Nailil

Vuʼunkutik ti Bankilal Peserenteetik xchiʼuk ti Lajchab Volol Tsobolik Jtakboliletik ta Schʼulna Jesukristo ta Chʼul Jchʼunolajeletik ta Slajebal Kʼakʼal, ta lekilal ta utsilal ta xkalkutik ti nupiel tsʼakiel ta vinik xchiʼuk antse jaʼ yaloj stuk Riox xchiʼuk ti jun nailile jaʼ tsots skʼoplal jech kʼu x-elan xchapanoj stuk Jpasvanej ta kʼu x-elan skuxlej ta sbatel osil yalab snichʼnabtab.

Skotol jchʼiel jkʼopojeletik, vinik xchiʼuk antsetik, jaʼ pasbilik ta slokʼol sbisol Riox. Ta jujuntal kʼanbilik ta skerem ta stseb pasbilik ta espíritu ta jtotik ta vinajel xchiʼuk xtok, oy lek tsots stuik ta sbatel osil ta jujuntal. Ti jech vinik spasel yakʼel o ants spasel yakʼele jaʼ jech x-elan jelelik kʼuxi stakʼik otkinel xchiʼuk jaʼ jech sjam smelol o noʼox ta kʼalal muʼyuk to ox ta xvokʼik, ta xvokʼik ta banamil xchiʼuk ta sbatel osil chʼiel kʼopojel.

Ti ta banamil bu to ox oyike, skeremetik xchiʼuk stsebetik, pasbilik kʼuchaʼal espíritu, la yotkinik Riox xchiʼuk la yichʼik ta mukʼ jech kʼuchaʼal stotik ta sbatel osil, xchiʼuk la schʼunbeik ti kʼusi xchapanoj ta sventa yalab snichʼnab kʼuxi staik sbekʼtal stakipalik xchiʼuk kʼuxi staik sbijilik ta banamil kʼuxi xlekubik s-utsibik ta lekil utsilal xchiʼuk kʼuxi staik skulejalik ta sbatel osil ta slajebale. Ta kʼu x-elan chapanbil lekil kuxetel oʼntonil ta xakʼ volel tsobel ta nailile ti maʼuk noʼox te ta xpaj ta mukinalile. Ti spasel mantaletik xchiʼuk ti kʼusitik chʼul akʼbil yeilal ta schʼul natak Rioxe jaʼ jech x-elan stakʼ x-akʼatik sutel ta stojolal Riox xchiʼuk ti nailile jaʼ jech volol tsobolik ta sbatel osil.

Ti baʼyuk mantal la yakʼ Riox ta Adan xchiʼuk Evae jaʼ koʼol sba xchiʼuk bu kʼalal xuʼ yuʼnik ti jech malalilik xchiʼuk kʼalal ajnililike, ta xkʼotik ta totil meʼiletik, ta xkalkutik ti smantal Riox ta sventa yalab snichʼnab ti jech x-epajik xchiʼuk ti ta snojesik banamile jech to oy o yichʼel ta mukʼ. Xchiʼuk xtok ta xkalkutik ti Rioxe spasoj mantal ti chʼul vuʼelil ta bolesvaneje jaʼ noʼox stakʼ xkʼot ta pasel ta vinik xchiʼuk ants bochʼotik nupul tsʼakalik smalal yajnil sbaik ta lekilale.

Ta xkalkutik ti kʼu x-elan pasbil akʼbil bekʼtalil snaʼ xchame jaʼ albil skʼoplal ta vinajel, ta xkalkutik ti schʼul lekil yutsil chʼiel kʼopojel xchiʼuk ti kʼu x-elan tsots skʼolal kuxlejale jaʼ jech x-elan schapanoj ta sbatel osil Riox.

Ti malalil xchiʼuk ajnilale jaʼ ta sbaik skʼelel stukʼulanel ta lekilal ta jujuntal, xchiʼuk jech kʼuchaʼal yol snichʼonik, (Salmo 127:3). Ti totil meʼile jaʼ ta schʼul baik schʼitesel skʼopojesel yol snichʼonik ta skʼanulajel oʼntonil xchiʼuk ta kʼusi lekilal, yakʼbelik ti kʼusi ta xtun yuʼnik ta sventa sbekʼtalik xchiʼuk ta schʼulelike, xchiʼuk ta xchanubtaselik ta skʼanel sbaik xchiʼuk ta skoltael sbaik ta jujuntal, ta xchʼunel smantaltak Riox xchiʼuk lekil jchʼiel jkʼopojeletikuk ta yichʼel ta mukʼ mantal vunetik ta vuuk noʼox chʼiem kʼopojemikuk. Ti malaliletik xchiʼuk ajnilaletik, meʼiletik xchiʼuk totiletike, jaʼ ta sbaik ta svat ta yelov Riox spasel ti vaʼay kʼusi jaʼ ta sbaik spasele.

