Ngaahi Folofolá
Koe Tohi a Isaia 49


Vahe 49

1 I he fekau a Kalaisi ki he kakai Jiu, oku ne lāuga kiate kinautolu. 5 Oku fekau ia moe gaahi talaofa lelei ki he kakai Jenitaile. 13 Oku taegata ae ofa ae Otua ki hono jiaji. 18 Koe toe laga oe jiaji ki hono muaki lelei. 24 Koe fakamoui lahi mei he nofo fakabobula.

1 FANOGO, E gaahi motu, kiate au; bea fakafanogo, akimoutolu ae kakai, mei he mamao; Kuo ui e Jihova kiate au mei he manāva; mei he fatu o eku fa‘e kuo ne lea aki hoku higoa.

2 Bea kuo ne gaohi hoku gutu o hage koe heleta majila; i he malumalu o hono nima kuo ne fufu au, bea gaohi au koe gahau gigila; kuo ne fakafufu au i hono aiaga gahau;

3 Bea ne behe kiate au, Ko koe, E Isileli, ko eku tamaioeiki teu ogoogolelei iate koe.

4 Bea neu behe, Kuou gaue taeaoga: kuou fakaoji noabe eku malohi, bea taeaoga: ka oku mooni oku ia Jihova eku fakamāu, bea i hoku Otua a eku gaue.

5 Bea koeni, oku behe e Jihova aia naa ne fakafuofua au mei he manāva ke hoko ko ene tamaioeiki, ke toe omi a Jekobe kiate ia, Kabau e ikai tanaki a Isileli, ka teu ogoogolelei i he ao o Jihova, bea e hoko a hoku Otua ko hoku malohi.

6 Bea naa ne behe, Koe mea jii ke ke hoko ko eku tamaioeiki ke toe fokotuu ae gaahi faahiga o Jekobe, bea ke fakailiili ae kakai o Isileli kuo fakahaofi: bea teu foaki foki koe koe māma ki he kakai Jenitaile, koeuhi ke ke hoko ko hoku fakamoui o a‘u ki he gataaga o mamani.

7 Oku behe e Jihova, koe Huhui o Isileli, bea mo hono Toko Taha Maonioni, kiate ia oku fehia ki ai ae tagata, kiate ia oku fākalilia ki ai ae buleaga, ki he tamaioeiki ae kau bule, E mamata bea tuu hake ae gaahi tu‘i, e lotu ae gaahi houeiki, koeuhi ko Jihova aia oku agatonu, bea moe Toko Taha Maonioni o Isileli, aia kuo ne fili koe.

8 Oku behe e Jihova, I he kuoga tuutuumalie kuou fanogo kiate koe, bea i he aho fakamoui kuou tokoni kiate koe: bea teu malu‘i koe, bea foaki koe koe fuakava oe kakai, ke fokotuu mau a mamani, ke gaohi ke toe kakai ae gaahi abi liaki;

9 Koeuhi ke ke behe ki he kau bobula, Alu atu; kiate kinautolu oku i he bouli, Fakaha akimoutolu. Te nau kai i he gaahi hala, bea e i he gaahi botu maoluga kotoabe ae nau mea kai.

10 E ikai te nau fiekaia be fieinu; bea e ikai teia akinautolu e he bubuha be e he laa: he ko ia oku aloofa kiate kinautolu te ne tataki akinautolu, io te ne fakahinohino akinautolu ki he gaahi matavai.

11 Bea teu gaohi hoku gaahi mouga kotoabe koe hala, bea e hakeaki‘i a hoku gaahi hala motua.

12 Vakai, e ha‘u akinautolu mei he tokelau bea mei he luluga; bea mo kinautolu ni mei he fonua ko Sinimi.

13 Hiva, ae gaahi lagi; bea ke fiefia, E mamani; bea ke ba mai i he hiva, ae gaahi mouga: he kuo fakafiemalie‘i e Jihova a hono kakai, bea te ne aloofa ki hono kakai mamahi.

14 Ka nae behe e Saione, Kuo liaki au e Jihova, bea kuo fakagalogalo‘i au e hoku Eiki.

15 E faa fakagalogalo‘i e ha fefine ene tama oku huhu, ke ne taeofa ai ki he tama a hono manāva? io, te nau faa fakagalo nai, ka e ikai teu fakagalogalo‘i koe.

16 Vakai, kuou tohi togi koe i hoku aofi nima; oku i hoku ao mau ai be a hoo gaahi a.

17 E fai vave hoo fānau; ko ho gaahi fili bea mo kinautolu nae fakamajiva‘i koe te nau alu iate koe.

18 Hiki hake ho mata o jio takatakai, bea vakai: ko kinautolu kotoabe oku tanaki fakataha akinautolu, ke ha‘u kiate koe. Oku behe e Jihova, Oku ou moui, bea te ke fakakofu‘i koe aki akinautolu kotoabe, o hage koe mea teuga, bea nonoo ia kiate koe, o hage koia oku fai e he taahine taane.

19 He ko ho gaahi botu maumau mo tae kakai, bea moe fonua o hoo fakaauha, e hoko ni o laujii koeuhi koe kakai, bea ko kinautolu nae folo hifo koe te nau mamao atu.

20 Koe fānau te ke ma‘u, hili ae mole iate koe ae taha, te nau behe i ho teliga, Oku jii ae botu ni kiate au: fakaataatā ae botu keu nofo ai.

21 Bea te ke toki behe i ho loto, Kohai kuo ne fakatubu kiate au akinautolu ni, kae vakai kuo mole iate au eku fānau, bea oku ou majiva, koe bobula, moe liaki? bea kohai kuo ne tauhi akinautolu ni? Vakai, nae liaki au toko taha be; ko kinautolu ni, naa nau ife?

22 Oku behe e he Eiki ko Jihova, Vakai, teu hiki hake hoku nima ki he kakai Jenitaile, bea fokotuu eku fuka ki he kakai: bea te nau omi ho gaahi foha i ho nau nima, mo ho gaahi ofefine e fua i ho nau uma.

23 Bea e hoko ae gaahi tu‘i ko hoo gaahi tamai ke tauhi fānau, bea koe gaahi tu‘i fefine ko hoo gaahi fa‘e ke tauhi hoo fānau: te nau bunou hifo kiate koe aki ho nau mata ki he kelekele, bea emo ae efu o ho va‘e; bea te ke ilo ko au ko Jihova: bea e ikai ma akinautolu oku tatali iate au.

24 E too ae koloa kuo vetea mei he malohi, be tukuage ae bobula totonu?

25 Ka oku behe e Jihova, Io koe gaahi bobula oe kakai malohi e faao, bea e tuku atu ae koloa kuo vete e he kakai fakamanavahe: koeuhi teu fai mo ia oku fai mo koe, bea teu fakamoui hoo fānau.

26 Bea teu fafaga akinautolu oku fakamalohi‘i koe aki ho nau jino onautolu; bea te nau kona i ho nau toto, o hage ha uaine foou: bea e ilo e he kakai kotoabe Ko au ko Jihova ko ho Fakamoui mo ho Huhui, koe Toko Taha Mafimafi o Jekobe.