang ilang kinabuhi karon lahi na kaysa ilang gilaoman, sila nagsunod sa balaod sa kaputli. Kana mahimong pagsulay sa ilang hugot nga pagtuo. Akong ipahayag ang akong dakong pagtahod ug pagdayeg niini nga mga disipulo ni Kristo.”

Pagsulay sa Inyong Hugot nga Pagtuo, Oktubre 2012 nga kinatibuk-ang komperensiya

Ang Pamilya: Usa ka Pamahayag ngadto sa Kalibotan

“Ang unang sugo nga gihatag sa Dios ngadto ni Adan ug ni Eva mao ang mahitungod sa posibilidad alang kanila isip bana ug asawa nga mahimong mga ginikanan. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman. Kami sa dugang mopahayag nga ang Dios misugo nga ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa. Kami mopahayag sa mga paagi diin ang mortal nga kinabuhi gilalang nga gipahimutang sa Dios. Kami mopamatuod sa pagkabalaan sa kinabuhi ug sa iyang pagkamahinungdanon diha sa walay kataposan nga plano sa Dios.”

Ang Pamilya: Usa ka Pamahayag ngadto sa Kalibotan

Alang sa Kalig-on sa mga Kabatan-onan

“Kon kamo putli sa sekswal nga paagi, inyong maandam ang inyong kaugalingon sa paghimo ug pagsunod sa sagradong mga pakigsaad sulod sa templo. Inyong maandam ang inyong kaugalingon sa pagtukod og usa ka lig-on nga kaminyoon ug sa pagdala sa mga anak nganhi sa kalibotan isip kabahin sa usa ka mahangtoron ug mahigugmaon nga pamilya. Kamo manalipod sa inyong kaugalingon gikan sa espirituhanon ug emosyonal nga kadaot nga moabot gikan sa pakigbahin sa sekswal nga kasuod nga gawas sa kaminyoon. Kamo makapanalipod usab sa inyong kaugalingon sa makadaot nga mga sakit. Ang pagpabilin nga putli sa sekswal nga paagi makatabang kaninyo nga mahimong masaligon ug tinuoray nga malipayon ug makapalambo sa inyong abilidad sa paghimo og maayo nga mga desisyon karon ug sa umaabot. Ang sumbanan sa Ginoo kalabot sa sekswal nga kaputli klaro ug dili mausab. Ayaw paghimo og bisan unsang sekswal nga mga relasyon sa wala pa ang kaminyoon, ug magmatinud-anon sa hingpit ngadto sa inyong kapikas human sa kaminyoon. ... Ayaw pag-apil sa mga panaghisgotan o bisan unsa nga pamaagi nga makapukaw sa sekswal nga mga pagbati. Ayaw pag-apil sa bisan unsa nga matang sa pornograpiya.”

Alang sa Kalig-on sa mga Kabatan-onan: Sekswal nga Kaputli

Presidente Ezra Taft Benson

“Kita nakigsaad nga mosunod sa balaod sa pagpahinungod. Niini nga balaod kita mopahinungod sa atong panahon, mga talento, kalig-on, katigayonan, ug kwarta alang sa pagpalig-on sa gingharian sa Dios dinhi sa yuta ug sa pag-establisar sa Zion. Hangtod nga ang usa ka tawo mosunod sa mga balaod sa pagkamasulundon, sa sakripisyo, sa ebanghelyo, ug sa kaputli, siya dili makasunod sa balaod sa pagpahinungod, nga mao ang balaod nga may kalabotan sa celestial nga gingharian. “Kay kon kamo buot nga Ako mohatag nganha kaninyo og usa ka dapit diha sa celestial nga kalibotan, kamo kinahanglan gayod moandam sa inyong mga kaugalingon pinaagi sa pagbuhat sa mga butang nga Ako misugo kaninyo ug nagkinahanglan gikan kaninyo (D&P 78:7).”

