Eparaama 4
    Footnotes
    Theme

    Wase 4

    Era sa navuca na Kalou na buli ni vuravura kei na veika bula kecega era tu kina—Sa vakamacalataki na veika eratou sa navuca me vakayacori ena ono na siga.

    1 Sa qai kaya na Turaga: Tou lako sobu mada. Ka ratou sa lako sobu ena aivakatekivu, ia eratou, sa btauyavutaka ka bulia na lomalagi kei na vuravura, ko iratou na Kalou.

    2 Ia na vuravura, ni sa buli oti, a sa lala ka sega ni vakacokotaki, baleta ni ra se bera ni bulia e dua na ka ia na vuravura ga; ia sa butobuto kecega na dela ni wasa titobu, ka sa ayavavala na Yalodratou na Kalou e dela ni wai.

    3 Ia ko iratou (na Kalou) eratou sa kaya: Me rarama mai; a sa rarama mai.

    4 Ia ko iratou (na Kalou) eratou sa raica na rarama ni sa vinaka, ni sa ramase; ka ratou sa wasea na rarama, se lewa me tawase mai na butobuto.

    5 A ratou sa vakatoka na rarama na Kalou me Siga, ka ratou vakatoka na butobuto me Bogi. Ka sa yaco, mai na yakavi ki na mataka eratou sa vakatoka me bogi kei na mataka ki na yakavi eratou sa vakatoka me siga, ka sai koya oqo na imatai, se na ivakatekivu, ni ka eratou sa vakatoka me bogi kei na siga.

    6 Eratou sa kaya tale na Kalou: Me dua na amaliwa lala ena maliwa ni wai, me wasei kina na wai mai na wai.

    7 Eratou sa vakarota na Kalou me dua na maliwa lala me wasea na wai e ruku ni maliwa lala mai na wai ena maliwa lala; a sa yaco me vaka, na ka eratou sa lewa.

    8 A ratou sa vakatoka na maliwa lala na Kalou, me aLomalagi. Ka sa yaco, mai na yakavi me yacova na mataka eratou sa vakatoka me bogi; ka sa yaco mai na mataka ki na yakavi eratou sa vakatoka me siga; ia oqo na kena ikarua ni bgauna eratou sa vakatoka kina me bogi kei na mataka.

    9 Eratou sa vakarota na Kalou, ka kaya: Me soqoni vata na awai e rukui lomalagi ki na bdua na yasana, me rairai mai na vanua mamaca; a sa vakakina me vaka na nodratou ivakaro;

    10 Eratou sa vakatoka na vanua mamaca na Kalou, me Vuravura; ka ratou vakatoka na wai sa soqoni vata tu me aWasawasa Levu; a ratou sa raica na Kalou ni sa yaco me vakakina.

    11 Eratou sa kaya tale na Kalou: Me datou vakarautaki vuravura me vakatubura na aco; na kau sa vakasorena; kei na kau dauvua, me vaka na kena mataqali, ia na sorena sa vuataka na vuana e vuravura; a sa yaco me vakakina, me vaka na nodratou ivakaro.

    12 A ratou sa vakarautaki vuravura na Kalou me vakatubura na co na qele mai na sorena, na co sa vakasorena me solia mai na sorena, ka solia na sorena ena kena mataqali; io me vakatubura tale ga na qele na veikau kei na kau vuata mai na sorena, ia na sorena sa vakatubura na kau vata ga sa vu mai kina, ena kena mataqali; a ratou sa raica na Kalou ni sa vakakina.

    13 Ka sa yaco ni ratou sa wilika na siga; mai na yakavi me yacova na mataka eratou sa vakatoka me bogi; ka sa yaco, mai na mataka me yacova na yakavi eratou sa vakatoka me siga; raica oqo sa kena ikatolu ni gauna.

    14 A ratou sa tauyavutaka na Kalou na vu ni ararama me tu ena maliwa lala kei lomalagi, me wasea na siga mai na bogi; ka tauyavutaka me ivakatakilakila ka tukuna na draki, kei na siga kei na yabaki.

    15 Eratou sa bulia na vu ni rarama me tu ena maliwa lala kei lomalagi ka vakararamataki vuravura; a sa vakakina.

    16 Eratou sa bulia na Kalou e rua na vu ni rarama; na avu ni rarama levu me lewa na siga, kei na vu ni rarama lailai me lewa na bogi; io eratou sa bulia na veikalokalo me cila vata kei na vu ni rarama lailai.

