O Sauniga o le Malumalu ma le Ala o Feagaiga
“O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga tāua e fusia ai i tatou ia te Ia e ala i feagaiga paia o le perisitua. O lenei, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau.” (Peresitene Russell M. Nelson, “O Le Malumalu ma Lou Faavae Faaleagaga,” Konafesi Aoao, Oketopa 2021)
O le mauaina o sauniga o le malumalu ma le tausia o feagaiga o se vaega tāua o lau tautinoga e mulimuli ia Iesu Keriso. E fesoasoani foi i a te oe e saunia e i ai se aso e toe foi ai ma faatasi ma Ia ma lo tatou Tama Faalelagi. E tele mea e mafai ona e faia ia mautinoa ai ua e saunia. O le aoaoina o le talalelei a Iesu Keriso ma le faataunuuina o na aoaoga i lou olaga e tatau ona aofia ai. O le tausia o feagaiga ua uma ona e faia o se ki i lou saunia mo le malumalu.
Na aoao mai Iesu, “Aua e vaapiapi le faitotoa, e lauitiiti foi le ala e tau atu i le ola, e toaitiiti foi i latou o e maua” (Mataio 7:14). O le faitotoa tatou te ulu atu ai o le papatisoga ma o le ala tatou te mulimuli ai o Lana Talalelei. O le papatisoga o le sauniga muamua lea o le talalelei ma o se laasaga manaomia faatasi ai ma le ala o feagaiga e toe foi ai i le Atua.
O isi sauniga o le a taialaina foi oe i luga o le ala. E aofia ai le mauaina o le Agaga Paia, o le faauuina i le Perisitua Mekisateko [mo alii], mauaina o faae’ega paia i le malumalu, ma le faamauina i le malumalu. O nei sauniga paia o le perisitua o le a taitai atu ai i faamanuiaga silisili ua tuuina mai e lo tatou Tama Faalelagi mo Ana fanau—O le fiafia i le nonofo faatasi ma Ia ma o tatou aiga pe a mavae lenei olaga faalelalolagi.
Atonu o le a i ai ni ou lagona lē mautonu e oo lava i le lofituina a’o e saunia mo le malumalu. Ae e te lei malaga atu mo le taimi muamua, o le mea masani lava le manatunatu pe o le a faapefea sauniga o le malumalu. O nisi mea o le a fou ia te oe, ae o le tele o mea e tutupu i le malumalu e tatau ona lagona o mea masani lava ona e i le totonugalemu uma o le talalelei a Iesu Keriso.
E te le manaomia ona malamalama po o le manatua o mea uma pe a e alu i le malumalu. E i ai pea tagata faigaluega o le malumalu iina e fesoasoani ia te oe. O nei volenitia e alolofa ma agalelei. Ua latou i ai iina e fesoasoani ia te oe e lagona le talisapaia ma le mafanafana i le maota o le Alii.
Ona ua uma ona e papatiso, ua e malamalama foi i nisi o mea e uiga i sauniga ma feagaiga. Ua e malamalama e i ai o latou faatusa ma uiga faaleagaga. Mo se faataitaiga, ua e aoaoina o le papatisoga o se faatusa o le faamamaina ma le toefanauina. Sa e ofu papae ma ulu atu i le vai. Sa sii le lima o lē umia le perisitua ma tautala i upu o le sauniga. Ona tanumia lea o oe (faatofu) i le vai ma tulai ane ai i luga o se tagata fou. Ua e mama ma lē pona ma saunia e ola i lou olaga o se soo faatuatua o Iesu Keriso. A maea ona papatisoina oe ona e maua lea o le meaalofa o le Agaga Paia a o faaee atu lima i luga o lou ulu.
I le taimi ao papatisoina oe, ua e osia se feagaiga ma le Atua. Ua e folafola atu ua e loto e tauave i ou luga le suafa o Iesu Keriso, ma manatua pea o Ia, ma tausi Ana poloaiga, ma auauna ia te Ia sei oo i le iuga. I le avea ai o se tagata o Lana Ekalesia, ua e faafouina le faatusa o le feagaiga o lou papatisoga pe a e mauaina le faamanatuga.
O sauniga o le malumalu e mulimuli lava i se mamanu faapena. O le a e ofu i ofu papae, aoaoina e uiga i le fuafuaga a le Atua, ma auai i sauniga e paia ma faafaatusa. Ma o le a folafolaina foi ia te oe faamanuiaga a’o e osi feagaiga e mulimuli i aoaoga ma faataitaiga a Iesu Keriso.
