Ang Buhi nga Kristo
Ang Pagpamatuod sa mga Apostoles
Samtang kita magsaulog sa pagkatawo ni Jesukristo duha ka libo ka tuig na ang milabay, kita mohalad sa atong pagpamatuod sa pagkatinuod sa Iyang dili katupngan nga kinabuhi ug sa walay katapusan nga gahum sa Iyang labing dako nga sakripisyo sa pag-ula. Walay lain nga adunay labaw ka mahinungdanon nga impluwensya diha sa tanan kinsa nakapuyo ug magpuyo pa dinhi sa yuta.
Siya mao ang Halangdong Jehova sa Daang Tugon, ang Mesiyas sa Bag-ong Tugon. Ubos sa pagdumala sa Iyang Amahan, Siya mao ang tiglalang sa yuta. “Ang tanang mga butang nangahimo pinaagi kaniya; ug niadtong mga nangahimo na, walay bisan usa nga nahimo nga dili pinaagi kaniya” (Juan 1:3). “Bisan og walay sala, Siya gibunyagan aron sa pagtuman sa tibuok pagkamatarung. Siya mipadayon sa paghimog mga kaayohan” (Mga Buhat 10:38), apan siya gitamay tungod niini. Ang Iyang ebanghelyo usa ka mensahe sa kalinaw ug maayong kabubut-on. Siya kinasingkasing nga mihangyo sa tanan sa pagsunod sa Iyang panig-ingnan. Siya naglakaw sa mga dalan sa Palestina, nag-ayo sa masakiton, naghimo nga ang buta makakita, ug nagbuhi sa patay. Siya nagtudlo sa mga kamatuoran sa kahangturan, ang pagkatinuod sa atong kinabuhi nga wala pa dinhi sa yuta, ug ang kahimoan alang sa anak nga mga lalaki ug anak nga mga babaye sa Dios sa umaabot nga kinabuhi.
Siya mitukod sa sakramento isip usa ka handumanan sa Iyang labing dako nga sakripisyo sa pag-ula. Siya gidakop ug gihukman sa bakak nga mga pasangil, gipahamtangan og sala aron matagbaw ang manggugubot nga panon, ug gihukman nga mamatay diha sa krus sa Kalbaryo. Siya mihatag sa Iyang kinabuhi aron sa pag-ula sa mga sala sa tanang mga katawhan. Ang Iyang kinabuhi usa ka gasa nga gihatag alang sa tanan kinsa magpuyo dinhi sa yuta.
Kami ligdong nga mopamatuod nga ang Iyang kinabuhi, diin mao ang mahinungdanon sa tibuok kasaysayan sa tawo, nagsugod dili lamang sa Betlehem ni natapos sa Kalbaryo. Siya mao ang Unang Natawo sa Amahan, ang Bugtong Anak diha sa unod, ang Manunubos sa kalibutan.
Siya mibangon gikan sa lubnganan para mahimong “nahaunang gibanhaw sa mga nangamatay” (1 Mga Taga-Corinto 15:20). Isip Nabanhaw nga Ginoo, Siya miduaw niadtong Iyang gihigugma dinhi sa kinabuhi. Siya usab nangalagad taliwala sa Iyang “laing karnero” (Juan 10:16) sa karaang America. Sa kalibutan karon, Siya ug ang Iyang Amahan nagpakita ngadto sa batang lalaki nga si Joseph Smith, sinugdanan sa dugay nang gisaad nga “kapaigoan sa kahingpitan sa mga panahon” (Mga Taga-Efeso 1:10).
Mahitungod sa Buhi nga Kristo, ang Propeta Joseph misulat: “Ang iyang mga mata ingon sa usa ka siga sa kalayo; ang buhok sa iyang ulo puti sama sa lunsay nga yelo; ang iyang panagway mihayag labaw sa kahayag sa adlaw; ug ang iyang tingog ingon sa dahunog sa dagko nga mga katubigan gani ang tingog ni Jehova, nag-ingon:
“Ako mao ang sinugdanan ug ang katapusan; Ako mao siya kinsa nabuhi, Ako mao siya kinsa gipatay; Ako mao ang inyong manlalaban ngadto sa Amahan” (D&P 110:3–4).
Mahitungod Kaniya ang Propeta mipahayag usab: “Ug karon, human sa daghan nga pagpamatuod nga gihatag mahitungod kaniya kini mao ang pagpamatuod, ang katapusan sa tanan, nga kami naghatag kaniya: Nga siya buhi!
“Kay kami nakakita kaniya, gani diha sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan—
“Nga pinaagi kaniya, ug ngadto kaniya, ug tungod kaniya, ang mga kalibutan nalalang, ug ang mga lumulupyo niana mao ang anak nga mga lalaki ug anak nga mga babaye sa Dios” (D&P 76:22–24).
Kami mopahayag pinaagi sa ligdong nga mga pulong nga ang Iyang pagkapari ug ang Iyang Simbahan gipahiuli dinhi sa yuta—tinukod ibabaw sa patukoranan sa … mga apostoles ug mga propeta. Si Jesukristo mao ang ulohang bato sa pamag-ang” (Mga Taga-Efeso 2:20).
Kami mopamatuod nga Siya sa umaabot nga adlaw mobalik nganhi sa yuta. “Ug ang himaya ni Jehova igapadayag, ug ang tanan nga unod sa tingub makakita niini; kay ang ba-ba ni Jehova nagsulti niini” (Isaias 40:5). Siya momando isip Hari sa mga Hari ug mohari isip Ginoo sa mga Ginoo, ug ang tanang tuhod magaluhod, ug ang tanang dila magdayeg, sa pagsimba diha sa atubangan Kaniya. Matag usa kanato mobarug aron pagahukman Kaniya sumala sa atong mga buhat ug sa mga tinguha sa atong mga kasingkasing.
Kami mopamatuod, ingon nga sa husto nga paagi Iyang gi-orden nga mga Apostoles—nga si Jesus mao ang Buhi nga Kristo, ang imortal nga Anak sa Dios. Siya mao ang halangdong Haring Immanuel, kinsa nagbarug karon sa tuong kamot sa Iyang Amahan. Siya mao ang kahayag, ang kinabuhi, ug ang paglaum sa kalibutan. Ang iyang paagi mao ang dalan nga paingon ngadto sa kalipay dinhi niini nga kinabuhi ug sa kinabuhing dayon sa kalibutan nga moabut. Salamat ngadto sa Dios sa dili katupngan nga gasa sa Iyang balaan nga Anak.
Ang Unang Kapangulohan
Enero 1, 2000
Ang Korum sa Napulog Duha