1 Na Emi, Ewuradze Nyankopɔn, kasaa kyerɛɛ Moses, see dɛ: Dɛm ^aSatan no, nyia ehyɛɛ no wɔ nyia me Woo no Kortoo no no ne dzin mu no, ɔnoara so nye nyia ɔwɔ hɔ fi ^bahyɛse no, na ɔbaa m’enyim, see dɛ—Hwɛ, mowɔ ha, soma me, mebɛyɛ wo babanyin, na mobɔpon adasa nyinara, ma ɔkra kor mpo rennyew, na ampaara dɛ ^cmebɛyɛ; dɛm ntsi fa w’enyimnyam ma me.

2 Mbom, hwɛ, mo ^aDɔba no, a ɔyɛ mo Dɔfo no a ^bmesaan mu yii no fi ahyɛse no, see me dɛ—^cEgya, wo ^dpɛ nyɛ hɔ, na ^eenyimnyam no nyɛ wodze afebɔɔ.

3 Dɛm ntsi, osiandɛ dɛm Satan no ^atseew etua wɔ mo do no, na ɔpɛɛ dɛ ɔsɛɛ nyimpa ne ^bpɛ no a Emi, Ewuradze Nyankopɔn, dze ama no no, na dɛ, memfa mankasa mo tum so mma no no; menam nyia me Woo no Kortoo no no, no tum do maa ^cwɔtoow no kyeen famu;

4 Na ɔbɛyɛɛ Satan, nyew, abɔnsam mpo, ^aakɔhwi nyinara egya, dɛ ɔndaadaa na ɔmfura adasa hɔn enyi, na ongya hɔn nkɔ ndɔmmum mu dɛ mbrɛ ɔpɛ, dodowara a wonnketsie me ndze mpo.

5 Na afei abowatsena no yɛ ^aonyitsewfo kyɛn hamu abowa biara a Emi, Ewuradze Nyankopɔn ayɛ.

6 Na Satan dze hyɛɛ abowatsena n’akoma mu, (osiandɛ ɔatwe dodowara edzi n’ekyir,) na ɔpɛɛ so dɛ ɔbɛdaadaa ^aEve, osiandɛ nna onnyim Nyankopɔn n’adwen, dɛm ntsi ɔpɛɛ dɛ ɔbɛsɛɛ wiadze.

7 Na ɔsee ɔbaa no dɛ: Nyew, ana Nyankopɔn ase dɛ—Mma hom nndzi ^ature yi mu ndua nyinara bi? (Na ɔkasaa duaa abowatsena n’anomu.)

8 Na ɔbaa no see abowatsena no dɛ: Ture yi mu ndua n’eduaba no yɛwɔ ho kwan dɛ yedzi bi;

9 Mbom dua a ihu a osi ture ne finimfin no n’eduaba no, na Nyankopɔn ase dɛ—Mma hom nndzi, eso mma hom mmfa hom nsa nnkã, ɔno hom bowu.

10 Na abowatsena no see ɔbaa no dɛ: Ampaara dɛ hom nnkowu bi;

11 Osiandɛ Nyankopɔn nyim dɛ da a hom bedzi bi no, hom ^aenyi bobue, na hom bɛyɛ dɛ enyame, na hom ^behu papa nye bɔn.

12 Na ber a ɔbaa no hun dɛ dua no ye dɛ wodzi, na ɔyɛ ^aakɔndɔ, na ɔyɛ dua a ɔbɛma ɔayɛ nyansafo no, ɔtseew n’eduaba no bi, na ^bodzii, na ɔmaa no kun a ɔkã noho so bi, na odzii.

13 Na hɔn beenu nyinara hɔn enyiwa buebuei, na wohun dɛ wodzi ^aadagyaw. Na wɔpepaam adɔmbadua n’ahataw na wɔyɛɛ nsamenyim maa hɔnho.

14 Na wɔtsee Ewuradze Nyankopɔn ne ndze, ber a ^awɔnam ture no mu ewimbibaamu; na Adam nye ne yer no kosumae fii Ewuradze Nyankopɔn n’enyim wɔ ture no mu ndua no mu.

