Mosese 4
    Footnotes

    Wase 4

    (June–Okotova 1830)

    Na sala sa yaco kina me tevoro ko Setani—Sa temaki Ivi—Erau sa lutu tani ko Atama kei Ivi, ka sa yaco kina na mate e vuravura.

    1 Au sa vosa vei Mosese, koi Au na Turaga na Kalou, ka kaya: Ko aSetani ko koya ko a vakarota ena yacana na noqu Le Duabau ga, sai koya ga a lako mai vei au ena bivakatekivu, ka kaya—Raica, koi au oqo, mo ni talai au, ni’u na luvemuni, kau na vueti ira kece mai na kawatamata, me kakua ni dua e yali, ia cau na vakayacora vakaidina, me vakarokorokotaki kina na yacaqu.

    2 Ia, raica, a sa kaya vei au na aLuvequ Lomani, o koya au sa Daulomana ka’u sa bDigitaka mai na ivakatekivu—I cTamaqu me yaco ga na dlomamuni, ka me nomuni tiko ga na elagilagi ka sega ni mudu.

    3 Raica au sa lewa me avakasavi sobu mai ko Setani ni sa bvorati au, ka segata me voroka na cgalala ni digidigi ka’u sa solia vua na tamata, koi Au na Turaga na Kalou; io sa vinakata tale ga me’u solia vua na noqu kaukauwa kei na nona kaukauwa na noqu Le Duabau ga.

    4 Ka sa yaco kina ko koya me Setani, io, na tevoro, na tama ni veika alasu kecega, me vakaisina ka vakamatabokotaka na tamata, ka me kauti ira vakabobula me vaka na lomana, io ko ira kecega era na sega ni via rogoca na domoqu.

    5 Ia sa kaukauwa sara na ailawaki ni gata mai vei ira na manumanu tawa lasa kecega ni vanua ka’u sa bulia, koi Au na Turaga na Kalou.

    6 (Ni sa lewevuqa era sa muri koya,) sa curuma kina na uto ni gata ko Setani ka segata me veretaki aIvi, ni sa sega ni kila na inaki ni Kalou, o koya sa segata kina me vakarusa na vuravura.

    7 Ka sa kaya kina vua na yalewa, mai na gusu ni gata: Oi; sa kaya bagi na Kalou—mo drau kakua ni kania na vua ni kau kecega ena awere? (Ka sa vosa mai na gusu ni gata.)

    8 A sa kaya na yalewa vua na gata: Sa tara me keirau kania na vua ni veivunikau ena were.

    9 Ia na vua ni kau ga ko sa raica ni sa tu e loma ni were, sa kaya kina na Kalou—Drau kakua ni kania, drau kakua tale ga ni tara, de drau mate.

    10 A sa kaya na gata vua na yalewa: Drau na sega dina ni mate.

    11 Raica sa kila na Kalou ena siga drau na kana kina, ena qai yadra dina na amatamudrau; ia drau na vaka na Kalou, ni drau na bkila na ka vinaka kei na ka ca.

    12 Ia ni sa kunea na yalewa sa yaga na kau me kakana, a sa ka e via raica na matada, ka sa kau me da agadreva me da vuku kina, sa qai tauca na vuana, ka bkania, a sa solia tale ga vua na watina erau tiko kaya, ka sa kania ko koya.

    13 A sa qai yadra na matadrau ruarua, ka rau kila ni rau sa aluvawale; a rau sa cula vata na drau ni lolo, ka cakava me nodrau liku.

    14 A rau sa rogoca na domo ni Turaga na Kalou, ni rau sa alako voli ena were, ni sa mudremudre na siga; a rau sa vunitaki rau e loma ni veikau ni were, ko Atama kei na watina mai na matana na Turaga na Kalou.

    15 Ia koi Au na Turaga na Kalou, au sa kaci vei Atama ka kaya vua: Ko sa alako ki vei?

    16 A sa kaya ko koya: Au a rogoca na domomuni ena were, ka’u qai rere ni’u kila niu sa luvawale, au a qai vunitaki au.

    17 Ia koi Au na Turaga na Kalou, au sa kaya vei Atama: Ko cei sa tukuna vei iko ni ko sa luvawale? Ko sa kana beka mai na kau au a vakarota mo kakua ni kana kina, ia kevaka ko na kana kina ko na amate vakaidina?