    17 A ratou sa viritoka na Kalou me rau tu mai na maliwa lala kei lomalagi me vakararamataki vuravura, io me lewa na siga kei na bogi, ka wasea na rarama mai na butobuto.

    18 Ka ratou sa vakaraica tiko na Kalou na veika eratou sa vakarota me yacova ni sa vakayacori me vaka na nodratou ivakaro.

    19 Ka sa yaco, mai na yakavi ki na mataka sa vakatokai na bogi; ka sa yaco mai na mataka ki na yakavi sa vakatokai na siga; ia sa kena ikava ni gauna.

    20 A ratou sa kaya na Kalou: Me datou qisia na wai me vakatubura vakalevu sara na ka sa yavavala voli ka bula rawa; kei na manumanu vuka, me vuka voli e delai vuravura ena maliwa ni lomalagi.

    21 Eratou sa vakarautaka na wasawasa na Kalou me vakatubura mai na aika lelevu ka rerevaki, kei na ka kecega sa bula ka yavavala rawa, ka na vakatubura mai vakalevu na wasawasa ena kedra veimataqali; kei na manumanu vuka kecega ena kedra mataqali. Ka ratou sa raica na Kalou ni na vakakina, ka ni sa vinaka na nodratou lewa.

    22 Eratou sa kaya na Kalou: Me datou vosa vakalougatataki ira, me ra luvea ka tubu me lewe vuqa sara, io me ra vakatawa na veiwasawasa kei na awai kecega; ka vakatubura talega na manumanu vuka e vuravura me vuqa sara.

    23 Ka sa yaco mai na yakavi me yacova na mataka sa vakatokai na bogi; ka sa yaco mai na mataka me yacova na yakavi sa vakatokai na siga; ia sa kena ikalima ni gauna.

    24 Eratou sa vakarautaki vuravura na aKalou me vakatubura mai na ka bula ena kedra mataqali, na manumanu yavaiva kei na ka sa qasi voli, kei na manumanu tawa lasa ni vanua ena kedra veimataqali; a sa yaco me vakakina, me vaka na nodratou vosa.

    25 Eratou sa qisi vuravura na Kalou me vakatubura na manumanu tawa lasa ni vanua ena kedra veimataqali, kei na manumanu e yavaiva me vaka na kedra veimataqali, kei na ka kecega sa qasi voli e dela ni vanua ena kedra veimataqali; ka ratou sa raica na Kalou ni sa yaco me vakakina.

    26 A ratou sa aveivosaki vakai iratou na Kalou ka kaya: Tou ia mada ka bulia na btamata me itovo vata kei kedatou ka cucui kedatou; ia edatou na solia vua me lewa na ika ni veiwasawasa, kei na manumanu vuka, kei na manumanu e yavaiva, kei na vuravura taucoko, kei na ka kecega sa qasi voli e delai vuravura.

    27 A ratou sa ia na aKalou ka bulia na tamata me itovo vata kei iratou, io eratou sa bulia na tamata me itovo vata kei na Kalou; io na tagane kei na yalewa eratou sa bulia.

    28 Eratou sa kaya na Kalou: Me datou vosa vakalougatataki rau mada. A ratou sa kaya na Kalou: Me datou qisi rau me rau vakaluveni ka tubu me lewe vuqa ka vakatawai vuravura, ka vakamalumalumutaka, io me rau lewa na ika ni waitui kei na manumanu vuka, kei na ka bula kecega sa qasi voli e delai vuravura.

    29 A ratou sa kaya na Kalou: Raica, me datou solia vei rau na co kecega sa vakasorena ka tu e delai vuravura taucoko, kei na kau kecega sa tu kina na vuana; io, io na vuanikau sa vakasorena edatou na solia vei rau; me na kedrau akakana.

    30 Io na manumanu tawa lasa kecega ni vanua, kei na manumanu vuka kecega, kei na ka kecega sa qasi voli e delai vuravura, raica, edatou na solia kina na bula, ka datou na solia talega na draunikau drokadroka kecega me kakana, ia na veika kece oqo ena vakarautaki.

    31 Eratou sa kaya na Kalou: Me datou vakayacora na veika kecega tou sa lewa, ka vakarautaka; ka raica era na talairawarawa sara. Ka sa yaco mai na yakavi ki na mataka sa vakatokai me bogi, kei na mataka me yacova na yakavi sa vakatokai me siga; ka ratou sa wilika me kena aikaono ni gauna.