Vahe 9
1 Oku fakafetai a Tevita ki he Otua i he ene fai ae fakamāu. 11 Oku ne ue‘i ae kakai ke fakafetai kiate ia. 18 Oku ne kole ae tabuaki koeuhi ke ne fakafetai ai kiate ia.
Ki he Takimua i he Muti‐labeni, koe Same a Tevita.
¶ 1 TEU fakafetai kiate koe, E Jihova, aki hoku loto kotoa; teu fakaha atu hoo gaue fakaofo kotoabe.
2 Teu fiefia mo nekeneka iate koe: teu hiva fakamalo ki ho huafa, akoe oku ke maoluga lahi taha be.
3 Bea ka foki kimui hoku gaahi fili, te nau higa o auha i ho fofoga.
4 He naa ke lagomia eku totonu mo eku gaue; naa ke nofo i he nofoa, o fakamāu i he maonioni.
5 Kuo ke valoki ae hiteni, kuo ke fakaauha ae agakovi, kuo ke tamate‘i ho nau higoa ke taegata bea taegata.
6 Kuo hoko ke gata aubito ae gaahi fakaauha oe fili: bea ko ho nau gaahi kolo kuo ke fakaauha; kuo auha mo kinautolu ho nau fakamanatu.
7 Ka e moui mau ai be a Jihova: kuo ne teu‘i hono afioaga ki he fakamāu.
8 Bea te ne fakamāu a mamani i he maonioni, e atu eia ae fakamāu ki he kakai i he agatonu.
9 Bea koe hufaga foki a Jihova ki he mamahi, koe kalofaga i he gaahi aho fakamamahi.
10 Bea ko kinautolu oku ilo ki ho huafa te nau falala kiate koe: he ko koe, E Jihova, nae ikai te ke jiaki akinautolu oku kumi kiate koe.
11 Hiva fakafetai kia Jihova, aia oku afio i Saione: fakaha i he ao oe kakai ene gaahi gaue.
12 Oka ne ka eke ki he toto, oku ne manatu‘i akinautolu: oku ikai te ne fakagalogalo‘i ae tagi ae agavaivai.
13 Ke ke aloofa kiate au, E Jihova; o tokaga ki he eku mamahi meiate kinautolu oku fehia kiate au, akoe oku ke hiki au ki oluga mei he gaahi mataba oe mate:
14 Koeuhi keu fakaha ho ogoogolelei kotoabe i he gaahi mataba oe taahine o Saione: teu fiefia i hoo fakamoui.
15 Kuo galo hifo ae hiteni i he luo naa nau gaohi: i he tauhele naa nau fakalilo kuo moua ai ho nau va‘e.
16 Oku ilo‘i a Jihova i he fakamāu oku ne fai: kuo hele‘i ae agakovi i he gaue a hono nima oona. Hikaione. Sila.
17 E teke‘i ae agahala ki loto heli, moe gaahi buleaga kotoabe oku fakagalogalo‘i ae Otua.
18 Koeuhi e ikai galo mau ai be ae majiva: e ikai auha ke taegata ae amanaki ae majiva.
19 Tuu hake, E Jihova; oua naa tuku ke malohi ae tagata: tuku ke fakamāu ae hiteni i ho ao.
20 Fakamanavahe‘i akinautolu, E Jihova: koeuhi ke ilo e he gaahi buleaga koe tagata be akinautolu. Sila.