Joseph Smith—Abakɔsɛm

1 Osian nkorɔfo a wɔpɛ dɛ wodzi bɔn hɔn nsɛm a wɔdze rikyima, dze resɛɛ ^aJesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne ^bkankɔ na no mpontu, nsɛm a dɛm nkorɔfo yi rekã na wɔrekyerɛw dɛ wɔdze resɛɛ Asɔr no ne dzin, ne kankɔ na no mpontu wɔ wiadze mu ntsi—na wɔama merekyerɛw abakɔsɛm yi, dze asakyer nkorɔfo hɔn adwen, ama hɔn a wɔreper hwehwɛ nokwar no eehu nokwar, dɛ mbrɛ woeesi no ho, dza ɔfa mankasa moho na Asɔr no ho, susuampaara dɛ mowɔ nokwar no wɔ mo hɔ.

2 Abakɔsɛm yi mu na mebɛkã ndzɛmba horow a osisii a ɔfa Asɔr yi ho, wɔ nokwar nye tseneneeyɛ mu, tse dɛ mbrɛ osisii, anaa tse dɛ mbrɛ ɔtse mber yi mu, a ɔyɛ sesei [1838] mfe awɔtwe fi ber a ^awɔtseew dɛm Asɔr yi.

3 ^aWɔwoo me wɔ hɛn Ewuradze n’afe mpemahaawɔtwe enum mu wɔ Mumu ne da a otsĩa eduonu ebiasa mu, wɔ Sharon kurow mu, wɔ Windsor mansin mu, wɔ Vermont man mu. … M’egya, ^bJoseph Smith Panyin, fii Vermont Ɔman mu kɛtsenaa Palmyra, wɔ Ontario (seseiara wɔfrɛ no Wayne) mansin, a ɔwɔ New York man mu, ber a nna medzi mfe du, anaa bɛyɛ dɛm no. M’egya dur Palmyra no, ne mfe bɛyɛ anan ekyir no, ɔnye n’ebusua tui kɔr Manchester wɔ Ontario mansin kor noara mu—

4 N’ebusua hɔn dodow yɛ akra dubiako, hɔn edzin nye, m’egya, ^aJoseph Smith; me ^bnã Lucy Smith (ansaana ɔrobɔwar no nna ne dzin dze Mack, Solomon Mack ne babaa); mo nuanom mbanyin, ^cAlvin (ɔno owuu Ɔberɛfɛw 19, 1823, ber a nna oedzi mfe 26), ^dHyrum, emi, ^eSamuel Harrison, William, Don Carlos; nye me nkyerɛbaa, Sophronia, Catherine, na Lucy.

5 Yetui kɛtsenaa Manchester no ne mfe ebien mu no nyamesom ho nhuanyan soronko bi tahyee wɔ bea a yɛtse no. Ɔhyɛɛ ase wɔ Methodist asɔrmba mu, na annkyɛr na asɔrasɔr a wɔwɔ dɛm mantam no mu no suoo mu. Nokwar, ɔtahyee wɔ ɔman no ne mansin nyinara do, na nyimpa dɔm tutui kãa hɔnho boaa ano kɔdɔm asɔr horow, dɛm no dze basabasayɛ na mpaapaamu kɛse baa nyimpa no mu, binom yɛɛ dede ara yie wɔ ho, binom se, ^a“Hwɛ ha!” na binom so se “Hwɛ hɔ!” Binom kɔr Methodist asɔr afã, binom so kɔr Presbyterian afã, na binom so kɔr Baptist afã.

6 Na eso dɔ kɛse a hɔn a wɔsakyeer hɔn kɔr asɔr horow mu kyerɛɛ wɔ hɔn nsakyer ber mu no, na asɔfo no dwuma a wodzii no enyiberdo kyerɛe na ahokekã soronko a wɔdze maa nyamesom ho nkãtse yi no, aama wɔdze asakyer obiara no, dɛ mber a nna wɔkã dɛ wɔmma wɔndɔm asɔr biara a wɔpɛ; naaso ber a hɔn a wɔsakyeer hɔn no hyɛɛ ase dɛ wɔrebɔ apetse no, na binom rokɔ kuw kor mu, na binom so rokɔ kuw kor so mu no, wohun dɛ nkãtse pa a asɔfo no na hɔn a wɔsakyeer hɔn no kyerɛe no yɛ ndaadaa na ɔnnyɛ nokwar; osiandɛ basabasayɛ kɛse sii na adwensɛɛ bae—ɔsɔfo kõ tsia ɔsɔfo, nna hɔn a wɔasakyer hɔn no tsiaa hɔnho; dɛm ntsi nkãtse pa nyinara a nna wɔwɔ ma hɔnho nkorkor no; sɛ nna wɔwɔ bi dze a, ɔyeew koraa osian kasa a wɔkasaa dze ^atsiaa hɔnho na hɔn gyedzi ho ekyingye ntsi.

7 Aber yi mu nna mowɔ me mfe duenum mu. M’egya n’ebusua no sakyeree kɔr Presbyterian gyedzi no mu, na hɔn mu baanan kɔdɔɔm hɔn, hɔn nye, me nã, Lucy; mo nuanom mbanyin Hyrum na Samuel Harrison; nye m’akyerɛba Sophronia.

8 Ber a dɛm nhuanyan kɛse no rokɔ do no, mehyɛɛ ase dwendween papaapa na midzii atseetsee ara yie; mbom nna ɔwɔ mu dɛ nkã a metse no no mu dɔ dze, naaso motwee moho koraa fii ekuwekuw yinom ho, mbom aber biara a mutumii no mokɔr hɔn nhyiamu dodowara bi. Mber kakra guu mu no, me pɛ hyɛɛ ase dɛ ɔrekɛhɛn Methodist asɔr mu, na minyaa pɛ dɛ mobɔkɔ akɔdɔm hɔn; mbom nna adwensɛɛ na aperper kɛse a ɔrokɔ do wɔ asɔr horow no mu ntsi, nna ɔyɛ dzen ma obi a osuar tse dɛ emi, na m’adwen mu mmbuei biara wɔ nyimpa na ndzɛmba ho dɛ mibenya adwen a osi pi dze akyerɛ nyia nedze ye na nyia nedze muo.

9 Ɔtɔ mber bi a nna m’adwen ehuanyan ara yie koraa, osian nkekamu na basabasayɛ kɛse a ɔrokɔ do no ntsi. Presbyterianfo no nna wotsia Baptistfo na Methodistfo no papaapa, na wɔbɔɔ mbɔdzen dze hɔn adwen ne nyimdzee na dɔkɔdɔkɔsɛm dze daa hɔn mfom edzi, anaadɛ, annyɛ yie koraa no, dze maa ma nkorɔfo eehu dɛ wɔafom. Baptistfo na Methodistfo so hɔn afamu no, dze enyimpi kor yi ara dɛ wɔbɛda hɔn nkyerɛkyerɛ no edzi, na wɔakyerɛ dɛ nkaafo ne dze no nyina nyɛ nokwar.

