Kapitulo 3
(Hunyo–Oktubre 1830)
Gilalang sa Dios ang tanang butang sa espirituhanong paagi sa wala pa kini gilalang sa kinaiyanhon nga paagi dinhi sa yuta—Gilalang niya ang tawo, ang unang tawo, sa ibabaw sa yuta—Ang babaye usa ka katabang alang sa lalaki.
1 Sa ingon niana ang langit ug ang yuta nahuman, ug ang tanang panon niini.
2 Ug sa ikapito nga adlaw ako, ang Dios, mihunong sa akong buhat, ug sa tanang butang nga akong gihimo; ug ako mipahulay sa ikapito nga adlaw gikan sa tanan nakong buhat, ug ang tanang butang nga akong gihimo nahuman na, ug ako, ang Dios, nakakita nga mga maayo kini;
3 Ug ako, ang Dios, mipanalangin sa ikapito nga adlaw, ug mibalaan niini; tungod kay diha niini ako mipahulay gikan sa akong tanang buhat diin ako, ang Dios, milalang ug mihimo.
4 Ug karon, tan-awa, sultihan ko kamo, nga kini mao ang mga henerasyon sa langit ug sa yuta, sa dihang gilalang kini, sa adlaw nga ako, ang Ginoong Dios, mihimo sa langit ug sa yuta,
5 Ug sa matag tanom sa kaumahan sa wala pa kini dinhi sa yuta, ug sa matag hilba sa kaumahan sa wala pa kini motubo. Kay ako, ang Ginoong Dios, milalang sa tanang butang, nga akong gipamulong, sa espirituhanong paagi, sa wala pa kini malalang sa kinaiyanhon nga paagi dinhi sa ibabaw sa yuta. Kay ako, ang Ginoong Dios, wala mopaulan sa ibabaw sa yuta. Ug ako, ang Ginoong Dios, milalang sa tanang anak sa katawhan; ug wala pay tawo nga mougmad sa yuta; kay sa langit gilalang ko sila; ug wala pay unod dinhi sa yuta, ni sa tubig, ni sa hangin;
6 Apan ako, ang Ginoong Dios, namulong, ug dihay gabon nga mitumaw gikan sa yuta, ug mibisbis sa ibabaw sa tibuok yuta.
7 Ug ako, ang Ginoo, miumol sa tawo gikan sa abog sa yuta, ug miginhawa ngadto sa lungag sa iyang ilong sa ginhawa sa kinabuhi; ug ang tawo nahimong usa ka buhi nga kalag, ang una nga unod diha sa yuta, ang unang tawo usab; bisan pa niana, ang tanang butang gilalang na kaniadto; apan sa espirituhanong paagi kini gilalang ug gihimo sumala sa akong pulong.
8 Ug ako, ang Ginoong Dios, nagtanom og tanaman sa silangang bahin sa Eden, ug didto akong gibutang ang tawo nga akong giumol.
9 Ug gikan sa yuta ako, ang Ginoong Dios, mihimo nga motubo ang matag kahoy, sa kinaiyanhon nga paagi, nga makalipay sa panan-aw sa tawo; ug ang tawo makakita niini. Ug nahimo usab kini nga usa ka buhi nga kalag. Kay kini espirituhanon atol sa adlaw nga gilalang nako kini; kay nagpabilin kini sa kalibotan diin ako, ang Dios, milalang niini, oo, gani ang tanang butang nga akong giandam aron magamit sa tawo; ug ang tawo nakakita nga maayo kini alang sa pagkaon. Ug ako, ang Ginoong Dios, nagtanom usab og kahoy sa kinabuhi sa taliwala sa tanaman, ug usab sa kahoy sa kahibalo sa maayo ug sa daotan.
10 Ug ako, ang Ginoong Dios, mihimo nga ang usa ka suba mogula gikan sa Eden aron mobisbis sa tanaman; ug gikan didto nagbulag-bulag kini, ug nahimong upat ka tinubdan.
11 Ug ako, ang Ginoong Dios, mitawag sa nahauna og Pison, ug nagliyok kini sa tibuok yuta sa Havilah, diin ako, ang Ginoong Dios, mihimo og daghang bulawan;
12 Ug ang bulawan niana nga yuta maayo, ug dihay bdellium ug ang onyx nga bato.
13 Ug ang ngalan sa ikaduhang suba gitawag og Gihon; nga nagliyok sa tibuok yuta sa Ethiopia.
14 Ug ang ngalan sa ikatulong suba mao ang Hidekel; kana nga nagpadulong paingon sa silangan sa Asiria. Ug ang ikaupat nga suba mao ang Eufrates.
15 Ug ako, ang Ginoong Dios, mikuha sa tawo, ug mibutang kaniya ngadto sa Tanaman sa Eden, aron moatiman niini, ug moalima niini.
16 Ug ako, ang Ginoong Dios, misugo sa tawo, nga nag-ingon: Sa matag kahoy sa tanaman gawasnon ka nga mokaon,
17 Apan sa kahoy sa kahibalo sa maayo ug sa daotan, dili ka mokaon niini, bisan pa niana, makapili ka alang sa imong kaugalingon, kay gihatag kini kanimo; apan, hinumdomi nga nagdili ako niini, kay sa adlaw nga ikaw mokaon niana ikaw sa pagkatinuod mamatay.
18 Ug ako, ang Ginoong Dios, miingon ngadto sa akong Bugtong Anak, nga dili maayo nga ang tawo mag-inusara; mao nga, ako mohimo og usa ka katabang alang kaniya.
19 Ug gikan sa yuta ako, ang Ginoong Dios, miumol sa matag mananap sa kaumahan, ug matag langgam sa kahanginan; ug misugo nga sila moadto kang Adan, aron makita unsa ang iyang itawag kanila; ug sila usab buhi nga mga kalag; kay ako, ang Dios, miginhawa ngadto kanila og ginhawa sa kinabuhi, ug mimando nga bisag unsa ang itawag ni Adan sa matag buhi nga nilalang, kinahanglan mao kana ang ngalan niini.
20 Ug si Adan mihatag og mga ngalan sa tanang baka, ug sa mga langgam sa kahanginan, ug sa matag mananap sa kaumahan; apan alang kang Adan, walay katabang alang kaniya.
21 Ug ako, ang Ginoong Dios, mihimo nga si Adan mahikatulog og maayo; ug nahikatulog siya, ug akong gikuha ang usa sa iyang mga gusok, ug mitak-op sa unod niini;
22 Ug ang gusok diin ako, ang Ginoong Dios, mikuha gikan sa tawo, gihimo nako og usa ka babaye, ug midala kaniya ngadto sa lalaki.
23 Ug si Adan miingon: Karon nakahibalo ako nga kini mao ang bukog sa akong mga bukog, ug unod sa akong unod; siya pagatawgon og Babaye, tungod kay gikuha siya gikan sa lalaki.
24 Busa ang lalaki mobiya sa iyang amahan ug inahan, ug mounong sa iyang asawa; ug sila mahimong usa ka unod.
25 Ug silang duha mga hubo, ang lalaki ug ang iyang asawa, ug wala maulaw.