Te Mesia Ora
Te Iteraa Papu o te Mau Aposetolo
A faahanahana ai tatou i te fanauraa o Iesu Mesia a piti miliniuma i teie nei, te pùpù atu nei matou i to matou iteraa papu no ni’a i te huru mau oTo’na oraraa faito ore e te mâ e te mana mure ore o Ta’na tusia taraehara rahi. Aita atu e mana tei haaputapu hohonu i ni’a i te mau taata atoa o tei ora a’e na e o te ora â i ni’a i te fenua.
O Oia taua Iehova Teitei roa o te Faufaa Tahito, te Mesia o te Faufaa Apî. I raro a’e i te arata’iraa a To’na Metua i te Ao ra, o Oia tei hamani i te fenua. “Na’na i hamani te mau mea atoa nei, aore roa e, e ere oia i te hoê mea i hamanihia” (Ioane 1:3). Noa’tu e aita Ta’na e hara, ua bapetizohia ra Oia no te faatupuraa i te parau ti’a atoa. Ua haere noa Oia ma te “hamani maitai” (Te Ohipa 10:38), noa’tu ra, ua faahapahia Oia no te reira. Ta’na evanelia o te hoê ïa poroi no te hau e te hamani maitai. Ua titau Oia i te taato’araa ia pe’e i To’na huru. Ua haere Oia na ni’a i te mau e’a o Palesetina, ua faaora Oia i te feia ma’i, ua ite te matapô, ua faati’a i tei pohe. Ua haapii Oia i te parau mau no te ora mure ore, i te huru mau o to tatou oraraa na mua a’e i teie oraraa, i te tumu o to tatou oraraa i ni’a i te fenua nei e i te faufaa no te mau tamaroa e te mau tamahine a te Atua no te oraraa amuri a’e.
Ua haamau Oia i te oro’a ei haamana’oraa i Ta’na tusia taraehara rahi. Ua tape’ahia Oia e ua faautu’ahia i ni’a i te mau pariraa haavare no te haamauruuru i te hoê pùpù taata iino e ua faautu’ahia ia pohe i ni’a i te satauro i Kalavari. Ua horo’a Oia i To’na ora no te faaore i te mau hara a te taata nei. O Oia te horo’araa rahi roa a’e no te feia atoa o te haere mai e ora i ni’a i te fenua nei.
Te haapapu maitai nei matou e To’na ora, ua faatumuhia ïa i ni’a i te aamu o te taata nei, ua haamata anei i Betelehema e aore râ, ua hope anei i Kalavari. O Oia te Fanau Matamua a te Metua i te Ao ra, te Tamaiti Hoê roa i roto i te tino, te Faaora o to te ao nei.
Ua ti’a mai Oia mai roto mai i te menema ia “riro ei matamua no te feia i mairi i te taoto ra” (1 Korinetia 15:20). Ei Fatu tei Ti’a faahou mai, ua haere Oia i rotopu ia ratou o Ta’na i here i roto i te oraraa nei. Ua haere atoa Oia i rotopu i Ta’na mau “mamoe ê atu” (Ioane 10:16) i te fenua Amerika tahito ra. I roto i teie anotau apî nei, ua fâ mai Oia e To’na Metua i te tamaiti ra ia Iosepha Semita, te haamataraa ïa o te tohu maoro e, “Ia tae i te tu’uraa parau i te hope’araa mau o te mau tau ra” (Ephesia 1:10).
Ua papa’i te Peropheta Iosepha no te Mesia Ora: “Mai te ura auahi ra To’na na mata; te rouru o to’na upoo ra e mea teatea roa ïa mai te hiona mâ roa ra; ua ana’ana maira to’na mata e ua hau a’e i te ana’ana o te mahana; e o to’na reo ra mai te taheraa ïa o te pape rahi, oia te reo o Iehova, i te na oraa mai e :
“O vau nei te matamehai e te hope’a ra; o vau nei hoi oia o te ora nei, o vau nei oia o tei taparahihia; o vau nei hoi to outou arai i te Metua ra” (PH&PF 110:3–4).
Ua parau â te Peropheta No’na ra: “E i teie nei, i muri mai i te mau parau faaite e rave rahi o tei horo’ahia no’na ra, o teie hoi te parau faaiteraa hope’a roa ra, o ta maua e faaite atu nei no’na ra; Oia hoi te ora nei oia!
“No te mea ua ite mata’tura maua ia’na, i te pae atau hoi no te Atua; e ua faaroo maua i te reo i te faaiteraa mai e o oia ana’e te Fanau Tahi ra no te Metua—
“Na’na, e na roto ia’na, e no’na hoi, te mau ao i hamanihia nei e i hamanihia na hoi, e te mau taata hoi no reira e mau tamaiti e e mau tamahine fanau hoi ratou no te Atua ra” (PH&PF 76:22–24).
Te faaite nei matou na roto i te mau parau u’ana oia hoi, ua faahoihia mai To’na autahu’araa e Ta’na Ekalesia i ni’a i te fenua nei—“patuhia i ni’a iho i … te mau aposetolo e te mau peropheta, e o Iesu Mesia iho te tihi rahi” (Ephesia 2:20).
Te faaite papu nei matou e e hoi mai Oia i te hoê mahana i ni’a i te fenua nei. “E faaitehia mai te hanahana o Iehova, e ite paatoa te taata” (Isaia 40:5). E faatere Oia ei Arii no te Mau Arii e e parahi mai ei Fatu no te Mau Fatu, e e pi’o hoi te mau turi o te mau taata atoa i raro e e fa’i hoi te mau vaha atoa i roto i te haamoriraa i mua Ia’na. E ti’a tatou tataitahi ia haavahia e A’na mai te au i ta tatou mau ohipa e te mau hinaaro o to tatou mau aau.
Te faaite papu nei matou, ei Mau Aposetolo Na’na i Faatoro’a-mau-hia e—o Iesu te Mesia Ora, te Tamaiti tahuti ore a te Atua. O Oia te Arii rahi o Emanuela o te ti’a i teie mahana i te pae atau o To’na ra Metua. O Oia te maramarama, te ora, e te ti’aturiraa o to te ao nei. To’na haere’a, o te e’a ïa o te arata’i i te oaoa i roto i teie oraraa e i te ora mure ore i roto i te ao e haere mai nei. Ia haamauruuruhia te Atua no te horo’a faito ore o Ta’na Tamaiti hanahana.
TE PERESIDENIRAA MATAMUA
Te 1 no Tenuare, matahiti 2000
TE PÙPÙ NO TE TINO AHURU MA PITI