10 Kasatsia na basabasayɛ nye adwen a ɔnnsaa ntsi no, mibisaa moho mpɛn pii dɛ: Ebɛnadze na ɔsɛ dɛ meyɛ? Ekuwekuw yinom nyina mu muana na nedze ^aye; anaadɛ, ne nyinara nntsen? Sɛ no mu kor na oye a, nna no mu muana, na mibesi dɛn na mehu?

11 Ber a miridzi atseetsee wɔ akansi a nsɔr horow yinom resi ho no, da kor bi merekenkan James Nwoma no, ne tsir kor, nkyekyɛmu enum, a ɔkã dɛ: Sɛ hom mu biara ne nyansaa tɔ sin a, ma ombisa Nyankopɔn a ɔdze ma nyimpa nyinara kwa, na ɔnnkã enyim no; na ɔdze bɛma no.

12 Dɛm kyerɛsɛm yi no tum nnkitsaa nyimpa biara n’akoma pɛn kyɛn dza iyi dze yɛɛ me dɛm ber yi mu. Ɔyɛɛ dɛ mbrɛ ɔdze ahoɔdzen kɛse bi hwiraa m’akoma mu nyina. Modweendween ho mpɛn pii, minyim dɛ sɛ obi hia nyansa efi Nyame hɔ a, nna emi a, na dza ɔwɔ dɛ meyɛ no minnyim, na gyedɛ mutum nya nyansa mbordo kyɛn dza nna mowɔ no, ɔno munnkotum ehu; osiandɛ asɔr horow no mu akyerɛkyerɛfo no ^atsee kyerɛwsɛm mu asɛnsin kor no ara ase wɔ kwan a ɔson koraa do a ɔdze sɛɛ awerɛhyɛmu biara a ɔwɔ dɛ yɛhwɛ ^bBible mu dze nya asɛmbisa no ho mbuae.

13 Ekyir no meyɛɛ adwen dɛ otwar dɛ mokɔ do tsena sum nye adwensɛɛ mu dɛmara anaa meyɛ dɛ mbrɛ James akyerɛ no, ɔno nye dɛ, mibisa Nyame. Ekyir no misii m’adwen pi dɛ ^a“mimbisa Nyame,” ɔnam dɛ meyɛɛ adwen dɛ sɛ ɔdze nyansa ma hɔn a hɔn nyansa tɔ sin a, na ɔdze bɛma kwa, na ɔrennkã enyim a, nna mebɛyɛ ahwɛ.

14 Dɛm ntsi ber a m’adwen sii pi dɛ mimbisa Nyame no, mokɔr kwaa bi mu dɛ morokɔbɔ mbɔdzen ayɛ. Ɔyɛ anapa a wimu atsew ara yie, wɔ afe apem ahaawɔtwe eduonu mu. Iyi nye aber a odzi kan wɔ me bra mu a mabɔ mbɔdzen ayɛ dɛm adze no, osiandɛ wɔ me dadwen yi nyinara mu no nna mummbuee m’ano mmbɔɔ ^ampaa da.

15 Ber a mudur bea a nna mayɛ m’adwen dada dɛ mobɔkɔ no, mohwehwɛɛ moho nyina na muhun dɛ monko na mowɔ hɔ no, mubuu ntwɛr na mehyɛɛ ase dɛ merekã m’akoma mu nsɛm akyerɛ Nyame. Mehyɛɛ ase no annkyɛr koraa, nna tum bi bɛhyɛɛ mo do, a odzii mo do konyim koraa, na nna ɔwɔ nhyɛdo huhu bi a ɔkyekyeer me tɛkyerɛma ntsi nna munntum nnkasa. Sum kebii twaa moho hyiae, na aber no mu no ɔyɛɛ me dɛ mbrɛ woegyaa mo mu ama ɔsɛɛ awerɛfir mu.

16 Mbom medze m’ahoɔdzen nyina ^abɔɔ mpaa frɛɛ Nyame dɛ ɔngye me mfi dɛm ɔtamfo yi a ɔabɛhyɛ mo do yi no tum nsa, aber no mu ara a meyɛɛ krado dɛ mebɛhɛn abagura ne bun mu no na meegyaa moho ama ɔsɛɛ no—ɔnnyɛ ɔsɛɛ a medze m’adwen bubui, mbom ɔyɛ nyimpa ankasa bi a ofi wiadze a enyi nntum nnhu no no tum, a ɔwɔ ahobow tum bi a menntsee bi nkã da wɔ nyimpa biara mu pɛn—aber yi ara mu a nna suro kɛse ekitsa me no, muhun ^bkan fadum bi a ɔhyerɛn sen ^cewia, wɔ m’etsifi papaapa, a osiaan berɛww kɛpeem dɛ ɔtɔɔ mo do.

17 Opuei no annkyɛr koraa nna ɔgyee me fii ɔtamfo no a ɔakyekyer me no nsamu. Ber a kan no tɔr mo do no ^amuhun Nyimpa-su ^bbeenu bi a hɔn hyerɛn na hɔn ^cenyimnyam no murunntum nnkã ho asɛm, dɛ wɔsensɛn mo sor wɔ wimu. Hɔn mu kor bɔɔ me dzin na ɔkasaa kyerɛɛ me, ɔtseen ne nsa wɔ kor no do—Na ɔkãa dɛ, Oyi nye mo ^dDɔba no. Tsie No!

18 Mo botae a ɔnam do ma ^amirikebisa Ewuradze, asɔr horow no no mu dza oye, ama meetum ehu dza monkɔdɔm. Dɛm ntsi, aber a minyaa ahoɔdzen, a mubotum dze akasa no, nkyii mibisaa Nyimpa-su a wɔsensɛn m’etsifi wɔ kan no mu no asɔr no mu dza oye (osiandɛ dɛm aber yi nna ɔnnhɛn m’akoma mu dɛ hɔn nyinara nntsen)—na no mu dza ɔwɔ dɛ mokɔdɔm.

19 Ɔsee me dɛ mma monnkɔdɔm no mu biara osiandɛ ne nyinara ^anntsen; Nyimpa a ɔkasaa kyerɛɛ me no see dɛ dza wɔgye dzi no yɛ ekyiwadze wɔ n’enyi do; na dɛ dɛm nkorɔfo a wɔfrɛ hɔnho nyamesomfo no nyinara aprɔw; na dɛ: “wɔdze hɔn ^banofamfa twe bɛn me, na mbom hɔn ^cakoma dze ɔnye me ntamu twe kɛse, wɔkyerɛkyerɛ nyimpa ne ^dmbrasɛm dɛ mbrɛ ɔyɛ kyerɛwsɛm nkyerɛkyerɛ, na wɔyɛ dɛ wɔwɔ ^enyamesompa, na mbom wɔpow no tum no.”

