Kidavaki tu ki na TQ Veimacawa
Kidavaki tu ki na TQ Veimacawa—e dua na tabaivola vakamacawa eke saraga ena nomu app ni Gospel Library volai tu me baleti ira na itabagone qasecake mai vei ira na tabagone qasecake, vakakina o ira na iliuliu ni Lotu kei na kenadau tale eso ena veiulutaga veiganiti tu kei keda nikua.
Noda Lalawa
Sa neitou lalawa na vukei iko mo raica na isau ni nomu ibolebole eso kei na kaukauwa mo sotavi ira kina. Keitou na cakava oqo ena raici vata ni kosipeli i Jisu Karisito kei na dikevi ni sala era sa segata tiko kina ni bulataka na itabagone qasecake e vuravura taucoko.
Me Baleti Keda
Matai ni ka me liu: na wase kece oqo e vakauqeti mai vei kemuni. Eda sa vauci tu ena vakatulewa, bolebole vou, kei na veisau levu eso ena gauna oqo ni noda bula. Keitou sa via tuberi kemuni vakataucoko kina. Keitou vinakata talega mo ni kila ni keitou raici kemuni tu vakai kemuni ka sega ena itutu ni vakawati, oya na vuna e sega ni vakatokai kina na wase oqo na TQL Vakamacawa. Na lewenivola oqo e sa caka me baleti ira taucoko na tabagone qasecake, ledua se vakawati se ledua tale, baleta na nomuni rawaka ena Lotu—kei na vuravura—e rawa ni tawavakatauvatani, veitalia na nomu vakatagedegede ena gauna oqo ena tuvaki ni itabagone qasecake.
Keitou nanuma talega ni na kauwaitaka na tabagone qasecake taucoko na ulutaga eso keitou qarava, o ira tale mada ga ka sa sivia na yabaki 30. Keitou kila ni na sega tu ni veisau na nomuni kauwaitaka na ulutaga kei na ibolebole eso eda na veivosakitaka tiko baleta ga ni dua tale tu na nomuni siganisucu. Na veika eda sotava nikua e sa ganiti keda taucoko sara ka sa levu tu meda qarava vata vakataucoko, se vakacava na yabaki ni noda bula.
Keitou kila ni duidui tu na tuvaki ni bula o ni cavutu taucoko mai kina, bula vakavuli, vakatagedegede ni bula vakailavo, tovo vakavanua, kei na ituvaki eso. Keitou sa na qarava na veimataqali ulutaga, ka na tiko e vuqa na neitou talanoa ena 20 na vosa ka sivia ena Gospel Library—keitou via yacovi kemuni taucoko ka veimaliwai kei kemuni taucoko. Era sa kauta tiko mai na tabagone qasecake e vuravura taucoko na nodra vakabauta kei na taledi ki na Lotu. Ena vuqa na vanua, eda sa sega walega ni liuliu ni mataka, eda sa liutaka tiko na Lotu nikua, oka kina na wasewase eso e sa tauyavutaki makawa kina na Lotu. Ka na kadre na noda rawaka ki na veisiga ni mataka, baleta ni da sa tubutubu talega ni tabatamata ka tarava.
Eda Rawa ni Lako Tikoga
Sa levu sara na ka eda rawa ni kaya me baleta na nodra yaga kei na igu na tabagone qasecake, ia ke da tomana, ena rogorogo veivakalevulevui toka (baleta ni sa vinaka saraga na noda tabatamata). Sa ganita tu me da kaya, sa gadrevi keda na Kalou, eda sa gadreva na Kalou kei na Nona Lotu, ka da sa veigadrevi talega. “[Eda] na caka tukuni ni veigauna” vata, me vaka e tukuna o Peresitedi Russell M. Nelson me baleti ira na tabagone qasecake. “Ena vakavuna o Koya mo rawata na ka tawarawa. …
“… Sai kemuni ‘na tabatamata digitaki’ (1 Pita 2:9), sa lesi taumada mai vua na Kalou ni cakava e dua na cakacaka veivakurabuitaki—ena nodra vukei ni vakarautaka na tamata ena vuravura oqo na iKarua ni Lesu Mai ni Turaga!”1
Ena veiveisau tu ni gauna oqo kei na kena tawakilai na veisiga ni mataka, sa rawa ni dua na gauna totoka ni dikevi koya vakai koya kei na tubu na bula vaka tabagone qasecake, ena raici ni noda inaki ena vuravura oqo, kei na vulici ni sala me maroroi kina na kosipeli ena noda bula e loma. Keitou sa yalomarau ni tomani iko ena ilakolako oqo ka nuitaka ni ko na dua tu na dauveisiko matau!
Na Vanua Mo Raici Keitou Kina
TQ Vakamacawa sa tiko ena Gospel Library ena ruku ni Mekasini se Uabula > Tabagone Qasecake. O na raica talega eso na neitou talanoa ena mekasini na Liaona, ena tabana ni Volamata ni Liaona, kei na tabana e vale ni ChurchofJesusChrist.org .
Keitou Via Rogoci Kemuni Tu
-
Na ulutaga cava soti o na vinakata me vakayagataki?
-
Na talanoa cava soti e tiko vei iko mo wasea?
-
Na vakatutu cava soti e tiko vei iko me baleti keitou?
O rawa ni vakauta mai na nomu talanoa, nanuma, kei na itukutuku lesu eso ki na liahona.ChurchofJesusChrist.org. Keitou sa vakanamata tu ni rogoci iko!