15 Na Emi, Ewuradze Nyankopɔn, frɛɛ Adam na mesee no dɛ: ^aErokɔ hen?

16 Na ɔsee dɛ: Metsee wo ndze wɔ ture no mu, na musuroi, osiandɛ muhun dɛ midzi adagyaw, na musumaa moho.

17 Na Emi, Ewuradze Nyankopɔn, see Adam dɛ: Woana kãa kyerɛɛ wo dɛ idzi adagyaw? Ana edzi dua a mehyɛɛ wo ho mbra dɛ mma nndzi bi no bi, sɛ dɛm a nna nokwar owu ara na ^aibowu?

18 Na ɔbarimba no see dɛ: Ɔbaa no a edze no maa me no, na ehyɛɛ no mbra dɛ ɔnkã moho no, ɔno na ɔmaa me dua no n’eduaba no bi na midzii.

19 Na Emi, Ewuradze Nyankopɔn, see ɔbaa no dɛ: Ebɛnadze na ayɛ yi? Na ɔbaa no see dɛ: Abowatsena no na ^aɔdaadaa me, na midzii.

20 Na Emi, Ewuradze Nyankopɔn, see abowatsena no dɛ: Osiandɛ ayɛ iyi ntsi, ^andom bɛkã wo akyɛn ofiembowa nyinara, na hamu mbowadoma nyinara, wo yafun do na ebɛnantsew, na huntuma na ibedzi wo nkwa nda nyinara;

21 Na medze ɔtan bɔto ɔwo na ɔbaa no ntamu, na w’asefo nye n’asefo ntamu; ɔbɔbɔ wo tsir, na wo so abɔ n’anantsir.

22 Ɔbaa no, Emi, Ewuradze Nyankopɔn, see no dɛ: Mebɛma w’awokõ mu amandzehu adɔɔ sõ kɛse. ^aƆfona mu na ebɔwo mba, na ebɛdan wo kun, na ɔbɔhwɛ wo do.

23 Na Adam dze, Emi, Ewuradze Nyankopɔn, see no dɛ: Osiandɛ etsie wo yer ne ndze, na idzii dua n’eduaba a mehyɛɛ wo ho mbra dɛ—Mma nndzi bi no ntsi, ndom bɛkã asaase no wɔ wo ntsi; awerɛhow mu na ibedzidzi do wo nkwa nda nyinara.

24 Nsoɛ nye nhwirom so na obefifir ama wo, na ibedzi hamu ahaban.

25 W’enyim ^amfifir mu na ibedzidzi, kɛpem dɛ ebɛsan akɔ daadze—na ampaara dɛ ibowu—osiandɛ ɔno mu na woyii wo fii; na ^bhuntuma na eyɛ, na huntuma mu na ebɛsan akɔ.

26 Na Adam too ne yer no dzin Eve, osiandɛ ɔno na ɔyɛ atseasefo nyinara hɔn nã; na dɛm na Emi, Ewuradze Nyankopɔn, dze frɛɛ mbaa nyinara hɔn mu nyia odzi kan, na ^awɔdɔɔ sõ.

27 Adam, nye ne yer so, Emi, Ewuradze Nyankopɔn, yɛɛ nwoma ntar, na ^amedze hyɛɛ hɔn.

28 Na Emi, Ewuradze Nyankopɔn, see nyia me Woo no Kortoo no no dɛ: Hwɛ, ^anyimpa no abɛyɛ dɛ hɛn mu kor, ^bonyim papa nye bɔn; na afei bɛyɛ na ɔatsen ne nsa na ^cɔatsew ^dnkwadua no so bi, na oedzi na ɔatsena ase afebɔɔ.

29 Dɛm ntsi Emi, Ewuradze Nyankopɔn, mebɛma woefir edzi efi ^aEden Ture no mu dɛ ɔnkɔdɔw daadze a woyii no fii mu no;

30 Na dɛ mbrɛ Emi, Ewuradze Nyankopɔn, tse ase yi, dɛmara so na me ^ansɛm nnkɛsan aba kwa, osiandɛ sɛ wofi m’anomu pue a otwar dɛ ɔhyɛ mã.

31 Dɛm ntsi miyii nyimpa no edzi, na medze ^acherubfo nye gya nkrantsee a onyinanyinam, sii Eden Ture boka afamu dɛ wɔmbɔ nkwadua no ho ban.

32 (Na nsɛm yinom na mekãa kyerɛɛ m’akowaa Moses, na ɔyɛ nokwar dɛ mbrɛ me pɛ ara mpo, na makã akyerɛ wo. Hwɛ mma mmfa nnkyerɛ nyimpa biara, kɛpem dɛ mebɛse wo, gyedɛ hɔn a wɔgye dzi no nko. Amen.)