Ngaahi Folofolá
Ⅱ. Samuela 22


Vahe 22

Koe hiva fakafetai a Tevita ki he Otua koeuhi ko ene fakamoui lahi, bea moe gaahi tabuaki kehekehe.

1 BEA nae lae aki e Tevita kia Jihova ae gaahi lea oe hiva ni i he aho nae fakamoui ai ia e Jihova mei he nima o hono fili kotoabe, bea mei he nima o Saula: o ne behe,

2 Ko hoku makatuu a Jihova, mo eku kolo, mo hoku fakamoui;

3 Koe Otua o hoku malohi; koia teu falala ki ai: ko hoku fakaū, moe malohi o eku moui, ko hoku fale maoluga, mo hoku hufaga, mo hoku fakamoui; oku ke fakahaofi au mei he fakamalohi‘i.

4 Teu ui kia Jihova aia oku tāu moia ae fakafetai: bea e behe ae fakamoui au mei hoku gaahi fili.

5 I he ene kabui au e he gaahi mamahi oe mate, nae fakamanavahe‘i au e he lomaki mai ae kau tagata agakovi;

6 Nae kabui au e he gaahi mamahi oe faitoka; nae talia au e he gaahi tauhele oe mate;

7 I he eku mamahi naaku ui kia Jihova, mo tagi ki hoku Otua: bea naa ne fanogo ki hoku le‘o mei hono fale tabu, bea nae a‘u atu a eku tagi ki hono fofoga.

8 Nae toki galulu ai a mamani mo tetetete; nae gau‘e mo lulululu ae tuuga oe lagi, koeuhi ko ene houhau.

9 Nae alu hake ae kohu mei hono fofoga, bea nae keina e he afi mei hono gutu; nae tutu aki ia ae fefie.

10 Naa ne ofe‘i hifo foki ae gaahi lagi o ne haele hifo: bea nae i hono lalo va‘e ae bouli.

11 Bea naa ne heka ki he jelubi, bea buna; bea nae ha mai ia i he kabakau oe matagi.

12 Bea naa ne gaohi ae fakabouli koe fale ke tuu takatakai iate ia, koe gaahi vai fakabouli, moe gaahi ao matolu oe lagi.

13 Koe mea i he uloulo i hono ao nae tutu ai ae fefie oe afi.

14 Nae mana a Jihova mei he lagi, bea nae fakaogo atu e he Toko Taha Maoluga a hono le‘o.

15 Bea naa ne fana‘i atu ae gaahi gahau, mo fakamovetevete akinautolu: koe uhila ke veuveuki akinautolu.

16 Bea nae ha hake ae tokaaga oe tahi, nae fakahāhā mai ae gaahi tuuga o mamani, i he valokia mai a Jihova, moe uulu mai ae mānava o hono fofoga.

17 Naa ne fekau mei oluga, o ne buke au; naa ne too atu au mei he gaahi vai lahi;

18 Naa ne fakamoui au mei hoku fili malohi, bea meiate kinautolu nae fehia kiate au: he naa nau malohi fau kiate au.

19 Naa nau talia au i he aho o eku tuutamaki, ka ko Jihova ko hoku falalaaga.

20 Naa ne omi foki au ki he botu ataatā: naa ne fakamoui au, koeuhi ko ene fiemalie iate au.

21 Nae totogi au e Jihova o fakatatau mo eku maonioni: o hage koe maa o hoku nima kuo behe a ene totogi kiate au.

22 He kuou tauhi eau ae gaahi hala o Jihova, bea kuo ikai teu mahui i he agakovi mei hoku Otua.

23 He nae i hoku ao a ene gaahi fono kotoabe: bea ko ene gaahi fekau nae ikai teu alu kehe moia.

24 Naaku agatonu foki i hono ao, bea kuou taofi au mei he eku hia aaku.

25 Koia kuo totogi au e Jihova o fakatatau mo eku maonioni: o fakatatau mo eku maa i hono ao.

26 Kiate ia oku aloofa ogogofua te ke fakaha ekoe ae aloofa, bea ki he tagata agatonu te ke fakaha koe koe agatonu.

27 Kiate ia oku agamaa te ke fakaha koe ki ai koe agamaa; bea ko ia oku agamamili, te ke fagatua moia.

28 Bea te ke fakamoui ae kakai oku mamahi: ka oku afio e ho fofoga ki he kakai fielahi, koeuhi ke hifo akinautolu ki lalo.