Teachings of Ezra Taft Benson, 121

Presidente Spencer W. Kimball

“[A]tong ipahinungod ang atong panahon, mga talento, ug mga kabtangan kon hangyoon sa atong mga lider ug kon aghaton sa mga paghunghong sa Espiritu. Sa Simbahan, sama diha sa sistema sa Welfare usab, kita makapalambo sa matag abilidad, matag matarong nga tinguha, matag mahunahunaon nga pag-awhag. Usa man ka boluntaryo, amahan, home teacher, bishop, o silingan, usa man ka visiting teacher, inahan, homemaker, o higala—adunay daghang oportunidad sa paghatag sa tanan nga anaa kanato. Ug sa atong paghatag, atong makita nga ang ‘sakripisyo nagdala sa mga panalangin sa langit!’ (Mga Himno, nu. [19]) Ug sa kataposan, atong mahibaloan nga dili diay kadto sakripisyo.”

Becoming the Pure in Heart, April 1978 general conference

Elder D. Todd Christofferson

“Ang atong kinabuhi dinhi sa yuta mao ang pagkatinugyanan sa panahon ug mga pagpili nga gihatag sa atong Tiglalang. Ang pulong nga pagkatinugyanan nakapahinumdom sa balaod sa Ginoo mahitungod sa pagpahinungod (tan-awa, pananglit sa, Doktrina ug mga Pakigsaad 42:32, 53), nga adunay ekonomikanhong bahin, apan labaw pa niana, mao ang paggamit sa balaod sa celestial nga kinabuhi dinhi ug karon (tan-awa sa Doktrina ug mga Pakigsaad 105:5). Ang pagpahinungod mao ang paggahin o paghalad og usa ka butang nga ingon ka sagrado, gihalad alang sa balaanong mga katuyoan. Ang tinuod nga kalamposan sa kinabuhi moabot sa pagpahinungod sa atong kinabuhi—kana mao, ang atong panahon ug mga pagpili—ngadto sa mga katuyoan sa Dios (tan-awa sa Juan 17:1, 4; Doktrina ug mga Pakigsaad 19:19). Sa pagbuhat niini, gitugotan nato Siya sa pagdala nato ngadto sa atong kinatas-ang kapaingnan.”

Mga Hulagway sa Gipahinungod nga Kinabuhi, Oktubre 2010 nga kinatibuk-ang komperensiya

Elder Neal A. Maxwell

“Kita may kalagmitan nga maghunahuna kabahin sa pagpahinungod nga mao lamang ang paghatag, kon gisugo sa langit, sa atong materyal nga mga kabtangan. Apan ang labing mahinungdanon sa pagpahinungod mao ang pagtugyan sa kaugalingon ngadto sa Dios. Kasingkasing, kalag, ug hunahuna mao ang malukpanon nga mga pulong ni Kristo sa paghulagway sa unang kasugoan, nga sa kanunay, dili sa panagsa, sundon (tan-awa sa Mat. 22:37). Kon tumanon, niana ang atong mga buhat, isip resulta, hingpit nga mapahinungod alang sa walay kataposan nga kaayohan sa atong mga kalag (tan-awa sa 2 Ne. 32:9).”

Consecrate thy Performance, April 2002 general conference

Presidente Henry B. Eyring

“Ang atong Langitnong Amahan naminaw sa mga pag-ampo sa Iyang mga anak sa tibuok yuta... Kadto nga mga pangamuyo gidungog Niya sukad nga Siya mibutang og mga lalaki ug mga babaye dinhi sa yuta.

Tungod kay ang Ginoo naminaw sa ilang mga pangaliyupo ug nabati ang inyong dakong kalooy alang kanila, gikan pa sa sinugdanan sa panahon Siya mihatag og mga pamaagi aron ang Iyang mga disipulo makatabang. Gidapit Niya ang Iyang mga anak sa pagpahinungod sa ilang panahon, ilang kapanguhaan, ug ilang kaugalingon aron moapil Kaniya sa pagserbisyo sa uban. Ang Iyang pamaagi sa pagtabang gitawag sa una og pagsunod sa balaod sa pagpahinungod.”

