Kyerɛwsɛm
Abraham 4


Tsir 4

Enyame no hyehyɛ asaase no mbɔe nye ndzɛmba a nkwa wɔ hɔn mu a wɔwɔ do nyinara—Hɔn nhyehyɛɛ wɔ nda esia a wɔdze bɔbɔ wiadze no wɔdze to gua.

1 Na nkyii Ewuradze see dɛ: Wɔmma yɛnkɔ famu. Na wɔkɔr famu aahyɛse no, na hɔn, Enyame no, bhyehyɛɛ na wɔyɛɛ ɔsorsor na asaase.

2 Na asaase, ber a wowiee yɛ no, nna ɔda hɔ pan na hwee nnyi do, osiandɛ nna wɔnnyɛɛ biribiara kã asaase no ho; na sum agye bun enyi, na Enyame no hɔn Sunsum abutuuw esu no enyi.

3 Na (Enyame no) see dɛ: Ekan mbra; na ekan bae.

4 Na (Enyame no) hun ekan no, na ɔhyerɛn; na wɔkyekyɛɛ kan no mu, anaadɛ wɔmaa ekan no tseew noho fii sum noho.

5 Na Enyame no frɛɛ kan no Adzekyee, na sum no wɔfrɛɛ no Adzesaa. Na ɔbaa dɛ ofi ewimbir dze kesi anapa no wɔfrɛɛ no adzesaa; na ofi anapa dze kesi ewimbir no wɔfrɛɛ no adzekyee; na iyi nye dza odzi kan, anaadɛ ahyɛse, dza wɔfrɛɛ no adzekyee na adzesaa.

6 Na Enyame no kãa so dɛ: Wɔmma awimu mbra esu no finimfin na ɔbɛtsew esu no efi esu no ho.

7 Na Enyame no hyɛɛ wimu mbra, dɛ esu a ɔwɔ wimu no n’ase no ntsew no ho mfi esu a ɔwɔ wimu no no sor no ho; na ɔyɛɛ dɛm so dɛ mbrɛ wɔhyɛɛ hɔn no.

8 Na Enyame no frɛɛ wimu no, aƆsor. Na ɔbaa dɛ ofi ewimbir dze kesi anapa no wɔfrɛɛ no adzesaa; na ɔbaa dɛ ofi anapa dze kesi ewimbir no wɔfrɛɛ no adzekyee; na iyi nye bmber a otsĩa ebien a wɔfrɛɛ no adzesaa na adzekyee.

9 Na Enyame no hyɛɛ hɔn see dɛ: Wɔmma aesu a ɔwɔ sor n’ase no ɔmpra nkɔboa bfakor na wɔmma wewewdo nyi no ho; na ɔyɛɛ dɛm so dɛ mbrɛ wɔhyɛɛ hɔn no;

10 Na Enyame no frɛɛ wewewdo no, Asaase; na esu no no mboano no wɔfrɛɛ no aEsu Kɛse; na Enyame no hun dɛ woedzi do.

11 Na Enyame no see dɛ: Wɔmma yensiesie asaase no ma omfifir aefuw; nhaban a ɔsow aba; na dua a ɔsow eduaba dɛ mbrɛ no su tse, dza n’aba wɔ no mu a ɔsow dɛ mbrɛ nankasa no su tse wɔ asaase no do; na ɔyɛɛ dɛm so, tse dɛ mbrɛ wɔhyɛɛ ho mbra no.

12 Na Enyame no hyehyɛɛ asaase no dɛ omfifir efuw mfi nankasa n’aba mu, na haban nsow haban mfi nankasa n’aba mu, ɔnsow aba dɛ mbrɛ no su tse; na asaase mfir dua mfi nankasa n’aba mu, ɔnsow eduaba a, n’aba botum asow nankasa ne saso, dɛ mbrɛ no su tse; na Enyame no hun dɛ woedzi do.

13 Na ɔbaa dɛ wɔkaan nda no; ofi ewimbir kesi anapa no wɔfrɛɛ no adzesaa; na ɔbaa dɛ, ofi anapa kesi ewimbir no wɔfrɛɛ no adzekyee; na ɔyɛɛ mpɛn ebiasa.

14 Na Enyame no hyehyɛɛ akandzea a ɔwɔ ɔsor wimu no dɛ onyi adzekyee mfi adzesaa ho; na wɔhyehyɛɛ dɛ wɔnyɛ nsɛnkyerɛdze nye hyɛber, nye nda na mfe;

15 Na wɔhyehyɛɛ hɔn ma wɔayɛ kandzea wɔ ɔsor wimu no mu ma wɔahyerɛn asaase do; na ɔyɛɛ dɛm.

16 Na Enyame no hyehyɛɛ nkandzea akɛse ebien no, akan kɛse no dɛ ɔnhwɛ adzekyee do, na kan kakraba no dɛ ɔnhwɛ adzesaa do; na wɔdze nworaba so kãa kan kakraba no so ho.