20 Ɔsee me bio dɛ mma monnkɔdɔm hɔn mu biara; na ɔkãa nsɛm pii a murunntum nnkyerɛw no aber yi mu. Ber a m’enyi baa moho do bio no, mohwɛe no nna m’ekyir da famu, na m’enyi rohwɛ sor. Ber a kan no kɔree no, nna minnyi ahoɔdzen; mbom annkyɛr na minyaa ahom kakra, mokɔr fie. Na ber a motweer bea a ɔbɛn mbukyia no ho no, me nã bisaa me dɛ ebɛnadze yɛ me. Mubuaa dɛ, “Mma nnhaw woho, moho ye—moho ye koraa” Nkyii mekãa kyerɛɛ me nã dɛ, “Mankasa mehu dɛ Presbyterian asɔr no nnyɛ nokwar.” Ɔyɛ dɛ ^aɔtamfo no nyim dɛ, mo mbafober yi mu no, nna wɔahyehyɛ ato hɔ dada dɛ mebɛyɛ ɔhawfo na ebufuhyɛnyi wɔ n’ahenman ho; ɔnntse dɛm a nna nkyɛ ɔyɛ dɛn yɛ na sum mu etumfo bɔbɔ mu etsia me? Ebɛnadze ntsi na ^bɔkotsia na atseetsee bɔsoɛr mo do, wɔ mo mbafober mpo mu?

21 Minyaa ^aenyido-adzehu yi ma nda kakra twaa mu no, mihyiaa Methodist asɛnkãfo no hɔn mu kor, a nna ɔkã nyamesom ho nhuanyan a makã ho asɛm dada no ho ma ɔyɛ dzen; na, ber a menye no ridzi nyamesom ho nkɔmbɔ no, mekãa enyido-adzehu a menyaa no ho asɛm kyerɛɛ no. Dza ɔyɛe no yɛɛ me ahobow; ɔammfa dza mekãa enyido-adzehu no no annyɛ hwee, mbom ɔyɛɛ no ebufuw so kɛse, ɔkãa dɛ ne nyinara fi abɔnsam, na dɛ ndzɛmba a ɔtsetse dɛm dɛ ^benyido-adzehu anaa ^cnyikyerɛ biara nnyi hɔ dɛm nda yinom mu; na dɛ ndzɛmba a ɔtsetse dɛm nyinara gyaae wɔ asomafo no hɔn aber do, na biribiara nnyi hɔ a ɔtse dɛm a ɔbɛba bio.

22 Annkyɛr biara na muhun dɛ, nkorɔfo a wɔfrɛ hɔnho nyamesomfo no ehuanyan adwembɔn kɛse etsia me wɔ nsɛm a mekae no ho, na iyi na ɔama wɔretseetsee me pii, na dɛm ^aatseetsee no kɔr do yɛɛ kɛse; meyɛ abofra a mennsɛ bi; nna medzi mfe duanan dze rokɔ duenum ara pɛr, minnyi dzibew biara nna meyɛ ^babofra so a mennsɛ bi wɔ wiadze yi mu, naaso nyimpa a wɔyɛ edzibewdzifo faa no dɛ meyɛ obi a moho hia kɛse ntsi wonunuu ɔmamfo hɔn adwen araa ma wotsiaa me na wɔtseetsee me yayaayaw; dɛm atseetsee yi fii asɔr horow no nyinara mu bae—hɔn nyinara yɛɛ kor dɛ wɔretseetsee me.

23 Iyi maa modwendwenee ara yie ofitsi dɛm aber no na mpɛn pii, na nna ɔyɛ me nwanwa dɛ abofra a mennsɛ bi, a medzi mfe duanan na kakra a nna obi a da biara meberɛ ansaana menya biribi kakra a mibedzi, ɔyɛɛ me nwanwa so dɛ wɔbɔdwen dɛ meyɛ obi a moho hia ma hɔn araa ma ɔbɛma wɔatseetsee me yaayaa na woegu m’enyim ase. Mbom kansa sɛ ɔyɛɛ me hu anaa ɔnntse dɛm mpo a, dɛm na ɔtse, na osian dɛm ntsi, nna ɔtaa ma mo werɛ how dodow.

24 Mbom, mbrɛ ɔtse biara no, ɔyɛ nokwar dɛ meehu enyido-adzehu. Ofitsi dɛm aber no meyɛɛ dɛ mbrɛ ^aPaul yɛe wɔ aber a ^boriyi n’ano wɔ Ɔhen Agrippa n’enyim, na ɔkãa enyido-adzehu a ohunii a ɔkyerɛ dɛ ohun kan na ɔtsee ndze ho asɛm no; naaso nyimpa kumaa bi na wɔgyee no dzii; binom see dɛ onndzi nokwar, binom so see dɛ ɔabɔ dam; na wosii no atwetwe na wɔyaaw no. Mbom iyi nyinara annsesã nokwar a ɔkyerɛ dɛ oehu enyido-adzehu no. Ohun enyido-adzehu, onyim dɛ ohunii, na atseetsee a ɔwɔ wiadze nyinara mpo nnkotum asesã dɛm nokwar no; na sɛ wɔtseetsee no kɔ owu mpo mu a, onyim, na obohu so dze ekodu n’ahom gye a odzi ewiei mpo do, dɛ oehu kan na ɔtsee ndze dɛ ɔrekasa kyerɛ no, na wiadzemba nyinara nnkotum ama ɔadwen anaa ɔagye edzi dɛ oennhu.

25 Dɛmara na ɔtse wɔ m’afamu. Mehu kan ankasa, na dɛm kan no ne finimfin no muhun ^aNyimpa-su beenu, na wɔkasaa kyerɛɛ me ampa; na sɛ kaansa wɔtaan me na wɔtseetsee me dɛ mekãa dɛ mehu enyido-adzehu mpo a, ɔda ho yɛ nokwar; na ber a wɔretseetsee me, wɔreyaw me, na wɔrekã nsɛmbɔn nyina to mo do akɔhwi mu, osiandɛ makã dɛm no, ogyaa me ma mekãa wɔ m’akoma mu dɛ: Ebɛnadze ntsi na wɔtseetsee me dɛ merekã nokwar no ntsi? Mehu enyido-adzehu ankasa; na emi nye woana a mubotum mesiw Nyame kwan, anaadɛ ebɛnadze ntsi na wiadzemba dwen dɛ wɔyɛ me ma maapow dza mehu ankasa no? Mehu enyido-adzehu; minyim dɛm, na minyim so dɛ Nyame nyim, na munnkotum ^bapow, na munnkotum ayɛ so, no koraa no minyim dɛ sɛ meyɛ dɛm a mobɔfom Nyame, na maaba afɔbu ase.

26 Afei m’adwen amee wɔ dza modwenee a ɔfa asɔr horow a ɔwɔ wiadze no ho. Minyim dɛ onnyi dɛ mokɔdɔm hɔn mu biara, mbom ɔwɔ dɛ mokɔ do tsena dɛ mbrɛ metse dada no kɛpem dɛ Nyame bɛkyerɛ me dza menyɛ. Mehu dɛ James ne ^adasegye no yɛ nokwar—dɛ nyimpa a ne nyansaa tɔ sin no botum ebisa Nyame, enya nyansa, na Nyame rennka n’enyim.

27 Mokɔr do yɛɛ m’edwuma dɛ ma meyɛ dada no kɛpeem Fankwa ne da a otsia eduonu biako wɔ mfe apem ahaawɔtwe eduonu-ebiasa mu a, aber nyina nna nyimpa horow, hɔn a wɔyɛ nyamesomfo na hɔn a wɔnnyɛ nyamesomfo retseetsee me pii, osiandɛ mokɔr do sii do kãa dɛ mehu enyido-adzehu.