Mga Oportunidad sa Paghimo og Maayo, Abril 2011 nga kinatibuk-ang komperensiya

Elder David A. Bednar

“Ang pagpahinungod may kalabotan ug matukod ibabaw sa sakripisyo. Ang pulong nga pagpahinungod nagpasabot sa pagpalambo ug ‘pagpahinungod ngadto sa usa ka sagrado nga katuyoan.’ Ang sakripisyo mao ang unsay atong ihalad, ihatag, itugyan, o biyaan. Ang pagpahinungod, sa laing bahin, mao ang hingpit nga pagpalambo ug pagpahinungod ngadto sa usa ka sagrado nga katuyoan. … Kon sundon nato ang balaod sa pagpahinungod, andam kita dili lang sa paghalad sa bisan unsa nga anaa kanato tungod og alang sa ebanghelyo—apan mosaad usab kita nga palamboon ug ihalad ang atong pinakamaayo—atong panahon, atong mga talento, ug ang nagtubo natong kapasidad—sa katukoran sa gingharian sa Dios dinhi sa yuta. Ang atong saad mao: Akong ihatag ang akong kaugalingon ug ang tanan nga akong maabot, ug ako magpakabuhi alang sa ebanghelyo ni Jesukristo. Ang baroganan sa sakripisyo mas ubos nga balaod sa pagpangandam alang sa baroganan sa pagpahinungod. Ang pagpahinungod naglakip ug naglangkob sa sakripisyo ug mas labaw pa. … Ang tinuod nga pagpahinungod dinasig gikan sa gugmang putli ug magbunga og dugang tinguha sa pagserbisyo. Niining ulahing mga adlaw, mas daghan ang gikinahanglan kanato isip mga anak sa pakigsaad kaysa atong kwarta, butang, ug panahon. Kita kinahanglan nga mopahinungod sa atong tibuok nga kalag ngadto sa Ginoo.”

Gikuha gikan sa pakigpulong sa usa ka debosyonal nga gihatag didto sa BYU-Idaho, “Your Whole Souls as an Offering Unto Him,” David A. Bednar, January 5, 1999

Presidente Russell M. Nelson

“Mga kaigsoonan, ang materyal nga mga kabtangan ug mga pagdayeg sa kalibotan dili molahutay. Apan ang inyong panaghiusa isip asawa, bana, ug pamilya mahimong molahutay. Ang kadugayon lamang sa kinabuhi sa pamilya nga makatagbaw sa labing halangdon nga mga gipangandoy sa kalag sa tawo mao ang kahangtoran. Walay sakripisyo nga dako kaayo aron makabaton sa mga panalangin sa mahangtoron nga kaminyoon. Aron mahimong sarang, ang usa ka tawo kinahanglan lamang nga molimod sa kaugalingong pagkadili diosnon ug motahod sa mga ordinansa sa templo. Pinaagi sa paghimo ug pagtuman sa sagrado nga mga pakigsaad sa templo, atong gipakita ang atong gugma alang sa Dios, alang sa atong kapikas, ug ang atong tinuod nga pagtahod sa atong kaliwatan—bisan niadtong wala pa matawo. Ang atong pamilya mao ang tumong sa atong labing mahinungdanon nga buhat ug hingpit nga kalipay niini nga kinabuhi; ingon man hangtod sa tanang kahangtoran, sa higayon nga kita ‘makapanunod og mga trono, mga gingharian, mga kayutaan, … mga kagamhanan, kamandoan, … pagkahimaya ug himaya.’ Kining bililhon nga mga panalangin atong maangkon kon atong ipahimutang ang atong mga panimalay diha sa kahan-ay ug matinud-anong mohupot sa ebanghelyo.”

