1 Ket siak, ni Abraham, addaanak iti ^aUrim ken Tumim, nga inted kaniak ti Apo a Diosko, idiay Ur dagiti Caldeos;

2 Ket nakitak dagiti ^abituen, a naindaklanda unay, a nakaas-asideg ti maysa kadakuada iti trono ti Dios; ken adu pay ti naindaklan nga asideg iti daytoy;

3 Ket kinuna kaniak ti Apo: Dagitoy ti mangiturturay; ket ^aKolob ti nagan dayta maysa a naindaklan, gapu ta asideg kaniak, ta siak ti Apo a Diosmo: Tinudingak daytoy a mangituray kadagiti amin a maibilang iti maymaysa nga ayo a kas iti dayta pagbatbatayam.

4 Ket kinuna kaniak ti Apo, babaen ti Urim ken Tumim, nga agtungpal ti Kolob iti wagas ti Apo, maibatay kadagiti oras ken panawenna iti panagpusiposna sadiay; a maysa nga ^aaldaw iti Apo ti maysa a pusiposna, a maibatay iti wagas ti panagbilangna, a sangaribu a ^btawen a maibatay iti oras a naituding iti dayta pagbatbatayam. Kastoy ti panagbilang iti oras ti Apo, a maibatay iti panagbilang iti Kolob.

5 Ket kinuna kaniak ti Apo: Ti planeta a nakapkapsut ti lawagna, a nakapkapsut ngem iti dayta mangituray iti aldaw, a kas iti rabii, nangatngato wenno dakdakkel ngem iti pagtaktakderam ti pagibasaran iti panagbilang, ta nabumbuntog nga agpusipos; kastoy ti mapasamak ta adda iti ngato ti daga a pagtaktakderam, ngarud ti panagbilang iti orasna saan a kas iti kaadu dagiti aldawna, ken bulanna, ken tawenna.

6 Ket kinuna kaniak ti Apo: Ita, Abraham, adda dagitoy ^adua a kinapudno, adtoy kitaem, naited kenka tapno maammuam no mamin-ano ti panagbilang, ken ti naikudi nga oras, wen, ti naikudi nga oras ti daga a pagtaktakderam, ken ti naikudi nga oras ti naranraniag a naikudi a mangituray iti aldaw, ken ti naikudi nga oras ti nakapkapsut ti lawagna a mangituray iti rabii.

7 Ita at-atiddog nga oras ti naikudi iti nakapkapsut ti lawagna a maibatay iti panagbilang ngem iti panagbilang iti oras ti daga a pagtaktakderam.

8 Ket iti kaadda dagitoy dua a kinapudno, adda sabali a kinapudno a mangrimbaw kadakuada, iti kasta, addanto sabali a planeta nga at-atiddog pay ti panagbilang iti oras;

9 Ket iti kastoy addanto panagbilang iti oras iti maysa a planeta a mangrimbaw iti sabali, agingga a makadanonka iti Kolob, ta agpannuray ti Kolob iti panagbilang ti Apo iti oras, ta naikudi ti Kolob iti trono ti Dios, a mangituray kadagiti amin a planeta a maibilang iti maymaysa nga ^aayo a kas iti dayta pagtaktakderam.

10 Ket naited kenka daytoy a mangammo iti naikudi nga oras dagiti amin a bituen a naikudi a mangted iti lawag, agingga a makaasidegka iti trono ti Dios.

11 Kastoy siak, ni Abraham, ^anakisaoak iti Apo, a rupanrupa, a kas iti pannakisao ti maysa a tao iti sabali; ket imbagana kaniak dagiti aramid nga inaramid dagiti imana;

12 Ket kinunana kaniak: Anakko, anakko (ket nayunnat dagiti imana), adtoy ipakitak amin kenka dagitoy. Ket sinagidna dagiti matak, ket nakitak dagidiay banag nga inaramid dagiti imana, a nagadu; ket immaduda iti panagkitak, ket diak makita ti pagpatinggaanda.

13 Ket kinunana kaniak: Daytoy ti Sineha, nga isu ti init. Ken kinunana kaniak: Kokob, nga isu ti bituen. Ken kinunana kaniak: Olea, nga isu ti bulan. Ken kinunana kaniak: Kokaubeam, a mangipasimudaag kadagiti bituen, wenno amin dagiti dadakkel a lawag, nga adda iti law-ang ti langit.

14 Ket rabii idi ibaga kaniak ti Apo dagitoy a balikas: ^aPaaduenkayonto, ken dagiti sumaruno a ^bbukelmo, a kas kadagitoy; ket no dimo mabilang ti ^ckaadu ti anay, kastanto met ti kaadu dagiti bukelmo.