28 Mber kakra ntamu, ofitsi aber a muhun enyido-adzehu dze kesi afe apem ɔhaawɔtwe eduonu-ebiasa mu no—ber a wɔbraa me dɛ mma monnkɔdɔm dɛm aber no mu asɔr ahorow no mu biara no, nna musuar so, na hɔn a nkyɛ ɔwɔ dɛ wɔyɛ m’anyɛnkofo na wɔkã m’akoma to me yamu no na wɔtseetsee me, na sɛ wosusu mpo dɛ obi adaada me a, ɔwɔ dɛ nkyɛ wɔbɔ mbɔdzen twe me ekyir wɔ ɔdɔ kwan do-wogyaa me too ^ansɔhwe ahorow nyina mu; ma menye nyimpa horow nyina dzii afora, na dɛm no maa mohwee mfom pii a ɔnnfata mu, na mekyerɛɛ ɔbabunyɛ ho mberɛwyɛ, na mfom nketsenketse a ɔwɔ nyimpa awoo su ho; na ɔyɛ me yaw dɛ mebɛkã dɛ dɛm mfom yi dze me kɔr nsɔhwɛ pii mu a ɔnnyɛ wɔ Nyame enyim. Sɛ mekã dɛm bɔn yi a, onnyi dɛ obiara susu dɛ midzi fɔ wɔ bɔn kɛse anaa ndzeyɛbɔn bi ho. Dɛ mebɛyɛ bɔn a ɔtse dɛm nnyɛ adze a ɔyɛ m’awoo su dabiara da. Mbom mofoom wɔ atwetwesi ho, na odu mber bi a nna medze moho akɔbɔ paserewyifo ho nye ndzɛmba a ɔtsetse dɛm ne nyɛe ho, dɛm nnyɛ su a ɔfata obi a Nyame ^bafrɛ no no tse dɛ emi. Mbom iyi nnkɛyɛ obi a ɔkaa me mberantsɛber mu, na onyim dɛ meyɛ obi a m’enyigye moho dada no nwanwa.

29 Osian ndzɛmba yinom ntsi, mber pii na muhu dɛ midzi fɔ wɔ me mberɛwyɛ na m’esintɔ ho; Fankwa ne da a otsĩa eduonu-biako n’ewimbir no a ɔyɛ da a midzii kan bɔɔ dzin no, n’anafua no a nna makɔ mpa do no, mehyɛɛ ase dɛ morobɔ ^ampaa na morototɔ serɛ Otumfo Nyankopɔn ma ɔdze mo bɔn na mo mfom nyinara akyɛ me, na dɛ ɔmma munhu me gyinabew wɔ n’enyim; nna mowɔ awerɛhyɛmu kɛse dɛ mbrɛ obesi biara no mibenya nyikyerɛ dɛ mbrɛ menya bi dada no.

30 Aber a mugu do robɔ mpaa ma Nyame no, muhun kan bi dɛ orupue me dan no mu, na ɔkɔr do hyerɛnee araa kɛpeem dɛ dan no mu yɛɛ kann kyɛn ewiaber mpo. Annkyɛr na ^anyimpa-su bi puee me mpa ne nkyɛn, nna ɔsensɛn hɔ a ne nan nnkã famu.

31 Ɔhyɛ bataker ^afufuufuw bi. Ɔhoa kyɛn adzefufuw biara a mehu no wɔ asaase yi do pɛn; na menngye nndzi dɛ biribi wɔ asaase yi do a wobotum ayɛ ma ahoa na ahyerɛn dɛm. Ne nsaho na n’abasa, fitsi ne nsakɔn dze kɔ sor kakra no da hɔ kwa a biribiara nnkata ho. N’anamɔn na ne nanho so da hɔ kwa, n’anankoroma dze kɔ sor kakra no so da hɔ kwa. Ne tsir na no kɔn ho so da hɔ kwa. Muhun dɛ ɔnnhyɛ atar biara bio ka bataker no ho osiandɛ nna no mu ebue ma mutumii hun n’akoko.

32 Nnyɛ n’atar no nko na ɔhoa mbordo, mbom ɔnoara so mbrɛ noho si ^ahyerɛn no ano nnkotum akyerɛkyerɛ mu, na no hwɛbea hyerɛn dɛ ^benyinam. Dan no mu hyerɛnee na mbom nna ɔnnto kan a etwa ne nyimpadua no ho ehyia no. Muhun no ahyɛse no ^csuro kitsaa me, mbom annkyɛr na suro no fii hɔ ntsɛmara.

33 Ɔdze me ^adzin frɛɛ me na ɔsee dɛ ɔyɛ ɔbɔfo a wɔsomaa no fii Nyame nkyɛn dɛ ɔmbra mo hɔ, na wɔfrɛ no Moroni; na Nyame wɔ dwumadzi bi dze ma me; na aman ebusuakuw, na kasa horow nyina mu no binom bɛkã dza oye wɔ me dzin ho na binom so akã dza omuo so. Dza ɔkyerɛ nye dɛ nyimpakuw ahorow nyina mu no binom bɔbɔ me dzin pa na binom so abɔ me dzin bɔn.

34 Ɔsee me dɛ wɔdze ^anwoma bi a wɔakyerɛw no wɔ ^bsika mprɛtse do esie. Na nwoma no kã tsetse nkorɔfo a wɔtsenaa asaase tɔw yi do na bea a wofi baa ho asɛm. Ɔsee bio dɛ Asɛmpa ne ^cmãhyɛ a ɔwɔ hɔ daapem no a Agyenkwa no dze maa tsetsemba no wɔ nwoma no mu;

35 Bio so dɛ, wɔdze abo ebien a ogu dwetɛ egyen mu akã mprɛtse no ho esie—na dɛm abo yi a ɔfam ^aakatabo ho no na ɔyɛ dza wɔfrɛ no ^bUrim na Thummim no—na dɛm abo yi na hɔn a wɔwɔ no ɔboaa wɔ tsetseberdo anaa nkaano no ma wɔyɛɛ ^c“adzehufo” na Nyankopɔn yɛɛ iyi kãa ho ama wɔdze aakyerɛ nwoma no ase.

36 Owiee nsɛm yinom kã ekyir no, ɔhyɛɛ ase kãa ^aAhyɛmu Dadaw no mu nkɔnhyɛsɛm no. Odzii kan serɛe kãa Malachi ^btsir ebiasa no mu nsɛm bi; na ɔserɛe kãa dɛm nkɔnhyɛ noara so ne tsir anan anaadɛ ne tsir a odzi ewiei no, mbom nna ɔsor dza ɔwɔ hɛn Bible mu no kakra. Nkyɛ ɔwɔ dɛ ɔserɛ kã nkyekyɛmu a odzi kan no dɛ mbrɛ wɔakyerɛw no wɔ hɛn nwoma no mu no, dza ɔserɛe kae nye dɛ:

37 Na hwɛ, ^ada no reba a ɔbɛyɛ ^bhyew dɛ fononoo, na hɔn a wɔyɛ ntsɛn nyinara, nyew, nye hɔn a wɔyɛ emumuyɛdze nyinara no bɛhyew dɛ ^ceburonan; na hɔn a wɔbɛba no bɛhyew hɔn, Dɔm Ewuradze na ɔse, amma hɔn ndwow anaa hɔn abaw annka.