Manatua o mea uma i totonu o le malumalu e faasino atu ai i tatou i lo tatou Faaola ma le Tama Faalelagi. O mea uma ua faamoemoeina ia siitia ma musuia.
Lima Mama ma se Loto Mama
I le tusi a Salamo, “O ai ea se alu ae i le mauga o Ieova? O ai se tumau i lona afioaga paia? O le ua i ai lima mama, ma se loto mama” (Salamo 24:3–4). O le mauga o le Alii o Lona Malumalu. E lua uiga lelei o ta’ua i le ulufale atu—lima mamā ma se loto mamā.
O le talanoa atu e uiga i lenei itulau, sei ou fautuaina atu o lima e faamamaina e ala i le faiga o le tuu ese o le tagata o le lalolagi ma le faatoilaloina o le agasala ma uunaiga leaga a le tiapolo i o tatou olaga e ala i le Togiola a le Faaola. E faamamaina loto a’o tatou mauaina Lona mana faamalosi e faia ai le lelei ma avea ma ē e sili atu. O o tatou faanaunauga agavaa uma ma galuega lelei, tusa lava po o le a le tatau, e le mafai ona fua mai ai ni lima mama ma se loto mama. O le togiola a Iesu Keriso e maua mai ai le mana faamama ma le mana faaola lea e fesoasoani tatou te faatoilalo ai le agasala ma se mana faapaia ma faamalosi lea e fesoasoani tatou te lelei atili ai nai loo le mea tatou te mafaia e ala i le faalagolago i lo tatou lava malosi. O le Togiola e le i’u e mo le tagata agasala faapea foi le tagata paia ia i tatou taitoatasi” (“O Lima Mama ma se Loto e Mama,” Ensign po o le Liahona, Nov. 2007,82).
A o e saunia mo le malumalu, o le a e asiasi atu i lou epikopo. Ma o le a lua feiloai foi ma lou peresitene o le siteki, pe afai o le a e mauaina lou faae’ega paia po o le faamauina. O le a la’ua faataunuuina le faatalanoaga o le pepa faataga o le malumalu. O le a mafai ona e faasoa atu ou manatu ma ou lagona ma i la’ua, ma o le a la’ua tuuina atu ni fautuaga musuia. A o e tali atu i a la’ua fesili, o le a e faamautu atu foi o loo ia te oe “lima mama ma se loto mama.” I nisi upu, o le a e ta’u atu ua e agavaa ma loto i ai e ulu i le malumalu, auai i sauniga paia, ma tausia au feagaiga.
O Sauniga Paia e Patino ma Mamana
A o e alualu ai i luma i le ala o feagaiga i le malumalu, o le a amata ona e talisapaia ia faamanuiaga o feagaiga paia i lou olaga. O nisi nei o mea e mafaufau i ai e uiga i le tāua o feagaiga:
1. O feagaiga e faalolotoina le lua mafutaga ma le Tama Faalelagi ma Iesu Keriso.
O le feagaiga e masani lava ona faamatala o se folafolaga paia i le va o le Atua ma Ana fanau. E ui e sa’o lenei faauigaga, ae e le o atoatoa. O se feagaiga e sili atu nai loo se konekarate. O se tautinoga patino e faamatalaina ma faalolotoina la tatou mafutaga ma le Atua. O feagaiga e fatu ai se notaga paia i le va o le Atua ma Ana fanau. Latou te faafouina o tatou agaga, suia o tatou loto, ma fesoasoni ia i tatou ia faatasia ma Ia. A’o e faamaoni i au feagaiga, o lou tuuto atu i le Tama Faalelagi ma Iesu Keriso o le a faateleina. O ou lagona o le lotofaafetai o le a faateleina. O lou tomai e alofa atu ma auauna atu ai i isi o le a tuputupu a’e. Ma o faamanuiaga folafolaina i le malumalu o le a tafe atu i lou olaga.
2. O feagaiga e fesoasoani ia te oe e taula’i atu i mea e sili ona aoga.
I le aluga o lou olaga, o le a e feagai ma filifiliga e manaomia ai lou taimi, lou malosi, ma au punaoa. E tele filifiliga lelei o le a tauva ma isi mea aoga. E faapefea ona e filifili?
