Joseph Smith—Mateo

1 Nokuti ndinoti kwamuri, kuti imi hamuchazondiona kubvira zvino uye mugoziva kuti ndini iyeyo uyo akanyorwa nezvake nevaporofita, kusvika mati: Akaropafadzwa uyo ^aanouya muzita raIshe, mumakore edenga, nedzose ngirozi tsvene dziinaye. Zvino ndipo pakanzwisisa vadzidzi vake kuti achauya zvakare panyika, mushure mekunge aremekedzwa nekugadzwa korona kurudyi ^brwaMwari.

2 Uye Jesu akaenda kunze, uye akabva patemberi; uye vadzidzi vake vakauya kwaari, kuti vazomunzwa, vachiti: Tenzi, tiratidzei nezvedzimba dzetemberi, sezvo makati—Dzichakandwa pasi, uye dzosiiwa kwamuri dzave dongo.

3 Uye Jesu akati kwavari: Hamusikuona zvose zvinhu izvi, uye hamuzvinzwisise here? Zvirokwazvo ndinoti kwamuri, hapachazosara pano, patemberi ino ^adombo rimwechete riri pamusoro perimwe risingakandwe pasi.

4 Uye Jesu akavasiya, uye akaenda ^amuGomo reMiorivhi. Uye agere paGomo reMiorivhi, vadzidzi vakauya kwaari kaverevere, vachiti: Tiudzei kuti zvinhu izvi zvichaitika rinhi zvamataura pamusoro pekuparadzwa kwetemberi, nekwemaJuda; uye chii ^bchiratidzo ^cchekuuya kwenyu, ^dnekwekuguma kwenyika, kana kuparadzwa ^ekwevakaipa, uko kuriiko kuguma kwenyika?

5 Uye Jesu akapindura, uye akati kwavari: Chenjerai kuti hakuna munhu anokunyengedzai;

6 Nokuti vazhinji vachauya muzita rangu, vachiti—Ndini Kristu—uye vachanyengedza vazhinji;

7 Zvino vachakuisai ^akunotambudzwa, uye vagokuurayayi, uye imi ^bmuchavengwa nemarudzi ose, pamusana pezita rangu;

8 Uye zvino vazhinji vachagumburwa, uye vachafumurana, uye vachavengana;

9 Uye vakawanda vaporofita venhema vachabuda, uye vachanyengedza vakawanda;

10 Uye nokuti huipi huchawanda, ^arudo rwevazhinji rwuchatonhora;

11 Asi uyo acharamba akasimba uye akasakundwa, iyeyo achaponeswa.

12 Kana imi, naizvozvo, pamuchaona ^achinyangadzo chinoparadza, chakataurwa nezvacho ^bnaDanieri muporofita, pamusoro pekuparadzwa ^ckweJerusarema, zvino muchamira munzvimbo ^dtsvene, ani zvake anoverenga ngaanzwisise.

13 Zvino ngavaite avo vari muJuda vaende ^amumakomo;

14 Regai uyo ari pamusoro pemba atize, uye asazodzoka kuzotora kana chii zvacho mumba make;

15 Kana kubvumira uyo ari mumunda kudzokera kunotora nhumbi dzake;

16 Uye nhamo kune avo vane ^apamuviri, nekune avo vari kuyamwisa mumazuva iwayo;

17 Nokudaro, namatai Ishe kuti kutiza kwenyu kusave muchando, kana musi weSabata;

18 Nokuti ipapo, mumazuva iwayo, kuchave nokutambudzika kukuru ^akumaJuda, nekuvagari ^bveJerusarema, zvisati zvakambotumirwa kuIsraeri, naMwari, kubvira pakutanga kweumambo hwavo kusvika nguva ino; kwete kana nariini hakuchazotumirwa zvakare kumaIsraeri.

19 Zvose zvinhu zvavawira mavambo chete ekusuwa kuchauya pavari.

20 Uye kunze kwekunge mazuva iwayo akaitwa mashoma, hakuzove nemumwechete wavo achaponeswa; asi pamusana pevakasarudzwa, maererano nechibvumirano, mazuva iwayo achaitwa mashoma.

21 Tarisai, izvi zvinhu ndazvitaura kwamuri pamusoro pemaJuda; uye zvakare, mushure mematambudziko emazuva iwayo ayo achauya kuJerusarema, kana munhu akati kwamuri, Onai houno Kristu, kana kuti uyo, musamutende;

22 Nokuti mumazuva iwayo muchabudawo vana Kristu venhema, nemaporofita venhema, uye vacharatidza zviratidzo zvikuru nezvishamiso, zvekuti dai zvaikwanisika, vacha nyengedza ivochaivo vakasarudzwa, avo vanove vakasarudzwa maererano nechibvumirano.

23 Tarisai, ndinotaura zvinhu izvi kwamuri pamusana ^apevakasarudzwa; kana nemiwo muchanzwa ^bnezvehondo, nerunyerekupe rwehondo; onai kuti hamutambudzwe nokuti zvose zvandakutaurirai zvinoitika; asi magumo haasati asvika.

24 Tarisai, ndakakutaurirai kare;

25 Nokudaro, kana vakati kwamuri: Tarisai, ave mugwenga, musaendeko: Tarisai, ari mumipanda yakavandika; musazvitende;

26 Nokuti sekuuya kunoita chiedza chemangwanani chichibva kumabvazuva, uye chichipenya kunyangwe kusvika ^akumadokero, uye chichizara pasi pose, saizvozvo kana kuuya kweMwanakomana weMunhu ndozvakuchaita.

27 Uye zvino ndinokuratidzai mufananidzo. Tarisai, pose pane chitunha, ipapo makondo ^aachaungana; saka nokudaro vakasarudzwa vangu vachaungana kubva kumativi mana enyika.

