¶ 1 BEA nae fekau e Mosese ke ha‘u a Isileli kotoabe, o ne behe kiate kinautolu, Fanogo, E Isileli, ki he gaahi tuutuuni moe gaahi fakamāu aia oku ou lea aki i ho mou teliga he aho ni, koeuhi ke mou ilo ia, bea tauhi, bea fai ki ai.

2 Nae fai e Jihova ko ho tau Otua ae fuakava mo kitautolu i Holebi.

3 Nae ikai fai e Jihova ae fuakava ni moe tau gaahi tamai, ka ko kitautolu, io, akitautolu oku moui kotoabe i heni he aho ni.

4 Nae folofola a Jihova kiate kimoutolu ae mata ki he mata i he mouga mei he loto afi;

5 (Naaku tuu i he vahaa o Jihova mo kimoutolu i he kuoga koia, ke fakaha kiate kimoutolu ae folofola a Jihova; he naa mou manavahe koeuhi koe afi, bea nae ikai te mou alu hake ki he mouga;) bea nae behe mai eia;

¶ 6 Ko au ko Jihova ko ho Otua, naaku omi koe kitua mei he fonua ko Ijibite, mei he fale fakabobula.

7 Oua naa ke ma‘u mo au ha otua kehe i hoku ao.

8 Oua naa ke gaohi kiate koe ha fakatātā, be ha mea fakatatau e taha i ha mea e taha i he lagi i oluga, be ha mea oku i he fonua i lalo ni, be ki ha mea oku i he vai i he lalo fonua:

9 Oua naa ke bunou hifo koe ki ai, be tauhi ki ai: he ko au Jihova ko ho Otua, koe Otua fuaa au, oku ou totogi ae hia ae gaahi tamai ki he fānau o a‘u ki hono tolu mo hono fa oe toutagata okinautolu oku fehia kiate au,

10 Beau fakaha ae aloofa ki he gaahi toko afe okinautolu oku ofa kiate au mo tauhi eku gaahi fekau.

11 Oua naa ke takuanoa ae huafa o Jihova ko ho Otua: koeuhi e ikai lau e Jihova koe tae halaia ia aia oku ne takuanoa hono huafa.

12 Tauhi ae aho sabate ke fakamaonioni‘i ia, o hage koe fekau a Jihova ko ho Otua kiate koe.

13 Koe aho e ono ke ke gaue ai, o fai ai hoo gaue kotoabe:

14 Ka ko hono fitu oe aho koe sabate ia o Jihova ko ho Otua; oua naa ke fai i ai ha gaue e taha, akoe, be ko ho foha, be ko ho ofefine, ko hoo tamaioeiki, be ko hoo kaunaga, be ko hoo bulu, be ko hoo asi, be ha manu e taha, be koe muli oku nofo i ho lotoa: koeuhi ke mālōlō mo koe a hoo tamaioeki mo hoo kaunaga.

15 Bea ke manatu naa ke nofo koe tamaioeiki koe i he fonua ko Ijibite, bea nae omi koe mei ai e Jihova ko ho Otua, i he nima mafimafi moe nima kuo mafao: koia kuo fekau ai e Jihova ko ho Otua kiate koe, ke ke tauhi ae aho sabate.

¶ 16 Fakaabaaba ki hoo tamai mo hoo fa‘e, o hage koe fekau a Jihova ko ho Otua kiate koe; koeuhi ke fuoloa ho gaahi aho, bea koeuhi ke hoko ai ae lelei kiate koe, i he fonua aia oku foaki e Jihova ko ho Otua kiate koe.

17 Oua naa ke fakabo.

18 Bea oua naa ke tonofefine.

19 Bea oua naa ke kaihaa.

20 Bea oua naa ke tukuaki‘i a ho kaugaabi.

21 Bea oua naa ke holi ki he unoho o ho kaugaabi, bea oua naa ke manumanu ki he fale o ho kaugaabi, be ki he ene goue, be ki he ene tamaioeiki, be ki he ene kaunaga, be ki he ene bulu, be ki he ene asi, be ki ha mea e taha oku a ho kaugaabi.

¶ 22 Nae folofola aki ae gaahi lea ni e Jihova ki hoo mou fakataha kotoabe i he mouga mei he loto afi moe ao, bea moe bouli matolu, i he le‘o lahi: bea nae ikai fakalahi ia. Bea nae tohi ia i he maka lafalafa e ua, o ne tuku mai ia kiate au.

23 Bea nae hoko o behe, i hoo mou ogo‘i ae le‘o mei he lotolotoga oe fakabouli, (he nae vela ae mouga i he afi,) naa mou ha‘u o ofi kiate au, io ae houeiki o ho mou gaahi faahiga, mo hoo mou kau mātua;

24 Bea naa mou behe, Vakai, kuo fakaha kiate kimautolu e Jihova ko ho mau Otua hono nāunāu mo hono lahi, bea kuo mau ogo‘i hono le‘o mei he loto afi: kuo mau mamata he aho ni oku alea ae Otua moe tagata, bea oku moui ia.

25 Bea koeni, koeha te mau mate ai? he koe afi lahi ni te ne fakaauha akimautolu: kabau te mau toe fanogo ki he le‘o o Jihova ko ho mau Otua, te mau toki mate ai.

26 He kohai ia i he kakai kotoabe, kuo ne fanogo ki he le‘o oe Otua moui oku folofola mei he loto afi, o hage ko kimautolu, bea kei moui?

27 Ke ke alu koe ke ofi, bea fanogo ki he folofola kotoabe a Jihova ko ho tau Otua: bea ke lea aki ekoe kiate kimautolu aia kotoabe e folofola ai a Jihova ko ho tau Otua kiate koe: bea te mau fonogo, bea fai ki ai.

28 Bea nae ogo‘i e Jihova ae le‘o o hoo mou gaahi lea, i hoo mou lea kiate au; bea nae behe e Jihova kiate au, Kuou fanogo ki he le‘o oe gaahi lea ae kakai ni, aia kuo nau lea aki kiate koe: kuo lelei kotoabe ae lea kuo nau lea aki.

29 Amujiaage e au kuo iate kinautolu ha loto behe, ke nau manavahe kiate au, bea tauhi mau ai be a eku gaahi fekau, koeuhi ke hoko ai ae lelei kiate kinautolu, bea ki he e nau fānau o taegata!

30 Alu o tala kiate kinautolu, Mou toe alu ki ho mou gaahi fale fehikitaki.

31 Ka ko koe, ke ke tuu i heni o ofi kiate au, bea teu fakaha kiate koe ae gaahi fekau kotoabe, moe gaahi tuutuuni, moe gaahi fakamāu, aia te ke ako aki kiate kinautolu, koeuhi ke nau fai ki ai i he fonua aia oku ou foaki kiate kinautolu ke nau ma‘u.

32 Koia ke mou tokaga o fai ia o hage koe fekau a Jihova ko ho mou Otua kiate kimoutolu: oua naa mou tafoki ki he nima toomatau be ki he toohema.

33 Te mou alu i he gaahi hala kotoabe aia kuo fekau e Jihova ko ho mou Otua kiate kimoutolu, koeuhi ke mou moui, bea mou lelei, bea ke mou fakatologa ho mou gaahi aho i he fonua te mou ma‘u.