Set in Order Thy House, October 2001 general conference

Presidente Dallin H. Oaks

“Ang katuyoan sa Ang Simbahan ni Jesukristo sa mga Santos sa Ulahing mga Adlaw mao ang pagtabang sa tanang anak sa Dios nga makasabot sa ilang potensiyal ug makab-ot ang ilang labing taas nga padulngan. Kining simbahan anaa aron mahatagan ang mga anak sa Dios nga mga lalaki ug anak nga mga babaye og paagi nga makasulod ug mahimaya ngadto sa celestial nga gingharian. Kini usa ka simbahan nga nakasentro sa pamilya diha sa doktrina ug sa mga tulomanon. Ang atong panabot bahin sa kinaiyahan ug katuyoan sa Dios ang Amahan sa Kahangtoran mopasabot sa atong padulngan ug sa atong relasyon diha sa iyang mahangtorong pamilya. Ang atong teyolohiya nagsugod sa langitnong mga ginikanan. Ang atong labing taas nga pangandoy mao nga mahisama kanila. Ubos sa maluloy-ong plano sa Amahan, ang tanan niini posible pinaagi sa pag-ula sa Bugtong Anak sa Amahan, ang atong Ginoo ug Manluluwas, si Jesukristo. Isip yutan-on nga mga ginikanan kita moapil diha sa plano sa ebanghelyo pinaagi sa paghatag og mortal nga mga lawas alang sa espiritu nga mga anak sa Dios. Ang kahingpitan sa mahangtoron nga kaluwasan usa ka buluhaton sa pamilya.”

Apostasy and Restoration, April 1995 general conference

Presidente Henry B. Eyring

“Kinahanglan nga ang sentro ug katuyoan sa tanan nga atong gibuhat mao ang celestial nga kaminyoon. Nagpasabot kana nga kinahanglan gayod kitang maningkamot nga maselyo ngadto sa usa ka mahangtorong kapikas diha sa templo sa Dios. Kinahanglan usab nga ato gayong awhagon ang uban nga mohimo ug motuman sa mga pakigsaad nga hiniusang nagbugkos sa bana ug asawa, uban sa ilang pamilya, dinhi niining kinabuhia ug sa sunod nga kinabuhi.”

Mahangtorong mga Pamilya, Abril 2016 nga kinatibuk-ang komperensiya

Presidente Boyd K. Packer

“Ang kataposan sa kalihokan sa Simbahan mao nga makita ang bana ug asawa ug mga anak nga malipayon, napanalipdan sa baroganan ug balaod sa ebanghelyo, nabugkos sa mga pakigsaad sa mahangtorong [pagkapari].”

Ug usa ka Bata nga Gamay Maoy Magamando Kanila, Abril 2012 nga kinatibuk-ang komperensiya

Presidente Dieter F. Uchtdorf

“Mapasalamaton ko nga nahisakop sa simbahan nga mihatag og bili sa kaminyoon ug pamilya. Ang mga miyembro sa Ang Simbahan ni Jesukristo sa mga Santos sa Ulahing mga Adlaw nailhan sa tibuok kalibotan nga dunay kinanindotan nga kaminyoon ug mga pamilya nga inyong makita. Nagtuo ko niini, sa usa ka bahin, tungod sa bililhong kamatuoran nga gipahiuli ni Joseph Smith nga ang kaminyoon ug mga pamilya gituyo nga magmahangtoron. Ang tumong sa pamilya dili lang kay aron mahapsay ang dagan dinhi sa yuta ug isalikway kon maabot na sa langit. Hinoon, mao kini ang han-ay sa langit. Kini ang kopya sa celestial nga sumbanan ug sa pagsundog sa mahangtorong pamilya sa Dios.”

Agig Pagdayeg Niadtong Miluwas, Abril 2016 nga kinatibuk-ang komperensiya

“Ang Pamilya: Usa ka Pamahayag ngadto sa Kalibotan”

“Ang balaan nga plano sa kalipay makahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangtoran.”