28 Uye vachanzwa nezvehondo, nerunyerekupe rwehondo.

29 Tarisai ndinotaura kuitira vakasarudzwa vangu; nokuti rudzi rwuchamukira rudzi, uye umambo hugomukira umambo; kuchave ^anenzara, nezvirwere, nekundengendeka kwenyika, munzvimbo dzakasiyana-siyana.

30 Uye zvakare, pamusana pekuti huipi huchanyanya, rudo rwevanhu rwuchatonhora; asi uyo asingazokurirwa, iyeyo achaponeswa.

31 Uye zvakare, iri Vhangeri reUmambo richaparidzwa ^apasi pose, kupupura kumarudzi ose, uye zvino kuguma kuchauya, kana kuparadzwa kwevakaipa;

32 Uye zvakare chinyangadzo chinoparadza, icho chakataurwa nezvacho naDanieri muporofita, chichazadzikiswa.

33 Uye pakarepo mushure mematambudziko emazuva iwayo, zuva ^arichasvibiswa, uye mwedzi hauzopa chiedza chawo, uye nyenyedzi dzichapunzika kubva kudenga, uye masimba edenga achazunguzwa.

34 Zvirokwazvo, ndinoti kwamuri, chizvarwa chino, icho chicharatidzwa zvinhu izvi, hachizopfuura kusvika zvose zvandataura zvazadzikiswa.

35 Nyangwe zvazvo mazuva achauya ekuti denga nenyika zvichapfuura; asi ^amazwi angu haazopfuura, asikuti zvose zvazadzikiswa.

36 Uye, sekutaura kwandamboita, mushure ^amematambudziko emazuva iwayo, uye masimba ematenga achazunzwa, zvino pachabuda chiratidzo cheMwanakomana weMunhu kudenga, uye zvino ndipo pachachema marudzi ose epanyika; uye vachaona Mwanakomana weMunhu ^bachiuya mumakore edenga, nesimba nekubwinya kukuru;

37 Uye uyo achachengetedza ^aizwi rangu, haazonyengedzwa, nokuti Mwanakomana weMunhu achauya, uye achatumira ^bngirozi dzake pamberi pake nekuridzwa kukuru kwehwamanda, uye ^cvachaungana pamwechete avo vakasara vevakasarudzwa vangu kubva kumativi mana emhepo, kubva kurutivi rumwe rwedenga kunosvika kune rumwe.

38 Zvino dzidzai mufananidzo ^awemuwonde—Panenge mapazi awo achiri matete, uye uchitanga kubuda mashizha, munoziva kuti zhizha rave pedyo;

39 Saizvozvo nokudaro, vakasarudzwa vangu, pavachaona zvose zvinhu izvi vachaziva kuti ave pedyo, kunyangwe pamusuwo;

40 Asi nezvezuva iroro nenguva yacho, hapana ^aanoziva; kwete ngirozi dzaMwari dziri kudenga, asi Baba vangu chete.

41 Asi sezvakanga zviri mumazuva ^aaNoa, ndozvazvichange zvakaitawo pakuuya kweMwanakomana weMunhu;

42 Nokuti zvichave kwavari, sezvazvakanga zvakaita mumazuva kusati kwaita ^amafashamu; nokuti kusvika musi wakapinda Noa mungarava vakanga vachidya nekunwa, vachiroora nokupa mukuroorana;

43 Uye vakasaziva kusvika mafashamu auya, uye ikavatora vose; ndizvo zvichaitawo kuuya kweMwanakomana weMunhu.

44 Zvino zvichazadzikiswa izvo zvakanyorwa, kuti ^amumazuva ekupedzisira, vaviri vachange vari mumunda, mumwechete achatorwa, uye mumwe ^bagosiiwa;

45 Vaviri vachange vachikuya paguyo, mumwechete achatorwa, uye mumwe agosiiwa;

46 Uye zvandinotaura kune umwe, ndinotaura kune vanhu vose; naizvozvo ^arindirai, nokuti hamuzive kuti inguvai ichauya Ishe wenyu.

47 Asi zivai izvi, dai murume akanaka wemba akaziva nguva yaiuya mbavha, angadai akagarira, uye angadai asina kubvumira imba yake kuti ipazwe, asi angadai anga akagadzirira.

48 Nokudaro nemiwo ivai makagadzirira, nokuti munguva yamusingafungire Mwanakomana weMunhu anouya.

49 Ndianiko, zvino muranda ^aakatendeka uye akangwara, uyo akaitwa natenzi wake mutongi wemba yake, uye kuvapa kudya nenguva yacho?

50 Akaropafadzwa muranda iyeyo uyo tenzi wake, paanouya, muranda anowanikwa achiita izvozvi; uye zvirokwazvo ndinoti kwamuri, achamuita mutongi wezvose zvinhu zvake.

51 Asi kana muranda akaipa uye akati mumwoyo make: Tenzi wangu ^aanonoka kuuya kwake,

52 Uye achatanga kurova vamwe vake varanda, uye nokudya nokunwa nevakadhakwa,

53 Tenzi wemuranda iyeyo achauya muzuva raasingamutarisire, uye munguva yaasingazive,

54 Uye achamutsemura nepakati, uye achamupa nzvimbo nevanyengedzi; kuchavepo kuchema ^anekugeda-geda kwemeno.

55 Uye ndiko kuuya kunoita ^akupera kwevakaipa, maererano nechiporofita chaMosesi, chinoti: Vachabviswa mukati mevanhu; asi kuguma kwenyika hakusati kwasvika asi mushure menguva pfupi-pfupi.