38 Na bio, ɔserɛe kãa nkyekyɛmu enum no so dɛ: Hwɛ menam ^aElijah nkɔnhyɛnyi no ne nsa do bɛda ^bAsɔfodzi no edzi akyerɛ wo, ansaana Ewuradze ne da kɛse no a ɔyɛ hu no aba.

39 Ɔsesãa nkyekyɛmu a odzi do no mu nsɛm no so na ɔserɛe kãa dɛ: Na ɔdze ^aanohoba a wɔdze bɔɔ egyanom no bɛhyɛ mba hɔn akoma mu, na mba no hɔn akoma ^bbɛdan akɔ hɔn egyanom hɔ. Sɛ annyɛ dɛm a, ber a Ewuradze bɛba no asaase no bɛsɛɛ koraa.

40 Ɔserɛe kãa Isaiah tsir dubiako so kãa iyinom ho, see dɛ ɔnnkɛkyɛr na iyi ahyɛ mã. Ɔserɛe kãa Asomafo Ndwuma no ne tsir ebiasa no so, nkyekyɛmu eduonu-ebien na eduonu-ebiasa no pɛpɛɛpɛr dɛ mbrɛ ɔtse wɔ Ahyɛmu Fofor no mu no. Ɔsee dɛ dɛm ^ankɔnhyɛnyi no nye Christ; mbom da no nnyaa mbae a hɔn a wonnketsie ne ndze no ^bwobotwa hɔn efi nkorɔfo no mu, mbom ɔnnkɛkyɛr na da no aba.

41 Ɔserɛe kãa ^aJoel ne tsir ebien no, fitsi nkyekyɛmu eduonu-awɔtwe dze kɛpem n’ewiei no. Ɔsee so dɛ dɛm nkɔnhyɛ yi so nnyaa nnhyɛɛ mã, na ɔnnkɛkyɛr na ahyɛ mã. Na ɔkyerɛɛ mu so dɛ ɔnnkɛkyɛr na ^bAmanamamfo no hɔn mãhyɛ no aba mu. Ɔserɛe kãa kyerɛwsɛm mu nsɛm pii, na ɔkyerɛkyerɛɛ mu a murunntum nnkã no wɔ ha.

42 Bio, ɔsee me dɛ, sɛ me nsa kã mprɛtse a ɔakã ho asɛm no a—na ber no nnyaa nnsõe a ɔdze bɛma me—mma memmfa nnkyerɛ obiara; ɔno nye akokyɛm nye Urim na Thummim no; kã nkorɔfo a ɔbɛhyɛ me dɛ memfa nkyerɛ hɔn no nko ho; sɛ meyɛ a wɔbɛsɛɛ me. Ber a ɔnye me rotwetwe mprɛtse no ho nkɔmbɔ no, wobuee enyido-adzehu no wɔ ^am’adwen mu ma muhun bea pɔkyee a mprɛtse no hyɛ, dɛm ntsi ber a mokɔr bea no do no muhunii.

43 Ɔkãa dɛm ndzɛmba yinom kyerɛɛ me ekyir no, muhun dɛ kan a ɔwɔ dan no mu no rotwe bɛn ne nyimpadua no. Ɔkɔr do yɛɛ dɛmara kɛpeem aber a dan no mu yɛɛ sum dɛ mbrɛ ɔtse dada no kã dza oetwa ehyia noho no nko. Nna awerɛfir mu ara muhun dɛ, ma ɔyɛ dɛ, kwan bi ebue wɔ sor, na ɔfaa mu kɔree a mennhu no bio. Iyi ekyir no, dan no mu yɛɛ sum dɛ mbrɛ ɔtse wɔ ber a kan a ofi sor no mmpuee hɔ no.

44 Medaa hɔ komm dwendween anwanwadze kɛse a osii na nsɛm a ɔsomafo nwanwanyi no kãa kyerɛɛ me no ho; ber a mugu do ^arodwendwen no, awerɛfir mu ara muhun dɛ me dan no mu ahyɛ ase reyɛ kann bio. Annkyɛr koraa na muhun dɛ dɛm ɔsomafo a ofi sor no gyina me mpa ne nkyɛn bio.

45 Ɔhyɛɛ ase bio kãa dɛm asɛm kor no ara a ɔkãa no ahyɛse no kyerɛɛ me, a ɔannsesã biribiara. Ɔno ekyir, ɔkãa atsɛmbu kɛse a ɔreba asaase yi do ɔnam ɔkɔm na akõkoekõ na ahokyer dze amamfoyɛ kɛse bɛba ho asɛm kyerɛɛ me; na dɛm atsɛmbu kɛse yi bɛba asaase yi do wɔ dɛm mbasantsen yi do. Ɔkãa iyinom kyerɛɛ me ekyir no, ɔfowee kɔr sor dɛ mbrɛ ɔyɛɛ no ahyɛse no.

46 Dɛm aber yi nsɛm no tɔɔ m’adwen do ara ma nda efi m’enyiwa mu. Dza mehu na matse no maa medaa hɔ ahobow mu. Na dza ɔyɛɛ me ahobow kɛse mpo nye dɛ muhun dɛ ɔsomafo kor no ara wɔ me mpa nkyɛn na metsee dɛ orisi nsɛm a ɔkãa kyerɛɛ me no do bio. Ɔbɔɔ me kɔkɔ dɛ ^aSatan bɛpɛ dɛ ^bɔsɔ me hwɛ (ɔnam dɛ m’egya n’ebusua yɛ abɔbɔfo ntsi) ama maagye mprɛtse no dze enya mo ho. Ɔbɔɔ me kɔkɔ dɛ mma minnya ^cadwen fofor biara wɔ mprɛtse no ho kã dɛ medze bɛhyɛ Nyame enyimnyam, na mma memmfa botae biara nnsi m’enyi do kã n’ahenman ne nkyekyeree ho, annyɛ dɛm a me nsa rennkã.

47 Ne mpɛn a otsĩa ebiasa ekyir no, ɔfowee kɔr sor bio dɛ mbrɛ ɔyɛɛ no ahyɛse no na ɔkaa monko a nna meda hɔ rodwendwen anwanwadze a mehu no seseiara no ho. Ɔsomafo no fowee fii me nkyɛn ne mpɛn a otsĩa ebiasa no annkyɛr koraa na akokɔ bɔnee na muhun dɛ adze akye, iyi kyerɛɛ dɛ hɛn kokoa mu mpɛnsampɛnsamu no gyee hɛn anafua no nyinara.

48 Ɔyɛɛ kakra no, mosoɛree wɔ me mpa do, na, dɛ mbrɛ ɔtse no, mokɔr me daadaa dwumadzi do; mbom ber a mobɔɔ mbɔdzen dɛ mereyɛ edwuma dɛ mbrɛ meyɛ no dada no, muhun dɛ mayɛ mberɛw na dɛm ntsi menntum annyɛ hwee koraa. M’egya, a menye no reyɛ edwuma no hun dɛ biribi rehaw me, na ɔsee me dɛ monkɔ fie. Mefaa kwan dɛ morokɔ fie; mbom aber a mehyɛɛ ase dɛ morofow ban a wɔdze agye haban a yɛwɔ mu no ho no, m’ahom nyina pae na mohwee famu a munntum nkekã moho na m’enyi do siiw me mber kakra.

