Ako mei he konifelenisi lahí

Teuteuʻi Fakalaumālie Koe

Talu mei he kamataʻanga ‘o e māmaní mo hono ui ʻe he ‘Otuá ha kau palōfita ke nau lea ʻaki ʻEne ngaahi folofolá ki he kakaí. ‘I he ʻahó ni, kuó Ne fokotuʻu ha kau ʻaposetolo mo ha kau palōfita ʻo hangē ko ia ʻi he kuonga muʻá, pea ʻoku hokohoko atu ʻEne fakahā kiate kinautolu Hono finangaló. ʻOku hoko ʻa e konifelenisi lahí, ko ha faingamālie fakaʻofoʻofa ke tau fanongoa ai e ngaahi pōpoaki ‘a e ʻOtuá maʻatautolu takitaha. Te tau toe ofi ange ki he Tamai Hēvaní mo Sīsū Kalaisi ʻi he taimi te tau ako, fakalaulauloto, mo ngāue ‘o fakatatau mo e folofola ʻa e ‘Otuá, ʻa ia ʻoku tau maʻu ‘o fakafou ʻi Heʻene kau tamaioʻeiki kuo filí.

Ngaahi Maʻuʻanga Tokoni ke Tokoni ki Hoʻo Teuteú

‘E nofotaha ʻi ʻEpeleli ʻa e ngaahi fakataha fakakōlomu ʻa e Lakanga Taulaʻeiki Faka-‘Ēloné, ʻi he ako mei he akonaki ne fakahoko ʻi he konifelenisi lahi ʻo ‘Epelelí. Fili ha pōpoaki ʻe taha pe lahi ange ke aleaʻi ʻi he ngaahi fakataha fakakōlomú ʻi he uike takitaha, ʻa ia ʻe mahuʻingamālie taha ki he kau talavoú ʻokú ke akoʻí.

ʻOku maʻu ʻa e ngaahi tohi mo e vitiō mei he konifelenisi lahí ʻi he ‘initanetí (vakai, conference.lds.org) pea mo e Gospel Library app.

Ngaahi Fehuʻi ke Fakalaulaulotoa kimuʻa ʻi Hoʻo Akoʻí

Ko e hā ha ngaahi tokāteline naʻe akoʻi ʻi he pōpoaki konifelenisí? Ko e hā ha ngaahi konga ‘o e pōpoaki ko ʻení ʻe tokoni lahi moʻoni ki he kau talavou ʻokú ke akoʻí?

Ko e hā ʻoku fakaafeʻi mai ʻe he tokotaha leá ke tau faí? Ko e hā ha ngaahi tāpuaki ʻokú ne palōmesi mai te tau lava ʻo maʻu? Ko e hā ha ngaahi aʻusia kuó ke maʻu fekauʻaki mo e pōpoaki ko ʻení ʻe ala tokoni ki he kau talavoú?

Ko e hā ʻe lava ke fai ʻe he kau talavoú ke nau teuteu ai ke ako? Hangē ko ʻení, te ke lava ʻo kole ange ke nau toe vakaiʻi ʻa e pōpoaki konifelenisí kimuʻa pea toki haʻu ki he fakatahá, pe te ke kole ange ki ha kau talavou ʻe niʻihi ke nau teuteu ke vahevahe e meʻa naʻa nau ako pe ongoʻi lolotonga ʻenau ako e pōpoakí.

Ko e Faiako ‘i he Founga ‘a e Fakamoʻuí

Naʻe fekau ‘e he ʻEikí, “Fuofua feinga ke maʻu ‘eku leá, pea ʻe toki vete ho ‘eleló; pea kapau te ke loto ki ai, te ke maʻu leva ʻa hoku Laumālié” (Tokāteline mo e Ngaahi Fuakava 11:21). Ko e konga ʻo teuteu fakalaumālié ʻa hono ako maʻau pē ʻa e ngaahi pōpoaki ʻo e konifelenisí. ʻE tataki koe ʻe he Laumālié ki he meʻa ʻe ʻaonga mo tokoni taha ki he toʻu tupú. Hili iá, ʻi hoʻo feinga ke moʻui ʻaki e meʻa ʻokú ke akoʻí, te ke lava ʻo fakamoʻoni ki hono moʻoni ʻo e ongoongoleleí mei hoʻo aʻusia pē ʻaʻau.