Ti jnaklume jaʼ skʼeloj schapanoj stuk Riox. Ti nupiel tsʼakiel ta vinik xchiʼuk antse jaʼ lek jech kʼu x-elan schapanoj ta sbatel osil stuk Riox. Ti alab nichʼnabe ta skʼan ta xvokʼ ta x-ayanik ta bochʼotik lek nupul tsʼakalik xchiʼuk tsʼitesbilik kʼopojesbilik ta totil ta meʼil bochʼotik yichʼojik lek ta mukʼ xchiʼuk ta lek ta uts ti kʼu x-elan nupul tsʼakalike. Ti lekil utsilal ta skuxlej jun jnaklume jaʼ lek ta xkʼot ta pasel me jaʼ jech x-elan ta xichʼ pasel jech kʼu x-elan ta xchanubtasvan Kajvaltik Jesukristoe. Ti bochʼotik nupul tsʼakalik xchiʼuk nailalil ta xilik lekil utsilale ta xkʼot ta pasel xchiʼuk jaʼ te oyik ta kʼu x-elan smantalil xchʼunolajel oʼntonil, ta skʼopanel jtotik, ta sutesub oʼntonil. Ta tsʼikumajel, ta ichʼel ta mukʼ, ta kʼan bail, ta yaʼaybel smelol,ta abtel xchiʼuk ta kʼusitik chichʼanan pasel ti jaʼ ta xtun ta lekilale. Jaʼ albil tal ta vinajel, ti totil jaʼ ta sba skʼelel snitel ti nailalil ta kʼanbail xchiʼuk ta stukʼiluk xchiʼuk jaʼ ta sba skʼelel stukʼulanel xchiʼuk yakʼbel kʼusi ta xtun yuʼun tas venta skuxlej ta snailal xchiʼuk ta skʼelel ta stukʼulanel mu kʼusi spasik snuptanik. Ti meʼile jaʼ ta sba skʼelel stukʼulanel ti yalabtake. Ti liʼ kʼusi ta chʼul bail spasele, ti totil xchiʼuk meʼile, jaʼ koʼol schiʼil sbaik, oy sujelik ta skolta sbaik ta jujuntal. Ta vokolil ta bekʼtal takipalil, la jel o me ta yan kʼusi ta xkʼot ta pasel stakʼ skʼelik kʼusi stakʼ pasel ta jujuntal. Stakʼ xichʼik koltael ta yan utsʼ alal ti me yuʼun jaʼ jech ta xtune.

Ta xkalkutik ti jchʼiel jkʼopojeletik bochʼotik ta xixtanik ti kʼu x-elan yakʼoj yeik ta spasel kʼusi lek, ta xilbajinik o me ta x-echʼik ta stojolal snup xchiʼilik o me ta yalab snichʼnabike, me muʼyuk ta spasik ti kʼusi jaʼ ta sbaik spasel ta snailalike, ta jun kʼakʼal ta xalbeik ta stojolal Riox. Xchiʼuk xtok ta xkalkutik ti vokʼel chʼakel ta nailalile ta xikʼ talel ta stojolalik jchʼiel jkʼopojel, ta jnaklumetik xchiʼuk ta mukʼtikil lum skotol kʼusitik chopolik jech kʼu x-elan albil skʼoplal ta pokoʼ xchiʼuk ta achʼ jvaʼlejetik yuʼun Riox.

Ta xkalbekutik ti jchʼiel jkʼopojeletik bochʼotik ta sbaik skʼelel xchiʼuk jtunel j-abteletik ta sbejal banamil kʼuxi saʼbeik lek smelol kʼuxi xlekub nailalil ta sveta kʼuxi jaʼ uk yipal stsatsal ta lekilal ta volel tsobel ta komon.