¶ 1 E KAIGA, koe holi a hoku loto, mo eku lotu ki he Otua, koeuhi ko Isileli, ke fakamoui akinautolu.

2 He oku ou fakamooni kiate kinautolu, oku iate kinautolu ae fai feiga ki he Otua, ka oku ikai tāu moe boto.

3 He koe mea i he e nau taeilo ki he fakatonuhia‘i e he Otua, naa nau alu fano ke fokotuu mau ae maonioni anautolu, kuo ikai ai ke fakavaivai akinautolu ki he fakatonuhia mei he Otua.

4 He koe fakahaohaoa oe fono a Kalaisi ki he fakatonuhia kiate kinautolu kotoabe oku tui.

5 He oku fakaha e Mosese ae fakatonuhia aia oku i he fono, Koe tagata oku ne fai ae gaahi mea ni, e moui ai ia.

6 Ka koe fakatonuhia oku i he tui oku lea ia, o behe, Oua naa ke behe i ho loto, Kohai te ne alu hake ki he lagi? (koe behe, ke o hifo a Kalaisi:)

7 Be, Kohai te ne alu hifo ki he loloto? (koe behe, ke o hake a Kalaisi mei he mate.)

8 Ka oku behe ia koeha? Oku ofi ae lea kiate koe, i ho gutu, bea i ho loto: aia koe lea oe tui, oku mau malaga aki;

9 Koeuhi kabau te ke fakaha aki ho gutu ae Eiki ko Jisu, bea ke tui i ho loto kuo fokotuu ia e he Otua mei he mate, e fakamoui koe.

10 He oku tui ae tagata aki ae loto ki he fakatonuhia; bea oku fakaha aki ae gutu ae fakamoui.

11 He oku behe ae tohi, Ko ia ia e tui kiate ia, e ikai ma ia.

12 He oku ikai ha fai kehekehe ki he Jiu moe Kiliki: he koe Eiki be ko ia oe kakai kotoabe oku mohu  agalelei ki he kakai kotoabe oku ui kiate ia.

13 He ko ia ia e ui ki he huafa oe Eiki, e fakamoui ia.

14 Kae fefe e nau ui kiate ia nae ikai te nau tui ki ai? bea fefe e nau tui kiate ia nae ikai te nau fanogo ki ai? bea fefe e nau fanogo tae ha taha e malaga?

15 Bea fefe e nau malaga, oka ikai fekau atu akinautolu? o hage koia kuo tohi, Hono ikai fakaofoofa ae va‘e o kinautolu oku malaga aki ae ogoogolelei oe melino, bea omi ae ogoogo fiefia oe gaahi mea lelei!

16 Ka kuo ikai te nau talagofua kotoabe ki he ogoogolelei. He oku behe e Isaia, Eiki, kohai kuo tui ki he e mau ogoogoa?

17 Koia, oku mei he fanogo ae tui, moe fanogo mei he folofola ae Otua.

18 Ka oku ou behe, Ikai kuo nau fanogo? Io, koe mooni, kuo a‘u atu e nau fakaogo ki he fonua kotoabe, bea moe nau lea ki he gaahi gataaga o mamani.

19 Ka oku ou behe, Ikai nae ilo e Isileli?  He oku fuofua lea a Mosese, Teu fakafuaa akimoutolu aki akinautolu oku ikai ko ha kakai, bea teu fakaita‘i akimoutolu aki ae buleaga vale.

20 Ka oku lea malohi lahi a Isaia o behe, Kuo ilo‘i au ekinautolu nae ikai kumi kiate au; kuo fakaha au kiate kinautolu nae ikai fehui kiate au.

21 Ka oku behe ene lea ki Isileli, Koe aho katoa kuou mafao atu hoku nima ki he kakai talagataa mo agatuu.