Aberahama 3
nā mua a’e i muri iho


Pene 3

’Ua ha’api’i Aberahama nō ni’a i te mahana, te marama, ’e te mau feti’a nā roto i te Urima ’e te Tumima—’Ua heheu mai te Fatu iāna i te nātura mure ’ore nō te mau vārua—’Ua ha’api’i mai ’oia nō ni’a i te orara’a nā mua a’e i te orara’a tāhuti nei, te fa’atōro’a-atea-ra’a-hia, te Hāmanira’a o te mau mea ato’a ra, te mā’itira’a nō te Tāra’ehara, ’e te piti nō te orara’a o te ta’ata nei.

1 ’E tei iā’u, ’o Aberahama, te Urima ’e te Tumima, ’o tā te Fatu tō’u Atua i hōro’a mai iā’u, i Ura i te fenua o te feiā Kaladaio ;

2 ’E ’ua ’ite au i te mau feti’a, e mau feti’a rarahi roa ho’i rātou, ’e te hō’ē o rātou, e mea piri roa ïa i te terōno o te Atua ; ’e e rave rahi te mau feti’a rarahi tei fātata i te reira ;

3 ’E ’ua parau mai ra te Fatu iā’u : ’O teie te mau feti’a fa’atere ; ’e te i’oa o te mea rahi roa ra ’o Koloba ïa, nō te mea e mea piri mai ïa iā’u nei, ’o vau nei ho’i te Fatu tō ’oe Atua : ’Ua fa’ata’a vau i teie ’ei fa’atere ia rātou ato’a nō roto mai i taua iho ha’apa’ora’a ra mai tenā ’o tā ’oe e ti’a na.

4 ’E ’ua parau mai ra te Fatu iā’u, nā roto i te Urima ’e te Tumima ē, ’ua au Koloba i te ha’apa’ora’a a te Fatu, nō ni’a i tō te reira mau taime ’e te mau tau i fa’ata’ahia nā roto i tōna mau ’ohura’a ; hō’ē ’ohura’a, hō’ē ïa mahana i te Fatu, mai te au i tāna ra tai’ora’a, ’e hō’ē ïa tauatini matahiti te reira mai te au i te taime i fa’ata’ahia nō te reira tā ’oe e ti’a na. Mai teie ho’i te tai’ora’a i tō te Fatu taime, mai te au ïa i te tai’ora’a nō Koloba.

5 ’E ’ua parau mai ra te Fatu iā’u : Te palaneta ’oia ho’i te ti’arama iti iho, iti iho i te reira nō te fa’atere i te ao, ’oia ato’a i te ru’i, tei ni’a a’e ïa ’e ’aore rā ’ua rahi a’e ïa i tenā tā ’oe e ti’a na nō ni’a i te tai’ora’a, e mea tāere a’e ho’i tōna ’ohura’a ; e mea ’āfaro te reira nō te mea tei ni’a a’e ïa i te fenua tā ’oe e ti’a na, nō reira e ’ere i te mea rahi roa te tai’ora’a i te rahira’a o tōna mau mahana, ’e te mau ’āva’e, ’e te mau matahiti.

6 ’E ’ua parau mai ra te Fatu iā’u : I teienei, Aberahama, tē vai nei nā parau mau e piti, inaha tē ’ite nei tō ’oe mata i te reira ; ’ua hōro’ahia ia ’oe ’ia ’ite i te mau taime nō te tai’ora’a, ’e te taime i fa’ata’ahia, ’oia ïa, te taime i fa’ata’ahia nō te fenua tā ’oe e ti’a na, ’e te taime i fa’ata’ahia nō te ti’arama rahi nō te fa’atere i te ao, ’e te taime i fa’ata’ahia nō te ti’arama iti nō te fa’atere i te ru’i.

7 I teienei te taime i fa’ata’ahia nō te ti’arama iti e taime roa a’e ïa i tōna tai’ora’a i te taime nō te fenua ’o tā ’oe e ti’a na.

8 E mai te mea e ’itehia teie nā parau mau e piti, e parau mau atu ā te ’itehia i ni’a a’e ia rāua, ’oia ho’i, e ’itehia te tahi atu palaneta e mea roa a’e tōna ra tai’ora’a taime ;

9 ’E mai te reira ho’i e ’itehia ai te tai’ora’a o te taime o te hō’ē palaneta i ni’a a’e i tō te tahi, ē tae noa atu ’ua piri mai ’oe i Koloba ’o tei au i te tai’ora’a o te taime o te Fatu ; ’oia ’o Koloba ’o tei fātata atu i te terōno o te Atua, nō te fa’atere i taua mau palaneta ato’a ra ’o tei au i tenā te huru ’o tā ’oe e ti’a na.

