¶ 1 BEA nae folofola a Jihova kia Mosese, o behe,

2 Lea kia Elone bea ki hono gaahi foha, koeuhi ke nau fakamavae akinautolu mei he gaahi mea maonioni ae fānau a Isileli, bea ke oua naa nau fakahala‘i hoku huafa maonioni i he gaahi mea koia oku nau fakatabu‘i kiate au: Ko au ko Jihova.

3 Tala kiate kinautolu, Koia iate kimoutolu i ho mou hako kotoabe i ho mou gaahi toutagata, oku alu ki he gaahi mea maonioni, aia oku fakatabu‘i e he fānau a Isileli kia Jihova, ka oku ne tae maa, e motuhi ae laumalie koia mei hoku ao: Ko au ko Jihova.

4 Koe tagata koia i he hako o Elone oku kilia, be mahaki koe au; oua naa kai ia i he gaahi mea maonioni, kae oua ke maa ia. Bea mo ia oku ala ki ha mea tae maa i he mate, be i ha tagata oku au noa hono mahaki;

5 Be ha taha oku ala ki ha mea totolo, aia e hoko o tae maa ai, be i ha tagata aia e hoko o bihia ai, i he mahaki oku tae maa ai ia;

6 Koe tagata kuo ala ki ha mea behe e tae maa ia o a‘u ki he efiafi, bea e ikai kai eia ae gaahi mea maonioni, kae oua ke kaukau hono jino i he vai.

7 Bea ka to ae laa, e toki maa ia, bea kai eia ae gaahi mea maonioni; he koeuhi ko ene mea kai ia.

8 Koia oku mate mahaki be, be koia kuo haehae e he manu, oua naa ne kai ia ke fakahala ai ia: Ko au ko Jihova.

9 Koia ke nau tauhi eku gaahi tuutuuni ni, telia naa nau halaia ai, bea mate ai, o kabau oku nau fakahala‘i ia: Ko au ko Jihova oku ou fakamaonioni‘i akinautolu.

10 E ikai kai e ha muli ki he gaahi mea maonioni: koe aunofo ae taulaeiki, be koe tamaioeiki uga gaue, e ikai kai ia i he mea maonioni.

11 Bea kabau e fakatau ha toko taha e he taulaeiki aki ene baaga, e gofua ene kai aana, bea mo ia kuo fanau i hono fale: te na kai i he ene meakai.

12 Bea kabau oku unoho ae ofefine oe taulaeiki moe tagata kehe, e ikai gofua a ene kai aana i he mea atu oe gaahi mea maonioni.

13 Bea kabau koe fefine baea ae ofefine oe taulaeiki, be kuo fakamavae‘i bea ikai haa ne tamajii, bea kuo toe omi ia ki he fale o ene tamai, o hage ko ene kei jii, e kai ia i he meakai a ene tamai: kae oua naa kai ia e ha muli.

¶ 14 Bea kabau e kai fainoa be e ha tagata ae mea maonioni, te ne fakalahi aki ia hono nima oe vahe o ia, bea atu ia ki he taulaeiki fakataha moe mea maonioni.

15 Bea e ikai te nau fakahala‘i ae gaahi mea maonioni ae fānau a Isileli, aia oku nau atu kia Jihova:

16 Be tuku akinautolu ke fua ae hia ae fai hala, i he e nau kai e nau gaahi mea maonioni: he ko au ko Jihova oku ou fakamaonioni‘i akinautolu.

¶ 17 Bea nae folofola a Jihova kia Mosese, o behe,

18 Lea kia Elone, bea ki hono gaahi foha, bea ki he fānau kotoabe a Isileli, bea ke behe kiate kinautolu, Iloga ae tagata i he fale o Isileli, be i he gaahi muli i Isileli, oku loto ke atu ene mea ofa i he ene gaahi fuakava, bea ki he ene gaahi mea oku atu loto ataatā be, aia oku nau atu kia Jihova koe feilaulau tutu:

19 Ke mou atu o fai loto lelei be, ae manu tagata tae hano mele mei he faga bulu be koe faga sibi, be koe faga koji.

20 Ka koia oku ai hano mele, oua naa mou atu ia; koeuhi e ikai leleiia ai akimoutolu.

21 Bea koia oku ne atu kia Jihova ae feilaulau oe gaahi mea fakamelino ke fakahoko aki ene fuakava, bea koe mea atu loto lelei i he faga bulu, be i he faga sibi, ke haohaoa ia koeuhi ke ma‘u lelei ia; oua naa i ai hano mele.

22 Koe kui, be koe faji, be koe mutu, be koe mea fufula, be koe kama, be koe mogumagu, oua naa mou atu mei ai kia Jihova, be fai aki ia ha feilaulau tutu aki ae afi ki he fuga feilaulauaga o Jihova.

23 Koe bulu be koe lami oku i ai ha mea kovi, be oku taehaohaoa i ha mea e taha, e gofua ke atu ia koe feilaulau loto ataatā ia: ka e ikai ma‘u lelei ia i he fuakava.

24 Oua naa mou atu kia Jihova aia kuo fakavolu, be kuo taomia, be kuo mafeji, be kuo mahifi; bea oua naa mou fai ha feilaulau aki ia i ho mou fonua.

25 Bea oua naa ke atu i he nima o ha muli ae mea kai a ho mou Otua i he gaahi mea ni; koeuhi oku i ai e nau kovi, bea oku i ai ae gaahi mele: e ikai aoga ia ma amoutolu.

¶ 26 Bea nae folofola a Jihova kia Mosese, o behe,

27 Oka fanau‘i ha bulu, be ha sibi, be ha koji, tuku ia ke aho fitu mo ene fa‘e: bea mei he aho valu o fai ai be e ma‘u lelei be ia koe feilaulau kuo gaohi aki ae afi kia Jihova.

28 Bea kabau ko ha bulu fefine ia be ha sibi fefine, oua naa mou tamate‘i ia mo hono uhiki i he aho be taha.

29 Bea ka mou ka loto ke atu ha feilaulau fakafetai kia Jihova, atu ia i he loto ataatā lelei be.

30 I he aho be koia e kai ia ke oji; oua naa mou tuku hono toe ki he abogibogi; Ko au ko Jihova.

31 Koia ke mou tauhi ai eku gaahi fekau, mo fai ki ai; Ko au ko Jihova.

32 Bea oua naa mou fakahala‘i hoku huafa maonioni; kae abajia kiate au ae fānau a Isileli: Ko au ko Jihova aia oku ou fakatabu‘i akimoutolu;

33 Naaku omi akimoutolu mei he fonua ko Ijibite, ke hoko ko ho mou Otua: Ko au ko Jihova.