Fokotuʻutuʻu ʻo e Fakatahá

1. Fealeaʻaki Fakataha mo Vahevahe e Ngaahi Aʻusiá

Tataki ʻe he mēmipa ʻo e kau palesitenisī ʻo e kōlomú; fakafuofua ki ha miniti ʻe 5–10

Tataki ha fealeaʻaki fekauʻaki mo ha ngaahi meʻa hangē ko ʻení:

Ko ʻetau kōlomú: Ko hai ʻoku ʻikai ke ʻi heni he ʻaho ní? Ko e hā ha ngaahi ʻaʻahi ʻoku fie maʻu ke tau fai? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai? Ko hai ʻokú ne fie maʻu ʻetau tokoní mo e ngaahi lotú?
Ko hotau ngaahi fatongiá: Ko e hā ha ngaahi ngāue ʻoku fie maʻu ke tau fai? Ko e hā ha ngaahi ngāue kuo tau fakahoko? Kuo tau fakaafeʻi fēfē nai ʻa e niʻihi kehé ke nau haʻu kia Kalaisi, pea ko e hā e founga te tau lava ai ʻo fakaafeʻi mai e niʻihi kehé he taimí ni?
Ko ʻetau moʻuí: Fakamanatu ki he kalasí ʻa e fealeaʻaki mei he fakataha kuo ʻosí. Ko e hā ha ngaahi meʻa ne tau aʻusia ʻi heʻetau fakaʻaongaʻi e ngaahi meʻa ne tau akó? Ko e hā ha ngaahi aʻusia kuo tau maʻu ʻi he ngaahi uike kuo hilí ʻa ia ʻokú ne fakamālohia ai ʻetau ngaahi fakamoʻoni ki he ongoongoleleí?

Kapau ʻe lava, aleaʻi ʻa e ngaahi meʻa ko ʻení kimuʻa ʻi ha fakataha ʻa e kau palesitenisī ʻo e kōlomú.

2. Ako Fakataha

Tataki ʻe ha taki pe ko ha faiako pe ko ha mēmipa ʻo e kōlomú; fakafuofua ki ha miniti ‘e 25–35

Hili hono ako ‘a e pōpoaki pe ngaahi pōpoaki kuo filifili mei he konifelenisi lahí pea fekumi ki he tataki ʻa e Laumālié, fili ha ʻekitivitī ‘e taha pe lahi ange ʻo e ngaahi ʻekitivitī ʻi laló. ʻOku faʻu ʻa e ngaahi ʻekitivitī ko ʻení ke tokoni ki he kau mēmipa ʻo e kōlomú ke nau ako fakataha kau ki ha ngaahi tokāteline naʻe akoʻi ʻi he ngaahi pōpoaki konifelenisí, ngaahi fakaafe naʻe ʻomi ʻe he tokotaha leá, mo e ngaahi tāpuaki naʻe foaki maí. ʻOku maʻu foki ʻa e ngaahi ʻekitivitī kehe ʻe malava ke fakaʻaongaʻi ki ha pōpoaki ʻo e konifelenisi lahí ʻi he fokotuʻutuʻu ʻo e konifelenisi lahi ʻo ʻOkatopá.