15 Ket kinuna kaniak ti Apo: Abraham, ipakitak kenka dagitoy a banag sakbay a mapanka iti Egipto, tapno ipakdaarmo amin dagitoy a balikas.

16 No adda dua a banag, ket adda nangatngato ngem iti maysa, addanto dagiti nain-indaklan a banag a mangrimbaw kadakuada; ngarud ni ^aKolob ti kaindaklanan kadagiti amin a nakita a Kokaubeam, gapu ta isu ti kaasitgan kaniak.

17 Ita, no adda dua a banag, maysa ti nangatngato iti sabali, ket ti bulan adda iti ngatuen ti daga, ngarud nangatngato ngem iti daytoy ti planeta wenno bituen; ket awan ti ipapuso ti Apo a Diosmo nga aramiden ngem iti ^aaramidenna iti daytoy.

18 Ngem isu a nangaramid iti nain-indaklan a bituen; a kasla, met, no adda dua nga espiritu, ket nasirsirib ti maysa ngem iti sabali, nupay kasta dagitoy dua nga espiritu, iti laksid ti kinasirsirib ti maysa ngem iti sabali, awan ti nanipudanna; addadan idi, awan ti paggibusanda, addadanto latta, ta ^agnolaumda, wenno agnanayonda.

19 Ket kinuna kaniak ti Apo: Adda dagitoy dua a kinapudno, nga adda dua nga espiritu, a nasirsirib ti maysa ngem iti sabali; addanto pay sabali a nasirsirib ngem isuda; siak ti Apo a Diosmo, ^anasirsiribak ngem kadakuada amin.

20 Nangibaon ti Apo a Diosmo iti anghel a ^amangwayawaya kenka kadagiti ima ti saserdote ni Elkena.

21 Agindegak iti tengngada amin; siak ita, ngarud, bimmabaak kenka tapno ipakdaarko kenka dagiti ^aaramid nga inaramid dagiti imak, a nangrimbawan ti ^bsiribko kadakuada amin, ta agturayak iti langit iti ngato, ken iti daga iti baba, iti amin a kinasirib ken kinaannad, kadagiti amin a pagsiriban a nakita dagita matam manipud pay idi punganay; bimmabaak idi punganay iti tengnga amin dagiti pagsiriban a nakitamon.

22 Ita naipakitan ti Apo kaniak, nga Abraham, dagiti ^akinasirib a nabukel idi ^bsakbay ti lubong; ket maibilang kadagitoy dagiti adu a ^cmadaydayaw ken naindaklan;

23 Ket nakita ti Dios a nasayaat dagitoy a kararua, ket nagtakder iti tengngada, ket kinunana: Pagbalinekto dagitoy nga agturayko; ta nagtakder iti ummong dagiti espiritu, ket nakitana a nasayaatda; ket kinunana kaniak: Abraham, maysaka kadakuada; ^anapilikan sakbay pay ti pannakaipasngaymo.

24 Ket nagtakder iti ummong ti ^amaysa kadakuada a kasla Dios, ket kinunana kadagiti adda a kaduana: Bumabatayo, ta adda lugar sadiay, ket alaentayo dagitoy a kasapulan, ket ^bmangaramidtayo iti ^cdaga a pagtaengan dagitoy;

25 Ket ^aipaneknektayo kadakuada daytoy, ta kitaentayo no ^baramidenda amin a banag nga ibilin kadakuada ti Apo a Diosda;

26 Ket dagiti agtalinaed iti ^aimmuna a kasasaadda manayonandanto; ket dagiti saan nga agtalinaed iti immuna a kasasaadda awanto ti gloriada iti isu met la a pagarian dagiti agtalinaed iti immuna a kasasaadda; ket dagiti agtalinaed iti ^bmaikadua a kasasaadda addanto ^cgloria a mainayon iti uloda iti agnanayon nga awan inggana.

27 Ket kinuna ti ^aApo: Asino ti ibaonko? Ket adda maysa a simmungbat a kasla ^bAnak ti Tao: Adtoyak, ibaonnak. Ket ^csabali ti simmungbat a nagkuna: Adtoyak, ibaonnak. Ket kinuna ti Apo: Ibaonko ti immun-una.

28 Ket nakapungtot ti ^amaikadua, ket saanna a pinagtalinaed ti immuna a kasasaadna; ket iti dayta nga aldaw, ^badu ti simmurot kenkuana.