1 Konsa, syèl la ak tè a te ^afini ak tout sa ki te ^bladan yo.

2 Epi nan setyèm jou a, mwen menm Bondye, m te fini travay mwen, ak tout bagay m te fè; epi m te ^arepoze nan ^bsetyèm jou a apre tout travay mwen, epi tout bagay m te fè yo te fini, epi mwen menm Bondye, m te wè yo te bon;

3 Epi mwen menm Bondye, m te ^abeni setyèm jou a, epi m te sanktifye l; paske nan jou sa a m te repoze anba ^btravay mwen menm Bondye m te kreye epi m te fè.

4 Epi kounyeya, gade, m di ou, sa yo se jenerasyon syèl la ak tè a, lè yo te kreye a, nan epòk mwen menm Senyè Bondye a, m te fè syèl la ak tè a,

5 Ak chak pyebwa ki nan jaden yo ^aanvan yo te sou tè a, ak chak plant ki nan jaden yo anvan yo te grandi. Paske mwen menm Senyè Bondye a, m te ^bkreye tout bagay m te pale yo, ^cespirityèlman, anvan yo te vin sou fas tè a natirèlman. Paske mwen menm Senyè Bondye a, m potko fè lapli tonbe sou fas tè a. Epi mwen menm Senyè Bondye a, m te ^dkreye tout pitit lèzòm yo; epi potko gen yon moun pou kiltive ^etè a; paske m te ^fkreye yo nan ^gsyèl la; epi potko gen kò fizik sou tè a, ni nan dlo yo, ni anlè a;

6 Men, mwen menm Senyè Bondye a, m te pale, epi te gen yon ^abwouya ki te sòti sou tè a monte anlè, epi l te wouze tout fas tè a nèt.

7 Epi mwen menm Senyè Bondye a, m te fòme lòm avèk ^apousyè tè a, epi m te soufle souf lavi a andedan twou nen l; epi ^blòm te vin tounen yon ^cnanm vivan, ^dpremye kò fizik ki te sou tè a, premye moun nan tou; sepandan, tout bagay te kreye deja; men, yo te kreye espirityèlman epi yo te fèt daprè pawòl mwen.

8 Epi mwen menm Senyè Bondye a, m te plante yon jaden nan kote lès ^aEdenn, epi se la m te mete moun m te fòme a.

9 Epi nan tè a, mwen menm Senyè Bondye a, m te fè grandi natirèlman chak pyebwa ki fè je lòm plèzi; epi lòm te kapab wè l. Epi l te vin tounen yon nanm vivan tou. Paske li te espirityèl nan epòk m te kreye l la; paske li rete nan anviwònman mwen menm Bondye, m te kreye l la, wi, menm tout bagay m te pare pou itilite lòm; epi lòm wè li te bon pou manje. Epi mwen menm Senyè Bondye a, m te plante ^apyebwa lavi a tou nan mitan jaden an, ak ^bpyebwa konesans byen ak mal la.

10 Epi mwen menm Senyè Bondye a, m te fè yon rivyè sòti nan Edenn pou wouze jaden an; epi se la li te divize tounen kat ^abranch.

11 Epi mwen menm Senyè Bondye a, m te rele premye a Pichon, epi l te travèse tout tè Avila a, kote Senyè Bondye a te kreye anpil lò a;

12 Epi lò tè sa a te bon, epi te gen bdelyòm ak pyè kristal onyx.

13 Epi non dezyèm rivyè a se Giyon; se rivyè sa a ki travèse tout tè Etyopi a.

14 Epi non twazyèm rivyè a se te Idekèl; se rivyè ki ale nan direksyon lès Asiri a. Epi katriyèm rivyè a se te Efrat.

15 Epi mwen menm Senyè Bondye a, m te pran lòm, epi m te mete l nan jaden Edenn nan, pou l anbeli l epi pou l pran swen l.

16 Epi mwen menm Senyè a, m te kòmande lòm, m te di: Ou kapab manje nan chak fwi ki nan jaden an avèk libète,

17 Men, ou pa dwe manje nan fwi konesans byen ak mal la sepandan, ou kapab ^achwazi pou tèt pa w, paske ou gen kapasite sa a; men, sonje m te defann sa, paske ^bjou ou manje ladan l w ap ^cmouri kanmèm.

18 Epi mwen menm Senyè Bondye a, m te di ^aSèl Pitit Literal mwen an, sa pa bon pou lòm ta pou kont li; se sa ki fè, m ap fè yon ^bkonpay pou li.

19 Epi avèk tè a, mwen menm Senyè Bondye a, m te fòme chak bèt ki nan chan yo, ak chak volay ki anlè a; epi m te kòmande pou yo vin jwenn Adan, pou wè kòman li t ap rele yo; epi yo te nanm vivan tou; paske mwen menm Bondye, m te soufle souf lavi a andedan yo, epi m te kòmande pou nenpòt non Adan ta bay chak kreyati vivan, se t ap non yo.

20 Epi Adan te bay tout betay yo non, ak volay ki anlè yo, ak chak bèt ki nan chan yo; men, kanta pou Adan, pa t gen okenn konpay pou li.

21 Epi mwen menm Senyè Bondye a, m te lakòz yon gran somèy tonbe sou Adan; epi l te dòmi, m te pran youn nan kòt li yo epi m te refèmen kò li ankò;

22 Epi avèk kòt ki mwen menm, Senyè Bondye a, te pran nan lòm nan, m te fòme yon ^afi, epi m te mennen l bay lòm.

23 Epi Adan te di: M konnen moun sa a se zo ki soti nan zo mwen, ak ^achè ki soti nan chè mwen; M ap rele l Fi, paske li te sòti nan yon nonm.

24 Se poutèt sa, yon nonm dwe kite papa l ak manman l pou l ^aatache avèk madanm li; epi y ap vin tounen yon ^bsèl kò.

25 Epi yo tou lède te toutouni, mari a ak madanm nan, epi yo pa t wont.