Ewe Famini

Am, ewe Aewin Presetensi me ewe Mwichen Engon me Ruemon Aposel seni Ewe Mwichefenin Jises Kraist ren Aramas mi Pin non Fansoun Soponon, aua pwäratä pwe pupunu nefinan emon mwan me emon fefin mi kefinita me ren Kot me ewe famini mi nukunapan ewe kokkoten ewe Chon För ren manau ese much fan iten Noun kewe semirit.

Non meinisin aramas—mwan me fefin—mi för non nikinikin Kot. Emon me emon mi eu ngun mi achengicheng noun emon sam me in me won nang, me, usun chok, emon me emon a wor an fetanin napanap me tufich napanap. An emon epwe at are nengin mi eu kinikinin manauen emon me an popun ren manau me mwen ei fonufan, manau won ei fonufan, me manau ese much.

Non fansoun me mwen ei manau, ngunun at me nengin mi sinei me ra pin ngeni Kot pwe I Semer we Ese Much me ra etiwa An kokkot non minne Noun kewe semirit mi tongeni angei eu inis me kaeo me won ewe fonufan me fefeita ngeni ar repwe unusoch me ra tongeni weri manau ese much. Ewe kokkoten pwapwa mi atufichi chiechi non famini ne sopweno mwirin ewe peias. Efeioch me pwon mi pin mi fis me non ekkewe tempel me ra atufichi ngeni aramas ar repwe niwinsefanita fan mesen Kot me famini repwe tongeni chufengen ren fansoun ese much.

Ewe aewin annuk Kot a ngeni Atam me If a usun ar tufichin winiti sam me in pwe ir repwe pupunu fengen. Aua pwäratä pwe an Kot we annuk pwe Noun kewe semirit repwe nounou semirit me won ei fonufan mi chuen eu annuk. Aua pwan pwäratä pwe Kot a annuku pwe ekkewe manamanen nounou semirit repwe chok fis nefinen chok emon mwan me emon fefin, mi pupunu fengen fan annukun ewe muu.

Aua pwäratä pwe ewe napanap minne manau mi för mi kefinita seni nang. Aua pwäratä pwe manau mi pin me mi pwan auchea non an Kot we kokkot ese much.

Mwan me fefin mi pupunu mi wor wiser ar repwe tongei me tumunu emon me emon me pwan nour kewe semirit. “Ekkewe semirit ra eu niffang seni ewe Samon” (Kon Fel 127:3). Mi wor wisen sam me in pwe nour kewe semirit repwe mamarita non tong me wenewen, ne awora met mi namot fan iter non pekin inis me non pekin ngun, me aitir ar repwe tongei me angang ngeni emon me emon, anneasosichi ekkewe annuken Kot, me anneasosichi ekkewe annuken muu non fonuer we. Mwan me fefin mi pupunu—sam me in—repwe pwisin kapunguno me mwen Kot ren fisitan ekkei wis.

Ewe famini mi kefinita me mwen Kot. Pupunu nefinen emon mwan me fefin mi eu mettoch mi namot ren An we kokkot ese much. Semirit repwe efeioch ngeni uputiw non eu famini mi chufengen seni pupunu, me repwe mamarita fan emwenien emon sam me in mi aucheani ar kewe pwonen pupunu ren föfför ennet. Pwapwa non famini mi tongeni fisioch nupwen mi kouta won nongonongen an ewe Samon Jises Kraist kewe afanafan. Pupunu me famini mi fefeita mi fis me mamarita won nongonongen nuku, iotek, aier, omusomus, sufon, tong, angang, me föfföroch. Seni kokkoten nang, sam repwe wisen nemeni ar we famini non tong me wenewen me ra wisen awora met mi namot ren manau me tumunun ar we famini. Ekkewe in ra wisen tumunu nour kewe semirit. Non ekkei wis mi pin, sam me in repwe anisi emon me emon pwe ir mi chok nonnofengen. Samau, mano, are pwan ekkoch mettoch mi tongeni ekkesiwini ekkei wis. Pwan ekkoch chon famini repwe awora aninis nupwen mi namot.

Sia pesei ngeni kemi pwe aramas mi atai ekkewe annukun nimenimoch, mi auata nour kewe semirit are punuer kewe, are rese apwonueta wiser kewe non ewe famini repwe uta fan mesen Kot. Pwan, aua pesei ngeni kemi pwe paras fetanin ewe famini epwe efisata won aramas, sopw, me eif ekkewe osukosuk mi pwäratä seni soufosen nom me soufosen ikenai.

Aua kökkö won chon ekkewe sopw me chon wisen ewe kafomen mi wisoch non ekkis meinisin won fonufan ne aninis ren wisen tumunu me apochokuna ewe famini pwe ewe kinikinin manau mi auchea.