10 ’E ’ua hōro’ahia ia ’oe ’ia ’ite i te taime i fa’ata’ahia nō te mau feti’a ato’a ’o tei fa’ata’ahia ’ia hōro’a i te māramarama, ē tae noa atu ’ua piri ’oe i te terōno o te Atua.

11 ’Ua nā reira vau, ’o Aberahama, i te paraparau i te Fatu, te mata ’e te mata, mai te hō’ē ta’ata e paraparau i te tahi ra ; ’e ’ua fa’a’ite mai ra ’oia iā’u i te mau ’ohipa i hāmanihia e tōna ra rima ;

12 ’E ’ua parau mai ra ’oia iā’u : E tā’u tamaiti, e tā’u tamaiti (’e ’ua fa’atorohia mai tōna rima), inaha, e fa’a’ite au i teie mau mea ato’a ia ’oe. ’E ’ua tu’u ihora ’oia i tōna rima i ni’a i tō’u nā mata, ’e ’ua ’ite ihora vau i te mau mea i hāmanihia e tōna ra rima, ’e e rave rahi ho’i te reira ; ’e ’ua fa’arahihia te reira i mua i tō’u nā mata, ’e ’aore i ti’a iā’u ’ia hi’o i te hope’a nō te reira.

13 ’E ’ua parau mai ra ’oia iā’u : ’O Sineha teie, ’oia ho’i te mahana. ’E ’ua parau mai ra ’oia iā’u : ’O Kokoba teie, ’oia ho’i te feti’a. ’E ’ua parau mai ra ’oia iā’u : ’O Olea teie, ’oia ho’i te marama. ’E ’ua parau mai ra ’oia iā’u : ’O Kokaubema teie, ’e te aura’a ra ’o te mau feti’a ïa, ’oia ho’i te mau ti’arama rarahi ato’a tei roto i te ra’i ra.

14 ’E i te ru’i ho’i te Fatu i parau mai ai i teie mau parau iā’u : E fa’arahi au ia ’oe, ’e tō ’oe ra hua’ai i muri ia ’oe, mai teie ïa mau feti’a te huru ; ’e mai te mea ’aita e ti’a ia ’oe ’ia tai’o i te mau one ra, mai te reira ho’i te rahi o tō ’oe ra hua’ai.

15 ’E ’ua parau mai ra te Fatu iā’u : E Aberahama, tē fa’a’ite atu nei au i teie mau mea ia ’oe hou ’oe e haere atu ai i ’Aiphiti ra, ’ia ti’a ia ’oe ’ia fa’a’ite atu i teie mau parau ato’a.

16 Mai te mea e piti mea tē vai ra, ’e tei ni’a a’e te tahi i te tahi, tē vai ato’a ra ïa te mau mea rahi a’e i ni’a a’e ia rāua ; nō reira ’o Koloba te mea rahi roa i rotopū i te mau Kokaubema ato’a tā ’oe i ’ite, nō te mea e mea piri roa mai ïa iā’u nei.

17 I teienei, mai te mea e piti mea tē vai ra, ’e tei ni’a a’e te tahi i te tahi, ’e tei ni’a a’e te marama i te fenua, e riro paha ïa tē vai ra te hō’ē palaneta ’e ’aore rā te hō’ē feti’a i ni’a a’e i te reira ; ’e noa atu te mea tā te Fatu tō ’oe Atua e ’ōpua i roto i tōna ’ā’au ’ia rave, e rave iho ā ’oia i te reira.

18 Noa atu ’ua hāmani ’oia i te feti’a rahi a’e ; ’e, ’oia ato’a, mai te mea e piti vārua tē vai ra, ’e e mea māramarama a’e te tahi i te tahi, noa atu te reira, ’aore e ha’amatara’a tō taua nā vārua e piti ra ; i vai na rāua i te mātāmua, ’aore ho’i tō rāua e hope’a ; e vai noa rāua a muri a’e, nō te mea ’o nolauma rāua, ’oia ho’i, e mea mure ’ore.