17 Na Enyame no dze hɔn sisii ɔsor wimu no mu dɛ wɔnhyerɛn asaase no do, na wɔnhwɛ adzekyee na adzesaa do, na wonyi kan mfi sum ho.

18 Na Enyame no hwɛɛ dɛm ndzɛmba no a wɔhyɛɛ hɔn ho mbra no do kesii dɛ wodzii do.

19 Na ɔbaa dɛ ofi ewimbir kesi anapa yɛɛ adzesaa; na ɔbaa dɛ ofi anapa kesi ewimbir yɛɛ adzekyee; nna ɔyɛɛ mpɛn anan.

20 Na Enyame no see dɛ: Wɔmma yensiesie esu no ma wɔndɔ mbowa menyamenya a wɔkekã hɔnho a nkwa wɔ hɔn mu; na ntumbowa, ama woekyin asaase do wɔ ɔsor wimu.

21 Na Enyame no siesiee esu no ma wɔadɔ aesumbowa akɛse, na mbowa a nkwa wɔ hɔn mu a wɔkekã hɔnho a esu no bɔdɔ hɔn menyamenya dɛ mbrɛ hɔn su tsetsee; na ntumbowa biara dɛ mbrɛ hɔn su tsetsee. Na Enyame no hun dɛ wobedzi do ama hɔn, na dɛ hɔn nhyehyɛɛ no ye.

22 Na Enyame no see dɛ: Yebehyira hɔn na yɛama wɔawo na wɔadɔr, na wɔahyɛ po anaadɛ aesu kɛse no mã; na yɛama ntumbowa adɔr wɔ asaase do.

23 Na ɔbaa dɛ ofi ewimbir kesi anapa na wɔfrɛɛ no adzesaa; na ɔbaa dɛ ofi anapa kesi ewimbir na wɔfrɛɛ no adzekyee; nna ɔyɛɛ mpɛn enum.

24 Na aEnyame no siesiee asaase no ma ɔadɔr mbowa a nkwa wɔ hɔn mu dɛ mbrɛ hɔn su tsetsee, anantwi nye mbowa a wɔtsen, nye mbowadoma dɛ mbrɛ hɔn su tsetsee; na ɔyɛɛ dɛm, dɛ mbrɛ wɔkãe no.

25 Na Enyame no hyehyɛɛ dɛ asaase no ndɔr mbowadoma dɛ mbrɛ hɔn su tsetsee, na anantwi dɛ mbrɛ hɔn su tsetsee, nye adze biara a ɔtsen asaase do dɛ mbrɛ hɔn su tsetsee; na Enyame no hun dɛ wobedzi do.

26 Na Enyame no faa aapam wɔ hɔnankasa hɔn mu na wɔsee dɛ: Wɔmma yɛnkɔ famu na yɛmbɔ bnyimpa wɔ hɛnankasa hɛn csaso do, dɛ mbrɛ hɛn su tsetsee; na yɛbɛma hɔn tum wɔ po mu nam do, nye wimu ntumbowa do, nye anantwi do, nye asaase nyina do, nye abowa biara a ɔtsen asaase do.

27 Dɛm ntsi aEnyame no kɔr famu dɛ wɔrokɔbɔ nyimpa wɔ hɔn saso do, Enyame no hɔn saso do na wɔrekɛyɛ no, ɔbanyin na ɔbaa na wɔrekɛyɛ hɔn.

28 Na Enyame no see dɛ: Yebehyira hɔn. Na Enyame no see dɛ: Yɛbɛma wɔawo na wɔadɔr, na wɔahyɛ asaase do mã, na wɔahom do, na woenya tum wɔ po mu nam do, nye wimu ntumbowa do, nye adze biara a nkwa wɔ hɔn mu a wɔkekã hɔnho wɔ asaase do.

29 Na Enyame no see dɛ: Hwɛ, yɛbɛma hɔn haban a ɔsow aba nyinara a ɔbɛba asaase nyinara enyi, nye ndua nyinara a ɔbɔsow eduaba wɔ do; nyew, dua do eduaba a ɔsow aba no yɛdze bɛma hɔn; ɔbɛyɛ aedziban ama hɔn.

30 Na asaase mbowadoma biara, nye wimu ntumbowa biara, nye adze biara a ɔtsen wɔ asaase no do, hwɛ, yɛbɛma hɔn nkwa, na yɛbɛma hɔn mfunoma biara ma woeedzi, na wɔbɛhyehyɛ ndzɛmba yinom nyinara dɛm.

31 Na Enyame no see dɛ: Yɛbɛyɛ biribiara a yɛakã no, na yeahyehyɛ hɔn; na hwɛ, wɔbɛyɛ setsie papaapa. Na ɔbaa dɛ ofi ewimbir kesi anapa na wɔfrɛɛ no adzesaa; na ɔbaa dɛ ofi anapa kesi ewimbir no wɔfrɛɛ no adzekyee; na wɔkaan mber a aotsia esia.