Ngāue fakakulupu. Vahevahe ‘a e kau mēmipa ʻo e kōlomú ki ha ngaahi kulupu iiki, pea vahe ki he kulupu takitaha ke nau aleaʻi ha konga kehekehe mei he pōpoaki kuo filí. Hili iá pea kole ki ha mēmipa mei he kulupu takitaha ke nau vahevahe ha fakamatala nounou ʻo e meʻa ne nau akó, ki he kulupu tokolahi angé. Pe ʻe lava ke faʻu ʻe he kau mēmipa ʻo e kōlomú ha ngaahi kulupu foʻou ʻaki ha niʻihi kehe ne nau ako ha ngaahi konga kehekehe pea vahevahe ʻa e meʻa ne nau akó.
Tali ha ngaahi fehuʻi. Fakaafeʻi ʻa e kau mēmipa ʻo e kōlomú ke tali ha ngaahi fehuʻi fekauʻaki mo e pōpoaki kuo filí ʻo hangē ko ʻení: Ko e hā ha ngaahi tokāteline ʻo e ongoongoleleí ne tau maʻu ʻi heʻetau akó? Ko e hā ha meʻa naʻe fakaafeʻi mai ʻe he tokotaha leá ke tau faí? Ko e hā ha ngaahi tāpuaki naʻá ne palōmesi mai te tau lava ʻo maʻu? Ko e hā ha ngaahi fehuʻi ʻoku tau maʻu? Ko e hā ha ngaahi tali ʻe ala maʻu?
Vahevahe ha ngaahi kupuʻi lea. Fakaafeʻi ha kau mēmipa ʻo e kōlomú ke vahevahe ha ngaahi kupuʻi lea mei he pōpoakí ʻokú ne ueʻi fakalaumālie kinautolu. Ko e hā ha ngaahi meʻa ʻoku ueʻi ʻe he ngaahi kupuʻi lea ko ʻení ke tau faí? Ko e hā ha ngaahi faingamālie ʻoku tau maʻu ke tau vahevahe ai ʻa e ngaahi ako ko ʻení mo e niʻihi kehé?
Vahevahe ha lēsoni fakataumuʻa. Fakaafeʻi ha kau mēmipa ʻo e kōlomú kimuʻa ʻi he kalasí, ke ʻomi ha meʻa mei ʻapi ʻoku fekauʻaki mo e ngaahi akonaki ʻi he pōpoakí. ʻI he fakatahá, kole ange ke nau fakamatalaʻi ʻa e founga ʻoku fekauʻaki ai e meʻa ko iá mo e pōpoakí. Mahalo te ke fie ʻomi ha meʻa pe ha fakatātā ʻoku fekauʻaki mo e konga takitaha ʻo e pōpoakí, pea fakaafeʻi ha kau mēmipa ʻo e kōlomú ke fakahoa ʻa e ngaahi meʻá ki he ngaahi konga ʻoku fekauʻaki mo iá.
Poupouʻi ʻa e ngaahi fehuʻí mo e talí. Kole ki he kau mēmipa ʻo e kōlomú ke nau lisi ha ngaahi fehuʻi ʻoku nau ala maʻe pe maʻu ʻe he niʻihi kehé kau ki he tefito ʻo ha lea. Fakaafeʻi kinautolu ke nau toe vakaiʻi ʻa e leá pea vahevahe ʻa e ngaahi tali ʻoku nau maʻú.
Teuteu ha lēsoni. Kole ki ha kau mēmipa ʻo e kōlomú ke nau ngāue tautautoko ua ke palaniʻi ha lēsoni efiafi fakafāmili ʻi ʻapi ʻo makatuʻunga ʻi ha konga ʻo e pōpoakí. Ko e hā te tau lava ʻo fai ke tokoniʻi ai e kāu mēmipa ʻo hotau fāmilíe ke mahino kiate kinautolu ʻa e ngaahi akonaki ko ʻení mo e founga ʻoku nau fekauʻaki ai mo ʻetau ngaahi moʻuí? Fakaafeʻi ha niʻihi ʻo e ngaahi hoá ke vahevahe ʻenau ngaahi palaní.
Lau pea vahevahe. Lau fakataha ha ngaahi kupuʻi lea mei he pōpoakí. Kole ki he kau mēmipa ʻo e kōlomú ke vahevahe ha ngaahi sīpinga mei he folofolá pea mo ʻenau moʻuí ʻa ia ʻoku fakahaaʻi ai ʻa e ʻuhinga ʻo e ngaahi kupuʻi lea ko ʻení kiate kinautolú.

3. Palani ke Ngāue

Tataki ‘e ha mēmipa ʻo e kau palesitenisī ‘o e kōlomú; fakafuofua ki ha miniti ʻe 5–10

Kole ki he kau talavoú ke nau aleaʻi ha faʻahinga ongo ne nau maʻu lolotonga ʻa e fakatahá. Ko e hā ha meʻa naʻe mahuʻingamālie kiate kinautolu? ʻOku ʻi ai nai ha meʻa te nau lava ʻo fai fakataautaha pe fakakōlomu ke fakaʻaongaʻi ai ʻa e meʻa kuo nau akó?
ʻOange ki he kau talavoú ha ngaahi miniti siʻi ke hiki e meʻa te nau fai ʻi he ngaahi uike ka hokó ke nau nau ngāueʻi ai ʻa e ngaahi meʻa ne nau ongoʻí. Fakaafeʻi kinautolu ke vahevahe ʻenau ngaahi fakakaukaú.
Fakamanatu ki he kau talavoú te nau maʻu ʻa e faingamālie ke vahevahe ʻenau ngaahi aʻusiá ʻi he kamataʻanga ʻo e fakataha hokó.