19 ’E ’ua parau mai ra te Fatu iā’u : Tē vai nei teie nā parau mau e piti, ’oia ho’i, e piti vārua tē vai nei, ’e ’ua hau a’e tō te tahi māramarama i tō te tahi ; ’e tē vai ato’a atu ra ïa te tahi atu ’o tei hau atu i te māramarama ia rāua ; ’o vau te Fatu tō ’oe Atua, ’e ’ua hau atu ho’i tō’u māramarama i tō rātou ato’a ra.

20 ’Ua tono te Fatu tō ’oe Atua i tāna melahi nō te fa’aora ia ’oe i te rima o te tahu’a nō Elekena ra.

21 Tē pārahi nei au i rotopū ia rātou pā’āto’a ; nō reira, i teienei, ’ua pou mai au ia ’oe nō te fa’a’ite ia ’oe i te mau ’ohipa i hāmanihia e tō’u rima, nā roto ho’i i te reira, ’ua hau atu tō’u pa’ari i tō rātou ato’a ra, tē fa’atere nei ho’i au i roto i te mau ra’i i ni’a, ’e i te fenua i raro, ma te pa’ari ’e te ’aravihi, i ni’a a’e i te mau ’ite ato’a tā ’oe i hi’o mai te mātāmua mai ra ; ’ua haere mai au i raro i te mātāmua i rotopū i te mau ’ite ato’a tā ’oe i hi’o.

22 I teienei ’ua fa’a’ite mai te Fatu iā’u, ’o Aberahama, i te mau ’ite tei fa’anahonahohia hou te ao nei i hāmanihia ai ; ’e i rotopū ia rātou ato’a ra, e rave rahi feiā maita’i ’e te feiā ti’ara’a teitei ;

23 ’E ’ua ’ite atu ra te Atua i teie mau vārua, ’e e mea maita’i rātou, ’e ’ua ti’a ihora ’oia i rotopū ia rātou, nā ’ō atu ra : ’O teie ïa tā’u e fa’ariro ’ei mau ta’ata fa’atere nā’u ; ’e ’ua ti’a ra ho’i ’oia i rotopū ia rātou ’o tei riro ’ei mau vārua, ’e ’ua ’ite ’oia e mea maita’i rātou ; ’e ’ua parau mai ra ’oia iā’u : E Aberahama, ’o ’oe te hō’ē o rātou ; ’ua mā’itihia ’oe hou ’oe i fānauhia ai.

24 ’E te ti’a noa ra te hō’ē i rotopū ia rātou mai te Atua te huru, ’e ’ua nā ’ō atu ra ’oia ia rātou i pīha’i iho iāna ra : E haere tātou i raro, tē vai ra ho’i te ārea i reira, ’e e rave tātou i teie mau mātēria, e hāmani tātou i te hō’ē fenua ’ei vāhi orara’a nō rātou.

25 ’E e tāmata tātou ia rātou i reira, ’ia ’ite tātou e ha’apa’o ānei rātou i te mau mea ato’a tā te Fatu tō rātou Atua e fa’aue ia rātou ra ;

26 ’E ’o rātou ’o tē ha’apa’o i tō rātou ’āi’a mātāmua e fa’arahihia ïa tā rātou ; ’e ’o tē ’ore e ha’apa’o i tō rātou ’āi’a mātāmua e ’ore ïa e fāri’i i te hanahana i roto i te bāsileia tei reira rātou ’o tei ha’apa’o i tō rātou ’āi’a mātāmua ; ’e ’o rātou ’o tē ha’apa’o i te piti o tō rātou ’āi’a e fa’arahihia ïa te hanahana i ni’a i tō rātou upo’o a muri ē a muri noa atu.

27 ’E ’ua nā ’ō a’era te Fatu : ’O vai tā’u e tono ? ’E ’ua pāhono mai ra te hō’ē tei au i te Tamaiti a te Ta’ata : Teie au, ’a tono iā’u. ’E ’ua pāhono mai ra te tahi, nā ’ō mai ra : Teie au, ’a tono iā’u. ’E ’ua parau atu ra te Fatu : E tono vau i tō mua ra.

28 ’E ’ua riri roa a’era te piti, ’e ’aore atu ra i ha’apa’o i tōna ’āi’a mātāmua ; ’e, i taua mahana ra, e rave rahi tei pe’e atu iāna.