49 Adze a odzi kan a mekaa nye ndze a ɔrekasa kyerɛ me na ɔdze me dzin refrɛ me. Memaa m’enyi do wɔ sor, na muhun ɔsomafo kor no ara dɛ ogyina m’etsifi na kan etwa noho ehyia dɛ mbrɛ muhun no ahyɛse no. Ɔsanee sii nsɛm a ɔkãa no anafua no nyinara do. Ɔhyɛɛ me dɛ monkɔ ^am’egya hɔ na menkɛkã enyido-adzehu na mbrasɛm no a menya no nkyerɛ no.

50 Midzii do. Mesanee kɔr m’egya hɔ wɔ haban no mu kɛkãa dza ɔfa nyikyerɛ no ho nyinara kyerɛɛ no. Obuaa me dɛ ofi Nyame na ɔsee me dɛ monkɔ nkɛyɛ dza ɔsomafo no ahyɛ me dɛ menyɛ no. Mifii haban no mu na mokɔr bea no a ɔsomafo no akã akyerɛ me dɛ mprɛtse no hyɛ no. Ɔnam dɛ enyido-adzehu a menya no yɛ pefee ntsi, ber a mudur hɔ ara nna muhunii.

51 ^aKoko a ɔsõ ara yie bi si Manchester ekuroba a ɔwɔ Ontario mansin a ɔwɔ New York mu no nkyɛn. Ɔno nye koko a ɔwar kyɛn akoko a ɔwɔ bea no do nyina. Mprɛtse no wɔ ɔbo adaka mu hyɛ ɔbo kɛse bi ase wɔ dɛm koko yi n’anee afamu wɔ bea a odzi kɔ no sor no a ne finimfin yɛ kɛse na no sor yɛ korkorba. Odzi kɔ ne nkyɛnkyɛn no yɛ tseatseaba na dɛtse akata do ma dɛm ntsi odzi kɔ ne finimfin no nko na opue sor.

52 Modwurudwuruuw dɛtse no wiei no, mohwehwɛɛ poma bi dze hyɛɛ boba no ase. Medze ahoɔdzen kakra ara maa bobaa no do kɔr sor. Mohwɛɛ adaka no mu na nokwar muhun ^amprɛtse, ^bUrim na Thummim no na ^cakatabo no dɛ mbrɛ ɔsomafo no akã no ara pɛr. Adaka a ɔwɔ mu no wɔatow abo dze dza ɔfam ayɛ. Wɔdze abo ebien abeabea adaka no ase. Dɛm abo ebien yi do na mprɛtse no na ndzɛmba nkaa no gu.

53 Mobɔɔ mbɔdzen dɛ mibeyi mprɛtse no epue na ɔsomafo no amma me kwan. Ɔsee me bio dɛ mber nnsõe a medze pue, nna nnyɛ n’aber nye no gyedɛ mfe anan etwa mu ana; mbom ɔsee me dɛ afrenhyia pɛpɛɛpɛr mensan mbra koko no ho na obehyia me wɔ hɔ; na dɛ menyɛ dɛm afe biara nkɛpem dɛ aber bɔsõ ma me nsa akã mprɛtse no.

54 Afe biara ewiei no mokɔr koko no ho dɛ mbrɛ ɔhyɛɛ me no; mihyiaa dɛm ɔsomafo kor no ara wɔ hɔ na aber biara minyaa nkyerɛkyerɛ na nyimdzee fii no hɔ wɔ kokoa mu mpɛnsampɛnsamu kor biara mu no, ɔkãa dza Ewuradze rebɛyɛ, na mbrɛ obesi ahyehyɛ ^an’ahendzi wɔ nda a odzi ekyir no mu.

55 Osiandɛ biribiara nnyi m’egya ne nsamu ntsi, okehiaa dɛ yedzi paa, yɛdze hɛn nsa yɛ edwuma ma nkorɔfo nda nda, na sɛ ɔyɛ so a edwuma biara a hɛn nsa bɛkã no yɛyɛ. Ɔtɔ mber bi a yɛbɛn fie, obodu aber bi so no nna yɛkɔ ekyirekyir, na osian edwuma a yɛyɛ no daabaa no ntsi yetumii nyaa biribi dze hwɛɛ hɛnho.

56 Afe 1823 mu no m’egya n’ebusua hun amandze ara yie osian mo nuabanyin panyin, ^aAlvin no wu ntsi. Afe 1825, Ɔbɛsɛ bosoom mu na panyin nyimdzefo bi a wɔfrɛ no Josiah Stoal, a ɔtsenaa Chenango mansin, a ɔwɔ New York ɔman mu, faa me edwuma mu. Nna ɔatse ɔfa Spainfo a wobue dwetɛ mona wɔ Harmony, a ɔwɔ Susquehanna mansin a ɔwɔ Pennsylvania ɔman mu; na ansaana ɔrebɛfa me edwuma mu no nna otutu famu, ama, kyerɛkyerɛ, sɛ obohu dwetɛ mona no a. Ekyir no a ɔmaa menye no kɛtsenae no, ɔfaa me nye n’edwumafo nkaa no, dɛ yentu dwetɛ mona no, hɔ na mokɔr do yɛɛ edwuma dze rokɔ bosoom a, yennhu hwee wɔ hɛn dwumadzi no mu, na ewiei no menye ɔpanyin nyimdzeefo no kasae araa ma yegyaa dɛ yeretutu hwehwɛ dwetɛ mona no. Iyi ntsi na nkorɔfo kãa dɛ mutu mona hwehwɛ sika no.

57 Ber a ɔfaa me edwuma mu no, ɔyɛɛ nhyehyɛɛ bi a ɔmaa mutumii nye Owura Isaac Hale a ofi dɛm bea no do kɛtsenae a midzidzi ne nsamu; Hɔ na midzii kan hun me yer (ne babaa) ^aEmma Hale. Sanda ne da a otsĩa duawɔtwe wɔ afe 1827 mu, ber a nna meda ho yɛ Owura Stoal n’edwuma no na yɛwaree.

58 Osiandɛ mokɔr do kãa dɛ mehu enyido-adzehu ntsi, ^aatseetsee no kɔr do kãa mo do, na me yer n’egya n’ebusua no ammpɛ koraa dɛ yɛwar. Dɛm ntsi okehiaa dɛ menye no fi hɔ kɔ beebi fofor; ntsi yɛkɔr Squire Tarbill fie kɔwaree, wɔ South Bainbridge, a ɔwɔ Chenango mansin mu, wɔ New York. Mowaree no ankyɛr koraa na migyaa Owura Stoal n’edwuma no yɛ, na yɛkɔr m’egya hɔ nye no kɛyɛɛ ekuadwuma dɛm hyɛber no mu.