Na aoao mai Peresitene Dallin H. Oaks: “Ona o se mea e lelei e lē lava lea mafuaaga e fai ai. … O nisi mea e sili atu i le na o le lelei, ma o mea ia e tatau ona ave i ai le faamuamua i o tatou olaga. … O nisi faaaogaaga o taimi faaletagata ma faaleaiga e sili atu, ae o isi e silisili atu. E tatau ona tatou lafoai nisi o mea lelei ina ia tatou filifili ai isi mea e sili atu pe silisili atu foi auā e atiina a’e ai le faatuatua i le Alii o Iesu Keriso ma faamalolosia ai o tatou aiga” (‟Lelei, Lelei Tele, Lelei Silisili,” Ensign po o le Liahona, Nov. 2007, 104, 107).
E ala i feagaiga, ua fesoasoani le Atua ia i tatou ia malamalama i aoaoga faavae, faatinoga, ma folafolaga Na te silafia e silisili mo i tatou. E mafai ona tatou maua le malamalama atili i faamuamua ma faia ni filifiliga poto pe a tatou taula’i atu muamua i nā tautinoga paia ua tatou faia ma le Atua.
3. O sauniga o le malumalu e faamanuia ai oe ma isi.
Pe a e maua lou faaeega paia po o le faamauina i lou toalua po o le aiga, o le a e tuua le malumalu ma le folafolaga mai le Alii e faasino tonu ia te oe. E le na o folafolaga na faia mo nisi perofeta o aso anamua poo tagata, ae o se folafolaga na faia mo oe. E tatau ona e saili ia malamalama ia i latou ma o latou uiga i lou olaga.
A maea ona e mauaina nei sauniga mo oe lava, e mafai ona e toe foi atu i le malumalu ia mauaina nei lava sauniga e fai ma sui mo isi ua maliliu. O loo ia te oe se matafaioi e saili atu mo ou tuaa ma mautinoa ua maua o latou sauniga i le malumalu. O lau auaunaga o le a faamanuiaina ai o latou olaga ma faamanatu ai ia te oe ou lava folafolaga ma faamanuiaga.
Taumafai e Manatua ma Toe Foi Atu
A’o e saunia e faia se vaega i sauniga o le malumalu, manatua o le Atua o lou Tama e Faavavau ma o Iesu Keriso o lou Togiola. E silafia lelei e i La’ua oe. E atoatoa lo La’ua alolofa ia te oe. Ao e tausia au feagaiga, o le a faamanuiaina oe i lenei olaga ma le isi.
E mafai ona e manatuaina se taimi na e lagona ai le latalata atu i le Tama Faalelagi ma Iesu Keriso. O na lagona o le a tuputupu a’e i le malumalu. O le malumalu ua maea ona faapaiaina mai le faalavelaveina, popole, ma aafiaga lē lelei o le olaga. I lenei nofoaga paia, ua faamanatu mai ia te oe o oe ma ē pele ia te oe ua i ai i luga o lenei fogaeleele mo se faamoemoega sili ma mamalu. O le a e maua le filemu sili atu, mafanafana, taitaiga, ma se faamoemoe.
O le a e mauaina foi o faamanuiaga o le malumalu o le a ulu atu i lou loto ma siitia lou agaga. Toe foi atu i le malumalu i le tele e te mafaia. A’o e faia, o le a e malamalama sili e uiga i le alofa o le Atua ma Iesu Keriso mo oe ma tagata uma. E tusa lava pe ua e tuua le malumalu, o le a faaauau pea ona aoao oe e le Agaga Paia. O le a ia faamanatu ia te oe ou aafiaga, ou lagona na e mauaina, ma pe faapefea ona e ola e pei ona manao ai le Atua.
A’o e saunia mo le malumalu, manatua e manao le Atua ia e latalata atu ia te Ia. Ua ia saunia Lona malumalu o se nofoaga faapitoa e faalatalata atili atu ai ia te Ia. O lou fiafia e faavavau o Lona fiafia foi lea. Na Ia tuuina mai ia i tatou faamanuiaga o le malumalu e taitai atu ai i tatou e toe foi atu ia te Ia. Ōle atu mo Lana fesoasoani a’o e saunia ma faasoa atu lau malaga ma Ia. O le a ia taialaina oe. O le a Ia musia oe. Ma o le a Ia fesoasoani ia te oe i le ala.
