Se Bula na Karisito
Nodra iVakadinadina na Kuoramu Le Tinikarua
Ni da marautaka na ivakananumi e vuravura ni sucu i Jisu Karisito e na ruanaudolu na yabaki sa oti, me keitou dusimaka mada na neitou ivakadinadina ni nona loloma tawayalani, ka sega ni tukuni rawa na kena talei, ni cabora na Nona veisorovaki e na vuku ni noda ivalavala ca na lewe i vuravura taucoko. E sega ni se dua tale e bula vakatamata e vuravura oqo, me cecere cake na nona loloma, vei keda na lewe i vuravura, ka vakakina vei ira era se bera ni sucu.
Sa i Koya ga oqori o Jiova na Kalou Cecere ni Veiyalayalati Makawa, ka noda Mesaia tale ga e na Veiyalayalati Vou. E na veiliutaki ni Tamana, a mai dauniveibuli e vuravura. “Sa cakava na ka kecega ko koya; a sa sega e dua na ka sa caka, me sega ni cakava ko koya” (Joni 1:3). E dina ni tamata tawacala, a papitaiso ga me vakayacori kina na lewa dodonu. A sa “lako voli ka dau caka vinaka” (Cakacaka 10:38), ia, a vakasewasewani kina mai vei ira na tamata. Na nona kosipeli e itukutuku ni bula veisaututaki kei na veilomani. A vakatakekere ki na tamata yadua me ra muria na nona ivakarau. A lakova sara na veigaunisala e Palesitaina, me veivakabulai vei ira era tauvimate, me ra rai na mataboko, ka ra vakaturicake sara na mate. A dau vunautaka na ivakavuvuli dina, ka yavu ni vuravura tawamudu, ka ni da a bula dina mai liu ni se bera na noda mai bula vakayago e vuravura oqo, sa dau talaucaka tale ga na inaki dina ni noda bula, kei na sala me da lesu tale kina vua na Kalou e na bula ka tarava, oi keda na luvena vakayadua dina ga, eda yalewa se tagane.
A mai tauyavutaka na sakaramede me dusimaki keda tiko ki na Nona veisorovaki bibi ka cabora e na vukuda. A qai veretaki me mate e na vuku ni veibeitaki vakailasu a yaco vua, ka totogimate kina, e na kauveilatai e delana o Kalivari. A balemate e na Nona sauma vakaveisosomitaki na itotogi ni ivalavala ca kei vuravura kece ga. Me veisosomitaki na nona iloloma, e na vukudra era na bula e vuravura.
Keitou tukuna kina oqo na neitou ivakadinadina ni Nona bula, ka itakele ni itukutuku kei vuravura e na veitabayabaki kece ga, ni a sega ni tekivu mai Peceliema, ka sega tale ga ni a laki cava e Kalivari. Sa i koya ga na Ulumatua nei Tamada, ka Luvena Duabauga vakayago, io, na Dauveivueti kei vuravura.
A vakaturicake mai na ibulubulu, me “kedra isevu era sa moce tu” (1 Korinica 15:20). Ni sa tucake tale na Turaga, a qai laki sikovi ira e dau veitokani kaya e na nodra se bula voli. A laki vunau tale ga vei ira na Nona “[sipi] eso tani tale” (Joni 10:16) e na gauna eliu mai Amerika. E na taba gauna oqo, a rairai o Koya kei na Tamana vei Josefa Simici na cauravou, me dolava “kina na ka sa lewa ko Koya ni sa oti kecega na gauna ka sa lokuca” me vaka sa yalataki makawa mai (raica Efeso 1:10).
Ni vakamacalataki Karisito, a kaya kina o Josefa na Parofita: “A sa vaka na yameyame ni bukawaqa na yaloka ni matana; sa vulavula sara na drau ni uluna me vaka na uca cevata; ia na iserau ni matana sa uasivi cake mai na rarama ni matanisiga; a rorogo ni domona sa vaka na vadugu ni wailevu; io na domo i Jiova sa kaya:
“Ko i au na kena ivakatekivu kei na kena ivakataotioti; sa i au sa bula, sa i au talega a vakamatei, raica ko i au na Dautataro vei Tamada” (V&V 110:3–4).
A vaka tale ga oqo na vosa a cavuta na Parofita me baleti Koya: “Ia me ikuri ni itukutuku kece ka vakadinadinataki kina ko Koya, keirau sa [vakadinadinataka] oqo na kena iotioti me yacova edaidai. Raica sa bula dina tiko ko Koya!
“Keirau a raici Koya vakaidina ni sa tiko e na liga i matau ni Kalou; keirau sa rogoca tale ga na domo sa tukuna ni sa i Koya na Le Duabau ga nei Tamana—
“Raica sa vu mai vua na ka kece ga; ia sa i Koya sa lesi me bulia na vuravura; io e na vukuna ga era sa yaco kina na lewe i vuravura me ra luve ni Kalou” (V&V 76:22–24).
Me itakele ni neitou itukutuku oqo, ni sa vakalesui tale mai i vuravura na Nona matabete kei na Nona Lotu—ka “tara cake e na nodra yavu na i apositolo kei ira na parofita, ia sai koya ko Jisu Karisito sa kena ivakadei e na tutunivale” (Efeso 2:20).
Keitou vakadinadinataka ni na lesu tale mai i vuravura o Koya e na dua na gauna sa voleka mai. “E na qai vakarairaitaki mai na iukuuku i Jiova, ka ra na raica vata na tamata kecega” (Aisea 40:5). Ni na mai dabe me nodra Tui na Tui, ka nodra Turaga na Turaga, ni na vakarokoroko vua na tamata kece ga, ka ra na vakatusai koya na yame vakayadua, ni ra sokalou Vua. Ni da kau me da laki tu e Matana na tamata vakayadua, me ra vakatusa na yame vakayadua na cakacaka era sa dui cakava, kei na dui gagadre ni lomada.
Keitou vakadinadinataka, oi keitou sa tabaki me Nona i Apositolo—ni sai Jisu ga na Karisito ka se bula tiko ga, o koya na Luve ni Kalou ka na bula tiko ga me tawamudu, ni sa bula vakatukatuka. Sa i koya dina ga na Tui o Imanueli, sa tu edaidai e na ligaimatau nei Tamana. Sa i Koya ga na rarama, na vu ni bula, ka inuinui kei vuravura. E dodonu vinaka na nona sala, ka na laki cava e na marau ni bula oqo, kei na bula tawamudu e na bula mai muri. Me vakavinavinakataki tiko ga na noda Kalou, e na vuku ni nona isolisoli vakaitamera vei keda, na Luvena savasava.
Na Mataveiliutaki Taumada
1 Janueri 2000
Na Kuoramu ni Le Tinikarua