    18 A sa kaya na tagane: Na yalewa ko ni a solia vei au, ka vakarota me keirau tiko kaya, a solia vei au na vua ni kau au a qai kania.

    19 Ia koi Au na Turaga na Kalou, au sa kaya vua na yalewa: A cava na ka oqo ko sa kitaka? A sa kaya na yalewa: Sa avosa vaqaseqase vei au na gata, ka’u a qai kania.

    20 Ia koi Au, na Turaga na Kalou, au sa kaya vua na gata: Ni ko sa kitaka na ka oqo, ko na acudruvi vakalevu cake mai vei ira na manumanu yavaiva, vei ira tale ga na manumanu tawa lasa kecega ni vanua; ko na dolo ga e ketemu, ko na kania tale ga na kuvu ni soso ena veisiga kecega ni nomu bula;

    21 Ia ka’u na vakaveimecakitaki kemudrau kei na yalewa, ko ira na nomu kawa kei na nona kawa; ia ena butuqaqia na ulumu ko koya, ia ko na qaqia na bukubuku ni yavana.

    22 Ia koi Au na Turaga na Kalou, au sa kaya vua na yalewa: Au na vakalevutaka na nomu ararawa ni ko sa kunekune. Ko na dau rarawa ni ko sa vakasucu gone, ia ko na vakarorogo vua na watimu, ka na liu vei kemudrau ko koya.

    23 Ia koi Au na Turaga na Kalou, au sa kaya vei Atama: Ni ko a vakarorogo ki na domoi watimu, ka sa kania na vua ni kau ka’u a vakarota vei iko ka kaya—Mo kakua ni kania; raica sa cudruvi na qele ena vukumu; ia ko na kana mai kina ena rarawa ena veisiga kece ni nomu bula.

    24 Ena vakatubura talega vei iko na kau votovotoa kei na soni, ia ko na kania na co ni vanua.

    25 Ia ko na kania na kemu kakana ena abuno ni matamu me yacova na siga ko na suka tale kina ki na qele—ni ko a buli mai kina; raica ko sa bkuvu ni qele ga, ia ko na suka tale mo kuvu ni qele.

    26 A sa vakatoka ko Atama me yaca ni watina ko Ivi, ni sa tinadra na ka kecega sa bula; ia koi Au na Turaga na Kalou, au sa vakayacani koya vakakina na imatai ni yalewa, vei ira e avuqa.

    27 Io koi Au na Turaga na Kalou, au sa cakava vei Atama kei na watina na isulu kuli ni manumanu, ka avakaisulutaki rau kina.

    28 Ia koi Au na Turaga na Kalou, au sa kaya vua na noqu Le Duabau ga: Raica, sa yaco na atamata me vaka e dua vei kedatou, me bkila na ka vinaka kei na ka ca; ia oqo de na dodoka na ligana ka ctaura talega na dvunikau ni bula, ka kania ka bula me sega ni mudu,

    29 Ia, koi Au na Turaga na Kalou, au sa vakatalai koya tani mai na were ko aIteni, a sa wereca na qele ka buli mai kina ko koya;

    30 Ia me vaka au sa bula koi Au na Turaga na Kalou, ena sega ni tale wale na noqu avosa, ni sa cavuka yani mai na gusuqu, ena yaco vakaidina.

    31 Au sa vakasavi koya tani na tamata, ka biuta ena yasana ki natuicake ena Were ko Iteni, na aJerupimi kei na iseleiwau bukawaqa sa veigoleyaki tiko, me rau vakatawa na sala ki na vunikau ni bula.

    32 (Sai koya oqo na vosa ka’u sa tukuna vei Mosese na noqu tamata, ka sa dina me vaka na ka sa vinaka vei au, kau sa tukuni ira vei iko. Raica mo kakua ni vakaraitaka vua e dua tale na tamata, ia vei koya ga sa vakabauta, me yacova niu sa vakaroti iko. Emeni.)