Ang Pamilya: Usa ka Pamahayag ngadto sa Kalibotan

Presidente Russell M. Nelson

“Ang matag tawo nga moanhi sa yuta mao ang produkto sa mga kaliwatan sa mga ginikanan. Kita adunay natural nga pangandoy sa pagkadugtong uban sa atong mga katigulangan. Kini nga tinguha anaa sa atong mga kasingkasing, sa walay pagtagad sa edad. Hunahunaa ang espirituhanon nga mga koneksiyon nga namugna sa diha nga usa ka batan-ong babaye nagtabang sa iyang apohan nga babaye nga isulod ang kasayoran sa pamilya diha sa computer o sa diha nga usa ka batan-ong lalaki nakakita sa pangalan sa iyang apohang lalaki sa tuhod diha sa rekord sa census. Kon ang atong mga kasingkasing mobati ngadto sa atong mga katigulangan, usa ka butang ang mausab sa atong kahiladman. Atong bation ang kabahin sa usa ka butang nga labaw pa sa atong mga kaugalingon. Ang atong natural nga mga pangandoy alang sa mga koneksyon sa pamilya matuman kon kita nasumpay ngadto sa atong mga katigulangan pinaagi sa sagrado nga mga ordinansa sa templo.”

Mga Kaliwatan Nasumpay sa Gugma, Abril 2010 nga kinatibuk-ang komperensiya

Presidente Thomas S. Monson

“Nganong daghan man kaayo ang andam sa paghatag og daghan aron makadawat sa mga panalangin sa templo? Kadtong nakasabot sa mahangtorong mga panalangin nga magagikan sa templo nasayod nga walay sakripisyo nga dako kaayo, walay kantidad nga bug-at kaayo, walay paningkamot nga lisod kaayo, aron makadawat niana nga mga panalangin. Walay daghang mga milya nga biyahion, daghang mga babag nga buntugon, o daghang pagkadili komportable ang ilahutay. Nakasabot sila nga ang makaluwas nga mga ordinansa nga madawat sa templo nga magtugot kanato nga makabalik sa atong Langitnong Amahan diha sa mahangtorong relasyon sa pamilya ug aron matugahan sa mga panalangin ug gahom gikan sa kahitas-an bililhon sa tanang sakripsiyo ug tanang paningkamot.”

Ang Balaan nga Templo—ang Suga sa Kalibotan, Abril 2011 nga kinatibuk-ang komperensiya

Presidente Gordon B. Hinckley

“Nagtuo ako nga walay miyembro sa Simbahan nga nakadawat sa kinatas-ang butang nga ikahatag niini nga Simbahan hangtod siya makadawat sa iyang mga panalangin sa templo diha sa balay sa Ginoo.”

Some Thoughts on Temples, Retention of Converts, and Missionary Service, October 1997 general conference

Presidente Howard W. Hunter

“Niana nga diwa ako modapit sa mga Santos sa Ulahing mga Adlaw sa pagtan-aw sa templo sa Ginoo isip mahinungdanon nga simbolo sa inyong pagkamiyembro. Mao kini ang labing dako nga tinguha sa akong kasingkasing nga ang matag miyembro sa Simbahan takos nga mosulod sa templo. Makapahimuot kini sa Ginoo kon ang matag hamtong nga miyembro mahimong takos—ug magdala—og usa ka magamit nga rekomend sa templo. Ang mga butang nga kinahanglan gayod nato nga buhaton ug dili buhaton aron mahimong takos sa usa ka rekomend sa templo mao gayod ang mga butang nga mosiguro nga kita magmalipayon isip mga indibidwal ug isip mga pamilya. Magmahimo kitang katawhan nga magtambongan sa templo. Tambong sa templo pirme kon itugot sa personal nga kahimtang. Paghupot og usa ka litrato sa templo diha sa inyong panimalay aron makita sa inyong mga anak. Tudloi sila mahitungod sa mga katuyoan sa balay sa Ginoo. Paplanoha sila sugod sa ilang pagkabata sa pag-adto didto ug sa pagpabiling takos niana nga panalangin.”

