¶ 1 E JIHOVA, fanogo ki he eku lotu, bea tuku ke a‘u atu eku tagi kiate koe.

2 Oua naa ke fufu ho fofoga iate au i he aho oku ou mamahi ai; fakatokaga‘i ho fofoga kiate au: i he aho oku ou ui ai ke vave hoo talia au.

3 He kuo fakaoji hoku gaahi aho o hage koe kohu, bea kuo vela hoku gaahi hui o hage koe vee tofunaga.

4 Kuo ta‘i hoku loto, bea kuo mae o hage koe mohuku; koia kuo galo ai iate au ke kai eku ma.

5 Koeuhi koe le‘o o eku to‘e, koia oku biki ai hoku gaahi hui ki hoku kili.

6 Oku ou tatau moe belikani oe toafa: oku ou hage koe lulu oe botu lala.

7 Oku ou leo, beau tatau moe kihi‘i manu buna oku toko taha be i he tuahivi oe fale.

8 Oku manuki kiate au a hoku gaahi fili i he aho kotoabe; bea ko kinautolu oku mata lili kiate au kuo nau fuakava ke agatuu kiate au.

9 He kuou kai ae efuefu o hage koe ma, mo hui aki hoku inu ae loimata,

10 Koeuhi ko ho tubutamaki mo ho houhau: he kuo ke hiki hake au, bea li au ki lalo.

11 Oku tatau hoku gaahi aho moe ata oku mole atu; bea kuou mae o hage koe mohuku.

12 Ka ko koe, E Jihova, te ke tologa o taegata; mo hoo fakailoga ki he gaahi toutagata kotoabe.

13 Te ke tuu hake, mo ke aloofa ki Saione: he koe aho ke tokoni ia, io, koe aho kuo tuutuuni kuo hoko mai.

14 He oku fiemalie a hoo kau tamaioeiki i hono gaahi maka, bea oku nau ofa ki hono efu oona.

15 Koia e manavahe ai ae hiteni ki he huafa o Jihova, bea koe gaahi tu‘i kotoabe o mamani ki ho nāunāu.

16 Oka toe laga hake e Jihova a Saione, e fakaha ia i hono nāunāu.

17 Te ne tokaga ki he lotu ae majiva bea e ikai manuki‘i e nau hu.

18 E tohi eni ma ae toutagata e ha‘u, bea koe kakai e fakatubu te nau fakamalo kia Jihova.

19 He kuo afio hifo ia mei he maoluga o hono fale tabu; nae afio a Jihova mei he lagi ki mamani;

20 Ke ne fanogo ki he to‘e oe bobula; ke vete akinautolu kuo tuutuuni ke mate;

21 Ke fakaha ae huafa o Jihova i Saione, mo ene fakamalo i Jelusalema;

22 Oka fakataha ae kakai, bea moe gaahi buleaga, ke tauhi a Jihova.

23 Naa ne fakavaivai‘i hoku malohi i he hala; naa ne fakanounou hoku gaahi aho.

24 Naaku behe, E hoku Otua, oua naa ave au i he lotolotoga o hoku gaahi aho: ko ho gaahi ta‘u oku tologa ki he toutagata kotoabe.

25 Naa ke ai i he kamataaga ae tuuga o mamani: bea koe gaahi lagi koe gaue ia i ho nima.

26 E auha ia, ka e behe ai be akoe: io, e fakaaau kotoabe ia ke motua o hage koe kofu; bea hage koe bulubulu te ke fatufatu ia, bea e fakakehe ia:

27 Ka e behe ai be akoe, bea e ikai hano gataaga o ho gaahi ta‘u.

28 E tologa ae fānau a hoo kau tamaioeiki, bea e fokotuu mau ho nau hako i ho ao.