1 Na emi, Abraham, nyaa ^aUrim na Thummim no, dza Ewuradze me Nyankopɔn dze maa me wɔ Chaldeefo hɔn Ur hɔ;

2 Na muhun ^anworaba, na wɔsõsõ yie, na hɔn mu kor bɛn Nyankopɔn n’ahengua no papaapa; na pii so wɔ hɔ a wɔsõsõe a wɔbɛn no;

3 Na Ewuradze see me dɛ: Woyinom na wɔhwɛ ndzɛmba do; na dza ɔsõ no ne dzin dze ^aKolob, osiandɛ ɔbɛn me, na Emi nye Ewuradze wo Nyankopɔn no: Medze iyi esi hɔ dɛ ɔnhwɛ hɔn a wɔwɔ dɛm nhyehyɛɛ kor noara mu no do tse dɛ mbrɛ igyina do yi.

4 Na Ewuradze see me dɛ, ɔnam Urim na Thummim no do, na Kolob bedzii Ewuradze ne nhyehyɛɛ ekyir, dɛ mbrɛ ne mber na hyɛber no tse wɔ no ho nkyinii ho, dɛ no ho nkyinii kor yɛɛ ^ada kor maa Ewuradze tse dɛ mbrɛ ne nkanee ho nhyehyɛɛ tse, na ɔyɛ ^bmfe apem dɛ mber wɔahyehyɛ ato hɔ ama bea a igyina do yi. Iyi nye Ewuradze ne mber a ɔfa do kan, tse dɛ Kolob ne nkanee.

5 Na Ewuradze see me dɛ: Sor abɔdze a ɔyɛ kandzea kakraba no, ne kan no suar kyɛn dza ɔhwɛ adzekyee do no, dza ɔhwɛ adzesaa do no sõ mpo kyɛn anaa ɔyɛ kɛse sen dza igyina do no ne mber nkanee, osiandɛ okyin noho nyaa dodow; ɔtse dɛm osiandɛ ogyina asaase a igyina do yi no sor, dɛm ntsi ne mber nkanee no nndɔɔ sõ dɛ ne nda, na n’abosoom, na ne mfe.

6 Na Ewuradze see me dɛ: Afei, Abraham, dɛm nokwar ^aebien yi wɔ hɔ, hwɛ w’enyiwa ehu; wɔdze ama wo ama eehu mber ne nkanee, na mber a wɔahyehyɛ ama no, nyew, asaase a igyina do yi ne mber a wɔahyehyɛ ama no, nye kan kɛse a wɔama ɔhwɛ adzekyee do no ne mber a wɔahyehyɛ, nye kan kakraba no a wɔama ɔhwɛ adzesaa do no ne mber a wɔahyehyɛ.

7 Afei mber a wɔahyehyɛ ama kan kakraba no yɛ mber tsentsen wɔ ne nkanee mu kyɛn asaase a igyina do yi ne mber nkanee.

8 Na ber a dɛm nokwar ebien yinom wɔ hɔ no, nokwar bi so bɔwɔ hɔn sor, ɔnye dɛ, sor abɔdze bi so wɔ hɔ a ne mber nkanee no bɛda ho ayɛ tsentsen;

9 Na dɛm na mber nkanee wɔ sor abɔdze kor so a ɔbɔ do bɛyɛ, kɛpem dɛ ibodu Kolob, dɛm Kolob yi tse dɛ Ewuradze ne mber nkanee; dɛm Kolob yi wɔ bea ɔbɛn Nyankopɔn n’ahengua, ama wɔaahwɛ dɛm sor abɔdze yinom a wɔkã dɛm ^anhyehyɛe kor noara ho no do tse dɛ dza igyina do yi.

10 Na wɔdze ama wo dɛ hu mber a wɔdze ama nworaba nyinara a wɔwɔ hɔ dɛ wɔmma kan no hɔn mber a wɔahyehyɛ no mu, kodu dɛ ebɛbɛn Nyankopɔn n’ahengua no ho.

11 Dɛm na emi, Abraham, nye Ewuradze ^akasae, enyim na enyim, dɛ nyimpa rekasa kyerɛ ne nyɛnko; na ɔkãa ndwuma a ɔdze ne nsa ayɛ kyerɛɛ me;

12 Na ɔsee me dɛ: Me babanyin, me babanyin (na ɔtseen ne nsamu), hwɛ mebɛkyerɛ wo ndzɛmba yinom nyinara. Na ɔdze ne nsa too m’enyiwa do, na muhun dɛm ndzɛmba no a ɔdze ne nsa ayɛ no na ɔdɔɔ sõ; na wɔyɛɛ mbɔho mbɔho wɔ m’enyiwa do, na menntum ennhu n’ewiei.

13 Na ɔsee me dɛ: Iyi nye Shinehah a ɔyɛ ewia no. Na ɔsee me dɛ: Kolob, ɔno nye nworaba. Na ɔsee me dɛ: Olea, ɔno nye bosoom. Na ɔsee me dɛ: Kokaubeam, ɔno kyerɛ nworaba pii, anaadɛ kan akɛse nyinara, dza wɔwɔ wimu wɔ sor.

14 Na ɔyɛ adzesaaber mu, ber a Ewuradze kãa nsɛm yi kyerɛɛ me: Mebɛma ^aadɔr mbordo, na ^bw’asefo a wodzi w’ekyir no bɛyɛ dɛ iyinom; na dɛ innkotum ^cakan anhwea no dodow a, dɛmara so na w’asefo hɔn dodow bɛyɛ.