59 Afei ber a ɔwɔ dɛ me nsa kã mprɛtse, Urim na Thummim na akatabo no sõe. Fankwa ne da a otsĩa eduonu-ebien, wɔ afe apem aha awɔtwe eduonu esuon mu no mokɔɔr bea no a ndzɛmba no hyɛ no, dɛ mbrɛ afe biara meyɛ no, na dɛm ɔsomafo kor no ara a ofi sor no dze maa me, nye bɔhyɛ yi: dɛ noho asodzi da mo do; na sɛ mannhwɛ no yie ma ɔyew anaa ^amubu enyi gu do a, Ewuradze botwa me akyen; mbom sɛ mobɔ mbɔdzen biara a mobotum dze ^bsie kɛpem aber a ɔno, ɔsomafo no bɛba abɛgye a, ɔno Ewuradze bɔkora do.

60 Annkyɛr biara na muhun siantsir a ɔnam do ma ɔsomafo no hyɛɛ me dzendzenndzen dɛ monhwɛ mprɛtse no do yie no, na siantsir a ɔmaa ɔsee dɛ sɛ muwie dza wɔdze ahyɛ me nsa dɛ menyɛ no a ɔbɛba abɛgye akɔ no. Nkorɔfo tsee dɛ mprɛtse no wɔ mo hɔ no ara, wɔbɔɔ mbɔdzen biara a wobotum dɛ wɔbɛgye efi me nkyɛn. Enyitsew kwan biara a nyimpa fa do a nsa kã a ɔbɛyɛ yie biara no wɔfaa do. Afei atseetsee no yɛɛ yaayaw kyɛɛn ma nkyɛ ɔtse no, na dɔmtutuw yɛɛ krado dabiara dɛ wɔbɛgye efi mo hɔ. Mbom ɔnam Nyame ne nyansaa do, ɔkaa me nsamu dwodwoodwo, kodur dɛ muwiee dza wɔdze hyɛɛ me nsa dɛ menyɛ wɔ ho no. Dɛ mbrɛ nhyehyɛɛ no tse no, ɔsomafo no bae ma medze sanee maa no, na ɔwɔ ne nkyɛn bodu ndɛ a ɔyɛ Esusow Aketseaba ne da a otsĩa ebien wɔ afe 1838 mu yi.

61 Nhuanyan no kɔr do ara dze kesi dɛ atsesɛm dze ne tɛkyerɛma apem no kɔr do aber nyina kãa atorsɛm too m’egya n’ebusua do, nye mankasa so mo do. Sɛ mese merekã no mu nkyɛmu apem a nkyɛ ɔbɛyɛ nwoma pii mu amaama. Atseetsee no kɔr do araa ma nna munntum nngyina ano ntsi okehiaa dɛ mifi Manchester, na menye me yer kɔ Susquehanna mansin a ɔwɔ Pennsylvania ɔman mu. Ber a yerisiesie hɛnho akɔ no—nna ohia akã hɛn papaapa, na atseetsee no so ayɛ dur ara yie ama hɛn ma nna ɔnnyɛ hɛn dɛ hɛn asetsena mu bɛyɛ yie da—hɛn amandzehu mu no yenyaa nyɛnko bi a wɔfrɛ no ^aMartin Harris, ɔno na ɔbaa hɛn nkyɛn na ɔmaa hɛn dolla eduonum dze boaa hɛn wɔ akwantu no mu. Owura Harris tse Palmyra kurow mu, wɔ Wayne mansin a, ɔwɔ New York ɔman mu, na ɔyɛ okuafo a odzi mu ara yie.

62 Ɔnam mboa yi ne mber pa ntsi ɔmaa mutumii dur bea a mabɔ me tsirmu pɔw dɛ merekɛtsena wɔ Pennsylvania no; mudur hɔ ara pɛr na mehyɛɛ ase dɛ morohwɛ akyerɛw akyerɛwmba a ɔwɔ mprɛtse no do no egu nkrataa do. Mekyerɛɛw no mu dodowara, na ɔnam ^aUrim na Thummim no ntsi mekyerɛɛ no mu bi ase, meyɛɛ iyi fi ber a mudur me yer n’egya fie, wɔ Mumu bosoom no mu dze kesi Kwakwar bosoom a odzi do no mu.

63 Kwakwar bosoom yi mu no, na Owura Martin Harris a mabɔ ne dzin dada no baa beebi a yɛwɔ no, ɔgyee akyerɛwmba no a makyerɛw efi mprɛtse no do no, na ɔdze sii mu dɛ ɔrokɔ New York kuropɔn no mu. Na dza osii ɔno no do na akyerɛwmba no a makyerɛw no ho no, mekã nsɛm a nankasa kãe a ɔfa dza osii, kyerɛɛ me wɔ ber a ɔsaan n’ekyir bae no, ɔno na odzi do yi:

64 “Mokɔr New York kuropɔn mu, na medze akyerɛwmba a wɔakyerɛ ase no maa Ɔbemfo Charles Anthon, a ɔayɛ atsenkã wɔ kasa ahorow suahun mu ara yie. Ɔbemfo Anthon kãa dɛ dza wɔakyerɛ ase no dzi mu, odzi mu koraa kyɛn Egyptfo hɔn kasa a wɔakyerɛ ase ma oehu pɛn. Nkyii medze dza wɔnnkyerɛɛ ase no so kyerɛɛ no, na ɔsee dɛ ɔyɛ Egyptfo, Chaldeafo, Assyriafo, na Arabfo hɔn kasaa; na ɔsee dɛ akyerɛwmba nyina yɛ nokwar. Ɔmaa me dasegye-krataa a, ɔdze kyerɛ nkorɔfo a wɔwɔ Palmyra dɛ akyerɛwmba no yɛ nokwar, na dza wɔakyerɛ ase no so dzi mu. Megyee dasegye-krataa no na medze hyɛɛ mo kotoku mu, na ber a miribefi fie hɔ ara no, nna Owura Anthon frɛɛ me ekyir, na obisaa me dɛ aberantsɛ no yɛɛ dɛn hun dɛ sika mprɛtse no hyɛ bea a ohunii wɔ no. Miyii no ano dɛ Nyame no bɔfoe na ɔdaa no edzi kyerɛɛ no.

65 “Afei ɔkãa kyerɛɛ me dɛ, ‘Ma monhwɛ dasegye-krataa no’. Dɛm ntsi miyii fii mo kotoku mu na medze maa no, ber a ɔgyee no ɔtsetseew mu esinesin, na ɔsee dɛ ^aabɔfo hɔn som biara nnyi hɔ dɛm aber yi mu, na sɛ medze mprɛtse no brɛ no a ɔbɛkyerɛ ase. Memaa ɔtsee ase dɛ mprɛtse no mu bi wɔ hɔ a ^bwɔasɔw ano, na wɔabra me dɛ mma memmfa mmba. Oyii ano dɛ, ‘Murunntum nnkenkan nwoma a wɔasɔw ano’. Mifii ne nkyɛn na mokɔr Okunyin Mitchell nkyɛn ma no so hwɛe na ɔgyee dza Ɔbemfo Anthon akã a ɔfa akyerɛw no na ne nkyerɛase ho no too mu.”