29 He ko hoku māma akoe, E Jihova: bea e fakamāma e Jihova a eku fakabouli.

30 He koe mea iate koe kuou motuhi ai ha vahega tau: bea koe mea i hoku Otua kuou buna atu ai i ha a.

31 Koe Otua, oku haohaoa hono hala oona: kuo ahiahi‘i ae folofola a Jihova: koe ugaaga ia kiate kinautolu kotoabe oku falala kiate ia.

32 He kohai oku Otua ka ko Jihova be? bea kohai koe makatuu, ka ko ho tau Otua be?

33 Koe Otua ko hoku malohi fakamoomooni: bea oku ne fakaataatā a hoku aluaga.

34 Oku ne fakatatau a hoku va‘e ke hage koe  va‘e oe anitelobe; bea oku ne fakaheka au ki hoku gaahi botu maoluga.

35 Oku ne ako‘i a hoku nima ki he tau; koia oku faa fajiua ai ha kau fana ukamea i hoku nima.

36 Kuo ke foaki foki kiate au ae fekau o hoo fakamoui: bea koe mea i hoo agaofa kuou hoko ai o lahi.

37 Kuo ke fakaataatā ae aluaga i lalo iate au; koia nae ikai hekea ai a hoku va‘e.

38 Kuou tulia a hoku gaahi fili, mo fakaauha akinautolu; bea nae ikai  teu toe tafoki kae oua keu fakaojioji akinautolu.

39 Bea kuou fakaojioji akinautolu, mo fakakafo‘i akinautolu, ke oua naa nau faa tuu hake: io kuo nau higa ki hoku lalo va‘e.

40 He ho koe kuo ke fakakofu aki au ae malohi ki he tau: ko kinautolu nae tutuu hake ke tau‘i au kuo ke fakamabelu hifo akinautolu kiate au.

41 Kuo ke foaki foki kiate au ae kia o hoku gaahi fili, koeuhi keu fakaauha akinautolu oku fehia kiate au.

42 Naa nau jio ka nae ikai ha toko taha ke fakamoui; bea kia Jihova, ka nae ikai te ne talia akinautolu.

43 Bea naaku toki haha fakaikiiki akinautolu ke tatau moe efu oe kelekele, naaku malakaki akinautolu o hage koe belebela oe hala, beau fakamovetevete atu akinautolu.

44 Kuo ke fakahaofi foki au mei he fetauaki a hoku kakai, kuo ke malu‘i au ke ulutukua kiate au ae hiteni: e tauhi kiate au ha kakai nae ikai teu ilo‘a.

45 E fakamoulaloa kiate au ae fānau oe kakai muli, ekinautolu be: oka nau ka fanogo leva, te nau talagofua kiate au.

46 E fakaaau ke mole atu ae kakai muli, bea te nau manavahe mei ho nau toitoiaga.

47 Oku moui a Jihova; bea ke monuia a hoku makatuu; bea ke fakamaoluga hake ae Otua oe makatuu o hoku fakamoui.

48 Koe Otua ia aia oku fai ae totogi maaku, mo ne fakamoulaloa ae kakai kiate au,

49 Mo ne omi au mei he lotolotoga o hoku gaahi fili: ko koe foki kuo ke hiki hake au keu maoluga hake iate kinautolu nae tutuu hake kiate au: kuo ke fakamoui au mei he tagata oku fai fakamalohi.

50 Koia teu tuku ai ae fakafetai kiate koe, E Jihova, i he haohaoga oe hiteni, bea teu hiva aki ae fakafetai ki ho huafa.

51 Koe fale maoluga  ia oe fakamoui ma a ene tu‘i: bea oku  ne fakaha ae aloofa kiate ia kuo ne bani  aki ae lolo, kia Tevita, bea ki hono hako, o taegata,