15 Na Ewuradze see me dɛ: Abraham, medze ndzɛmba yinom rekyerɛ wo ansaana hom akɔ Egypt, ama hom aabɔ nsɛm yinom nyina ho dawur.

16 Sɛ ndzɛmba ebien yi wɔ hɔ, na sɛ kor bɔ kor no do a, nna ndzɛmba akɛse bɔwɔ hɔ a ɔbɔ hɔn do; dɛm ntsi ^aKolob sõ koraa kyɛn Kokaubeam a ehu nyinara, osiandɛ ɔbɛn me.

17 Nkyii, sɛ ndzɛmba ebien wɔ hɔ, kor bɔ kor no do, na bosoom bɔ asaase do a, nna ɔbɛyɛ dɛ sor abɔdze anaadɛ nworaba bɔwɔ hɔ a ɔbɔ no do, na biribiara nnyi hɔ a sɛ Ewuradze wo Nyankopɔn dze ahyɛ n’akoma mu dɛ ɔbɛyɛ no, gyedɛ ^aɔyɛ.

18 Dɛ mbrɛ ɔtse no, ɔyɛɛ nworaba kɛse no; eso, dɛmara, sɛ esunsum ebien wɔ hɔ, kor wɔ nyansa mbordo kyɛn kor no, naaso dɛm esunsum ebien yinom, ɔwɔ mu dɛ kor wɔ nyansa mbordo kyɛn kor, wonnyi ahyɛse; wɔwɔ hɔ dada, wonnyi ewiei, na wɔbɛtsena hɔ daa, osiandɛ wɔyɛ ^agnolaum, anaadɛ onnyiewiei.

19 Na Ewuradze see me dɛ: Nokwar ebien yinom wɔ hɔ, dɛ wɔyɛ esunsum ebien, kor wɔ nyansa mbordo kyɛn kor; na kor so wɔ hɔ a ɔwɔ nyansa kyɛn hɔn; Emi nye Ewuradze wo Nyankopɔn, Mowɔ ^anyansa mbordo kyɛn hɔn nyinara.

20 Ewuradze wo Nyankopɔn somaa no bɔfoe dɛ ^aɔmbɛgye wo mfi Elkenah no sɔfoe no nsamu.

21 Metse hɔn nyinara hɔn finimfin; dɛm ntsi, seseira maba famu ha wɔ wo nkyɛn dɛ merebɛda ^andwuma a medze me nsa ayɛ edzi akyerɛ wo, iyi mu na me ^bnyansaa bɔ hɔn nyinara hɔn dze do, osiandɛ midzi hen wɔ ɔsorsor, nye asaase a ɔwɔ ase do, wɔ nyansa na nyimdzee mu, wɔ sunsum mu enyansafo nyinara a edze w’enyiwa ehu fi ahyɛse no; mebaa famu wɔ ahyɛse no wɔ sunsum mu enyansafo nyinara a edze w’enyiwa ehu mu.

22 Nkyii Ewuradze dze ^asunsum mu enyansafo nyinara a wɔhyehyɛɛ hɔn ^bansaana wɔrobɔ wiadze no akyerɛ emi, Abraham; na iyinom nyinara hɔn mu no ^cekunyin na akɛse pii wɔ mu;

23 Na Nyankopɔn hun dɛ akra yinom no woye, na ɔsoɛree gyinaa hɔn finimfin, na ɔsee dɛ: Iyinom na mebɛyɛ hɔn m’ahemfo; na ogyinaa hɔn a wɔyɛ esunsum no hɔn mu, na ohun dɛ woye; na ɔsee me dɛ: Abraham, eyɛ hɔn mu kor; ^awɔsaan mu yii wo ansaana wɔrobɔwo wo.

24 Nna ^akor bi gyinaa hɔn mu a ɔtse dɛ Nyankopɔn, na ɔsee hɔn a wɔkã noho no dɛ: Yɛbɔkɔ famu, osiandɛ bea wɔ hɔ, na yɛbɛfa ndzɛmba yinom, na yɛdze ^bayɛ ^casaase ama iyinom aatsena do;

25 Na ^ayɛbɔsɔ hɔn ahwɛ, dɛ sɛ ^bwɔbɛyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no;

26 Na hɔn a wosie hɔn ^aasetsena a odzi kan no wɔdze enyimnyam bi bɛkã hɔn ho, na hɔn a wonnsie hɔn asetsena a odzi kan no nnkenya enyimnyam wɔ dɛm ahenman kor noara mu dɛ hɔn a wosie hɔn asetsena a odzi kan no; na hɔn a wosie hɔn ^basetsena a otsĩa ebien no wɔdze ^cenyimnyam bogu hɔn etsir do afebɔɔ kesi afebɔɔ.

27 Na ^aEwuradze see dɛ: Woana na mobɔsoma no? Na kor bi a ɔtse dɛ ^bNyimpa Ba no yii ano dɛ: Emi nye yi, soma me. Na ^ckor so yii ano na ɔsee dɛ: Emi nye yi soma me. Na Ewuradze see dɛ: Mobɔsoma dza odzi kan no.

28 Na nyia ^aotsĩa ebien no no bo fuwii, na oennsie ne asetsena a odzi kan no; na, dɛm da no, ^bdodowara kãa no do.