· · · · · · ·

66 Ebɔbira ne da a otsĩa enum, wɔ afe 1829 mu na ^aOliver Cowdery baa me fie, kɛpem dɛm aber no mu nna munnhun no da. Ɔkãa kyerɛɛ me dɛ nna ɔyɛ kyerɛkyerɛnyi wɔ skuul bi a ɔbɛn beebi a m’egya tse no, na ɔnam dɛ m’egya wɔ mbofra wɔ skuul no mu ntsi, ɔkɔree kɛtsenaa m’egya ne fie kakra, ber a ɔwɔ hɔ no ebusua no kãa mbrɛ me nsa sii kãa mprɛtse no ho asɛm kyerɛɛ no, dɛm ntsi ɔaba dɛ ɔnye me robɔtwetwe ho nkɔmbɔ.

67 Owura Cowdery bae no ne nda ebien ekyir no a (ɔyɛ Ebɔbira ne da a otsĩa esuon no) mehyɛɛ ase dɛ merekyerɛ Mormon Nwoma no ase, na ɔhyɛɛ ase dɛ ɔrekyerɛw ma me.

· · · · · · ·

68 Yɛkɔr do yɛɛ nkyerɛase edwuma no, kɛpeem (Esusow Aketseaba bosoom mu wɔ afe 1829), da kor bi yɛkɔr kwaa bi mu dɛ yɛrokɔbɔ mpaa na yebisa Ewuradze dza ɔfa ^aenuma a wɔdze kɔ ^bbɔnfakyɛ mu ho asɛm a yehu wɔ mprɛtse no do wɔ dza yɛakyerɛ ase no mu. Aber a yegu do robɔ mpaa na yɛrefrɛ Ewuradze no, ^cɔsomafo bi nam kan ^dmununkum mu fii sor sianee, na ɔdze ne ^ensa guu hɛn do na ^fɔhyɛɛ hɛn asɔfo see dɛ:

69 Me mfɛfo asomfo, wɔ Messiah ne dzin mu medze ^aAaron Asɔfodzi no ma hom, dza okitsa abɔfo hɔn som, nye nnuhu asɛmpa no nnuho, na nsumuhyɛ enuma a wɔdze kɔ bɔnfakyɛ mu no ne nsaafee; na wonnkeyi iyi efi asaase do bio da, kesi dɛ ^bLevi ne mbabanyin bɔbɔ afɔr bio ama Ewuradze wɔ tseneneeyɛ mu.

70 Ɔsee dɛ Aaron Asɔfodzi yi nnyi tum a wɔdze nsa gu nyimpa do ma onya Sunsum Krɔnkrɔn ^an’akyɛdze no, mbom ekyir yi na wɔdze tum yi bɛma hɛn; na ɔhyɛɛ hɛn dɛ yenkonuma hɛnho, ɔkyerɛɛ hɛn dza yɛnyɛ dɛ munnuma Oliver Cowdery, na n’ekyir no no so nnuma me.

71 Dɛm ntsi yɛkɔree na yekonumaa hɛnho. Midzii kan numaa no, na n’ekyir no ɔno so numaa me—ekyir no medze me nsa guu ne tsir do na medze Aaron Asɔfodzi no hyɛɛ no sɔfo, na n’ekyir no no so dze ne nsa guu mo do na ɔdze Asɔfodzi kor no ara so hyɛɛ me sɔfo—na dɛm na ɔhyɛɛ hɛn dɛ yɛnyɛ.*

72 Ɔsomafo no a ɔbaa hɛn nkyɛn aber yi na ɔdze dɛm Asɔfodzi yi maa hɛn no, kãa kyerɛɛ hɛn dɛ ne dzin dze John, na ɔnoara so nye ^aJohn Onumanyi no a ne dzin wɔ Ahyɛmu Fofor no mu no, na dɛ ^bPeter, ^cJames na ^dJohn na wɔkyerɛɛ no dɛ ɔmbɛyɛ dza ɔyɛe no, hɔn na wokitsa ^eMelchizedek Asɔfodzi ho ^fnsaafee no, dɛm Asɔfodzi no, ɔkãa dɛ, n’aber du a, wɔdze bɛma hɛn, na dɛ wɔmfrɛ me Asɔr no ne ^gElder a odzi kan, no ɔno (Oliver Cowdery) so wɔmfrɛ no Asɔr no ne Elder a otsĩa ebien. Esusow Aketseaba ne da a otsĩa duenum wɔ afe 1829 mu, nna dɛm ɔsomafo yi hyɛɛ hɛn asɔfo wɔ ne nsa ase, na wonumaa hɛn.

73 Ber a yenumaa wiei ma yerifi nsu no mu epue ara, na yenyaa enyimnyam nhyira kɛse suahun fii Ɔsor Egya no hɔ. Munumaa Oliver Cowdery wiei ara pɛr na ^aSunsum Krɔnkrɔn no tɔɔ no do, na ɔsoɛree na ogyinae na ^bɔhyɛɛ nkɔm wɔ ndzɛmba pii ho a ɔnnkɛkyɛr na ɔaba. Na bio, ɔno so numaa me wiei ara pɛr, na mo so minyaa nkɔnhyɛ sunsum, ber a mosoɛree gyinae no, mehyɛɛ nkɔm a ɔfa Asɔr yi ne nkyekyeree na no mpontu ho, nye ndzɛmba pii a ɔfa Asɔr no ho, nye dɛm ebusuasantsen yi hɔn nkorɔfo ho. Sunsum Krɔnkrɔn no hyɛɛ hɛn mã, na yedzii dɛw wɔ hɛn nkwagye Nyame no mu.

74 Afei hɛn adwen mu tsewee, na Sunsum Krɔnkrɔn no buee kyerɛwsɛm no n’enyi kyerɛɛ hɛn ma ^ayɛtsee ase yie, na ɔdaa no mu esumasɛm ne ^bnkyerɛase ankasa na ne siantsir wɔ kwan a nkyɛ yennkenya da anaa yɛnndwen ho, no edzi kyerɛɛ hɛn. Ɔwɔ mu dɛ hɛn nsa akã Asɔfodzi no na yeenuma hɛnho dze, naaso osian atseetsee a nkorɔfo a wɔwɔ apaamu hɔ dze tseetsee hɛn ntsi, okehiaa dɛ yɛyɛ biribiara nsumamu wɔ dɛm aber no mu.

75 Ofi ber to ber no so, nkorɔfo a wɔfrɛ hɔnho nyamesomfo no nunuu dɔm no adwen ma wotsiaa hɛn dɛ wobotu ahyɛ hɛn do. Na wɔyɛɛ hɔn adwen dɛ wobotu ahyɛ hɛn do no na me yer n’egya n’ebusua hɔn atsenkã ho na ɔbɔɔ hɛnho ban fii hɔn ho (ɔnam Nyame n’adom do) nna wotsiaa dɔm no, na wɔnye me bɛyɛɛ nyɛnko ntsi wɔpɛɛ dɛ wɔma me kwan ma mokɔ do yɛ nkyerɛase edwuma a wɔnntseetsee me, na dɛm ntsi wɔbɔɔ anohoba dɛ wɔdze hɔn tum nyinara bɔbɔ hɛnho ban wɔ biribiara a ɔmmfa mbra kwan do, dɛ mbrɛ hɔn ahom botum.