Exceeding Great and Precious Promises, October 1994 general conference

Elder David A. Bednar

“Ang Espiritu ni Elijah nakaapekto sa mga miyembro ug dili mga miyembro sa Simbahan. Apan, isip mga miyembro sa gipahiuli nga Simbahan ni Kristo, kita adunay responsibilidad nga pakigsaad sa pagsiksik sa atong mga katigulangan ug paghatag kanila sa makaluwas nga mga ordinansa sa ebanghelyo. ‘Sila kon wala kita dili mahimong hingpit’ (Mga Hebreohanon 11:40; tan-awa usab sa Mga Pagtulun-an: Joseph Smith, 576). Ug ‘ni kita kon wala ang atong mga patay mahingpit’ (Doktrina ug mga Pakigsaad 128:15). Tungod niini nga mga rason kita naghimo sa pagsiksik sa family history, nagtukod og mga templo, ug nagpahigayon sa mahinungdanon nga mga ordinansa. Tungod niini nga mga rason si Elijah gipadala aron sa pagpahiuli sa awtoridad sa pagbugkos nga nagbugkos dinhi sa yuta ug didto sa langit. Kita mao ang mga tinugyanan sa Ginoo sa buhat sa kaluwasan ug kahimayaan nga makapugong kon ‘ang tibuok yuta pagahampakon uban sa usa ka tunglo’ (Doktrina ug mga Pakigsaad 110:15) inigbalik Niya pag-usab. Kini ang atong katungdanan ug talagsaong panalangin.”

Ang mga Kasingkasing sa mga Anak Mobati, Oktubre 2011 nga kinatibuk-ang komperensiya

Elder Quentin L. Cook

“Ang doktrina sa pamilya kalabot sa family history ug buhat sa templo klaro. Ang Ginoo sa Iyang orihinal nga pagpadayag nagpasabot sa ‘bunyag alang sa inyong mga patay.’ Ang atong doktrinal nga obligasyon mao ang ngadto sa atong mga katigulangan. Kini tungod kay ang celestial nga pag-organisar sa langit gibasi sa mga pamilya. Ang Unang Kapangulohan nag-awhag sa mga miyembro, ilabi na ang kabatan-onan ug mga young single adult, nga hatagan og gibug-aton ang buhat sa family history ug mga ordinansa alang sa ilang kaugalingong ngalan sa pamilya o sa mga ngalan sa katigulangan sa mga miyembro sa ilang ward ug stake. Kinahanglang makonektar kita ngadto sa atong mga gamot ug mga sanga. Ang hunahuna nga makonektar kita sa mahangtorong dapit mahimayaon gayod.”

Mga Gamot ug mga Sanga, Abril 2014 nga kinatibuk-ang komperensiya

Presidente Boyd K. Packer

“Bisan unsa pa ang pagkalumulopyo o kaliwatan, lalaki man o babaye, bisan unsa pa ang trabaho, bisan unsa pa ang inyong edukasyon, walay pagsapayan sa henerasyon diin ang usa katawo nagpuyo, ang kinabuhi mao ang usa ka panaw alang natong tanan, balik ngadto sa presensya sa Dios didto sa iyang celestial nga gingharian. Ang mga ordinansa ug mga pakigsaad mao ang atong mga kredensyal aron makasulod ngadto sa Iyang presensya. Ang takos nga pagdawat niini mao ang tibuok kinabuhi nga tinguha; ang paghupot niini human sa pagdawat mao ang hagit sa mortalidad. Sa higayon nga madawat nato kini alang sa atong kaugalingon ug alang sa atong mga pamilya, gihatagan kita og obligasyon sa paghatag niining mga ordinansa sa puli nga paagi alang sa atong namatay na nga mga kaliwatan, gani alang sa tibuok tawhanong pamilya.”

Covenants, Ensign, May 1987